قصيدة برد الدفا ...
ودعت هم يومه فعمري شهر
والشهر رحب في همومي واحتفى
هم كساني هم به ضاق الصدر
و هم يهلي بالجديد اللي لفا
كان العسل يوم شفا مرضى البشر
وش في مريض الهم عمره ما شفى!؟
أضحك وانا قلبي تجرع بالقهر
وأبكي بدمع في وسط عيني خفى
أبرد و تجمد عبرتي عند الجمر
واستعذب الآهات في برد الدفا
ماللسهر داعي إذا غاب القمر
مير إن غفت عيني ؟ عذابي ما غفى
مصباح أحلامي تحطم وانكسر
وسراج أحزاني ولا مره طفى !
ياما عطيت الحظ من إسمي عطر
يقطع حظوظ ما بها ريحة وفا !
لا من سكني الهم وش باقي عمر
لا من تساوى العام مع لحظة جفا؟
لا العمر يكفيني ولا فيني صبر
قلت أكتب الأحزان بالحبر ..وكفى
قصيدة انتفاضية ...
للجمود الساكن اللي في محيطاتي العميقه
بأنتفض موج و ابعثر رجفة تقلب كياني
من بديت أمشي وانا من ضيقه في ألف ضيقه
كل ما ضايقت درب ..ضاق فيني درب ثاني !!
لو تعزويت الصبر ؟.. ما تكفي الدنيا دقيقه
ولو تعزويت التجمل؟..ملت الدنيا الأماني؟!
يقطع أم الحب كان الحب هذا هو طريقه !!
ويش ابي بالشمع كان الشمع يحرق شمعداني؟
يالخفوق إفرج عن الأشعار والحب و رقيقه
و اسجن القرآن عندك لين يعرف وش دهاني ؟؟!!
كن حظي ورد يومي نحلة تلفظ رحيقه
كل ما قبلت قفى .. وان تحاشيته نصاني
و كن في غصني غراب يزعج الكون بنعيقه
ما دريت إنه حسود لين با زهاري رماني
ما عرف للطيب غير اللي تمصلح مع رفيقه !
و ما عرف للجود غير اللي يعدد وش عطاني ؟؟!
الجحود اللي كتبته تو ما بليت ريقه
والصديق الصادق اصبح بعض حبر في معاني ؟!
الحقيقه ما تزيف من يزيف فالحقيقه
و المشاعر ما تبادر من يبادر في هواني
سلت الدنيا سيوف في وجه ساطع بريقه
وفالوجيه الشهب ؟؟ حارت .. بين.. أفراح و تهاني !!
يا عشيقي لا تقول انك تدور عن عشيقه
ما بقى فالناس عاشق ما يدور عن مكاني
للجمود الشامخ اللي فالعمر ماله وثيقه
باكتب إثنين و معهم عشرتي ويا ثماني