[همس الليالي]

الســـــــــلام عليكم ورحمة الله وبركاته ..







بصراحه الموضوع واقع محد ينكره وحبيت اطرحه وجمعته من قراءات في منتديات ومن اللي نسمعه كل يوم
وحبيت أنشره وبالذات بين البنات

هو إننا نتناقش في الطرق اللي يستخدمها الشباب للضحك على عقول البنات عسى أن نجمع بعد ذلك مادة مفيدة خاصة للبنات المراهقات ... وأنا ببدأ في الفضفضة


أولاً : يا بنات مو كل شاب هدفه يشهر بالبنات ويسجل أصواتهم وياخذ صورهم ..
في نوع خلينا نسميه (مستكشف) .. يعني يريد يتسلى ساعة .. أو يجرب شي جديد ..فيتعرف على بنت ويمثل انه يريدها ويخلي الموجة تاخذه (يعيش الدور).. وهذا النوع خطير .. لأنه يمكن يحب .. لكن حبه من دون هدف .. يلعب بعواطفه عادي .. وساعة الجد (اذا توهق) يدوس عليها ولا كأنها صارت ..


ثانياً: حجج الشباب كلها متشابهة ... وهذي أشدد عليها لأنها بتنفعنا في كل المشاكل التي تعرض في قسمنا هذا ..
يعني الواحد يتعرف على البنت .. ويعيش قصة الحب .. وتكون كللل الحياة وردية .. بعد ما تطلع سالفة الخطبة .. تطلع العراقيل .. وخذولكم لفه في المواضيع ..و الأعذار هي :


*ماعندي فلوس أتزوج
*أهلي مايزوجو خارج العائلة
أنا (جنسيتي ، عائلتي ، قبيلتي ، مدينتي ، أصلي ..الخ ) ما يتناسبو مع أهلك وأخاف يرفضوني
*انتي (جنسيتك، عائلتك ، قبيلتك ، مدينتك ، أصلك .. الخ ) ما يتناسبو مع أهلي وأخاف أهلي يرفضك
*انتظري لين ما أخلص دراستي
*انتظري لين أحصل شغل
*أبوي مريض ، أمي مريضة
*أنا مديون
*صار حدث مفاجأ في بيتنا ومضطر أأجل (موت أو حريق أو مشاكل عائلية)
* انا متزوج وأخاف تنقلب حياتي علي


لاحظوا إن كل الأعذار هي مشاكل مؤقته علشان البنت تقول ماعليه بصبر لين ماتخلص المشكلة (ماعليه سنة أو سنتين)


ثالثاً: كل الأعذار اللي تنقال للبنت ما يتبعها كلمات مثل خلينا نقطع ، أو شوفي نصيبك .. لااا .. تتبعها كلمات مثل أنا تعلقت فيك .. أنا متمسك فييك .. علشان العلاقة تطول أكثر وأكثر .. طبعاً لييين ما يمل منك أو يحصل غيرك ويبدأ الفصل الثاني من الأعذار مثل :

اكتشفت ان أهلي متكلمين مع ناس وخاطبيلي بنت
طلع فيني مرض
أنا متزوج ... وهكذا

لاحظو كلها مشاكل مالها حل .. حتى لو حاولتي تحليها ماراح يقتنع بأي واحد فيهم ..
مع انها في الغالب مشاكل تاااافهة وسهلة تنحل بس بتحصليه يعقدها وهي ماتسوى ..
وانتبهي انك بتحصلي نفسك انتي الوحيدة اللي تحاول تحل السالفة لا وتحاولي تخففي عليه همه بعد

رابعاً: كثيييير نسمع سالفة ان انتي زوجتي خلاص .. وهذي العبارة مايقولها إلا الإنسان اللي أصلاً مايريد يتزوج بالضرورة ..
عشان كذا يكون حريص على انه يستمتع بالعلاقه قبل ما تصير شرعية


خامساً: سالفة كلمني بأدب وأخلاق .. وما قل أدبه .. وهذا الأسلوب كثير يغري البنات .. وكثييير اسمعه في المنتديات ...
حبيبتي الدنيا تغيرت .. يعني ألحين الشاب لما يتعرف مايريد يكلم وحده نابية بأسلوب حقير ..
واذا كان يريد هالنوع فالدنيا صار فيها تكنلوجيا وتطور في التشات وفي العاهرات صاروا في الشوارع الله يعزكم ..
لكن الشاب يريد الأسلوب الراقي والسوالف اللي تفتح النفس ويحس انه متزوج أو خاطب من غير مايضطر انه يخطب أو يتزوج ...

