في بيت عامر: سعيد وعامر وسمر والام ومنيره وعنود زوجة سعيد مجتمعين :
الام: شدي حيلك يامنيره مابقالك انشالله غير شهر وتولدين بعونة الله
منيره: الله كريم ياخالتي
سمر: انا عندي احساس ان البيبي اللي بتجيبه منيره انشالله بيكون ازين واحلى من عيالك ياسعيدو
عنود: اسم الله على عيالي من عمرهم مزايين ومحد يصك عليهم
سمر: نشوف....هذا ولد عامر مو شويه
سعيد اللي كان مو منتبه مع سوالفهم وكان مندمج بالتلفزيون : وشهالقناة الخايسه ذي؟؟؟
عامر: سعيد وشفيك؟
سعيد: انا قلتلك ياعامر لاتحط ديجتال بس انت ماطعتني..
سمر: ليه ياحبيبي؟؟؟حلال عليك وحرام علينا...هذا انت حاط بشقتك واحد
سعيد: انتي تسكتين..كم مره قايلك لاتدخلين لما اتكلم مع عامر
عامر: انت ليه معصب؟؟
سعيد: شف هالبنات كيف يترقصن..وتخلي خواتك يناظرون؟؟
عامر يبتسم: ياسعيد وانا اخوك..هذي الاغنيه يسمونها البرتقاله ومابقى احد ماشافها ..
الظاهر بس انت..
يقاطعه سعيد: وانت راضيلك ...اهلك يشوفون
سمر: حره على قلب العذال اعرف ارقص مثلهم ...
يلتفت سعيد على سمر وهو معصب ويرشها بقلاس الماي اللي عنده...بينما يضحك الجميع
::::::::::::::::
الكويت:
ساره: والله يمه زمان على مها تصدقين صارلي سنه ماكلمتها
ام ساره : مها الله يعينها شكلها مو مرتاحه
ساره: والله قلبي يعورني عليها احس ان فيها شي...ياليتك تحافظ على مها يافيصل...مها جوهره وصعب تلقى مثلها في هالدنيا..
ام ساره: الله يوفقها انشالله ... مها تستاهل
ساره: شوفي الدنيا يمه... مها اللي كنت انا وياها مثل الاخوات واكثر..من كنا صغار واحنا مع بعض.. افترقنا فرقى طويله... وجراح اللي عمري ماحسيت فيه ولاكنت افكر
مجرد تفكير فيه...راح ارتبط فيه طول العمر
ام ساره: هذا الزمن ... يجمع ويفرق ..
يقاطع كلام ام ساره التلفون اللي يرن...:
ساره: ويييي هذي اكيد امل مالي خلق لها
ام ساره: قومي كلمي .. خاف موإهي؟
ساره: يمه اعرفها هذي حزتها للطراره
ام ساره: بقوم انا اكلم واشوف منو
ترد ام ساره على التلفون وهي تطالع بنتها وتبتسم : هلا امل.... لاساره..فوق نايمه بدارها
:::::::::::::::::
سمر: اهلييييين
محمد: هلا حبي
سمر: وينك؟؟؟ قاطع عني مده طويله؟؟
محمد: توني مكلمك العصر ..صارت مده طويله ؟؟
سمر:ابغاك على طول تكلمني
محمد: خلي عنك ذا الهرج ... سمر انا مشتاقلك بالحيل
سمر بدلع: اشتاقتلك العافيه
محمد: مااقدر اصبر
سمر: ماني فاهمتك؟
محمد: ابغى اشوفك
سمر: تشوفني؟؟؟؟
محمد: إيه والله ابغى اشوفك...
سمر: بس انت ...ماادري فاجئتني ؟؟
محمد: مليت من السوالف والكلام..ابغى نتواجه ...انتي موكنتي تحنين نتقابل ..وانا الحين عرفت ان البعد طاغي وجبار ..
سمر: انا الحين مااقدر
محمد: ماتقدرين؟؟ ليه ؟؟
سمر: انا اقول بالمدرسه احسن..مابقى غير شهرين على المدرسه
محمد: وتظنين هالشهرين شويه..حرام عليكي ياشيخه ارحميني..انا لازم اشوفك
سمر: صدقني الحين مااقدر ..
محمد: اذا قصدك اهلك ..طلعي أي عذر..قولي انك رايحه تحظري حفل زفاف وحده من صديقاتك
سمر: سايقنا فتان وممكن يعلم علي
محمد: لاتصيرين عاد هبله.... وفكري بأي طريقه المهم نتقابل
سمر: خلاص افكر واتصل عليك
محمد: موتطولين علي..ترى بموت من الشوق
سمر: اسم الله عليك من الموت
محمد: طيب حياتي .. تبغين شي؟؟
سمر: مليت مني؟؟
محمد: لاعمري..واحد يمل منك؟؟ بس اسمع الوالده تناديني وبروح اشوفها شتبغى
سمر: والوالده شمقعدها الحين؟
محمد: والله مدري عنها..يلا حبي مع السلامه
سمر عجبتها الفكره حتى هي كان ودها تشوف محمد..بعد ماوثقت فيه وتأكدت انه لايمكن يأذيها...... مسكينه ماتدري انهم واحد وماكو فرق بينهم .... سهرت لي الصبح وهي تفكر بخطه ...ولقتها اتصلت بمحمد بس طلع نايم ومايرد على اتصالاتها..
