شبكة صدفة - النظام البرلمانى:

النظام البرلمانى ده نظام حكم بيتولى الحكم فيه رئيس الوزراء .. وبيكون رئيس الوزراء مع وزارته متضامنين فى المسئولية أمام البرلمان وأمام الشعب ..
وبيشكل الحكومة أكبر حزب خد عدد مقاعد فى البرلمان ,، ولو مفيش أى حزب خد الاغلبيه المطلقة ففى الحالة دى بتتشكل حكومة ائتلافية ..
الحكومة الائتلافية بتتكون من الاحزاب اللى خدت مقاعد فى البرلمان وكل حزب بياخد عدد وزارات بيتناسب مع عدد المقاعد اللى خدها فى الانتخابات البرلمانيه ..
معظم الدول اللى نظام حكمها ملكى نظامها برلمانى ،, وكمان فيه جمهوريات نظامها برلمانى زى إيطاليا و اسرائيل .. وبيكون منصب رئيس الدولة في النظام البرلمانى منصب شرفى ..

تشكيل الحكومة:
فى النظام البرلمانى بتتشكل الحكومة من الحزب اللى بياخد أعلى من 50% من عدد النواب فى البرلمان وفى حالة إن مفيش حزب عدى 50 % بتتشكل حكومة ائتلافية من الاحزاب اللى ليها مقاعد فى البرلمان و كل حزب بيشارك بعدد أعضاء بيتناسب مع عدد المقاعد اللى ليه فى البرلمان .. وبنلاقى جبهات متصارعة من الأحزاب كل منها بيحاول يتفق مع أحزاب تانية عشان يشكل الحكومة الائتلافية قبل الحزب المنافس له .. والعملية دى ممكن تعطل سير الحياة فى البلد لمدة شهور زى ما حصل فى بلجيكا مرة قبل كده إنهم فضلوا شهور من غير حكومة بسبب الصراعات بين الأحزاب على مين اللى يشكل الحكومة الائتلافية ..

عيوب النظام البرلمانى:
البرلمان المفروض إنه بيراقب الحكومة .. لكن فى النظام البرلمانى الحكومة والاغلبية فى البرلمان بيكونوا من نفس الحزب .. فتخيلوا شكل المراقبة هيبقى عامل ازاى ..
ولو حكومة ائتلافية بتبقى صفقة بين الاحزاب فصعب البرلمان يمارس دوره الرقابى بفعالية.
أخطر عيب فى النظام البرلمانى هو الحكومات الائتلافية .. لأنها بتهدد استقرار الدولة ،، بسبب الصراعات بين الأحزاب على مين اللى يشكل الحكومة ومين اللى يبقى رئيس وزراء وكل حزب بيتخانق على الوزارة اللى هو عاوزها .. وده ممكن يا إما يخلى الدولة فى حالة شلل لمدة شهور لحد ما الأحزاب تتفق ،، أو الحكومة الائتلافية بعد ما تتشكل تنهار خلال كام شهر بسبب اختلاف وجهات النظر بين الأحزاب زى ما بيحصل فى اسرائيل كل شوية ..
كمان عيب إن النظام ده مفيهوش توازن بين القوى (التنفيذية والتشريعية والقضائية) لأن القوة التشريعية اللى هى البرلمان هى اللى بتشكل القوة التنفيذية اللى هى الحكومة ففى النهاية بنلاقى النظام عبارة عن قوتين بس ،، القوة البرلمانية متمثلة فى حزب الاغلبية والقوة القضائية بس

عادةً النظام البرلمانى اللى بيحاول يروج له هو من يسعى إلى التحكم فى كل مقادير الدولة دون أى منافسة ،، لأنه بيتخيل إنه هيسيطر على البرلمان والحكومة ومفيش رئيس ..

سمات النظام البرلمانى:
الرئيس او الملك فيه بيكون منصب شرفى و انه رمز للدوله و حامى للدستور , و بيكون مافيش مسئوليه سياسيه على الرئيس .
كمان الشعب مش هو اللى بيختار الرئيس ،، اللى بيختار الرئيس هو البرلمان وحزب الأغلبية ..
بيكون الحاكم الفعلى هوا رئيس الوزراء وبيكون مسئول اساسى سياسيا على سياسات الحكومه و ادائها أمام الناس , وبيكون كل الوزراء مسئولين تضامنيا فى نفس الحكومه فى حالة فشل سياسات الحكومه واستقالة رئيس الحكومه معناها استقالة كل الوزرا اللى فى الحكومه