من عز نومي صحيت وشفت في عيني
دمع تهادى على جفني وأنا غافي
سترت دمعي بكمي قبل يغريني
وأخذت هذا الجسد من باقي لحافي
وسريت تايه ورا خطوات رجليني
لا الوجه وجهي ولا أوصافي هي أوصافي
أمشي وأقول لطريقي لا توديني
لعيون ناس تبي تدري عن الخافي
أمانتك.. خلها ما بينك وبيني
خابرك يالدرب خوة عمر وسنافي
ما ودي الناس تدري وش يبكيني
كرامة النفس ورث أبوي وأسلافي
أمشي وأحس الخناجر في شراييني
والبرد يمشي وراي وينهش اطرافي
وحيد والليل بردونه يغطيني
تقول كن البلد روح بها السافي
إلين ما أوحيت لي صوت يناديني
صوت أعرفه مثل ما أجهل وش خلافي
قمت أتلفت وانادي لا تخليني
ما غيره.. الصوت هذا صوته الدافي
ولمحت زوله من أقصى الدرب لافيني
مدري وش اقول لكن حي ها اللافي
تعال.. شف غيبتك كيف أثرت فيني
تعال.. شفني وأنا أغرق عقب مجدافي
تعال.. خذني ورحبي من عناويني
تعبت أعدي على جمرك وأنا حافي
تعال واقطف بصوتك زهرة سنيني
كل المواعيد عقبك شمعها طافي
تعال وازرع خصل شعرك بكفيني
بضمها لين أحس بليلك الظافي
تعال وشفيك خايف؟ أنت ناسيني؟
قطعت صوتي عليك وطال ميقافي
حتى بديت أشعر أن الحب معميني
وان أنت حلم عثى فيني وأنا غافي
لكن أمانة ترى اللي في كافيني
إن رحت منك كذا ما رحت متعافي
بصدق الحلم وأحذر لا تصحيني
في خاطري كلمتين إن قلتها كافي
أمانة الله عليك إن غبت عن عيني
لا يكون قلبك مثل قلب الزمن جافي
مع كل دمعة تذكر رعشة يديني
ومع كل ضحكة تذكر قلبي الوافي

جف الكلام ومدت يدينها فوق : ..
.. أخترت هذي ..، وأنت شف لك سحابه

قلت .. ويديني تحتضنها مثل طوق .. :
أخترت هذي ،،. هذي أكثر رحابه

هذي دفا صوت من البرد ~ مخنوق
هذي سؤال نصف عمري جوابه

هذي هي اللي عرفتني على الشوق
هذي قدر .. ماكنت حاسب حسابه

قطعة حزن في جيب بالي ومشقوق
ومضة فرح في عيون ناس غلابه

أن سولفت .. في ثغرها لمعة بروق
وإن سرحت في عيونها صمت غابه

واليا اضحكت .. نور من الفجر مسروق
واليا بكت تحزن عليها الكآبه

حبي لها لوأدري ان فيه مخلوق
قد حب مثله .. قلت : ياللغرابه !

هالآدمي من وين له قلب وعروق؟!
والصبر هالمسكين من وين جابه؟

وأنا أتكلم .. ردت عيونها فوق
ثم تمتمت : من هي هالأكثر رحابه؟؟

قلت ويديني تحتضنها مثل طوق
في ذمتي ماشفت غيرك سحابه ..~

صعب لامنك فشلت .. وصعب لامنك لقيت
إن من يكره نجاحك .. يدري إنك مانجحت

أمس ضقت .. ورحت أقلب ذكرياتي .. وأنتهيت
عند صورة طفل صوته مثل صوتي لانجرحت

وش مثل لا والله إلا هذا أنا يوم ابتديت
أنطق حروف تلعثم في لساني لا أنمدحت

هذا انا يوم الحياه فنظرتي عشرين بيت
ومسجدين .. ومدرسه من طين كم فيها اصطبحت

هذا أنا وأصبحت اتمتم : هذا انا حتى بغيت..
.. أختنق .. بس القدر عيا على موتي .. وطحت

وصاح صوت الطفل فيني : أنت من وين ارتميت
قلت أنا المستقبل اللي فيه كم همت وطمحت

أمس كنت أبيك تكبر .. بس والله لو دريت
أني اللي عشت لأجله مت عندك وأسترحت

لو دريت إن الزمان يجر رجلي .. ما عديت
ولو دريت إن البحور بلا مواني .. ماسبحت

كان دربك لي طويل .. وكل ماشفتك هويت
قلت لك : كبوة جواد .. وما كبيت إلا وجمحت

ليه تسمعني وتمشي ؟! آه ليتك ما مشيت
و آه ليتك من كثر عثرات الأيام أنتصحت

ضاعت احلامي .. وظل الحزن فيني .. وأهتديت
للطريق اللي يوديني على دمعي .. ورحت

يالحزن .. ليتك مثل دمعي وتنزل لا رقيت
بس أعرفك .. لو مسحت الدمع تبقى ما انمسحت !

كان حلمي .. في وجود إنسان يبكي لا بكيت
وصار حلمي .. في وجود إنسان يفرح لا فرحت

كنت أشوف الناس مثلي كل ما جعت وضميت
مادريت إن الأوادم ناس فوق .. وناس تحت

آه ياأول ذكرياتي خذني فحضنك نسيت
لأسألك عن وجه ابوي اللي معه ياما سرحت

خذني فحضنك أبغفى .. ياه مبطي ماغفيت
وإن لمحت دموع عيني .. سو نفسك مالمحت

خذني فحضنك .. وبعثر في جروحي وإن قضيت
هز لي كتفي .. وقل لي : عيب تبكي لو سمحت

إضحك .. وعلم زماني من أنا .. ومن وين جيت
طق باب الحزن .. واصرخ في لامني فتحت

و ضمني يمك .. وكمل ضحكتك لامن بكيت
ودي أذكر كيف كانت ضحكتي لامن فرحت !