::::::::::::::::
تزور فاطمه امها..:
ام فيصل : هلا والله زارتنا البركه
فاطمه: هلا فيك يمه
ام فيصل: الا عيالك وين؟؟؟ماجبتي غير اميره؟؟
فاطمه: عند عيال عمهم مابغوا يجون
ام فيصل: لايكون سعد مانعهم يجون عندي؟؟
فاطمه: ليه تقولين كذا يمه؟؟سعد مايعلم عياله على القطاعه
ام فيصل: بعد مامات عبدالعزيز الله يرحمه .. ماعاد شفت العيال
فاطمه تمسح دموعها: لاتربطين الاحداث يمه ..ولاتظنين ان سعد بيمنع عياله من قدرهم
ام فيصل:خلاص يافاطمه لاتبكين...عزيز مات والله يغفرله والحي وانا امك ابقى من الميت..شوفي لحمك كيف راح وعيالك ماعدتي تهتمين فيهم..ترى مايجوز اللي تسوينه في عمرك
تدخل مها عليهم وتسلم على فاطمه
ام فيصل : خلصتي شغلك؟؟
مها: إيه
ام فيصل: ماعندك دار تقعدين فيها؟
مها: خالتي انا بس جيت اسلم على فاطمه
ام فيصل: طيب روحي تقلعي لدارك..مدام سلمتي وخلصتي .. خلي البنت تقعد مع امها
فاطمه: خليها يمه تقعد معنا...تعالي مها اقعدي بجنبي
ام فيصل: مدام هالوجه القبيح بيقعد انا بقوم عند الجيران شوي وراجعه.. بشوف البضاعه اللي جايبتها ام مازن.. مراح اطول
فاطمه: الله معك يمه
تروح ام فيصل وتقعد مها عند فاطمه ..
فاطمه: ها يامها وشخبارك..عساكي مرتاحه
مها :........
فاطمه: وشفيك؟؟
مها: فاطمه انتي اخت فيصل الكبيره ولج كلمه عليه واكيد يطيعج ..
فاطمه: مها .. انتي طلبتيه وهو ردك؟
مها تحاول تمالك احزانها: قوليله يطلقني
فاطمه: لاحول ولا قوة الا بالله..مااشين ماطلبتي يامها..هذا طلب تطلبينه ؟؟
مها: مااقدر اتحمل اكثر..تعبت من الحياه..تعبت يافاطمه والله تعبت .. اول ماشفتج استانست وقلت محد بيرحمني غير فاطمه
فاطمه: طيب ليه تطلبين الطلاق؟
مها: انتي عارفه ان حياتي صارت جحيم واني تحملت المستحيل .. اخوج تغير علي حيل وماعاد هو فيصل الاولاني صار يتجاهلني حيل تدرين متى اخر مره جمعنا سقف واحد..كان قبل ثلاث شهور..مدام يكرهني للهدرجه ليش مايطلقني؟؟
فاطمه: مها..انتي رحتي لطبيب من قبل
مها بخوف: ليش؟؟
فاطمه: ماادري..جسمك كله يرتجف حتى شفايفك .. مها وشفيك اسم الله عليك
تقوم مها لغرفتها وتقفل عليها الباب..وتقعد بزاويتها...وهي تعض اظافرها وتكلم نفسها : معقوله اكون مريضه ؟؟ معقوله فيني شي؟؟لالالا انا مافيني شي..الحمدلله انا بخير وبكامل قواي العقليه ..
وبينما مها في غمرة تساؤلاتها ...تضرب فاطمه عليها الباب..:
فاطمه: مها افتحي الباب ...وشجاك؟
مها:..........
فاطمه: مها افتحي الباب.. وكلميني ...
مها:.........
فاطمه: مها لاتسوين في روحك كذا.. واللي تبينه يصير انشالله..مايصير الا اللي يريحك بس لاتسكتين كذا
تثور مها وتصرخ : اتركوني في حالي...خلاص انا مابي شي ... خلوني ..انا تعبت ياناس منكم ومن دنيتكم.. الله يرحمني برحمته..انا ماارجي من الناس شي .. انا مابي منكم شي
تستغرب فاطمه من ردة فعل مها وتصعد لسلوى وتحكيلها اللي صار بينها وبين مها :
سلوى: ماعليك منها يافاطمه هذي عياره
فاطمه: كيف عياره؟ اقولك تنتفض قدامي كنها تموت
سلوى: الله يسمع منك
فاطمه بحده: ســـلـــوى
سلوى: اسمعي يافاطمه..مها هذي غريبة الاطباع وفاليوم الواحد لها عدة شخصيات..عارفه البنت المعقده.. يعني مرات تصير مطيعه ومرات تحقرك ماترد عليك..وانا اذكر مره فيصل طلب منها شغله..ناظرته بنظرات غريبه وتركته وراحت وقتها كان فيصل معصب وماقدر يتمالك نفسه راح لها وجرها مع شعرها وهو يصرخ ويهدد فيها توقعين وش ردة فعلها؟؟؟ تصوري لاصرخت ولابكت ..بعد ماترك شعرها ناظرته بنفس النظرات الغريبه وكملت طريقها ولاردت عليه...ومرات تبكي على اتفه الاسباب .. يعني لو قلتيلها مها ممكن مويه ؟؟ تنزل دموعها مثل السيل وكأنك ذابحه اهلها... ومرات ياام عبدالعزيز اشوفها تكلم حالها وتبكي او تكلم حالها وتضحك..احسها يافاطمه مخبوله
فاطمه: خبلتوا فيها ياسلوى
سلوى: واحنا ايش سوينالها؟
فاطمه: ماعليه ..كملي بعد
سلوى: واللي استغربت منه انها بسرعه تعرق لو كان يوم بارد
فاطمه: وفيصل... شلون علاقته معاها؟؟
سلوى: قصدك....
