شبكة صدفة - قلب البطيخ

قلب البطيخ

كتب على سلامة
أنا كنت راجل طموح
لكن مع مرور الوقت
كل شىء بيروح
وطموح للى مش واخد باله
يعنى باعرف أحلم
ده قبل الأحلام
ما تبقى مشفرة
عشان كده أنا بحب البطيخ
بيفكرنى بالدنيا
مهما كبرت
بتفضل صغيرة
والبطيخ طيب
صحيح فى قلبه نقط سودة
لكن دايما فيه مساحة منورة
فى عز ما دمه سايح
بيوزع الفرح ع الناس
واثق من نفسه
ما بيخافش م السكاكين
متواضع
حساس..
ترميه مع التفاح والأناناس
يعيش
ولو مفيش غير حتة جبنة قديمة
من قلب بلاص
ما يقولش لأه..
بيتباع بالكيلو وبالواحدة وبالشقة
والبطيخ غير الشمام
برىء من كل الكلام المزيف
ومن الأمان المزيف
عشان كده
إوعى تصدق حد
يقولك اطمن
ونام..
وحط ف بطنك بطيخة صيفى