شبكة صدفة - بحب البرد

بحب البرد ..
و يا سلام ..
لو حد هرب م الدوشه ..
و راح و جابلي ورد ..

لو كتبت قصيدة ..
و قولتلي حلوة ..
قولها تاني ..
أتنطط زي العيال الصغيرين ..

..

و أقولك أحلف ..
والله العظيم ..
بتتكلم بجد ..
يمكن عشان ..
أيام الفرح قليلة ..
سهل تتعد ..
عارف ..
رغم إن المخازن ..
كل يوم بتتحرق ..
و مفيش حساب و لا جرد ..

و رغم وجود السيرك ..
و الأراجوز ..

و التلات ورقات ..
و جوز و فرد ..
عمري ما أتمنيت أكون أمير

أو ولي عهد ..
لكني بحلم بوطن ..
مفيهوش و لا حارة سد ..
وطن بيفرح بحاجة ..
غير وصول الأهلي لليابان

وحزنه أنبل ..
م الدموع البلاستيك ..
و عمليات التجميل ..
و الشفط و الشد ..
عارف ..
رغم إنها ..
بتقع ..
بتغرق ..
بتتنيل بستين نيلة ..
لكن جميلة ..
و عمرها ما هاتنهد ..
عشان كده ..
أنا لسه بحب حاجة ..
و لسه ف قلبي حد ..