تقاطعهافاطمه: إيه
سلوى: لا فيصل ماينام عندها
فاطمه بإستغراب: ليه
سلوى: هو يقول انه حاول معها كذا مره بس هي ترفضه بطريقه شرسه وعنيفه وقبل كنت دايما اسمع صراخها وصياحها.. خالتي تقول انها مجنونه
فاطمه: للأسف مها مريضه
سلوى: مريضه؟؟؟؟
فاطمه: تعاني من مشكلات نفسيه ولازم تعالج
سلوى: واذا ماتعالجت؟؟
فاطمه: الله يعلم شيصير فيها ...تدرين انها تبغى الطلاق ؟؟
سلوى: من صدقك؟؟
فاطمه: اللي مستغربه منه ان فيصل رافض .. مع انها خلاص ماعادت تصلحله
سلوى: صدقيني يافاطمه ان مها وجودها في البيت شغاله مو اكثر..ماني عارفه فيصل ليه متمسك فيها
فاطمه: والله ماادري؟؟... هذي مو كأنها امي تنادي ؟؟
سلوى: امبلا هذا صوت خالتي
فاطمه: قومي خلينا ننزل تحت وجيبي ضويحي معك
سلوى: يلا
:::::::::::::::::::::::::::::::::::
سمر: اسمع محمد ... اسوي روحي مريضه.. واطلب من السايق يوديني للطبيب ومنه اطلع واروح معك
محمد: حلوه..خوش خطه .. انا عارف ان زوجة المستقبل عبقريه
سمر: طيب أي يوم؟
محمد: من بكره ..واشرايك؟
سمر: صار
- وفي اليوم الثاني :
سمر: آي يمه ماني قادره اتحمل
الام بخوف: خير يابنيتي وشفيك؟
سمر: راسي يمه..احس ان الدنيا تفتر فيني
الام: قومي وانا امك خليني اوديك للطبيب يفحص عليك
سمر: لا خلاص مايحتاج..انشالله يخف
الام: والله حالتك ماتطمن .. مايرتاح قلبي لين تروحين للطبيب
سمر: ماابغى اتعبك معي يمه
الام: لا مافيها تعب .. بروح اجيب عباتي
سمر: لالالالا انتي لاتروحين..انا بروح لحالي
الام: لا مافيه روحه لحالك تطيحين بالطبيب محد يدري عنك
سمر: خلاص مااروح للطبيب
الام: يعني الا لحالك والا ماتروحين ؟؟
سمر: يمه والله انا ماابغى اتعبك معي
الام: يابعد عمري يابنيتي .. خلاص روحي بدلي ثيابك على مااقول لشاهين يشغل السياره
تحاول سمر قد ماتقدر انها تخبي فرحتها لاتبين من عيونها......
تروح مع السايق للطبيب وتدخل من الباب الامامي وتطلع من الخلفي .. في المكان اللي واعدت محمد فيه تركب معاه السياره :
محمد: هلا والله بالغلا...مااصدق عيوني واخيرا انا مع سمر حبيبة قلبي
سمر: لاصدق حبيبي...
محمد: سمر عندي شقه صغيرونه واشرايك نروح نقعد فيها؟
سمر: لالا رجاءا خلنا نفر بالشوارع
محمد: انا ماعندي مانع بس اخاف احد يطب علينا وبعدين تصير فضيحتنا بجلاجل..واخوانك لو عرفوا ممكن يذبحونك
سمر بحذر: وشقتك وين؟
محمد: قريبه من هنا ...على بعد شارعين
سمر: بس انا مااقدر اتأخر
محمد: ياعمري كلها نص ساعه نسولف مع بعض.. بعدين انا ابغى اشوفك مايصير كذا..
سمر: طيب خلاص ودني...بس انت متأكد ان مافيها احد
محمد وهو فرحان : متأكد ياحلوتي متأكد
يروح محمد للشقه ومعاه سمر الغبيه اللي انقادت لمصيرها بخطى ثابته .. ضعف الوازع الديني واهمال اهلها وعدم مراقبتهم لها والدلع اللي كانت محاطه به من كل الجوانب....كل ذلك افسدها .. تدخل مع الحبيب المزيف للشقه ... و...