قصيدة احتضار ...
الموت آمنا به إن مات محبوب
مير البلا من مات قلبه وهو حي !
ما ينفعه لو هو صبر صبر أيوب
دام الأماني ما تزيده سوى غي
يهرب من الدنيا ولا يلحق هروب
وتركض له الدنيا ولا شافها شي !!
كن الليالي لابسه طلعته ثوب
ما غير تفرق بأنها أبيض شوي !!!
وفكل أسبوع يمر....( سبعة قلوب..
..تموت في صدره) و لا مرها ضي
نصفه جماد .. ونصفه احساس مسكوب
واكثر جروحه ناضجه .. والعمر ني !
الله يفرج كرب من كان مكروب
يطوي همومه كلها بالرضا طي
الموت .. آمنا به ومات محبوب
مير البلا ما عاش عقبه ولا حي
قصيدة معنى الكابة ...
الكآبه لو تبي معنى الكآبه؟
ناظر فوجهي ..... وتعرف جدها !!
في وجوه العالم احزان تشابه
بس في خدي ؟؟.. تميز خدها
حدني حظي على المر .. ورضى به
بس ابفهم .. هي علي وش حدها ؟؟
واصلة .. وبزعمها..هذي طيابه
ليت تتكرم علي بصدها
خابره قلبي أبد ما صك بابه
خابرتني طيبه .. ما اردها
وإحتراقي: عود .. والدمعة: سحابه
واليمين بلا عطا؟ ما امدها
وش بلاها تحسب لهمي حسابه
وابتساماتي .... علي تعدها ؟ !!
والزمن .. حتى الزمن .. زادت عذابه
مابقى به حيل يقوى هدها !!
والفرح سافر و خلى لي غيابه
ما يبي يجلس .. وهي ما ودها
راح متشره.. ولا عندي إجابه
غير بإني خاتم في يدها !؟
وكل ما اتجاهل شقاها بالكتابة
هددت سري : (تبيح سدها) !!
ليمتى بأسكت لها ذوق و ذرابه؟
كنها ما قد تعدت حدها ؟؟
واثر جيشي مختفي قبل انسحابه
واستباحت كنني من كدها
لبست كل اجنبي بي .... حجابه
واستقرت داخلي ... من جدها !؟؟
ومع مرور الوقت بأنواع الرتابه
صرت اوقف ضد منهو ضدها !
والكآبه .. تعني الحين (( المهابه))
زادها وجهي شرف .. من قدها ؟!!