ايه اعرفك بنت عز وكلمتك مسموعه
وادري انك من خلقتي في ظلال وفيه

ما لعب فيك الزمان ولا قرفتي جوعه
ولا وقفتي من همومك وقفتا محنيه

ادري ورب اليتيم الي يهل ادموعه
مابعد هلت دموعك في ضحى عيديه

بين حضن ابوك وامك وردتا مزروعه
طول عمرك مافقدتي لمست الحنيه

ايه اعرفك واعرف ان الناس لك متبوعه
وادري ان امرك مجاب وحاجتك مقضيه

بس انا من فضل ربي هامتي مرفوعه
ورث ابوي وراس مالي عزوتا جابريه

منحنيت الا لمخافت ربي المشروعه
ولا بعد دفقت دم الوجه امد ايديه

ابدويا ماعرفة الضحكه المصنوعه
احمد الله من خلقت وطيبتي فطريه

قانعا في حكمة الله ماشيا في طوعه
ماحسبت احساب دنيتا ناسها طرقيه

ايه انا يم الترف قلبي غدا موضوعه
الفراق الي بلا رجعه وطاري جيه

بس روحي وسايري قلبك وهدي روعه
واعذريني ولا عادي ازعلي عليه

دامها وصلت لذل النفس يا الدلوعه
والله ان يعيش راسي ما انحنا لبنيه

ياعروس الشعر مدري فتنة المصايف





ايه سمي يا بعد كل الولايف سمي





والله انه تاج راسي دعوتك يالطايف





أبرك الساعات ساعة مالتفتي يمي





ابشري وبجاه رب جبالك النوايف





ان أسوق لك القصايد لومهرها دمي





يكفي ان رجالك اللي يمنون الخايف





مزبن اللي مزن همه سيلها متحني





والله العظيم لولا (ربطة )الوظايف





ان أقضي كل عمري فيك وانسى همي





وآخر الأبيات شكرا يا ربوع الطايف





يوم لدت لي عيونك والتفتي يمي

ليل ياليل .. يوم الناس سموك ليل



هو عشان السهر وإلا عشان المنام ..؟



شف عيوني وشف وشلون جسمي نحيل



لعنبو هالغرام إن كان هذا الغرام ..!



آه ياقلبي اللي مابقى فيك حيل



من كثر ماطواك الشوق ولد الحرام



قلت لك لاتميل إن طعتني لاتميل



بس هذا أنت ملت وماسمعت الكلام



يوم ذيك الصبية أم ذاك الجديل



جت تهادى وتمشي مثل مشي الحمام



إنكسرت وقعدت تحط في وتشيل



لين رحت وخذتني في طريق الهيام



قبل أسلم عليها كنت عابر سبيل



وصرت ديرة غرام وعشق بعد السلام



كنت اقول : أي حب وأي خل وخليل



الهوى ماوراه إلا التعب والملام



لكن اليوم شفني ضعت وأكبر دليل



اني امشي واهذري( إبتسام .. إبتسام )

صباح الخير يابلادي
مع كل نسمة صباح أقوم وأيديه
ترفع بعضها كذا .. وأقول وأنادي
الله يسعد صباحك يالسعوديه
عساه والله صباح الخير يابلادي


***


يادروب الأرض لعناق السماء
ياجداول ماء لحكاية ظمأ
يالكلام اللي عجزنا نبتديه


من يقول أنك كما غيث هما
أنتي لاقبلك ولابعدك كما ..
علمينا كيف نلقى لك شبيه


يابلدنا وين نلقى لك شبيه
في وميض البرق لاسال الغمام ؟!
في شعاع الشمس لاشق الظلام ؟!
في أبتسامة شايب صلى ونام !
في المحبه .. في السماحه .. والا في معنى السلام !


يابلدنا صعب نلقى لك شبيه
وأنتي اللي لاذكرنا أنك بلدنا
نرتبك حب وغلا
ونتلعثم في الكلام


***



عمار يادار السعد
لا يالسعوديه عمار
والله ماقبلك بلد
والله مابعدك ديار
مادام أبو متعب سند
الحر أبن نسل الحرار
ايوالله نحبه عدد
مايطوي الليل النهار
والكل منا لاسجد
يقولها سر وجهار
أمجاد ياوجه السعد
وعمار يابلادي عمار


***


ياوطنا ..
ياطموح اللي تمنى
نحمد الله يوم صرنا فيك ..
والا قبلك كيف كنا


ياوطنا ..
يالنخيل اللي تثنى
لو بكيف الشمس ماخلت يديك ..
ولاخذاها الليل عنا


ياوطنا ..
أنت حنا..
الرجال اللي بطهر أرضك تغنى
والبنات اللي ينسماتك تحنى
ومن تنكر لك ترى ماهوب منا


***

وطنا كثرة أحبابك تحير والكلام يطول
ولكن لاتغرك ياوطنا كثرة أحبابك
بعض هالعالم يحبك عشان النفط والبترول
وحنا ننطح العالم على ذره من ترابك
لك الله ياوطنا .. لابدا اللازم .. وطق الجول
نجي وثيابنا لعيونك أكفان تغنابك
نجي ماهمنا الماضي ولاخفنا من المجهول
نجي ونقدم الموت بيدينا قبل نحيابك

جيت في ليلة وداعه تايه بين البيوت
وصحت : وينك؟!.. جيت اوادع عمري اللي ضاع فيك

ما سمعت الا صدى صوته وكان آرق صوت
ينطق اسمي..ثم يهمس : من متى وانا احتريك؟!

قلت وهمومي تغافل زفرة الحزن وتفوت :
هذا انا جيتك..يا ليت الموت جاني قبل اجيك

بعدها يا دوب عدت عبرته حد السكوت
قال وعيونه تغارق دمع : بسم الله عليك

قلت : يا ابن الناس عادي ماورى هالموت موت
وش وراها لا فقدت عيونك ولمسة يديك؟!

