* .* الجزء السابع *.* الفصل الثاني كانت جالسين سديم وفاطمة بالصالة يسولفون .. " صدق هالحريم سخيفات وش دخلهم بنوف كل شوي ناطين لها عيال وما عيال .. والشكر " فاطمة : وأنتي ياسديم وش له شاقه بعمرك ؟! شكت لك اليوم ! سديم : لأ .. بس شيء يقهر والله .. من شوي شفت شكلها وحسيت أن أحد قايل لها شيء وتعرفين نوف تراعي مشاعر غيرها ونادر ما تشتكي ! فاطمة : والله شوفي مادام أنها صالحة هي وزوجها .. هم وش دخلهم ؟!! سديم : مهيب المشكلة صالحين ولا ..لأ ..! المشكلة هالملقوفات ما يخلن أحد في حاله .. صدق حريم ..؟ استغفر الله بس ..! فاطمة : طيب ليش نوف جالسة مع الحريم إلى الآن كانت جلست معنا هنا بالصالة أحسن لها .. سديم : ابد أصبري شوي إلا هي جايتك " حاس قلبي والله " وبعد دقائق جت لهم نوف ووجها متغيييير مررررررة .. وسلمت وتوها بتروح فوق .. لكن سديم ما تركتها وعلى طول مسكتها سديم : نوف اشفيك ؟؟ نوف وهي العبرة خانقتها : .... ما فيني شيء ..؟! سديم : مستحيل ما فيك شيء ..؟ أنا اعرفك زين ؟ نوف : .................. فاطمة : نوف كانك تعبانة روحي فوق ارتاحي أحسن لك ؟ سديم : لأ .. هي مش تعبانة .؟ أنا أعرفها زين .. هي فيها شيء .. ما قدرت تتحمله ؟؟! ولما خلصت سديم جملتها انفجرت نوف وبكت سديم : شفتي ؟؟ أنا اقولك .. أنا اعرف نوف زين وكملت وهي ماسكة يد نوف تعالي عيوني تعالي أجلسي .. والله هالحريم ما يسوون دمعة من دموعك الغالية نوف وهي تبكي : حـ .. وتشهق .. حرام عليهم هذا شيء مب بيدي .. هذا من الله فاطمة وهي متأثرة : ونعم بالله وكملت نوف : ولا معقولة فيه حرمة ما تبي العيال .. لييييييييييش يبون يفسدون علي حياتي .. ليييييييييييييش ؟! انا ايش سويت لهم سديم ويدها على كتف نوف : انتي ما سويتي شيء ياعمري .. بس تعرفين هم حريم وما يخلون أحد في حاله أبدا .. إذا ماتزوجت الوحدة قالوا ما تزوجت أكيد فيها شيء ؟؟ .ولا تحب أحد ؟!! وإذا تزوجت قالوا ماحملت ؟! وإذا حملت قالوا كل سنة ومعها طفل .. " مسيكيييينه " يعني مستحيل رضاهم .. مسسسستحيييل .. وأكيد انتي يانوف تعرفين هالشيء .. دائما نسولف أنا وياك فيه .. فاطمة : صادقة سديم .. يعني الحين شوفيني انا عندي ولد وبنت وجبتهم وراء بعض .. لو تشوفينهم بغوا يأكلوني كأنهم عيالهم مب عيالي وليش تجيبينهم وراء بعض ؟؟ وليش تتعبين عمرك ؟؟ الرجال إذا شاف الحرمة كثروا عيالها ماعاد يبغاها .. ويتزوج غيرها ؟؟ وكلاااااااام ماله أول ولا آآخر بس أنا تاركتهم ولا كأني أسمعهم ولا وانا اختك اللي بيسمع كلام النااااس بيتعب .. وأقولها لك بقلب بيتتتتعب .!!! نوف وهي تمسح دموعها : صحيح كلامكم .. بس أنا تعبت من كثر ماانا ساكته وكل شوي أقول علشان خالتي بسكت .. بس هالحريم ما يراعون مشاعر أحد .. همهم بس أنفسهم .. وأنهم يشبعون حاجة بدواخلهم .. أنا أكثر شيء يعذبني " أحمد " !!!! سديم : أحـــمد !! ليش وش دخله ؟؟ نوف : أخاف يتأثر بكلامهم وكثر ما يسمع ... يمكن يقولون حرمتك ما تجيب عيال ... ونزلت نوف رأسها وبكت .. فاطمة : يابنت الحلال هوني المر وبيهون إن شاء الله وانا بعد بكلم أمي .. تشوف لها حل مع هالحريم .. كل يوم نفس السالفة .. نوف : لأ .. خالتي مالها دخل .. خالتي بالعكس دائما تقول كل تأخيرة وفيها خيرة .. وماشاء الله عليها راضية .. بس الحريم ما يتركونها دائما يعيدون نفس السالفة سديم : ياجعلهن البلاء إن شاء الله .. صدق ما عندهم سالفة !! " منهم اللي ما عندهم سالفة ؟!! " وجلس أحمد وتكلم وهو معصبببببب : وش سالفتكم وليش تبكي نوف .؟!!! أشوفكم تدعون وأصواتكم واصله آآخر البيت سكتت سديم لأن أحمد كان معصب .. ونوف مسحت دموعها وقامت وراحت فوق فاطمة : سالفة بيننا .. ؟!! أحمد بصوت معصب : وهاالسالفة تخلي نوف تبكي ؟!! فاطمة : ............ أحسن لك رح لزوجتك وهي بتقولك وش صار ؟! ياأحمد السالفة مب منا لا تفهمنا غلط .. رح لنوف فوق وهي بتعلمك ...؟!! أحمد : طيب .. نشوف وش آخرتهاااا وقام أحمد وطلع عنهم .. سديم : يـــــمه خفت والله .. فاطمة : ههههههه لا والله .. لاتلومينه ياحبيبتي .. هذي مهما كانت زوجته ودموعها أكيد غالية عليه .. ابتسمت سديم : الله يحفظهم فاطمة : آمين ويرزق الناس اللي عندنا سديم : يالدبة ما تملين من هالسالفة أبداً فاطمة : ماراح اسكت إلا إذا شفتك في بيت زوجك معززة ومكرمة سديم ويدها على خصرها : لا والله .. أبوي على غفلة ؟!!!! فاطمة : هههههههههههه لا أختك اللي تحب لك الخير .. يابعدي سكتت سديم وبادلتها بابتساااامة حلوووه *.*.*.*.*.*.*.*.*.*.*.*.*.*.*.*.*.*.* طلع احمد لنوف وكلمها وقالت له عن سالفة الحريم .. وهو تضايق مررررة .. أحمد : خلاص نطلع في بيت احسن لنا .. نوف : لا ياأحمد ؟! وخالتي مسكينة من لها ؟! أحمد : عندها ياسر وسديم .. فيهم البركة .. وإذا تزوج ياسر ينزل حرمته عند أمي نوف : لأ .. أحمد طلبتك أنا متعودة على خالتي ومستحيل أتركها بالهبساطة !! أحمد : يا طيب قلبك يا نوف .. قسم بالله أنك نادرة في الحريم .. نوف : لأني زوجتك بتقول إنك نادرة !! أحمد : لا والله .. بس الحقيقة أنتي نادرة .. الله لا يحـــــرمنـــــي منك ياقلبي نوف بأسف : والعيال .. أحمد : نوف هل سبق شكيت .. قلت أبي عيال ؟! نوف : لأ أحمد : أجل ليه تهتمين ؟! العيال متى ما ربك كتبهم لنا تم الأمر .. ما يرده أحد من الخلق ! نوف : أكيد .. بس من حبي لك اقوله .. أبي راحتك احمد : وانا راحتي معك .. ومعك انتِ بس يانوف .. سواء بعيال أو بدون عيال .. ابتسمت نوف ابتسامة رضى نوف : آآآآآآه تصدق ارتحت ياأحمد .. الله يريح قلبك مثل ما ريحت قلبي .. قل آآمين أحمد وهو مبتسم : آآآمين *.