شبكة صدفة - القرد ميمون

القرد ميمون

كتب على سلامة
قالوا رئيس الوزراء إتجوز
أنا قلت ألف مبروك
ده شرع ربنا
وده حقه..
قالوا الوطن بيقع
قلت لوحده كده
ولا فيه حد زقه..
عموماً
راحت أيام القميص أبو نص كم
وابتدينا مرحلة الخضار المسلوق
واللب الأبيض والينسون..
عشان كده لما قالولى مصر عندها برد
قلت يا ريت تشرب لمون..
ولما قالولى
الانتخابات اللى جايه نزيهة
قلت يا ترى دى منحة..!!
ولا ده حكم القانون..
ولما قالولى الطيارة سقطت ف البحر
سألت كان فين الطيار..؟
قالوا بيتفرج على مصر والجزائر
ومساعد الطيار..؟
كان فى البرلمان بيقرا البيان
اللى بينتهى بسب الدين
ويبتدى بـ الإخوة المواطنون
قلتلهم أمال فين
اللى كان سايق الطيارة..؟
قالولى ده..
قلتلهم مين ده؟
قالولى ده القرد ميمون..