فهمتوا؟؟ فتحوا عقولكم الله يهديكم


سادساً: في شباب تجرأوا على دخول بيوت الناس والتعرف على الأب والإخوان علشان تطمئن البنت ويوهمها انه شهم يحليله ..

سابعاً : في بعض البنات بيلاحظوا انه في البداية الشاب بيتصل من تيلفونه كثير ويعبي بطاقات بالهبل .. لا وبيشحنلها رصيد الرجل الشهم الكريم ، بس بعدها بيلاحظوا البنات ان هم اللي يتصلوا ويصرفوا بطاقات وفواتير على الشاب والحجج فهذا المجال كثيــر .. مثل خلص رصيدي ، و وماعندي فلوس لأني ما أشتغل و هذي الحجج كثيره .. وانتي بتصرفي اللي حولك ودونك وهو متنعم بالصوت الحلو والكلام العذب بلوووووشي


في شي يقهر ... انقهر من وحده تقول .. قالي أنا ما أعرفك بس عجبني أسلوبك فقررت أتزوجك خبريني شو إسمك بالكامل...

هذي ودي اذبحها قبل ما اذبحه هو .. يعني بالله عليك حد يحب وحده ويقرر يتزوجها من خلال كلمه ولا من أول مره شافها فيها ..

ليش هو بيسلق بيضه .. وين الأهل وين الإجراءات الطويلة للزواج .. لا ويطينها ويقول لها أنا أصلاً مو جاهز للزواج ..
وهي تصدق .. هذا الشي شااااااائع جداً جداً فانتبهوا يا بنات

هذا اللي خطر على بالي ألحين مع إن الكلام
كثير .. وكله كلام متكرر في كل العلاقات الفاشلة ..

يا بنات .. المشكلة إن كل بنت تحب تسكت وتخفي الموضوع علشان كذا محد يعرف عن القصص الملفقة
يابنات تذكرن ..

واحد + واحد= اثنين .. كل الناس تخضع لهذي القاعدة ومحد شاذ عنها


لا تقوليلي ظروفه غير ولا تقوليلي خرابيط كله كلام ماكليييين خيره



وفي منهم بيدأ معاك بصراحه أنا من ألحين أقولك ما في زواج بس نحب بعض وهذا كيف ترضين تبدين مع علاقه اذا اهو يقولك من بدايتها انتي ما ترقين تصيرين حبيبتي وزوجتي قدام الناس!!


ونصييييييييييحه إذا وحده اكتشفت ان حبيبها المزعوم من هذا النوع تقلع السالفة من جذورها من هذي اللحظه .. لا تخافي من شي الا من الله تعالى .. وتأكدي انك بتكوني أسعد انسانة فالدنيا وبتلذذي بشعور طرد طفيلي من حياتك


الطريقة الوحيدة للزواج بأي امرأة خطبتها من اهلها وبس .. لو كان حافي منتف على باب الله .. بيخطبك .. لو كنتي تكرهينه بيخطبك عناد فيك .. لو كان اهلك يكرهونه بيجيب 20 واحد يتوسطوله .. بتسمعي الناس تقول ليش ماشي فالدنيا غيرها؟؟ .. اذا قرر انه يكلمك بيحط وسيط وحده من خواته .. واذا ماحط وحده من خواته وكان متهور بيكلمك مره وحده بسس وبعدها بيخطبك .. تعرفي ليش لأنه بيخاااااف انك تفهمينه غلط ويخترب تخطيطه للزواج منك...


طبعاً كلنا نعرف أن اصلاً مجرد علاقه مع رجل غريب محرمه شرعاً واحنا ما دخلنا جانب الدين لأن أصلا
اللي يسوي هالشي يدري انه حرام .. فحسيت ان الاقناع بالمنطق والواقع يمكن يجيب نتيجه..

الحب شي جميل وحلاته يكون بالحلال ... واذا كان لا فهو عسل مسموم وراح اضعين في متاهات الحب و بعدين بتقولين كنت ضحية واحد لعب فيني وقص علي عشان تثيرين الشفقه وتعذبين نفسك فتتخطبين بعلاقات ثانيه ..

وفي مثل يقول الكلمات تذهب وتبقى المخطوطات بمعنى ان كلام الحب يمكن يروح ومرح يبقى غير عقد الزواج....

آسفه على الإطاله وأتمنى يعجبكم الموضوع وأسمع رأيكم وتجاربكم


وكلمه أخيره وبصراحه في حكايات وقصص كثير عن الحب ولكن مهما اختلفت البداية فالنهااااية وحده ...
فلا تسمحين لحد يلعب بقلبك وحافظي على آخرتك ودنيتك وأهلك ونفسك ..

يحفظكم البارئ

م/ن