قصيدة أنا الجاني ...
(( كفا الله فراقك يا بعد كل من حبيت
عسى الموت لي قبلك و طيات الاكفاني ))
تعاني من اسبابي وانا منك كم عانيت
و يدمح ..غلانا .. كل غلطه من الثاني
حبيبي .. وتكتب كل نبضه فحبك بيت
على الله أطيح بدرب قلبك وتقراني
حبيبي .. وتتحدر عيوني متى مأقفيت
وتدري متى مأشرت ..عندك بتلقاني
حبيبي .. وتتهاوى عظامي إذا صديت
وتصدح طيور الموت فوقي وتنعاني
حبيبي .. وتتلاشى الأمومه متى حنيت
حبيبي ولو تقسى علي إنت .. أنا الجاني !
عيوبك قبل ميزاتك اغرتني وظليت..
..أحسب اني استاهلك .. حقي وماجاني
وحقك علي إن كنت بإسم الغرام اخطيت
وحقي عليك تكون راضي وتهواني
تصدق .. على ان الشوق مالي علي البيت
عجزت آتجرد لو للحظه من احزاني
تجيني على شان المواجع متى ما جيت
ياليتك تجي لو بس مره على شاني
نخاف اللقا من خوف فرقا .. كذا حسيت !!
بأبرر علام الصمت جاثم على لساني
حبيبي ولا ينلام عقلي إذا انجنيت
اجل كيف .. عاد إن جن شعري و قيفاني !!
أحبك .. وانا لا قلت أحبك .. فأنا حبيت
على انك تبي تاخذ خفوقك من احضاني
قصيدة بدون أحباب ...
العيد فرحة لقا الأحباب بعد الغياب
وانا حزينه بدون احباب وبدون عيد
ياعيد ما زدت فيني غير هم وعذاب
وش زود غيري من الأفراح زاد و يزيد
ألحق سراب وانا ادري بإني ألحق سراب
وأسكب دموعي وانا ادري بإنها ما تفيد
للهم ألفين باب و للفرج ( ظل ) باب
ما يمدي آصله .. إلا وتغرب الشمس أكيد !!
يا شين حس العجز والعمر توه شباب
ويا شين موت الرجا والياس توه وليد
يشبهني الحزن .. لا .. وش جاب حزني لجاب ؟
وان قلت انا والحزن خلان .. ويش الجديد ؟
لا صار كل لأصله .. و الأصل من تراب
عند الحزن ما فرق.. أسياد والا عبيد
ومن جرب الموت.. قال الموت ما ينتهاب
ومن عزني ؟؟ ليت يدعي لي ب ( موت ) مديد
ما كان في خاطري أكتب بهمي كتاب
للفم قيد وللأقلام مليون قيد
مير الشعر جابه الله لي ونيس الغياب
في صبح عيد ..بدون احباب وبدون عيد