|
من اطلق النار على هريدى؟
http://www.w6w.net/album/35/w6w20050...0080f2ef94.gif وسعوا صدركم واقرأوا الراجل دة بيقول اية أنا عايز أعرف بقى فيه كام واحد غَني في مصر؟؟ لا حضرتك.. مش الغِنَى العادي بتاع شغلة محترمة وعربية فيات وشقة تمليك بطلوع الروح.. أنا اقصد الغِنَى الفاحش بتاع القصور والعربيات اللي اربعة في اربعة يساوي ستاشر وحمامات السباحة والبودي جاردز اللى الواحد فيهم عضلة دِراعُه أتخَن من بطني لما آكل مَحشي ******* كام واحد غَنِى في مصر بقى؟؟ حضرتك السؤال ده منطقي جدا بعد الوجبة الدسمة من شلل الاطفال اللي شفناها في مسلسلات رمضان.. والحمد لله كلنا ختمناها وشدِّينا حيلنا كمان في العشر الأواخر أنا ماشفتش ولا مسلسل بصراحة إلا أول يوم رمضان عشان كنت في بيتنا.. المهم خير اللهم اجعله خير المسلسلات كلها عبارة عن عربيات شيروكي وبودي جاردز وحمامات سباحة ومجوهرات ودهب وياقوت واحمدك يارب والخلافات كلها ازاي الملياردير ده زعَّل الملياردير التاني.. فالملياردير التانى خسَّر الأولاني كام مليار.. وبعدين اتصالحوا في الآخر وكل ملياردير باس الملياردير التاني من بُقُّه والمسلسل خلص زى الفل والأخت نادية الجندي.. أخت إيه؟؟؟ نينة نادية الجندي صحفية شريفة أي وعهد الله وبتدافع عن الأخلاق وبتجري ورا الخبر والمستندات والصحف كلها واقفة على رِجْل أيوة حضرتك فين الكلام ده بقى؟؟ صحفية إيه اللي بتلفّ وتتعب وتتنكَّر وتتقتَل وتتخطَف عشان خبر ولاّ قضية فساد؟؟؟ كنتوا اكتبوا في تِتْر المسلسل بقى هذه الأحداث لا تمت للواقع بصلة وأي تشابه في أرض الواقع يبقى انتوا اللي هُبْل كلنا عارفين ان الصحافة كلها سبُّوبَة.. من أتخَن مؤيِّد لأتخَن مُعارِض.. وعدوّ النهاردة حبيب بُكرة.. مادام مرتب رئيس التحرير المعارض بيعَدِّي 35 ألف جنيه شهرياً ده غير نِسْبته من الإعلانات تبقى الحياة زي الفل ومفيش مشاكل ولا فساد ******* فكَّروني برضُه بأفلام خالد يوسف الأخيرة.. الأبطال كلهم أغنيا بالصلا ع النبي.. حتى البواب عنده هيونداي على قَدُّه.. ورايحين يتفسحوا في شاليه أي واحد فيهم ما كلهم عندهم شاليهات صلوا ع النبي وبعدين مالقوش حاجة يعملوها ولا يفكروا فيها قالوا يللاّ نلعب ويجا.. طب بالله عليكم حدّ كِدَه يقعد جنب موظف راجع من شغله في المترو .. ويقول له: لو سمحت ممكن نلعب ويجا مع بعضينا؟؟؟ الاحتمال الوحيد انه هيلعب صلَّح على قفاك ولاّ العلاقات بين الجنسين.. دي بقى عايزة قعدة.. أي حد مذكر بيروح بيت أي حد مؤنث..والحد المؤنث عايش في بيت أي حد مذكر.. وطلع بالشيفروليه واحنا قاعدين.. وحَمِّل ع الشيفروليه واحنا قاعدين في فيلم وسط البلد محمد نجاتي بيقول لهند صبري تعالي معايا الشقة.. هند صبري بكل براءة وطُهْر قالت له: مفيش مشكلة.. أنا اعرف ان الواحدة تروح شقة الواحد تشرب شاي .. تقعد تتكلم شوية.. بس المشكلة ان الناس ممكن يفهموها غلط طبْ حدّ يجيب كوباية عصير قصب بقى للراجل اللي اتجنَّن ده يااخوانا اللى هوَّه أنا يعنى الواحدة تروح شقَّة الواحد تشرب شاي.. اتمَنَع الشاي من البلد ما عدا في شقة المحروس؟؟ وانا اللي عامل فيها مابحبِّش الشاي وعُمري ما شربتُه.. دا انا من بكرة هاشترى مخزون شهر من الشاي من جميع الأنواع ******* فين المسلسلات بتاعتنا احنا؟؟ احنا مش بنشوف الحاجات اللي بتحصل دى ياجدعان.. حد منكم شاف قصور وبودي جاردز وعربيات زي اللى بيحصل مع ابطال المسلسلات دي؟؟ واحدّ منكم شاف التحرُّر الرهيب ده بين أي بنت وولد في الحياة.. وان البنت تروح له البيت عادي؟؟ وبلاش نتكلم اكتر من كده عشان أنا حاطط وشِّي في الأرض دلوقتي ولو موجود يبقى كام في المِيَّة من سكان مصر المحروسة؟؟ يعنى مش عيب تبقى كل مسلسلات وأفلام مصر عن ناس احنا مانعرفهمش.. أو حتى عن نسبة لا تتجاوز واحد في المية من سكان بلدنا الحبيبة بتاعة مشربتش من نيلها؟؟ حد هيقول ده حسد؟؟ اقول له أيون حضرتك.. حسد وحقد وغلّ وكُرْه ومقت ونفسَنَة وما خَفِيَ كان أعظم فين عربية الفول وساندوتش الكبدة اللي برُبْع جنيه وتذكرة المترو والأتوبيسات الخنقة والموظفين الغلابة اللي فيه فتاوي قالت ان يجوز عليهم الزكاة.. والشباب اللي ع القهاوي؟ فين النت اللى عايزين يحدِّدوه زى النسل وفين مشاكل التأمينات والمعاشات؟ فين مشاكل الميَّة والزِّبالة اللي بقت على فواتير الكهربا ومش عارف إيه دخل الزبالة بالكهربا؟؟ جايز عشان اللى مايدفعش فاتورة الزبالة يكهربوه فين مشكلة السَكَن والشباب اللي اتجوَّز على روحُه والبنات اللي بتشَمْشِم على عريس ******* مش هيَّه دي مصر؟؟؟ ولاّ مصر شوية صفقات وقصور وعربيات وبنات ستايل في الجامعة بأحدث موبايلات؟؟ ولا يعني ده عشان نفضل نقول ياريتنا زيّهم.. ونفضفض عن نفسنا شوية زي إعلانات السَمْنة.. الإعلان يجيب ألف صنف فراخ ولحمة وهُبَر هُبَر عشان يقنعك ان السَّمنة هيه السبب.. مع ان المشكلة مش في جَوْدة السَّمنة حضرتك.. المشكلة مين اللي هيجيب لك الأصناف دي؟؟ دي الفرخة عندنا بتتقسم على أربع ليالي.. والشوربة بنشرب فيها أسبوع وتلاقي الست الوالدة جايبة نفس نوع السَّمنة بس الفرخة مش زى اللي في التليفزيون الفرخة بتاعتنا م الآخر هيه فرخة لينا بتاعة مسرحية المتزوجون دي مش حياتنا؟؟ يا جماعة يعني واحد زى اللي قتل أمه من كام شهر عشان مش راضية تدّيله تلاتة جنيه ..لو شاف مسلسل زي بتاع نينة نادية الجندى والعيلة كلها عندها عربيات.. يعمل إيه؟؟؟ طب صحافة إيه ولا طبّ إيه ولا شغلانة إيه عموما اللي تجيب الفلوس دي كلها؟؟؟ طب حضرتك هما خرِّيجين آداب إنجليزى مش تبع الشغلانات دي يعني؟؟ حتى في الروايات البوليسية تلاقي كلمة السرّ دايما حاجة مش بتاعتنا.. يقول لك مثلاً: الثلوج تذوب دائما في الصيف يردّ عليه: ماعدا في القطب الشمالى وانا مالي بالقطب الشمالي ولا الجنوبي؟؟ ليه مَتِبْقاش كلمة السر مثلا: موبينيل رخَّصِت كل كروت الشحن يردّ عليه بفرحة: قُول وعَهد الله فيغمِز له بعينه ويقول: بيقولوا الكارت بعَشْرة.. بس بيبيعُوه بِحْدَاشَر هههههههههههه (((((((((((((( لحد هنا منقول (((((((((((((((( ودى كلمة مغلول المشكلة يا جماعة مش فى كل دة المشكله ان مصر مش كدة نحن المغتربين نعانى من الخزى الدائم امام من نحن نعمل عندهم يقولون مصر/ استغفر الله العظيم ...ومهما تقنع فيهم ما بيصدقوش مع ان عندهم بلاوى بس مدارية انما احنا مش فاضحين نفسنا بس لا دة كمان بنفترى على بلدنا وشبابنا واعراض بناتنا واخواتنا وامهاتنا احنا مش كدة ومصر مش كدة ارحموا من فى الارض يرحمكم من فى السماء (((((((((( اكرم شكرى |
رد: من اطلق النار على هريدى؟
كلمتك الاخيرة كنت ساكتبها
وانت سبقتنى مصر مش كده 00 فيها الخير كتير والشرفاء ايضا كتير يوجد بها وقت الجد تلاحم غير طبيعى وخوف على البلد والعرض اسال ابناء الشعب وانت تعرف كل كلمة تقول الحق فيها ناس شريفة زى حضرتك وزى ناس كتير تعمل بصمت والاعلام لانه عندنا مشهور وفى كل قطر يكون تحت المجهر لكن فى كل بلد عربى فن الاختباء معروف لديهم يوجد بكل دولة مشاكل ومتاعب وفساد واسال عن سيول وضحايا الفساد فى السعودية مصر ستظل ام الدنيا ليست بكل اثارها ولالياليها لكن بااولاد بلدها ورجاله فيها يحملوا بداخل كل منهم حب وخير كتيييير والكل يعلم الفساد والرشوة نعذر الفقراء لو اتجهوا لها لكن ليه فى بلد زى الكويت والا السعودية تكون وهم عندهم ملاييين لانعذر اى مرتشى ولاسارق لكن هى ضمائر تغييب فى كل مكان بالعالم ياريت كل دولة تسلط الضوء على مشاكلها زى مصر على الاقل لانهرب من مواجهة نفسنا بقوة وياريت يرحمنا منتجين الافلام والمسلسلات ويركزوا على النماذج المكافحة والطيبة وخير مصر ويبعدوا عن مسلسلات الفضائح سلمت اخى اكرم دوما طرحك يحرك الاقلام للسرد والرائ دمت بكل الخير رائع بكل فكرك الراقى |
