[عادل الريس]

سبب إختلاف طباع الصعايدة والبحاروة


سبب إختلاف الطباع بين الصعايدة والبحاروة
وهل بسبب إختلاف جيني ؟

طبعا في البداية كان فيه إختلاف جيني , يقل ويتلاشى بالتمازج والتجانس مع مرور الوقت
والأصل الجيني بيأثر , طبعا , لأن دول كانوا دولتين دولتين , وشعبين مختلفين

وده معنى كلمة : قطرين

ولأن الحاجة هي أم الإختراع والمبادرة
ولضرورة تضافر الجهود الصعيدية والبحيرية للسيطرة على النهر الجامح
قامت الدولة المركزية , وأجبرت القطرين على الإتحاد في دولة واحدة

الحاجة للإتحاد كانت أكبر في القطر الصعيدي ,
لأن النيل بيصب في الآخر , مع نهايته في أراضي ومستنقعات الدلتا , فيقدر البحاروة يزرعوا ويربوا حيواناتهم طوال شهور وأيام السنة ,

أما الصعايدة اللي النيل جاي فايت عليهم يادوب يزرعوا شهرين تلاتة , وبقية السنة يعانوا من قلة الماية وأحيانا من المجاعة

عشان كده المبادرة للتوحيد بدأت بملك صعيدي من أبيدوس سوهاج هو الشهير أوزير" اوزيريس ,5000 سنة قبل الميلاد , وبعد 1000 سنة تقريبا قلده بعد إنحلال الإتحاد الأول الملك "العقرب" من أسيوط ,, وبعده بحوالي 700 سنة إنحل الإتحاد تاني , فإضطر الملك نارمر - مينا من طيبة القصر , يوحد القطرين في دولة واحدة , لسة موجودة وموحدة , كأقدم دولة مركزية في التاريخ

ندعو أن تبقى موحدة وآمنة , بحب وجهد أبناءها وبناتها الصعايدة والبحاروة