كل ماجبت كبوه قلت كبوة جواد
وطال كبو الجواد وطال معه العدي

كنت أجمع قروش بيض لجل السواد
ويوم ساد السواد أنشل معصم يدي

آه ياهي غروسي طولت بالحصاد
يوم نوخت حلمي عند باب الجدي

يالحبيب الكبر ماخلق لجل العباد
خلق للي ينادي : ( يالعباد أعبدي )

جيت مثل الغريب وكنت مثل البلاد
وقمت أباهي وأصوت يابلدي يابلدي

أحسب أني كسبت الكسب يوم الجهاد
وجبت راس العنيد وشلت حمل ( ابعدي )

وأثر كسبي عيون ماتذوق الرقاد
وشاعر كل ماضاقت عليه يحدي

هيه ياللي بديت بشي مثل الوكاد
وأنتهيت بظنون حاربت مرقدي

أعتبر كل عمري معك كبوة جواد
وألف شكرا على أني صرت اعرف آعدي

يوم هب الوقت وأعماني عجاجه
الفرج عيا .. وأنا بالصبر راهي

ويوم مال وطال ميله وأعوجاجه
رحت أدور شي يشد إنتباهي

وشفت زولك مقبل مثل إنفراجه
كنه اللي جايب عزي و جاهي

ياه ياضيقات صدري وإبتهاجه
تذكر آخر مرة شفتك ..متى هي !!

صاحبك من يومها زاد إحتياجه
وأمتطى ظهر المصايب والدواهي

سولف الليله على قلبي و ناجه
من بقى لي غيرك أفخر به وأباهي

يابعد من كدر غيابي مزاجه
ويابعد من مرت حروفه شفاهي

رغم حيرة قلبك ورغم إنزعاجه
الزمن .. ماغير احساسه تجاهي

ورغم وحشة بعدك وقسوة سياجه
كل حاجه فيك ظلت مثل ماهي

الخجل في وجهك أول م نتواجه
والبراءه في عيونك وأنت ساهي

وبسمتك لامن بغيت تقول حاجه
وغيرتك لاشفت كني عنك لاهي

قبل أشوفك .. والزمن عاقد حجاجه
أسأله : وش فيك ؟! وألقى العذر واهي

ويوم شفتك قلت للوقت وعجاجه :
هيه ياللي في طعونك كنت راهي

أنت لو غيرت فينا ألف حاجه
القلوب البيض تبقى مثل ماهي

تطيح دمعه واسلم للفضا موقي
وارفع يدين الذنوب وتظلم أعماقي

اشوف قبري يمر بوحشته فوقي
وتصير كل الحياة أضيق من أخلاقي

يانفس طالت ليالي غينا فوقي
كم قلت يالله وقلتي تونا باقي

يالمزنه اللي تحن لغيثها نوقي
تعبت أخيلك وأقول نياقي نياقي

تعبت ياما تعبت و ضاعت حقوقي
ياما ندمت وردمت الذنب ف أوراقي

ياما سكت وتركت البوح لعروقي
أخاف أسولف وأخيب هقوة الهاقي

أخاف ابوح ويخون الصمت منطوقي
وأقول شي يحث الناس لفراقي

يالله وأنت الملاذ إن مسني عوقي
وأنا ذنوبي جهد من راسي لساقي

يالله تغفر خطاي وترحم وتوقي
عظمي نهار الحساب وتقبل إعتاقي

مرني طيفك .. وطيفك صاحبي مدري عدوي
جايب صوتك .. وصوتك سكة الذكرى الحزينة

قال أنا جوي تكدر .. قلت : ماهو كثر جوي
قال فرقانا غبينة .. قلت : وأكثر من غبينة

قال : أنا ب أموت من غيبتك قل لي ويش أسوي؟
قلت : أنا أبغى الموت في غيبتك .. قل لي بس وينه؟!

قبل ترحل .. كنت أقول بيسرح أيام ويضوي
مثل ماعودني اليا اشتقت له جابه حنينه

بس هالمرة ثمان شهور وضلوعي تدوي
كل يوم أشتاق لك .. يلعن أبو الشوق وسنينه

كل ماعشمت قلبي .. قال ياضلوعي تقوي
ورحت أنا وياه نرقب رجعة اللي فاقدينه

نوب أقول اليا رجع بكون في قمة هدوي
ونوب أقول الا أبزعل وأتلى مابيني وبينه

كل يوم أجلس على جال البحر وأقول توي ..
.. لاسألني : مافقدت الحلم في لمسة يدينه ؟!

مادريت أن البحر ماقال لأمواجه تروي !
و مادريت أن الغرق هو حجة غياب السفينة

مادريت .. أو مابغيت أدري .. ولاأدري وش بسوي
لو رجعت .. وشفت طيفك في الممرات الحزينة

وين ابنسى وانت طيفك صاحبي مدري عدوي
مارضى يترك لغيره شبر واحد في المدينة!

حبيبي جيت اقدم لك هدية عيد ميلادك
وانا متأكد اني لو نسيتك مانقص قدري

ولكن قلت ادور أي شي يناسب عيادك
تصفحت الهدايا لين ضاق بشوفها صدري

أبي شي يجملني معك لا فاح رينادك
مابي شي أمده والخجل من فوقي وحدري

وقلت آشوف بعض الناس قبل يحل ميعادك
وش اللي من هداياهم يليق بوجهك البدري

بعضهم جاب ورد .. وشفت كل الورد مافادك
وانا اصلا أعتبر من جاب ذاك الورد مايدري !

