حلو ياحلو رمضان كريم ياحلو
حل الكيس وأدينا بأشيش لنروح منجيش ياحلو
كلمات جميله بريئه تخرج من فاهي بتلقائية وبراءة الطفولة
وقتها يبدأ من بعد الافطار أجري بسرعه وأولع فانوسي الإزاز الصغير أبو شمعة
تشبه صباعي الابهام الصغير وفي طوله تقريبا
أهز فانوسي يرقص ويرقص ضوء الشمعه جواه
ويرقص قلبي كمان ويفرح لفرحتهم
وضفايري الحلوين وخطواتي تنط تسابق زمني
يلا أدينا حلولي
شوية بلح ولا قرش ولا مليم صغنون
يخلوني في منتهى السعادة
أجمع أنا وصحابي الحلولي وأفضل ألف كتير حوالين منطقتي لغاية قرب السحور او لحد مااتعب وفي الأخر يتفاخر كل منا بما جمعه ونشكر ربنا
لأ وأيه لازم نقسمه بيننا بالحق
لكن ياويلي لو الشمع خلص أو انطفت اللي متركبه جوا الفانوس
وقتها أتحرم من الحالولي ولا حتى ماأغنيش
حلو ياحلو رمضان كريم ياحلو
حل الكيس وأدينا بأشيش لنروح منجيش ياحلو
دي أحلى بعض ذكرياتي
والجايات جاية
همس