[أحمد اسماعيل]

ارتفاع كروت الشحن الى 15 %
موبينيل - اتصالات - فودافون

أثار خبر ارتفاع أسعار كروت الشحن بشركات المحمولة الثلاثة، غضب المستهلكين واستياءهم من هذه الزيادة، وكالعادة انعكس ذلك على موقع التواصل الاجتماعي "تويتر" الذي امتلأ بالتعليقات الساخرة والغاضبة.

قال كريم "أول ما أصحى كدا الاقي كروت الشحن غليت، طب وربنا ما هرجعلكوا اللي أنا مستلفه"، وقال يوسف "اللي يكلمك دلوقتي .. تعرف أنه فعلا يا إما بيحبك يا إما عاوز منك حاجه".

وقال أحمد "بكرة مرسي يطلع يسحب قرار زيادة أسعار كروت الشحن خابزينك يا ريس"، وقالت شيماء "بعد زيادة أسعار كروت الشحن .. ا‏لإقبال على الرنات النهاردة تاريخي يا فندم !!"، وقال حمادة "هو صحيح إن سعر كروت الشحن زاد ولا ده كــلام إعلانات ؟!".

وقال أحمد أسامة "من يتحدثون عن غلاء كروت الشحن.. هم المشحونون مرسي_ستايل"، وقال "أحمد بعد ما سمعت أن كروت الشحن هتغلى حمدت ربنا وبوست ايدي شعر ودقن أني سينجل مش ناقصة خراب بيوت يابا" .

وقال أحمد صادق "بعد غلاء كروت الشحن اللي هيفرط ف الرصيد بتاعه هيبقي كأنه فرط ف عيل من عياله".
وقال رانيا "والله حرام عليهم اللي بعمله فينا ده بعد ما اغلب الناس كانوا بطلوا يستخدموا التليفون الأرضي كده هنرجع نستخدمه تاني"، وقال محمد "ياللي ساكت ساكت ليه معاك كريدت ولا إيه".

وكانت شركات المحمول قد قامت برفع أسعار كروت الشحن على عملاء الكارت المدفوع مسبقا بقيمة 15%، ليصل سعر كارت الشحن فئة 10 جنيهات إلى 11.5 جنيه بدلا من عشر جنيها، وفئة 15 إلى 17.25، وفئة 25 إلى 28.75، وفئة 50 إلى 57.5، وفئة 100 إلى 115، وفئة 200 إلى 230، وجاء ذلك القرار عقب قرارات الحكومة بزيادة ضريبة المبيعات على خدمات الاتصالات وكروت الشحن.

يذكر أن التعديلات الضريبية الخاصة بقطاع الاتصالات طبقا للقانون 102 لسنة 2012 نصت على أن خدمات الاتصالات، الدولية والمحلية عن طريق التليفون المحمول سواء بنظام الفاتورة أو الكارت المدفوع مقدما أو غيرها من النظم المتبعة في التحصيل تخضع للضريبة بفئة 18%، بالإضافة إلى تحصيل ضريبة مبيعات بواقع 25 جنيها عن كل شريحة محمول جديدة من قيمة الفاتورة أو قيمة الخدمة، في حين أن القانون الأصلي قبل التعديل ينص على أن خدمات الاتصالات المشار إليها كانت تخضع للضريبة بفئة 15% من قيمة الفاتورة.