لأن الورد لو مازاد بين إيديك مازادك
تركت الورد ذبلان .. وذكرت اللي سروا بدري

هديتهم قفص وطيور .. قلت ف عيد ميلادك
اسوي مثلهم واهديك طير في قفص صدري

يانديم الجرح واللي وصتك بأرقامها
عارف انك ما تعرف الا شذى يشمومها

لا تعلمني عن آخر ما حصل فأيامها
من رسالتها عرفت اليوم كل علومها

أدري إن الوقت شمر عن يديه وضامها
وأدري إن الحظ الأقشر صار مثل هدومها

وأدري إن الهم وقف في طريق أحلامها
لين صار الحزن أثرها .. والشقى مقسومها

بس تستاهل .. هي اللي طاوعت من لامها
وباعت اللي كل ذنبه .. مادخل في سومها

خلها تدفع ثمن غلطاتها ما دامها
هملت قلبي .. وراحت .. وأسرفت في حومها

يبتعد مع كل خطوه .. صوت وقع أقدامها
وتقرب الضيقه .. وتصحى دمعتي من نومها

لين غابت عن عيوني .. وأنجلى هندامها
ليلة .. تغفى على صدر الظلام نجومها

كنت احس بشي .. والله ماتشيل عظامها
لو تحس بشيي منه .. يمر وسط حلومها

كنت احس إن الضلوع العوج مثل أيتامها
وأشعر إن القلب نبضه منتهي من يومها

والحياه اللي تدور شهورها وأعوامها
وقفت .. واليوم دور رماحها وسهومها

ياكثر ما اغرقت نفسي في بحور اوهامها
وياكثر ماضعت بين أوهامها وهمومها

ما جداي إلا احلم اني واقف قدامها
وأتخيلها تعاتبني .. وأروح ألومها

يانديم الجرح .. خلك من علوم أيامها
مابقى في القلب رغبه يلتفت لعلومها

والرساله ردها للي زمنها ضامها
وقلها كلمه .. وتفهمها حسب مفهومها

والله أن أقص كفي قبل .. أدق ارقامها
والله أن اشيل قلبي .. قبل أشيل همومها

قلبي له اليوم .. ثالث يوم موجعني
وعيني لها اليوم ثالث .. تجمع طيوفك

والبال كنه على دربك يوزعني
ولساني ماكنه الا خلق لحروفك

لالنوم نافع .. ولا التفكير نافعني
انام واصحى على الباقي من وصوفك

بالله قلي .. شعوري هذا وش يعني !
؟طمني .. الله يطمن همك وخوفك

بيني وبينك .. ترى اللي صدق ضيعني ..
.. ان انت في اخر لقا .. شارح لي ظروفك

مدري وش اقول .. لكن تدري .. اسمعني
خابرك وافي .. و أبيك تتم معروفك

ان كنت ناوي تسافر .. لاتودعني
بس انتبه .. لا تسافر قبل ماشوفك

ياصاحبي جيتك أشكي لك من أحوالي
جيت .. وما دامك رفيقي ليه اطولها؟!

العلم ومافيه يا أول وآخر أمالي
عندي رساله ولا أدري كيف أوصلها

للي سبتني وانا من قبلها سالي
أبيك توقف معي وتروح تسألها

وش فيها تفتح علي أبواب عذالي
وتحمل النفس حاجه ما تحملها

وش فيها رغم الوفا تتركني لحالي
وأنا لجفاها تركت الدنيا ب أكملها

إن كان هذا زعل .. علمها يالغالي
ماكان قصدي ورب البيت ازعلها

علمها واللي يخلي قلبك الخالي
عن ضيقتي .. وين وصلت من تجاهلها

علمها كم لي وانا ماشلت جوالي
كله علشان ما أقلب رسايلها

وعلمها وشلون لا مرت على بالي
أروح وأضم صورتها واقبلها

وعلمها كيف أنشغل عن كثرة أشغالي
وأسرح وأغمض عيوني واتخيلها

علمها عني .. وعن همي .. وغربالي
علمها عن كل حاجه في تجهلها

وإن شفتها دنقت .. تبكي على حالي
إنسى الكلام .. وتذكر كلمه و قلها

قل : شاعرك يعتذر .. ويعاهدك تالي ..
إنه يرتب حساباته من أولها

ويقول : حتى القصيد اللي على بالي
والله ما عاد أكتبه كانه يزعلها

كل ماطابت هجوسي .. رحت اسولف للزوايا
عن فتاة كان يملى صوتها صمت المكان

عن فتاة غير كل اللي قرينا في الحكايا
صمتها طيش وقصيد .. وطيشها صمت وأمان

باقي فيها من اللي في طفولتها بقايا
شيطنة ضحك وسوالف .. رقة شعور وحنان

كم تزاعلنا .. وكل ينتظر دمح الخطايا
ثم سكتنا .. والزعل من بيننا مثل الرهان

لين ماتنهي زعلنا ضحكة بين الشفايا
ضحكة غابت ولكن شانها مازال شان

ماذكرت الا عيوب .. ولاتركت الا مزايا
سود الله وجه حظي .. والليالي .. والزمان

راحت وخلت دلعها صورة بين المرايا
وين مالديت فيها شفت ضحكات الثمان

وشفت شامه فوق جمره سوت بقلبي سوايا
آه ياهالحال منها كيف صار .. و وين كان !

بس ياذاك الخفوق اللي تلج أبك الحنايا
شد حيلك .. لاتخاذل .. مايطيح الا الجبان

مالك الا ذكرياتك وأنت من بين الهدايا
حول ذاك الورد ابو عطر يهز الشمعدان

كل ماخلت وراها غالي ريم الصبايا
حتى والله من غلاها .. رحت وأغليت المكان

اضمن لي ان البحر ما فيه حوريه
وأضمن لك انه يكون حكاية المينا

الله يرحم جدار كان له فيه
وكانت تسمي علينا كل ما جينا

نرمي تعبنا عليها كل عصريه
نتبع قدرنا وتتبعنا خطاوينا

انا.. وذاك.. وهذاك .. وكانت بنيه..
تطل من جرحها .. وتبشره فينا

كل ما استلان الزمان احد.. بكت هيه
وكل ما استهان المكان احد.. تباكينا

وفي يوم كان الدفا صوت الشماليه
نادت : حبيبي.. وجينا نرفع ايدينا

خلت يديهم وجتني وانكسر فيه
صوت ..وصدى صوت : تكفى لا تخلينا

رجعت الم الشتات وضاعت يديه
كل ما جمعته تبعثر تحت اسامينا

ورحنا نعدي .. وكل عبرته حيه
حتى الزوايا بكتنا يوم عدينا

انا وذاك وهذاك.. وكانت بنيه
وقبل نتفارق كتبت اللي يعزينا:

اضمن لي ان البحر ما فيه حوريه
واضمن لك انه يظل حكاية المينا

ياقلب طالت قسوتك وأنت لين
في قسوتك ياقلب ويش انت لاقي !؟

اللي تعدى عمر ماهوب هين
والعالم الله كم من العمر باقي !

