إحساس مرعب ...
.. وسط سينا .. فى الكمين .. وإنت تبقى واقف تأمن فى المكان .. بالليل .. وريحة الموت بتهفهف من حواليك .. ومستنى اللى جاى من وسط الضلمة .. وإنت مجبر تعامله بأمان .. مع إنه هو ممكن يثبت العكس .. وتبقى واقف طول الليل جازز على اسنانك من الترقب والقلق .. لحد ما سنانك تجيب دم .. الليل .. البرد .. الوحدة .. الخوف .. على نفسك وعلى عساكرك ولاد الناس .. والخوف على عيالك من بعدك لوحصل ..
.. ولما تعدى الليلة بسلام .. وترجع إستراحتك وش الصبح .. ويبقى نفسك تدخل من الباب تلاقى حد بتحبه .. ترمى نفسك فى حضنه وتبكى من كتر الضغوط .. وبرضو متلاقيش غير الوحدة .. وعساكر لازم تبان قوى ومتماسك قدامهم .. عشان يطمنو على نفسهم من نظرة عنيك ..
.. وأدخل أنام عشان أستعد لليلة من ليالى الترقب اليومى .. ولسان حالى بيقول . . الحمد لله .. يبقى مش النهارده .. لسه فى العمر بقية .