رامى محمد زين يكتب: آه يا بلد
أه يا بلد عايشين جواكى.. والأسعار بتغلى مليون مره …نفسى أعرف أيه مغزاكى ... تعيشينا بأسعار بلاد بره ... هو إحنا ف يوم زعلناكى ... عشان تولعى أسعارك نار... غليتى علينا اللحمه .. ودلوقتى بتغلّى الخضار...ولما تدينا العلاوه ... بتاخدها منا التجار... زى السكينه ف الحلاوه ... بعد ما تعلى الأسعار ... ونروح نشتكى للحكومه ونستنى القرار...وشكاوى هنا بالكومه على كرسى الأنتظار...ولو ردت علينا ترد متأخره ... وكأنها يا بلد علينا مستكتره ....ناكل كيلو فاكهه ... يكون مسكروله نكهه.... ميكونش محقون بكيماوى ... مليان أمراض وبلاوى ...يا طماطم مالك مجنونه ليه ...امبارح بقرش النهارده بجنيه ...ومالك يا فاكهه منفوخه ليه ... هو الحقن زياده ولا أيه ... ف النفخ أيه أخرك يا ريت شويه تفشى ... يحسن لما باجى أكلك بخاف تفرقعى ف وشى ... دى الأسعار بتعلى من غير دراسه ... والتعليم بقى نار والكشكول والكراسه ...أه يا بلد ده الحال وبقينا صيده.... حتى أسألى البقال الجنيه يجيب كام بيضه ... ومهما حكينا يا بلد مفيش حصر ....بتعملى فينا كده ليه ده احنا حتى بنحب مصر.