يمكن يطول .. ويمكن اليوم أعين
موتي .. ويبكون الحبايب فراقي

وش عاد أسوي وسط قبري وأزين ؟!
لاجفت عروق .. وعيون .. وسواقي

لا عاد به فرصة عشان آتحين
ولا عاد به زفرة وأفك اختناقي

باكر وكل اللي سترته يبين
وانا على هالحال ميس وهاقي

مدري متى يهديني الله وأدين
وأكف عن بعض المشاوير ساقي

الباب هذا باب بيتك .. بس ما يفتح عليه!
الباب هذا لو فتحته .. تنفتح لي الحياه

وانا وراه .. احس كن الدمع تخنقني يديه
احس كنه حد منفى .. والوطن كله وراه

صوتك وحشني يا وطن .. وأحترت وين القاه فيه؟!
وأمسيت اغني به .. وانا اللي كنت اغني له معاه !

وحشني صوتك يا وطن .. وأمسيت اغني : ليه؟..ليه؟
·ليه الكلام اللي نقول يموت في سكة صداه؟!

ليه الدواير تنتهي مع دربها اللي تبتديه؟!
ليه الشوارع ساكته .. والناس كل في هواه؟!

ليه اليدين تصد عن شي تبيه وتشتهيه؟!
..يوم العيون تسابق الجايع على لقمة عشاه!

علمتني في صف (أول حبك) .. ان اكبر سفيه..
.. اللي اذا حس بغلا خله يفرط في غلاه

طيب علامك .. كل ما زدتك غلا .. تزداد تيه
آهات والله يا وطن..حتى ولو ما قلت : آه

يعني كذا ياأم الوفا والمحبة
كذا المحبة والوفاء ياوفيه

أغيب عنك أيام ولا أتنبه
إلا وانا أشوفك زعلتي عليه

وش زعلك ؟ وش هز قلبك وشبه ؟
يعني عشاني غبت صارت قضيه !

يام القوام اللي من أدناه هبه
يميل كن الخيزران أدميه

وأم الجديل اللي من يخاف ربه
يذكر عليه الله ويذكر نبيه

إن كنت مخطي فالخطا مايجبه
إلا العذر وانا اعترف بالخطيه

وهذي بعد من فوق الأعذار حبه
لاتزعلين الله يخليك ليه

ياغايبه وان كان فيها جماله
تجملي يام الحلا والظفاير

بالله شوفي صاحبك كيف حاله
شوفيه في غيبتك وشلون صاير ؟!

صارت حياته ضيق خلق .. و بطاله
هم .. وسهر .. واوراق شعر .. وزقاير !!

يعني حبيبك صار حالته حاله
ماباقي الا انه يدن العباير

الله لامنه ذكر مامضاله
قبل الدواير ماتجر الدواير

يوم الطفوله والشقا والجهاله
يوم الصغاير في عيونه كباير

ايام كان معانده راس ماله
ويسوق لهبال الشقاوه بشاير

ياما امتلى بالحب والطيش باله
وياما امتلت من شخبطته العواير

يكتب عليها : ( عاشقك للثماله )
ويخط توقيعه : ( جريح الضماير )

ياما اشتكاه ابوك في بيت خاله
وياما تحصل من هواك العزاير

مره حلف بأنه يبطل هباله
وقبل يكمل .. فك اخوه الستاير

ثم طالع الشباك.. لينك قباله
وفي اقل من لمح البصر جاك طاير

على صغر سنه مميل عقاله
كاشخ وناسي لايصك الزراير

لاشافك يتمتم لحاله بحاله
لعيون هالشوفه تهون الخساير

ولاشاف زول ابوك حذف نعاله
الحب جاير .. لكن العود جاير

طفل يتيم ورغم الأحزان داله
مايدري ان حظه مع الوقت باير

كنتي طموحه .. كنتي أغلى حلاله
كنتي وصرتي بس يام الظفاير

طفل زرع من ضحكتك في خياله
لين اثمرت شعر هزاله حراير

لاتتركينه في غيابك لحاله
بالله شوفي كيف هالطفل صاير

وحده بوحده كان عندك عداله
اتبطلي غيبه .. و ابطل زقاير

ما كل ضحكه تهز القلب يشبعها
وما كل دمعه تمر العين تبكيها

من شاف ضحكة زماني قال : بايعها
ما يدري اني فقير ما اقدر اشريها

يا اللي نثرتي سنين كنت اجمعها
تكفين هذي حصاد العمر لميها

كم كنت اهدد بك الدنيا والوعها
كل ما اذكرتني..واذكرها وانسيها

بيدينك اللي احس وكن اصابعها
تقول : بدري على الضيقه وطاريها

بعيونك اللي اناديها وانا معها
الله ياكم زعلتي يوم اناديها

كنتي تحسبيني اسرح عن مدامعها
وانا ما غير اتهجى رحلتي فيها

اي والله اذكر عيونك يوم اطالعها
اقرا بها انشودة كنا نغنيها

كانت تروح وتهج البال واتبعها
تاخذ عيوني من الحزن وتوديها

لايام كنت ارمي بدنياي واجدعها
أيام ما .. كنت اكحلها.. ولا اعميها

طفل سلاحه دموعه يوم يزرعها
من فوق خده وكف ابوه يرضيها

اكبر همومه من دروس يراجعها
واقصى طموحه متى ينجح ويرميها

طفل وكل امنياته كان مطمعها
يكبر وتكبر هنوف كان يرجيها

كبرت..و كبرت.. وضعت..وخفت اضيعها
خليت همي رضاها يوم اداريها

كل ما طعني زماني رحت ادلعها
يوم الزمن ما ترك لي غير اياديها

ما كنت افكر تجي في يوم واسمعها
تقلب حياتي من اعلاها لواطيها

حتى اقبلت تبكي الدمعه وتردعها
ثم قالت..وكن موتي بين اشافيها:

جيتك أحلف عيونك قبل اودعها
ما اشوف دمعة عتبها لين اخليها

تبغى تروح وتخليني واطاوعها
تبغاني اسكت واقول : الله يهديها!!

