العرض السياحي المميز لجزيرة الشمس Rügen جوهرة عائمة في بحر البلطيق تقع هالقطعة الخضرا في اقصى الشمال وهي أكبر جزيرة في المانيا وتتكون من 18 جزيرة متفاوتين في المساحات ومع أنها قريبة من الفلاجة السويدية بس تعتبر المصيف الأوربي الأول لان الشمس تشرق عليها 1920 ساعة في السنة وهو اكبر معدل في اوروبا >>> هب عليهم حتى ساعات الشمس يعدونها يعني قايلتهم اكثر من 10 ساعات في اليوم بس يازينها من قايله الي ماتتعدى ال22 في ظهرية اوغست السكن المقترح :في Travel Charme Kurhaus Binz وهو فندق 5 نجوم وهو في الاساس من اقدم واعرق الحمامات الكبريتية القديمة في الجزيرة الي ترجع للقرن ال19 ويقع على البيتش مباشرة الجدول الترفيهي المقترح : هذي الجزيرة يزورها كل من مسوي فيها ياي وجا الصيف وابي اسوي تان عليها بيتش برمال بيضا وبحر صافي بشكل غريب تناسب فئة الشباب الي حابين يفلونها بكل الانشطة الرياضية والرحلات البحرية كل من يزور الجزيرة لازم بيجرب صيد السمك والغوص في بحر البلطيق وبينشط جسمه بالرياضات البيتشية من كرة اليد لكرة الشاطئ وركوب الامواج للسباحة والتسدح وحتى للغولف وركوب الخيل والدراجات يعني بتاع كلووو يؤمنون بالمقولة المشهورة في الحركة بكرة ومن الاماكن المقترح زيارتها Inselrodelbahn Bergen وهو مكان مخصص لمتعة التزلج في أي وقت من اوقات السنة يعني لاتنتظر ثلج ولا شتا زحليقة ممتدة على طول 700 متر وفيها 7 منحنيات حادة الزحليقة لها متعة ماتنوصف ومن الاماكن والتجارب الجديدة الي ماتتفوت هي زيارة منتزه Seilgarten Prora bei Binz auf Rügen وهي على جبل برورا ويعتبر زي الغابة المرتفعة الي تمليها الاشجار الضخمة وكل المنتزه عبارة عن تدريب وممارسة رياضة التسلق والتزحلق بس بدون زحليقة يعني في الهواء الطق حالكم حال طرزان ولاتخافون يعني بشكل آمن ومع مدربين قديرين ويرحبون بالزوار من عمر 6 سنوات الى 66 سنة وتعالوا معي شوفوا الصورة المتحف الالماني البحري متحف يعتبر الافضل اوروبياً نقدر نسميه قرية مائية ولا تتوقعون انها احواض للفرجه وبسس فيها معرض لعمالقة البحار , احواض الاسماك , الغواصات , معلومات وخبرات من مئات السنين فيه اقسام لارخبيل البحر ووالاعشاب البحرية وغيرهم الكثير يعني قمة المتعة والفائدة والتفكر في مخلوقات لله رحلتنا اليوم مميزة وبالامكان نجلس فيها اليوم كامل راح نروح لاقدم شاطئ في الجزيرة الي هو ساحل سيلين الي استوطن في عام 1295م وفيه منتجع سيلين المشهور مافيه سائح يمر الجزيرة ومايزور هالمنتجع المتكامل الي مبني فوق البحر بكم متر ويضرب في اعمدته الموج وفيه مطعم عريق فيه من امهر واشهر الطباخين الالمان ودايم في الويك اند يكون فيه زواج ورقص وفلة لان الجزيرة تنفع كثير للهني مون جزيرة مانشوف فيه الا 3 الوان الاخضر والازرق والابيض اكيد بتقولون وشو اللون الابيض ؟؟!! الي هي الصخور الطبشورية البيضا والرمال البيضا الصافية الي تجتمع مع زرقة البحر وخضار الطبيعة ومنتجع سيلين يتميز بجسر طويل يمتد ل400 متر وسط البحر واميز مافيه هو هيكل الغوص الثابت الي ينزل ل4 امتار تحت سطح البحر والتمتع بمشاهدة الكائنات البحرية والبحر الصافي وهالغواصة تكفي ل30 شخص وهذي صورتها توضح الفكرة وفي هالشاطئ راح تشوفون كل الرياضات البحرية الي تعرفونها والي ماقدر مرت عليكم وانواع القوارب والشراعية وغيرها