قصيدة / بايعها
ما كل ضحكه تهز القلب يشبعها
وما كل دمعه تمر العين تبكيها
من شاف ضحكة زماني قال : بايعها
ما يدري اني فقير ما اقدر اشريها
يا اللي نثرتي سنين كنت اجمعها
تكفين هذي حصاد العمر لميها
كم كنت اهدد بك الدنيا والوعها
كل ما اذكرتني..واذكرها وانسيها
بيدينك اللي احس وكن اصابعها
تقول : بدري على الضيقه وطاريها
بعيونك اللي اناديها وانا معها
الله ياكم زعلتي يوم اناديها
كنتي تحسبيني اسرح عن مدامعها
وانا ما غير اتهجى رحلتي فيها
اي والله اذكر عيونك يوم اطالعها
اقرا بها انشودة كنا نغنيها
كانت تروح وتهج البال واتبعها
تاخذ عيوني من الحزن وتوديها
لايام كنت ارمي بدنياي واجدعها
أيام ما .. كنت اكحلها.. ولا اعميها
طفل سلاحه دموعه يوم يزرعها
من فوق خده وكف ابوه يرضيها
اكبر همومه من دروس يراجعها
واقصى طموحه متى ينجح ويرميها
طفل وكل امنياته كان مطمعها
يكبر وتكبر هنوف كان يرجيها
كبرت..و كبرت.. وضعت..وخفت اضيعها
خليت همي رضاها يوم اداريها
كل ما طعني زماني رحت ادلعها
يوم الزمن ما ترك لي غير اياديها
ما كنت افكر تجي في يوم واسمعها
تقلب حياتي من اعلاها لواطيها
حتى اقبلت تبكي الدمعه وتردعها
ثم قالت..وكن موتي بين اشافيها:
جيتك أحلف عيونك قبل اودعها
ما اشوف دمعة عتبها لين اخليها
تبغى تروح وتخليني واطاوعها
تبغاني اسكت واقول : الله يهديها!!
يا أول احلام روح كان دافعها
انك سندها وحاضرها وماضيها
يا سنيني اللي قضيت العمر اجمعها
يا ذكرياتي من اولها لتاليها
لا تتركيني اعيش العمر بايعها
ضحكة زماني بدونك ما اقدر اشريها