يا أول احلام روح كان دافعها
انك سندها وحاضرها وماضيها

يا سنيني اللي قضيت العمر اجمعها
يا ذكرياتي من اولها لتاليها

لا تتركيني اعيش العمر بايعها
ضحكة زماني بدونك ما اقدر اشريها

حبيبي دام انا أصلا حبيبك وانت والفني
اجل وشفيك تزعل يوم افضفض وانفض ايامي؟

انا لولاك.. قلت : ان الزمن ب اموت ما انصفني
وانا لولا الزمن ما كنت اهوجس وانت قدامي

هي الدنيا كذا .. لا جيت ارتب للكرى جفني
تكاثر غفوتي حتى تصير ابعد من احلامي

هي الدنيا كذا .. و ان كان ما صدقتني ..شفني
شف عيوني .. وشف وش لون جلدي يستر عظامي

شف..أو.. لا.. لا تشوف.. ان كان ودك صدق تعرفني
تتبع سيرتي .. او سكتي .. او جرة اقدامي

تتبعني واذا مريت دمعي لا تضاعفني
تعد بخطوتين وشف طموحي كيف مترامي

هنا طحت.. وهنا حظي عثر..وهناك وقفني
وهنا ماردوا اللي كنت اناديهم بالآسامي

تهجى فالمواني لين تقرا سالفة سفني
تتبعني من اول جرح واترك عنك هندامي

وانا اقول : ان تشوف اللي يحدك ما تحلفني..
.. وش اللي حدني ابقى على جال النهر ظامي

امانه بس لا تزعل علي .. ولا تخالفني
لو ابكيتك من همومي .. او ابكيتك من هيامي

انا لولاك..قلت: الوقت هذا ما يشرفني
ولولا الوقت قلت اني خذيت اكبر من احلامي

هذا انت خنت العيش والملح يامن
تسب ناس خانوا الملح والعيش..!!

كنت احسبك..وش احسبك؟!..كنت ضامن
أنك تداري خاطري لو على ويش؟!

ماكنت اظنك قاسي القلب لامن
ضاقت علي وجيت لك قلت لي: ((ليش))؟!

وش ليش؟! انا مابي لك اية تضامن
مابي لك الاضحكة كلها طيش

مابي لك الا ضحكة لو تزامن
مع ضيقتي طارت هموم وخفافيش

ارقد بها عن غدر الايام ( وامن)
واحيا بها مدري بها اموت واعيش !

واسج فيها عن هوى كل طامن
وأروي بها عروق عليها معاطيش

بس انت خنت العيش والملح يامن
تسب ناس خانوا الملح والعيش!!

ياصاحبي بالله خل التغلي
وقت التغلي والدلع ذاك ولى

ماعاد معنا وقت تربط واحلي
دامه عدو الحب بالصوت على

خذها صريحه .. حط نفسك محلي
ادمح لك الزلات قدر وتغلى ؟

ولي حياة جابت الذل ولي
لابو حياة صرت فيها تسلى

قولوله اني بنسحب منه كلي
خلوه يدري ( من تغلى يخلى)

اكتب واسلي خاطري ب (الكتابه)
كود التهي في نظم الابيات وانساه

واثر القصايد منه قامت تشابه
من وين اقلب دفتر اوجاعي القاه

هذي قصيده قلتها في عتابه
وهذي قصيده قلتها يوم فرقاه

وذيك القصيده قالها من عذابه
يكتب قصيد منكسر بس ماحلاه

ويقول: (( جابه كان تقدر تجابه))
واقول شعرك لعن ابو من تحداه

ويروح يضحك ما اقتنع في الاجابه
ويقول: (( شعرك زين بطل محاباه))

واقول: ((طبعا زين لأنك زهابه
لاصرت روح البيت وش لون تبغاه))؟

واليوم ذاك الوقت جمع شبابه
واقفي ولادري صاحبي وين وداه؟

رضيت مدري ذل ولا مهابه
ابعد واهل الدمع لأيام ذكراه

الشعر والليل وبياض السحابه
والضحك والحظ الردي والمعاناه

كلش يذكرني بوقت غدابه
ياوين أبرمي هالجسد فيه وانساه

ياسيدي والقلب له صوت مسموع

الياتكلم .. ينصت الكون كله

وقلوبنا يمكن لها ثالث أسبوع

مافارقتها صورتك في المجله

يوم أنها طاحت من عيونك دموع

لعيون طفل فارق عيون خله

طفل الشهيد اللي على أبوه مفجوع

ألين شافك ياضماده وظله

ثم أنفجر من صوته الغظ ينبوع

وغنى وطنا كلنا فدوة له

قمت وحضنته كن ماحولك جموع

قاسمت حتى الطفل دمع يهله

يابو اليتامى كلنا سمع وطوع

فك غمرنا يالحبيب موله

ودمعاتك اللي هزت ضلوع وضلوع

أكبر دليل أن المحبه من الله

يانبضنا اللي كم هدى ب أسمه الروع

ادربنا اللي نهتديه وندله

ياتاجنا اللي يودع الراس مرفوع

لغزنا اللي خفقة القلب حله

نهيم فيك هيام ونجوع لك جوع

ياأصدق سبب لوجيهنا المسفهله

حبك هنا بين المعاليق مزروع

تسقيه غيمة عطفك المستهله

ربي يديمك ياذرى كل مفزوع

ربي يعينك يابو الشعب كله

أقولها والقلب له صوت مسموع

طلق حجاجك يالسنافي وفله

لك في يدين أطفالك ورود وشموع

في قلوبهم لك غيمة مستتقله

ولك من زنود عيالك سيوف ودروع

الكل منهم وده أنك تسله

آمر يابو متعب لك السمع والطوع

لودك نجيب البحر من محله

ماهو كثير أن قلت يفدونك جموع

يالله عسانا من فداياك لله

اللي طفل من شعبه أصخى له دموع

ارواح شعبه كلها فدوة له

كان في وسط المدينه...
طفل أكبر من سنينه..


