[أحمد اسماعيل]

يا ترى لسه بتدعيلي !!

عارفه يامه

انا حاسس ان الموت
ماخدتش منك
غير الطرحه
والجلابيه السوده
...
ما انا كل ما اعدي
جنب الاوضه
اسمع صوتك..
وانتى بتضحكى ع الدنيا
وبتدعي لي ...

روح..
ربنا معاك..

ها تسافر..
وهاترجع مجبور الخاطر
وها استناك...

طب اسندى على كتفى
بكره تقومي
بكره تخًفى

عارف مين
بيقع ويقوم
اوعى تدور ع الدفا
فى فلوس وهدوم

ومتنساش تحوش شويه
اصحاب..

وافرح اووى..
لما يدق الباب
وتلاقى حد بيحضنك
لوجه الله...

ياه
فاكره يامه لما كنتي
تعملى بصاره
وتدى منها لابله سارة
يرجع الطبق رز باللبن
يروح لام حسين..
يرجع صنيه بسيسه

يــاه
معقوله فيه كده قلب..!
عارفه يامه
النهارده بقيت بخاف
من اى حاجه
ومن اى حد..
بخاف بجد

مشيت كتير يا امي
لسه الفرح بعيد

يا ترى لسه بتدعيلي
يا ترى لسه بتدعيلي


على سلامة

[YOUTUBE]9eLpLWBldww&feature=related[/YOUTUBE]

_____________

يا ترى لسه بتدعيلي !!