|
رد: ღ♥ღ آخر البنات المحترمين ღ♥ღ
اقتباس:
اميرة ان شاء الله تكملي الباقي وتعجبك القصة كلها :) :) :) |
رد: ღ♥ღ آخر البنات المحترمين ღ♥ღ
السلام عليكم ورحمة الله يسلمو قطه يعطيك الف عافيه على القصة اتابع الباقى معاكى تحياتى لجمال اختيارك |
رد: ღ♥ღ آخر البنات المحترمين ღ♥ღ
قطة تسلمى على طرحك دعواتى لكى بالصحة والعافية نتابع معك البقية |
رد: ღ♥ღ آخر البنات المحترمين ღ♥ღ
(الحلقه السابعه) شيرين: يا بنتي انتي بتدخلى الامتحان تكتبي الي تعرفيه سواء جالك او مجالكيش, المهم تملي ورقة الاجابة. منى : هو انا هستنا لما ادخل الامتحان؟, انا مش فاهمة حاجة اصلا , انا عايزة اخد درس ,وعايزة الحق دا معادش الا شهرين على الامتحانات, وخالد زميلي قالي ممكن يشرحلي , بس مش عارفة اعمل ايه. شيرين: ايه دا ماحنا اهو بقى لنا اصحاب ولاد . منى: لو سمحتى يا شيري ,دا ولد محترم جدا وبعدين دا دحيح الدفعة, وانتي عارفة كويس اني ماليش في الحوارات دي. شيرين :طب بالراحة عليا شوية, ربنا يكملك بعقلك يا ستي ويبعد عنك الشيطان ......ييييه اهو جه. منى: هو مين دا؟ شيرين: الشيطان. التفتت منى لتجد نفسها وجها لوجه امام احمد, نظر الي منى وقال محادثا شيرين احمد: شيطان ايه؟ بس والله ليكي وحشة منى:.................... م*حرام عليكي يا شيري بقي دا شيطان قالت شيرين شيرين: سيبك انت, كنت رايح على فين كده؟ احمد : كنت بدور على كيمو مشفتيهوش؟ شيرين : لا مشفتوش, الا صحيح يا ايمو , متعرفش حد بيدي دروس سنة اولي . نظر لمنى بنظرة خاوية وقال احمد: اعرف واحد صاحبي كان معانا, هو دلوقتي معيد, انتي عايزة تاخدي درس؟ مني بصوت خفيض منى: اه, انا كنت بسأل شيرين اعمل ايه, بس انا ممكن واحد زميلي يشرحلي. أ* واحد زميلك , هو انتي لحقتي ,ماكنتي عاقلة, قال واحد زميلي قال احمد: لا لا لا, متخليش حد يلخبطلك دماغك , انا هظبطلك عند صاحبي دا وهبقي اكلمك اقولك, تمام؟ م*مابلاش انت, انا ما صدقت نسيتك منى : ماشي ان شاء الله. احمد: يلا , عايزين حاجة؟ شيرين: وهنعوز منك انت ايه؟ احمد: ماشي يا غلباوية ,سلام. وبعد ان مشي التفتت شيرين لمنى واضعة كفيها في وسطها شيرين: وايه هكلمك اقولك دي ان شاء الله, انتو بتكلمو بعض؟ منى: لا والله العظيم ابدا , هو مكلمنيش الا مرة يقولي على الرحلة وبس وعمرنا متكلمنا حتى في الكلية بعدها. شيرين: وبس؟ منى: انا حلفت , انتي مش مصدقاني؟ شيرين: مصدقاكي يا ستي......., والله انا نفسي انصحك بس خايفة تفهميني غلط. منى: لا قولي يا شيري براحتك. شيرين : اصل احمد دا انا اعرفه من اول ما حطيت رجلي في الكلية, كان لسه بيعيد تانية ,كان واد بايظ وكده , بصراحة عجبني اوي لانه مع كل دا كان جدع , وحصلت توقيعة كده من واحدة صاحبتي, وصلتله اني معجبة , كنا ساعتها مش اصحاب اوي , فبدأ هو يرسم عليا وبتاع , بس شوية كده , عرفت حكاية التوقيعة وقلتله اني مش في دماغي حاجة , وبقينا اصحاب من ساعتها , انا مش قلقانه منه هو , انا خايفة عليكي انتي , ممكن تحطي انتي في دماغك حاجة وهو مش هنا اصلا....... منى تقاطعها بشدة منى: انا مفيش في دماغي حاجة. شيرين: اسمعيني بس للاخر, انتي لسة مش في دماغك حاجة, بس انتي خام ع الاخر , يعني مصيبة ,ممكن من ادبك تروحي في داهية , ومتفتكريش انا مش دريانه بيكي ,دانتي بتتكسفي لما بيكلمك. منى: هو الادب بقي عيب الايام دي؟ شيرين: لا , مبقاش عيب ولا حاجة, بس عشان تتعاملي مع الناس لازم تكوني مصحصحة, يعني عندك سارة صاحبتك مثلا, انا شايفة انها مبقالهاش شهر ونص في الكلية وبقت اشهر من احمد نفسه, ومع ذلك محدش يقدر يتعدي حدوده معاها,ولا يقول عليها كلمة , وكل الناس اصحابها ,اهي هي دي الصحوبية الي كنت بقولك عليها,يبقي كل الناس اصحابك , بس انتي مش ملك حد. منى: انتي بتقوليلي الكلام دا ليه. شيرين: عشان انا بنت وعارفة البنات كلها بتبقي عايزة تحب وتتحب وانا نفسي احب واتحب واديكي شفتي الي حصلي ومن ساعتها الحمد لله , عرفت ان الطريق السليم مفيش احسن منه وانا تعبت جامد بعد اسامة ,واحدة غيري كانت دورت على واحد تاني على طول عشان تملا