والده مات بحنانه..
ولاقعد يندب زمانه...


صادق هموم الشوارع ..
يمسح الدمع ويصارع ..
طفل لكن كان بارع ..
مات ابوه وجا مكانه ...


يمسح أطراف القوايل عن جبينه ..
يبعد الشمس ويطاردها بيدينه..



طفل أحزانه معالم..
طيب وسمح ومسالم..



يمشي ويطوح بصوته ..
يبغى قوت أمه وقوته ..



المحارم....المحارم....المحارم ..
المحارم....المحارم....المحارم ..



ولا أقبل الليل ..ورحل وجه النهار ..
راح لامه مثل الأطفال الصغار ..


وأرتمى في ...حظنها ..
أرتمى في....جفنها ..
أرتمى في....حزنها..



وقامت امه تبكي لضيعة سنينه ..
وصاح...يمه
ليه ياعمري حزينه؟ ..
دمعتك يالغاليه والله ثمينه ..



تحسبين أني حزين؟ ..
لا..وراسك ما ألين ..
من لقى هذا الحنين ..
ينسى حزنه..
ينسى همه...
ينسى حتى العمر كله..
دامك أنتي تحترينه..



وفي صباح من صباحات الضياع ..
الحزن قدر يقول له الوداع ..



نادت أمه...ماسمع ..
صاحت أمه...مانفع ..
طاحت أمه...مارجع ..



الصغير اللي ملى الدنيا صراع...
مات ....من كثر الوجع

يا رجفتي.. والبرد يبغى له بلاد
يا غربتي.. والعيد طعمه بلا روح

اليوم عيد.. وليلة البارح سهاد
ماعدت ذاك الطفل .. ابو ضحك و مزوح

كن السهر .. ياخذ من عيوني رقاد
وكن القلق .. ياخذ من لساني البوح

امشي.. وأحس الناس من حولي أجساد
وأغيب في صمتي .. وأشارف على النوح

أهيم في صدفه على غير ميعاد
من كثر ياسي قلت للوقت مسموح

ما ادري اتوه.. او اهتدي.. بس الوكاد
منفاي ما ادري موطني..حذفة جروح

غريب.. تايه.. وان لفى صوت نشاد
قلت : ايه هذي غربة أعيادي تلوح

اكذب واسمي غربتي (غربة أعياد)
لكن عسى الله يرحم الحال والروح ..

دام الجسد في بلاد والقلب في بلاد
والله ل (احصل) غربتي وين ما اروح

ياعين هلي دموع الوجد وانهمري
محتاج لي دمعتين تعيد ترتيبي

نويت دمر الزمان اللي نوى دمري
بايعك ياطيبتي شاريك ياطيبي

والدانه اللي تغنج كنها القمري
أمنتكم بلغوها يا مناديبي

لا عاد تشفق على نخلي ولا تمري
ولا عاد تشره علي في قل ترحيبي

إن كان ربي عطاها لونها الخمري
الله بنفسي معوضني فقر جيبي

أمنتكم بلغوها تحتري جمري
مادام مافاد معها حسن تهذيبي

إن عشت والله لأمشيها تحت أمري
وأحس فيها تعذب كثر تعذيبي

هذريت فيها ثلاث سنين من عمري
وإن قاله الله لأخليها تهذريبي

أيوالله أن شوفته تستاهل عنادي
اللي عشانه تركت الدار والتربه

ماقول لك شوفته نستني بلادي
لكنها يافهد نستني الغربه

وش عاد لو قلت عني ضايع وغادي ؟
وش أبركه من ضياع دلني دربه

تبغاني ارجع ! وأنا ياصعب معوادي
مادام همي نساني وأنقلع سربه

الهم هاللي تشوف انه علي بادي
ياليتك تشوف كيف يصير في قربه

الله يحرم ... عيوني لذة رقادي
أني معه .. ماعرف حزني ولاشعربه

هرجك ف وادي وأنا ياخوك في وادي
الله يخليك ... حالي لاتعذربه

راضي بحالي كذا ... واللي يجي عادي
لعيون منهو ركز في قلبي الحربه

بصوته , شقاوته , مزحه , طبعه الهادي
يملا علي الفضا .. من شرقه لغربه

يكفيني أنه غدا هو شربي وزادي
أو تقدر تقول أنا اللي زاده وشربه

ياخي أذا الحب عيب ! ف شفني آنادي :
سجل ..... أنا من عرف عيبه وجاهربه

وسجل هنا كلمة تستاهل عنادي
بقولها قبل أسافر وأترك التربه :

والله ماأقسى من الغربه عن بلادي
الا .. شعوري وانا في بلادي بالغربه

القرايا ساكنتنا لو سكنا في المدينه
ياكثر مافي المدينه ناس تسكنها قرايا


مثل انا لامن شعرت أني بحاجه للسكينه
رحت يم القريه اللي قدرها بين الحنايا


قريتي واليوم جيتك شاعر هزه حنينه
للوجيه وللبيوت وللسوالف والحكايا


قريتي انا فهد .. فهد .. فهد ماتذكرينه ؟!
أسألي عني بيوت الطين ونقوش الزوايا


ياسقى الله قبل اسافر عنك يالدار الثمينه
يوم انا طفل يشوف عيوب جدرانك مزايا


يوم انا طفل يمر اليوم ماشاف الغبينه
الضحى وسط المدارس والشفق بين المطايا


ياسقى الله يوم كنت الريح والدنيا سفينه
قبل مالدنيا تكون الريح والسفن البرايا


يوم ابوي الله يبيحه كان ياخذنا بيدينه
يم ذاك المسجد اللي فيه من ريحه بقايا


ياسقى الله او بلاش ازيد هذا الطين طينه
لي هنا والعمر مابه متسع لاهل الرزايا


قريتي مانيب انا اول من رجع لك وسط عينه
دمعتين كنها لبيوتك وناسك مرايا


القرايا سالفة اهل القرايا في المدينه
والمدينه سالفة اهل المدينه في القرايا

أشتاق / لك
وأوقف على مطلع شعر قلته خبال وراق / لك
وأدورك
أنا أذكر أني قلت / لك
الشعر هذا مايليق ..
وجاوبت : لكن لاق / لك


