قصيدة / الحصاد
كل ماجبت كبوه قلت كبوة جواد
وطال كبو الجواد وطال معه العدي
كنت أجمع قروش بيض لجل السواد
ويوم ساد السواد أنشل معصم يدي
آه ياهي غروسي طولت بالحصاد
يوم نوخت حلمي عند باب الجدي
يالحبيب الكبر ماخلق لجل العباد
خلق للي ينادي : ( يالعباد أعبدي )
جيت مثل الغريب وكنت مثل البلاد
وقمت أباهي وأصوت يابلدي يابلدي
أحسب أني كسبت الكسب يوم الجهاد
وجبت راس العنيد وشلت حمل ( ابعدي )
وأثر كسبي عيون ماتذوق الرقاد
وشاعر كل ماضاقت عليه يحدي
هيه ياللي بديت بشي مثل الوكاد
وأنتهيت بظنون حاربت مرقدي
أعتبر كل عمري معك كبوة جواد
وألف شكرا على أني صرت اعرف آعدي