*.*.*.*.*.*.*.*.*.*.*.*.*.*.*.*.*.* كانوا جالسن الثنين بالصالة يسولفون .. وماجد يحاول يتقرب من منيرة .. يحاول يكتشف أكثر عن شخصيتها .. ومنيرة مادامت مع ماجد لوحدهم .. فمن الطبيعي تظهر الطباع على سجيتها من بينهم .. لكن ماجد متحمس لمنيرة بقوووة .. يبي يعرف كل شيء عنهاا ماجد : إلا منيرة نسيت أسالك الترتيبات اللي في غرفة النوم ذاك اليوم من هي ذوقه ؟! منيرة وهي تفكر : قصدك الحركات اللي فيه ؟ ماجد : أيه ؟! منيرة : ذوقي طبعا .. ههههههه حس ماجد انها تكذب ما يدري ليش ماجد : لا والله .. ويناظرها بنص عين .. طيب ليش تضحكين منيرة : هههههههههههههههههههههههه بس كذا .. تذكرت شيء ماجد : ضحكيني معك طيب منيرة : الله يهديك يا ماجد .. سالفة وعدت .. تنهد ماجد : براحتك حبيبتي .. إلا شخبار دراستك .. ناوية تكملين .. ؟! منيرة : أووووووه تركتهاااا .. خلاص البنت يا ماجد إذا تزوجت ماله داعي تكمل .. ماجد : وليش ماله داعي تكمل .. منيرة : خلاص زوجها بيصرف عليها ليش تتعب عمرها .. ماجد : مش القضية بيصرف عليها .. بس الشهادة زينة .. المستقبل ما يضمنه أحد .." علمه عند الله " منيرة : بس تعب ومضيعة وقت وجلوسها عند زوجها أبرك لها ماجد : انتي وصلتي ثالث صح ؟! منيرة : أيه وصلته بس هونت .. مانيب مكملته .. وععععع مالت على الدراسة مافيها إلا الهم ماجد : شكلك يامنيرة ما عندك طموح تكملين الدراسة منيرة : لا لا أبدااااا ماجد : حتى لو طلبته منك أنا ..! سكتت منيرة شوي وبعدين قالت منيرة : لأ .. ياماجد الله يهديك لاتجبرني ..! ماجد : أنا ماقلت أجبرك .. أقولك كملي الحين مادام ما عندك عيال وتونا في بداية حياتنا .. لأنك بتملين مع طول الوقت منيرة : لأ إن شاء الله مانيب ماله أبدا أبدا ماجد : ماأدري يامنيرة .. أحسك عنيدة ؟! منيرة : هههههه .. لأ بالعكس حليوووووه لأبعد الحدود .. ابتسم ماجد بسخرية وبعدين قال وااااضح * * * * * * كانت بدور جالسة على النت وداخله الشات وسوالف مع خالد ومع مجموعة من البنات والشباب كلمتها سارة وحاولت معها تتركهم لكن بدون فائدة .. بدور مصرة على الدخول من دون ما تنتبه لخطورة هذا الأمر .. بدور فرغت كثير من عاطفتها بالشات ومع حبيبها خالد .. وشخصيتها دائما مغرورة ومتكبرة حتى في الشات .. كل من يكلمها .. يحسها تنفخ وهي ترد سمية : بدووووووور بدوووووووور بدور : هاااه وشو . .. وش فيك ؟؟! سمية : زياااد طاح وانكسرت رجله ؟! قااااعد يصيح تحت .. مسكييييين بدوووور بسرعة تعااااالي انزلي وتقوم بدور وتنزل تحت بسرررررعة بدور : وشفيكم ؟؟ وش فيه زيااااد ؟! أم ماجد : بسم الله عليك وشفيك انتي ؟؟ زياد عند اهله ما فيه إلا العافية ؟! بدور: ســــــــــمـــــــــيووو وه ؟! اللــــه يأخذك قولي آآآمين سمية : ههههههههههههههههههههه لعبت عليها .. مسيكينه .. أصلا امي تقول ناديها تشرب شاهي .. وناديتك بدور: ياااااابة .. وزياد ؟؟ سمية : أصلا أنتي بقرة .. وتطلع لسانها لهاااا وأصلا زيادة عند اهله ولا ماتدرين .. تهووووو .. مسيييييكييينه .. ههههههههه وترووووح تركض قبل تمسكها بدوووور بدور: يالحيوااانية .. لعبتي علي .. هالبة خلتني أقطع النت أم ماجد : أبرك اجلس معي واشربي معي الشاهي .. وانتي ماغير ماقبله هالبلاء 24 ساعة .. كأنه أهلك .. جلست بدور على الكنبة وتنهدت بقووووة .. مالي الأ أجلس شوي أروق .. هالمشينه طيحت قلبي اللــه ياخذهاااا أم ماجد : لا تدعين على اختك ..؟! بدور وهي تلف بفمها على جنب وتتهزأ : أيه نسيت .. أستغفر الله .. أحد يدعي على سمية .. وأمها سكتت ولا كأنها سمعتهاا *.*.*.*.*.*.*.*.*.*.*.*.*.*.*.*.*.*.* كانت منيرة جالسة في الصالة تقلب في القنوات .. وتاركه ماجد في الغرفة .. مصدع راسه بالمرة وما يقدر يتحرك من قوة هالصدااع ومنيرة ماسكه الريموت كنترول ومنتبهه جدا لموضوع حواري .. ماجد بصوت عالي : منــــــــــــــيرة ؟! منيرة : نــــــــــــعم ماجد : تـــــعالي .. شوي منيرة : طيب .. طيب .. وقبل تقوم قلبت في القنوات ولقت لها خبيرة تجميل .. تشرح كيفية عمل مكياج العروس فتحت فمها وجلست تناظر ونست أن ماجد مناديها وشوي سمعت صوت مسج فتحته ولقت مكتوب فيه " منيرة الله يعافيك هاتي لي شاهي أو بندول .. أو أي شيء راسي بينفجر... بسرررررررعة " وجلست الجوال على الكنبة وتوها بتقوم إلا اتصال من إحدى صديقات منيرة منيرة : هلاااا والله وغلااا أروى : أشلونك منيرة .. ألف ألف مبروووووك كلووووووش منيرة : ههههههه الله يبارك فيك .. وينك من زمان .. أروى : أنا حضرت عرسك .. الله ياسلام وش هالزوج المزيون .. والله العظيم يهبل مررررة منيرة : ههههههه إيه كلهم يقولونه .. بس مب طالع أحسن مني اورى في نفسها واضح .. أنت شرق وهو غرب أروى : هههههههههه لا كلكم زينين والله منيرة : وش رأيك فيني ذيك الليلة ..؟ أروى : حلووووووة ما شاء الله تهبلين .. ما صدقت يوم شفتك ؟! منيرة : ههههههه ليه ؟! أروى : تغيرتي يا منيرة مرررة في ذيك الليلة ؟؟ وجلست منيرة تسولف و تضحك وماجد يسمع صوت ضحكاتها لحد عنده وهو غير قادر على الحراك ..! رفع ماجد راسه شوي حتى يقوم أو ينطق .. لكن الألم كان اقوى منه .. فرجع ورمى بنفسه بقووووة على السرير لعله ينووووووم ويرتاااح