الفراغ الي سابه, ودا الي بيحصل على طول البنت اول مابتسيب الولد بتبقي عاملة زي المدمنة مبتبطلش ولاد ,وهاتيلي اسم بنت سابت ولد وما ارتبطتش بعده , انا الحمد لله لولا انهم لحقوني بمحمود ودخل من الباب مكناش هنتخطب بعد اسبوعين ,وانا شفت , شفت انتي بتبصي لاحمد ازاي ,انا اكبر منك بسنتين صحيح, بس انا شفت كتير , وانتي بقي ودماغك , خدي بالك من نفسك عشان محدش هياخد باله منها الا انتي , والكلام دا مش على احمد بس , دا على اي ولد تاني يحاول يدخلك من الشباك. صمتت شيرين ونظرت لمنى , شعرت منى بان كل كلمة قالتها شيرين كانت صواب ,حتى ان عينيها امتلأت بالدموع. شيرين:ايه يا بنت يا هبلة انتي هتعيطي؟ ومدت زراعها واحتضنت منى وقالت شيرين: يا عبيطة ,انا قصدي افهمك. مني من بين دموعها منى: انا فهمت والله فهمت. |
رد: ღ♥ღ آخر البنات المحترمين ღ♥ღ
وتاتى الاحداث فيما بعد
سويت حقيقى قصة سويت مستنى الباقى تحياتى |
رد: ღ♥ღ آخر البنات المحترمين ღ♥ღ
السلام عليكم ورحمة الله وبركاته اهل صدفة الغاليين وحشتوني اسفة على الغياب الطويييييييييل عشان المدرسة والمذاكرة انا انهارده هكمل باقي قصة اخر البنات المحترمين (الحلقه التامنه) فاقت منى قليلا بعد كلام شيرين , وقررت للمرة الثانية ان تنسي احمد واصبحت حتى تنساه تجاهد نفسها كي لا تفكر به, وبهذه الطريقة تضاعف تفكيرها فيه, لان ان تحاول التوقف عن التفكير بأحد فانك تبذل مجهود اكبرمن ان تفكر فيه , ونخرج بذلك من الامر ان منى نست احمد *************** احمد: متعرفش نمرة الواد وائل عبد الكريم؟ كريم : ليه؟, والله انا لو من الواد دا معرفكش تاني. احمد: ماهو مش انا الي هكلمه , انت الي هتكلمه. كريم: ليه بقي ان شاء الله. احمد: مش عشاني والله , كنت عايز احجز عنده درس. كريم: ليه؟ ناوي تختصر وتاخد الكلية م الاول؟ احمد: مش ليا يا ظريف دا لمني. كريم: على اساس لما هتقولي منى هفهم , منى مين يابني؟. احمد: قريبة شيرين. كريم: انت رجعت تاني؟؟,مش كنا نسينا. احمد: ايه يابني انا بعمل خدمة لشيرين. كريم: ومن امتى بقي الحنية دي؟,من ساعة ماقلبتك ولا من ساعة ما مطلعتش الرحلة ؟. احمد: بقولك ايه هتتصل ولا لأ؟. كريم: هتصل عشان خاطر شيرين بس, وعشان خاطر الواد الي سيبته صاحبته الغلبان دا بس. احمد: تلاقيه هو نفسه نسي كريم: ولما هو نسي , ماتكلمه انت . كريم: خلاص هكلمه انا ************* منى: انتي عارفة يا سارة احسن حاجة اني لما قررت انسي احمد دا خالص, جيت على نفسي وشلته من دماغي سارة:.................. منى: انتي مبترديش عليا ليا؟ سارة: عشان دي عاشر مرة تقوليلي الكلام ده من الصبح , دا غير انك قولتيهولي امبارح في التليفون , بالله عليكي انتي كده نسيتيه؟. منى: اه ... طبعا....انا مبفكرش فيه خالص. سارة : لا ابدا ... اصل هو انا الي بحب اجيب سيرته , بحب اتكلم عنه , وماليش سيرة غيره م الصبح, الله يسامحك ************** كريم: على فكرة,كلمتلك الواد ,وطبعا مجبتش سيرة سعادتك . احمد: مشكوريا سيدي. كريم : وانت بقي عايز ايه من منى احمد: ولا حاجة اهي حدوتة جديدة . كريم: هي البت حلوة بس, شكلها مش بتاعة بمب وفراقيع. احمد: لا يا سيدي , هي بتاعة بمب وفراقيع, مشفتش لما قالتلي واحد صاحبي هيشرحلي, وبعدين لو مكانتش كده مكنتش ردت عليا لما اتصلت بيها, انت بيدخل عليك الكلام دا, دا تقل ,وبكرة هوريك. كريم: طب ولو طلعت مؤدبة بجد. احمد: وانا هخسر ايه يعني , لو كانت مؤدبة خير وبركة وان كانت بتتقل هوريها هي بتتقل على مين. كريم: ماهي لو مؤدبة اصلا مش هترضى تصاحبك. احمد: يا حبيبي كل بنت ليها سكة, لما نشوف دي سكتها ايه. كريم: ربنا يسترعلى البنت. احمد: سيبك انت من السيرة دي, هنسهر فين النهاردة؟ |
رد: ღ♥ღ آخر البنات المحترمين ღ♥ღ
لسه في 12 حلقة جايين في السكة بس عاوزة الكل يقراها يا رب تنال اعجابكم ورضاكم تحياتي للجميع |
رد: ღ♥ღ آخر البنات المحترمين ღ♥ღ
مفيش حد قرا الحلقة :( |
| الساعة الآن 06:40 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Content Relevant URLs by vBSEO 3.6.0 (Unregistered) Trans by