صحيت اليوم الثاني الظهر نزلت وحصلت خالي ناصر سلمت عليه وذكرته بام مهند وعلى طول فز يكلم مهند ويتحمد له على سلامة امه
قال لي العصر بوديكم اصحي تتأخرون .. هزيت له راسي بمعنى اوكي ..
تغدينا انا وخالي ..وهدى صحت بالقوة لأنها كانت سهرانه مع اخواتها لين الصباح ومع كذا صحيتها عشان خالي مايعصب ... ويلومها عشان نومها الكثير ..
العصر خرجنا للمستشفى ومرينا سلوى وام هدى وأخذناهم ودخلنا المستشفى لقينا مهند وريم وسميرة عند امهم ولمن سمعوا صوت خالي خرج مهند وسلم عليه خالي .. ورد السلام على امه من برا خاصة ان الغرفة مافيها غيرها وردت عليه بصوت واطي لأنها ماتقدر ترفع صوتها عشان العملية ..
اما انا فدخلت ولمحت مهند اوووف شو هالطول..؟ نحيف وأبيض وشعره غريب بالرغم اني بس لمحته لكن معطيه شكل رااائع ..ناعم ويوصل لرقبته .. بس فيه شي لفت نظري كثير .. كان عطره قوي لدرجة شميته من ورى غطاي الثقيل وحسيته لزق في ملابسي والغرفه حقت امه واغراضي .. صرت اتوهم اني يديني فيها من عطره .. بصراحه صحيح انه لفت نظري بس مو لدرجة اني اهتم فيه ... ياكثرهم الشباب الحلوين عند الجامعه ولله الحمد محد قد استحوذ على اهتمامي يمكن لأني بنت واقعيه .. ويمكن لأن الدراسة ماخذة وقتي كله .. والأصح اني مااعترف بعلاقات وهمية او حب طايش .. او ان الحب من نظرة اولى ..
سلمت على امه واخواته وجلسنا عندهم قهويناهم وأمهم على عينها قزازة وشاشة وجالسه بحيث انها ماتحرك راسها ولا تميل ولا تتحرك ..
باين ان امه حبوبة وتحاول تضحك وتمزح معاي روحها مرة شباب .. حتى شكلها اللي يشوفها يعطيها في الثلاثينات .. او بداية الأربعين ..
ماقدرت اتكلم زي البنات او اشاركهم بطلاقه.. فضلت اني اسكت وأوزع ابتسامات ورد مختصر على أي سؤال يوجه لي .. اماريم شافتني ساكته سكتت هي كمان ..وسلوى وسميرة وهدى وام هدى جلسوا يسولفون ويحاولون يغيرون جو المستشفى الكئيب عليهم بالضحك والوناسة والفرفشة
اتصل خالي يقول مشينا .. وقمنا كلنا خرجنا بعد ماسلمنا عليهم وعزمنا اام مهند والبنات وترجيناهم اول ماتخرج امهم او تقوم بالسلامه يجون عندنا .. بس هم رفضوا قالوا ان هالمرة لازم نرد الزيارة ... رجعنا ام هدى وسلوى لبيتهم ورجعنا لبيتنا
جلست مع بسام وأسامه وياسمين وديومه الصغيرة عيال خالي ناصر كنا نلعب انا أجري واتخبى عنهم واللي يلاقيني هو البطل ونحط على وجهه نجمه من النجوم الزينه اللي في يدي .. وكانت ديمه معاي اشيلها لأنها تمشي وتطيح ماتقدر تجري زيهم
تعبت من اللعب وهم مايشبعون
اخيراً فتحت التلفزيون حصلت توم وجيري الحمد لله انقذتني جلسوا بهدوء وسكون فظيع وتسللت لغرفتي اخذت لي كتاب اقرا فيه
دخلت نت .. فتحت منتديات ادبية قريت شوية وخرجت ورجعت للرواية اكملها على الكرسي الهزاز بغرفتي
اليوم الجمعه .. باقي اسبوع عن زواج روان وخالي حجز لي على الجمعة لسوريا