سـم ياشاعـر تعـوذ مـن ابليـس ووحــد الله
واذبح الضيقة ودرب اليـاس بالصـدر الشمالـي
ياخـوي البـدر يـاجـار النـجـوم المستقـلـه
الفضا صـدره وسيـع ولايضيـق مـن الاهالـي
كـل ماثـور عجـاج أفكارهـم بـالارض خلـه
قل سلام الله على وسـع الفضـاء وانـا لحالـي
مادريـت ان الهـوا لـه بالوطـاء تسعيـن ملـه
لين يجمع لك سراب القيض في خضـر المفالـي
والمدى ماضـاق يارجـال مـن صفحـة مجلـه
ضيقـوا فيـا مساحـات الجـزال مـن الهزالـي
مشكلـة لا جيـت للناقـص بشبـر الوجـه كلـه
والخطا وان جيت سوق الرخص وانت انسان غالي
كـل عيـنٍ ماتعـاف النـوم فـي جفـن المذلـه
فالهـا سهـر الليـال المقبـلات بكـل حـالـي
والقصيد اللي خذوه النـاس سيـف بـدون سلـه
يذبحون ويسلخون وهـم علـى حمـر الزوالـي
يوم ماباقـي علـى ظهـور المهـار الا الاجلـه
كل يـومٍ تلقـح العاقـر ف ابـو زيـد الهلالـي
يـوم طـاح الريـح ووجيـه الليالـي مسفهـلـه
جت علـومٍ مالهـا وسـط الحلـوق اول وتالـي
يمطرون ارض القصيد بسحب صيـفٍ مـا تعلـه
لـج راعدهـم ولا فـزت لهـم جـرد السهالـي
في زمانٍ فيـه حتـى الاخيلـه صـارت مخلـه
شف بنـات افكارهـم لاهـي بنـات ولا عيالـي
علمـوا بنـت الخيـال اللـي نواعسهـا مظـلـه
لا تضايـق كـل ماغـنـوا لـهـا يـالالالالـي
ان نشف ريق الكلام العـذب مـن صـدري تبلـه
وان بغت تسبح مع الغيمه تعـزوى فـي خيالـي
يحسبون البدر يـوم انـه نحـف لاجـل الاهلـه
مايعـود كامـل الاوصـاف فـي بيـض الليالـي