* * *


شيطانه أنتي
ماتحبي من بناتي الا بنتي اللي أنتي فيها بنتي
كم صار لك يابنتي
ماعاد بينتي
مدري ليه ! ..
يا أنتي كنتي منتي انتي يوم شفتك !
والا شفتك ..
يوم انتي منتي كنتي أنتي !


* * *



يا اجمل من عيون خل ينتظر خله
بغمازتين وسله
فيها سحاب وعيد
وطيور مبتله


* * *


آه لو تجي ..
تسقيني الحب الغزير
وأخذها بيديها وأطير ..
مدري لوين !؟
لكن أطير ..
ومتى ماينهكنا الهوى
أذوب وتذوب .. وتمرنا أسراب الغيوم
وأصير أنا غيمه
وتصير هي غيمه
وأسيل أنا ف وادي
وتسيل في وادي
وأقول للمفرق :
محد سأل عني أو مر من حولك
ويقول لي المفرق :
أسمع سراب أصوات فيها من هطولك
وأظنها كانت
ل أهل ينادولك
وأصيح به : تكفى
يامفرق الوادي
أنا هنا مليت
مادلني أصحاب
ولا دلني غادي
قبل انطفي وأجف
(خذني على بلادي)

الشعر أبوي .. ولا بعد قلت : لبيه
إلا ل( بحة وزنه ) و ( صوت قافه )
ماقبلي أحد قد تربى على يديه
ولاغيري أحد سمع صوته وشافه
أغليه .. وأخافه .. وأحبه .. وأداريه
وأخاف لاأفقد دهشتي فأكتشافه
على كثر ما أبيه وأتعب وأنا أبيه
ماقد شكيت لغيمته من جفافه
إن ألتفت في حالي .. الله يحييه
و إن ما ألتفت .. ما ألحقت عمري حسافه
ياما على غفله غرقت فشواطيه
وياما رمى في قاع صوتي ضفافه
وأمسيت أغني له .. وأشيله .. وأشاكيه
كني مكوم كل ماكان طافه !
أحاول أقوى شي مانيب قاويه
وأحاول أقبل شي نفسي تعافه
اسمع من هروج العتب والمسافيه ..
مازود حمول التعب والمسافه
ناس بلوني بالحسد والمشاريه
مافيهم اللي وسط قلبه مخافه ..
لا .. والمصيبه .. ويش أنا منحسد فيه ؟!
في الشعر , ودروب السهر , والكلافه !!
قولوا لذاك اللي ( سهادي ) على ايديه
وش جاه مني ؟! لعنبوها ضعافه
ان كان حاسدني على الشعر والتيه !
يجي يبادلني .. وأخط أعترافه :
يعطيني راحة باله اللي تقديه
وأيامه اللي ماتعرف الصلافه
ونذر علي لأعطيه .. وأعطيه .. وأعطيه
حتى يمل من الشعر والصحافه

اتعبتني عيوني قد ماهي بصيره



واتعبتها يديني قد ماهي جفول



قلت : خيره.. ولكن وينها و وين خيره؟!



لا عيوني تكف.. ولا يديني تنول



هيه.. وين انت يا للي كان ما فيه غيره؟!



يفهم اللي اقوله قبل حتى لا اقول



رحت ادور حبيب مثلك ابغى استشيره



واثر ما كل زول ينتعوض ب(زول)



جيت ناس تزود حيرة القلب حيره



قلت : اطيع الزمان وكل شده تزول



قالوا : العمر يكبر.. قلت : كذبه كبيره



عمر الانسان يصغر كل ما هو يطول



قالوا : الشعر بيت.. وقلت : انا الشعر ديره..



..اعقل اللي سكنها فيه طيش مهبول



قالوا : اللي فقير يحب وحده فقيره



قلت : واللي يحب يحب وحده خجول



قالوا : و ذيك هي الأوله والأخيره ؟



قلت : ما ادري.. او ادري بس ما ابغى اقول..!

يادلال ان ضاع صوتي لايضيع اللي بقى



لاتضيع الصورة اللي في خيالك يادلال



يابعد طول المسافة والكلافة والشقا



يابعد كل الحياة وكل ماجاب الخيال



ماورى سود الليالي والفراق إلاللقا



وش تبين بهالدموع الزرق يابنت الحلال؟



اتركي عنك الدموع وخلي الحزن يهقى



ان ماله فالقلوب الطيبة أية مجال



كلها جرح ونشوف الليل لامنه اتقى



في جلال الصبح جعل الصبح مايلقى جلال



اقبلي قبل نتفارق والوصال ابو النقا



ودي آخذك بيدينك والنقا ولد الوصال



اقبلي واليوم يوم الشعر كانه مارقى



يم ذيك الغيمة اللي كنها (طلبة تعال )



لايجي باكر يغني : (ياسقى الله وسقى)



كل شي ان طال زال الا القصايد ماتزال



لعن ابو ذكرى القصايد كان ذكراها محقا



كل بيت وذكرياته في ملامحها سؤال :



وينها اللي كنت انا والصبح ويديها اشققا؟



اي فال اللي رماني في خيالك اي فال؟



آه كان الشعر راح ورحتي انتي وش بقى



مابقى لي غير اجر الصوت وأسري يادلال