شبكة صدفة - ما تاخدش فى بالك

ما تاخدش فى بالك

كتب على سلامة

الدنيا مش دايماً طيبة..
وتعمل إيه
ياللى انت دموعك قريبة..
تمد إيدك فى جيب القميص..
تطلع الورقة اللى فيها
اسم الدوا..
شربت كتير
لكن قلبى عمره ما ارتوى..
كام أجزخانة..
والإجابة نفس الإجابة..
مفيش
الدوا ده ناقص..
يمكن ييجى كمان شهر
وجايز مايجيش خالص..
اسأل قدام أنت عارف الدوا ده بكام
سألت ودورت ولفيت..
تعبت..
ولاقيتنى قريب من هنا
قلت أعدى
بس ياريتنى ما عديت..
شفتك..
حد شبه صاحبى
لكن مش هو
التانى كان أصغر منك بكتير..
وأجمل منك بكتير..
شربت قهوة ومية وعصير
بطعم الحيرة اللى ف شارع
القصر العينى
وتعب عسكرى واقف خدمة
ف عز حر أغسطس
ف قلب ميدان التحرير..
ونزلت أدور من تانى
عن صاحبى اللى بجد..
واسأل ع الدوا
وأسمع نفس الرد..
مفيش..
ناقص..
جايز ييجى كمان شهر
وجايز مايجيش خالص