شبكة صدفة - ادينى عقلك

http://www.boswtol.com/mastaba/images/133/3a2lak_00.jpg
هاسألك سؤال..

أنت صح ولا غلط ؟
سؤال بسيط مش كده ؟
مش ساعات بتلاقي الناس حواليك (والديك- أصحابك- شريك حياتك- أصدقاءك....) بيحاولوا ساعات ينصحوك ويقولوا لك رأيهم في حاجات بتعملها في حياتك؟
وأنت منزعج أصلا من الكلام ده, لأن أنت عارف بتعمل إيه ؟
لأنك عارف إنك صح.. مش كده ؟
الناس ازاي مش شايفين إن أنا باتصرف صح؟ وإني لازم أتصرف كده؟
خليني أكرر السؤال :

أنت صح ولا غلط؟؟
سؤال بسيط...
لكن.. هل تعرف إنه أصعب سؤال في الدنيا ؟
أنا صح الصح
زي ما قلنا قبل كده.. إن كل واحد مننا بيحكم على الدنيا من وحي تجاربه وتربيته ونشئته.. كل واحد اتربى وعاش تجارب في الحياة خلته يفكر بالطريقة اللي هو بيفكر بيها دلوقتي.
وهل تعرف.. إن كل واحد فاكر نفسه صح ؟
أيوه.. كل واحد فاكر إن تصرفاته وتفكيره صح.. والناس هي اللي مش بتفهم..
وكل واحد مريحاه دماغه عدم المؤاخذة..
يعني لو لقيت واحد بيقول لك حاجه, عكس اللي أنت شايفها.. هاتعتبره غلط.
أقول لك مثال ؟

بص على الرسمة دي :
(created by Edward H. Adelson)
http://www.boswtol.com/mastaba/images/133/3a2lak_01.jpg
لو قلت لك إن المربع A له نفس لون المربع B !!!
هاتقول عليّ إيه ؟
المربع A أسود إنما B أبيض.. لو قلت لك عكس كده مش هاتصدقني..
الأسود زي الأبيض يعني ؟؟
مش هاتصدقني لأن ده اللي أنت شايفه بعينيك..
هاتكذب عينيك عشان خاطري يعني ؟
بالعقل كده !!
العقل الباطل..
المخ بتاعنا بيستقبل المعلومات من الدنيا اللي حوالينا عن طريق الحواس الخمس.. وبيخزنها ويحللها.. ويخرج لينا بوجهات نظرنا..
الحواس مش دقيقة, فبالتالي الاستنتاج مش هايكون دقيق هو كمان!
فهل ممكن للعقل.. اللي وصلنا لاستنتاج معين- مهما كان غلط- إنه يعتبر نفسه غلط ؟

مثال:

يعني لو خدت رأي واحد في حاجة.. راح قايل لك رأي غلط.. هل تتوقع منه –في نفس اللحظة- إنه يقول لك : أنا غلط ؟
لا طبعا !
الطبيعي إنك تروح تسأل شخص تاني وتاخد رأيه.. صح ؟
هو ده اللي عايز أقوله..
العقل البشري ماعندوش كل الإجابات..
العقل البشري بيغلط زيه زي أي جهاز في الدنيا.. لأن معلوماته محدودة.. ومشكوك في صحتها كمان !
العقل البشري ممكن يحسسك إن رأيه صح.. بس اوعى تصدقه طووول الوقت..
نرجع لمرجوعنا..
الرسمة اللي فوق دي.. لسه متخيل إن المربع A لونه أغمق من المربعB ؟
طيب تعالى نبص على الرسمة تاني كده..
http://www.boswtol.com/mastaba/images/133/3a2lak_02.jpg
المربع A له نفس لون المربع B
سجل الصورة عندك وتأكد بأي طريقة تعجبك.
شفت بقى ؟
مخنا يا عيني اتلخبط.. لأنه افترض إن المربع B لازم يكون أبيض عشان محطوط في أرضية تشبه أرضية الشطرنج.. بس هو مغمقّ شوية عشان الضل !
لكنه يا عزيزي نفس اللون..
مخك خدعك يا باشا!
عايز أقول لك إيه ؟
عايز أقول إن العقل بيخون.. مش شرط تكون صح.. لمجرد إنك حاسس إنك صح.. مش شرط تكون صح حتى لو عقلك بيقول لك إنك صح..!!
عايز أقول لك : اسأل دايما واطلب النصيحة..
خد رأي الناس ..

م.ن

حاول تستفيد من آراء اللي بيحاولوا ينصحوك وأنت مطنشهم..
لأن رأيك مش شرط يكون صح.. لمجرد إنك حاسس إنه كده !

لأنك لو فاكر نفسك صح طووول الوقت..
اعرف إن ده مجرد.. خداع بصر !
و خليك فاكر..
احنا بنعيش في الدنيا دي حياة واحدة بس.. حان الوقت إنك تخليها أروع حياة ممكنة..