قصيدة مشاوير اللقا ...
على كثر الهموم اللي تجيش بصدري الملهود
بعدها ما سقت عيني مدامع حزني الظامي
الى من ضاق بي همي تمنيت السنين تعود
ولكن .. من متى كانت سنيني فرحة ايامي ؟!
علام القلب يتمنى عروقه ( تستحيل ) ورود
اذا كان الشذى يجذب طعون تذبل عظامي!!
مشاوير اللقا راحت تحيد لمفرق مسدود
و ذا مشوار للفرقا يسوق الدرب لأقدامي
يحسدون العبير ل (ميلة ) في حظها المقرود !
أجل وشلون لو شافوا هموم الحظ لى قامي !!!
لمحت فغمرة احزاني سماي ب خاطر مهدود
وهج نور البدر / وابرق / وميض الشوق قدامي
تخيلتك قمر يضوي ليالي فكري المحدود
والامن حل بي فجري غديت الشمس (فاوهامي) !
بعيني .. لو جميع الناس غابوا ؟.. ما بهم مفقود
مدامك حاضر بقلبي و طيفك ساكن احلامي
تصدق ما دريت ان الخلايق عنك فيهم زود؟
يزيدون ب( برودي) .. وانت حدك حبي الحامي !!
مع اني ما عطيتك غير قلبي،تشتكي هالجود؟!
عسى م ازهد لك ب روحي وتشكي باقي حطامي
ترى لاهمت في حبك، ذكرت ان الشعر موجود
رحمك الله / من اطنان المشاعر/ عند أقلامي !!
انا والليل وهمومي على رهن العيون السود
ترفق في بهاك اللي عليه أسدلتك إ لثامي
ولا صارت مشاوير اللقا لك ، كلبوها صدود؟؟
كفاني من دروبك إنها هي ...... مصدر إلهامي
قصيدة ياما و ياما ...
ياما وياما قلت لي .. ياما وياما قلت لك
ياما وياما قلت لك: ياما وياما قلت لي
واضح عليك انت الغلا لكن عزيزي ماجملك
لما يجي خلف الغلا قلب بحبي ممتلي
لا بو همومك و الزعل لابو حبيب يزعلك
اطى على قلبي إذا قلبك همومه تنجلي
حين تحس انك قمر.. حين تحس انك ملك
لكن شعور تجهله : هو قيمتك بالنسبه لي
لا تشتكي نار الهوى دام انها تنشب لك
غيرك يموت من الصقيع ولا حصل له مشعلي
تدري وش احلى ما أشوفه فيك كلك؟..مجملك
مدري هو احلى ما تشوفه في .. كلي ب اكملي ؟
ماستغرب اسراب النحل يوم انها تنشد لك
العين في لون العسل و الخد ورد مخملي
أشفق على ذيك الجبال اللي تحاول توصلك
تتطاول ب طين وحصى وانت فسمائي معتلي
بدري على شمس الكواكب والمعامل و الفلك
تنجب مثل نور الى من شعشع اجهر منزلي
يا صبر شيطانك عليك اشلون هو مستحملك !!
أكبر عذاريبك خصال الطيب يا شيمة هلي
هونك على طهري أنا ودي فقط أتأملك !
لك نظرة لا داهمت يخجل جميع اللي علي !!
جاوب ولكن كانها كلمتك (إيه ) .. باسألك :
تسمح حبيبي كلمتك .. بابني بها مستقبلي ؟
أما ولو صارت ب نفي كلمتك ...... لا يشغلك
لا صار ياما قلت لك: ياما وياما قلت لي !!