حبيبتى فرقعتنى
جميل انك تخوض تجربه عاطفيه
الاجمل انها تنتهى بالفشل..وتتخلص معاها من المسئوليه..
ترمى الدبله..ماتفكرش فى الشقه..متسألش عن سعر أوضة النوم..وماتصحبش حد عشان يعملك تخفيض فى قاعة الزفاف..ومتستهلكش عربية صاحبك المرسيدسوهى بتنقلك للعالم الاخر..دنيا الزواج.
لكن نعمل ايه؟
البنى ادم مننا غاوى مسئوليه..وزى ماقريت فى كتاب علم نفس مش فاكر اسمه..الانسان..بيحب التعب والبهدله ..عشان يحس انه مهم.
مفيد فوزى قال "المسئوليه أحلى مرض"
ربنا يشفى الجميع ياعم مفيد..زى ماربنا شافانى..وخلصنى من المسئوليه..أو هى اتخلصت منى
أنا اللى أخدت البمبه ..حقيقى مش تهريج
وصلنى الخبر عن طريق واحده صاحبتها..قالتلى"كل شئ قسمه ونصيب..وهى مقدرتش تقولك الكلام ده ..بس بتقولك ياريت تبقوا صحاب زى الاول"
قلب العاشق دليله
كنت متوقع النتيجه اللى فاتت دى..لما بدأت تكدب عليا كتير..خاصه لما بسألها"مابترديش ليه ع التليفون؟"..فتقول مبررات كلها كدب فى كدب.
ورغم عن كده ..وكعادة المغفلين العشاق ماصدقتش كلام صاحبتها
اتصلت بيها"الكلام دا حقيقى؟"..ردت "انا شايفه ان كده أحسن"
أسبوع مكتئب ..ماشى فى الشارع سرحان..بفكر فى حاجات كتيييير..سؤال ملاحقنى فى كل مكان..بيطاردنى بعلامة استفهامه اللى بتدور فى راسى"ازاى؟"
العلامه شغاله تلف ..تلف،اركب ميكروباص..فضل شاكر بيغنى فى ال اف ام.."بياع القلوب باعنى..حبيته ليه خدعنى..كدب عليا وصدقته..كان كل زنبى انى عشقته"..عندى رغبه فى البكا..رغم انى سمعت الاغنيه قبل كده100مره وماحستش بحاجه.
انزل من الميكروباص..اشاور لتاكسى.."بدون أغانى من فضلك"..وافق السواق على الشرط .
اروح البيت..أطلع صورتها..بتضحك فى الصوره ..اتغاظ اكتر..ارميها على الارض ..اشيلها تانى..واركنها بعيد.
امسك الموبايل 20 رساله بأسمها..كلهم غرام فى غرام..احذف فورا..لا ماتحذفش..لا احذف
احذف اسمها والرسايل من الموبيل ..بس المشكله انى حافظهم فى دماغى.
افكر فى حاجات كتير حصلت بينا..شريط الذكريات يشتغل....
هان عليها الفول والطعميه فى"اخر ساعه"؟
هانت عليها طلعات السينما..صحيح الافلام اللى دخلناها كانت بايخه"دى ازمة موسم"....بس احنا برضه ماكناش بندخل السينما علشان نتفرج.
صحيح ان انا مابعرفش اقول كلام حلو زى مابتقولى ..وصحيح انى عصبى حبتين..وصحيح الشغل واخدنى حبتين..بس دى كلها حجج مش كافيه عشان تسيبنى.
الغريبه.. ان احنا كنا متقابلين قبل ماصاحبتها ماتقولى على الخبر بأسبوع..وهات ياحب رغم ان القعده بدأت - كالعاده- بخناقه..بس كانت فيه مؤشرات للنهايه..يعنى أول مره كلامى مايعجبهاش..ده غير اعتراضتها.."بلاش الشقه دى..والشغلانه دى..والاكل ده....و...و..."
اللى تاعب قلبى نى ماكنتش بحبها فى الاول..لأنى ماكنتش عايز اتورط وانا كده ف عز شبابى ..هى اللى قعدت تتقرب منى ..ولما وقع السهم والمكتوب ..حبيتها..اتورط قلبى ..وكلمت والدتها واختها..دخلت جمعيات عشان احوش فلوس..جبت شقه ايجار قديم..وقلت للناس كلها..طب اودى وشى منهم فين دلوقتى.
واللى غايظنى انى خسرت كل البنات اللى اعرفهم بسببها وعشان خاطرها.
فرقعتنى
لكن ورغم ان الواحد صعبت عليه نفسه ..لما النهايه جات منها..الا انى اكتشفت ان دى ميزه عبقريه..يعنى الواحد مش هيعزبه ضميره..ومش هيمنعه ان يحب واحده تانيه.
بعد تجربتى العاطفيه
اسمحوا لى ان اقدم لكم عصارة حبى فى نصيحه
خليها تفرقعك احسن
ضميرك هيبقى مستريح وانت بتقلب صفحه وتفتح صفحه على واحده تانيه.
وصدقنى كله بيدوب ..يعنى بيدخل الخلاط..قصدى الايام بتفرمه.
المهم اروح ادور على حبيب تانى..تقولوا ايه؟.. مرض.
منقووووووووول
هههههههههههههه