كتب على سلامة
بنت بلد..
وهانم..
وفلاحة من كفر البطيخ..
وست بيت..
وَنَفسها حلو ف الطبيخ..
ودمها زى العسل
تتشعبط ف ميكروباص
وتحلم توصل المريخ..
أما عن مرحلة ما بعد الملوخية
مفيش أى شىء عنها
ف كتب التاريخ..
غير تعادل الأهلى وبتروجيت
واستعداد مصر لشم النسيم
وتوفير العلف والبصل والفسيخ..
انظر صفحة اتناشر
تلاقى نفس الحاجات
من أيام ميكى وسمير..
مسكنات وحقن تخدير..
ومن وزير لوزير..
نقول دى موجة وبكرة تفك..
ونتكلم عن الأمن
ونخاف م الفيس بوك..
ومن حاجات كتير..
وف كل شارع لجنة مرور
تفتش ع المثلث والشنطة
وتعدى صناديق التزوير..
والدنيا ماشية وشغالة..
لسه يا دوب واخدين بالنا
إن مصر الرقيقة
الناعمة زى الحرير
بتعيش فوق كوم زبالة..
وكل يوم تعدى
وتتفرج عليها عيون
تندب فيهم مليون رصاصة..
مبدعين
ومسؤولين
واونطجية
ومفكرين وساسة
لا حد قال عيب كده
ولا حد قال يا ناس
مصر أغلى من كل الكراسى
من أول الكرسى
اللى عندى ف البلكونة
ولحد كرسى الرياسة..