رد: من اطلق النار على هريدى؟
فعلا البلاد دى
فيها بلاوى كتير اكتر بمليون مرة من اللى فى مصر بس فعلا مداريين وعلى فكرة هما من جواهم عارفين دة وعارفين انهم الاوحش بس يا اكرم هما بيعملوا المصريين وحش مش بس بسبب ان مصر مفضوحة لا هما بيعملوا المصريين هلى انهم ناس غلابة يا حرام فقرانين وهما بقى اللى بيدوهم وبيتفضلوا عليهم صدقنى لو مصر كانت دولة غنية وفضايحها كل يوم فى الفضائيات كانوا عمرهم ما هيتكلموا كلمة فى حقنا ودى وجهة نظرى جايز تكون صح وجايز تكون غلط بس انا شايفة ان احنا لما بنعرض مواضيع ممكن تكون صغيرة لسة ممكن دة يكون تنبية للشباب انهم يبعدوا عن خطورتها وكمان لما بنعرض مشاكلنا فية منها بيتحل هما بيحلوا مشاكلهم بفلوسهم لكن احنا هنحل مشاكلنا ازاى لازم ننصح ونوعى وكفاية انهم عارفين ان احنا احسن منهم واحنا عارفين دة تسلم اكرم لطرحك |
رد: من اطلق النار على هريدى؟
لحد هنا منقول (((((((((((((((( ودى كلمة مغلول وانت لسه شفت حاااجة |
رد: من اطلق النار على هريدى؟
مشكووورعلى هيك طرح اكرم شكري جزاك الله كل خير أخى بالله ربي يجعله بميزان حسناتك كل الاحترام لك تحياااتى |
رد: من اطلق النار على هريدى؟
يعنى لا الاغنيا اللى بيجبوهم هى دى مصر
ولا الفقرا هما دول مصر ميلون مرة.... لا بليون مرة احنا مش كده ومصر مش كده حتى الفقرا اللى مش حيلتهم غير شرفهم صوروهم بابشع صورة سبحان الله انا اشوف افلام اللى بتتكلم عن العشوائيات او المناطق الشعبية اكيد بيتكلموا عن مناطق تانية اكيد بلد تانية لسه المناطق الشعبية زى ماهى الناس تعرف بعضها وتود بعضها وتساعد بعضها الفرح بيكون عند الكل والحزن عند الكل لسه البنات تساعد اهلها بمنتهى الاخلاق بيخرجوا يشتغلوا ويرجعوا تانى بنفس الاخلاق لسه الشباب اللى عارف انه دى بنت حتته ومايقدرش يبص حتى ليها لسه الستات اللى اهون عندها تشتغل فى البيوت ولا تشتغل اى شغلانة علشان تأكل ولادها وماتفرطش فى نفسها مين اللى قال انه مصر بقيت كده اللى عاوز يشوف مصر يجى يروح بنك الطعام ويتفرج على المصريين اللى طلعوا زى الشلال علشان ينقذوا اهل اسوان والعريش من السيول والناس كانت تجيب من بيوتها رز ومكرونة وتونة واى اكل علشان يروح لاخواتهم يشوف اصحب الشركات الاغنيا وهما بيتبرعوا باطنان البضائع الاستهلاكية برضه لاخواتهم يشوف انهم قدروا يلموا تبرعات فاقت 20 مليون جنيه علشان يبنوا مساكن لاهل اسوان والعريش يتفرجوا على اهل اسوان الفقرا لما مالقوش حد يسكن فى الاماكن الاضطرارية اللى عملتها الدولة لانه كل عيله اخدت عيلة معاها فى بيتها يجوا عندى هنا ويتفرجوا انه ازاى لما نقول ياجماعة بنت هتتجوز ومافيش جهاز ليها عاوزين تبرعات تلاقى ناس تفتح دواليبها وتطلع اللى عندها وتقول خدوا اعذرينا يامصر عذرا اكرم على الاطالة ولكن الواحد مفقوع مرارته |
رد: من اطلق النار على هريدى؟
اكرم يعطيك الف عافية لروعة الطرح وقيمته بارك الله فيك وجعل عملك الصالح في ميزان حسناتك لك جزيل الشكر والتقدير تقبل مروري |
| الساعة الآن 09:56 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Content Relevant URLs by vBSEO 3.6.0 (Unregistered) Trans by