[ساجده]

كتب على سلامة
المطر يا ابنى
حاجة تانية خالص
غير عربية الرش..
ساعات أقضى الليل بحاله
وأنا بدور ف كوم القش..
عن كلمة
أو غنوة فيها من ريحة سمارة..
لكن ف الآخر بنام وأصحى
على نفس الوش..
عارف..
أنا غيرت مكان السرير
بقى قفايا للدولاب ووشى للحيط
بس برضه مش مرتاح..
يا سيدى..
أهى نومة والسلام
يعنى اللى جاى م الأيام
هايكون أد اللى راح..
على رأيك..
عموماً..
كلها سواد الليل
ويطلع النهار
وتتفرج على ميدان الجيزة..
وتعرف إن المشى جنب الحيط
عمره ف يوم ما كان ميزة..
وإن أنا النجار
اللى ساب كل شىء حواليه يزيّق..
أنا اللى رميت البراح
وسكنت ف ركن ضيق
فوتك ف الكلام..
ابتدينا نسمع عن التغيير..
لكن بعد هات وخد..
وروح وتعالى..
وكلام كتير..
مفيش شىء اتغير يا ابنى
غير وضع السرير..
وقفايا اللى بقى باصص ع الدولاب..
ياه..
هو إنت لسه يا ابنى
ف نفس الصفحة
ونفس الكتاب!
أمال بتاخدوا إيه ف المدرسة؟