شبكة صدفة - الحكومة كسبت الشعب

حكايتك ايه يا انتخبتنا
قالوا لينا روحوا انتخبوا
خرجنا راجل وست
ابن وبت
شاب وجد
خرجنا وافتكرنا ان الانتخابات بجد
افتكرنا ان احنا اللى هنختار
هنختاراللى هيتكلم عنى وعنك وعنها وعنكم
واتارى اللى اختار غيرنا
مين بقى اللى اختار
بس الكلام دة فى سركوا
لحسن ورا الشمس بقى قريب اوى مننا
ولا اقولكم خلوها على الخلاق
كدة او كدة خربانة ياعم خربانة
اللى اختارت مرشحنا هى الحكومة
اختارت وقالت بالعلنى كدة
طظ فيكوا يا اهل زفتى
طظ فيكوا يااللى وقفتوا قدام الاحتلال
وعملتم جمهوريه
انهاردة بقى طظ فيكم وفى اختياركم
احنا اخترنا ليكوا عبد الاحد جمال الدين
زعيم الاغلبية ابن الحكومة
اما بقى ابن الشعب بتاعكم اللى اختارتوه
فطظ فيه وفيكم
طيب يا حكومة خرجتونا لية
من بيوتنا نهتف ونقول عاوزين ابن الشعب
خرجتونا ليه نصوت للى احنا عاوزينة
ولا جايز كنتم بتجربوا صوتنا
العضو اللى انتوا اختارتوه تف علينا
وقال غصب عن عينكوا الحلوين هكسب
والف طظ فيكوا
دة انا زعيم الاغلبيه يا كلاب
انتوا اية يا حساله
انتوا ولا حاجة وانا كل حاجة
بيكوا من غيركوا هكسب
دة الكرسى بتاعى من سنين
دة انا ابن الحكومه
برافو عليكوا يا حكومه
كسبتونا وبعد ما كان الامل موجود
ماتت امل وضاع عمر وسط الزحمة
زحمة يا دنيا زحمه
ديمقراطيه مجلس شعب حكومة
كله غش فى غش
ولا عاد لصوتنا مكان
ولا عاد لنا راى
بدل ما تذلونا
عينوهم وريحونا
زمان شاديه وسهير ومدبولى قالوا
وكسبنا الحكومة
احنا انهاردة رفعنا الرايه واعلناها
كسبتنا الحكومة

بقلمى

انا marmer
بنت مركز زفتى
المحتل من قبل عبد الاحد جمال الدين وحكومته من سنين
وبيسالوا ليه

الناس بطلت تضحك من قلبها فى مصر
لان ماعاد فيه امل
فى اى تغيير
هنضحك على ايه والقهر ملئ قلوبنا
طظ فينا
وسلامات يا حكومه