هل انت مصرى ؟؟
بعيدا عن السياسة وتغيير النظام
بعيدا عن المؤيد والمعارض
بعيدا عن مبارك او البرادعى
احنا هنا علشان سؤال واحد
إزاى ابقى مصرى ؟
المصرى اللى معدنه فى وقت الشدة ظهر
اللى شال شومة او عصايا على باب بيته يحميه
اللى خلى المسلم ويا المسيحى بايدهم علم مصر رافعين
اللى صوتهم اترفع لكل العالم صارخين
احنا المصريين
امريكا والا اسرائيل والا ايران والا العالم كله شايفين
المصرى موش جبان والا ضعيف
ولو عاوزين تعرفوا قيمتنا تعرفوها من الناظرين
احنا شعب متسامح بس موش ضعيف
بأيدينا نعمل اى حاجة
حتى المستحيل
إزاى أبقى مصري ؟
حملتنا لكل الشباب ولكل الجيل
احنا جيل التصحيح
ولازم نبدأ بأنفسنا ونعمل المستحيل
موش هانقف فى مظاهرات
موش هانهتف بالعداوات
موش هانضرب والا نخرب والا حتى نرفع الشعارات
احنا هانبدأ بحملة للتصحيح
حملة هدفها ازاى ابقى مصرى أصيل
ازاى نخلى العالم كله يحترمنا غصب وتقدير
إزاى أبقى مصرى
هانبدأ بنظافة بيوتنا وشارعنا
هانشارك بزرع شجرة او زرعة قدام بيتنا
هنرجع ننور شوارعنا ونركب لمبات وفوانيس
هانساعد بأى حاجة علشان بلدنا تفضل دايما جميلة
هانرفض الرشوة ونحارب الاستغلال
هانرجع القيم ونرجع الايمان
كل واحد فينا هايبدأ بأهل بيته وأسرته
نمد ايدينا ونخبط على جارنا ونقوله
عاوزين نرجع مصر اقوى وأجمل مما كان
صدقونى مصر ساعتها هاتتغير من غير شهداء
وهاتبقى أحلى بلد فى الدنيا بالشباب
ومن هنا هاتوصل لكل البلاد
ايد لوحدها متصقفش
ايدنا كلنا مع بعض
( أزاى ابقى مصري )