لكل عروسة جديدة تعالى هنا
لكل عروسه جديده اول مره تدخلي المطبخ
عارفه ان معظم العرايس متدلعين و اول مره يدخلو المطبخ في حيااتهم بعد الجواز و المسكين بيشبع تجارب انا كنت بشوف ماما و هي بتطبخ
يعني اعرف التوابل لكل اكله مثلا و اعرف خلطه السمك طشه الملوخيه و كده
انا مش خبيره طبخ بس اكلي بيبقي طعمه حلو نفس بقي يا اختي
و احب اقولك حاجه كمان جوزك مش حيتعود علي اكلك بسرعه حتي لو حلو لان لكل دار و ليها مدار و هو اتعود علي حاجه معينه طول عمره فحياخد وقت معاكي في الترويض اعتبريه اسد و خلاص
المهم قولت اديكم خلاصه خبرتي اللولبيه في المطبخ اللي تساعد اي عروسه جديده في الطبخ
تعالي ناخد حاجه حاجه كده
اول حاجه لازم تسمي الله بعدين ما تاخريش الصلاه عشان تلحقي تخلصي الاكل فعلا دول اهم نصيحتين عن تجربه يا الاكل يبوظ يا مافيش حاجه بتخلص و ادعي ربنا و انتي بتطبخي االاكل يطلع حلو انا شخصيا بحس اني في امتحان كيمياء
نصيحه كمان في البدايه كده اغسلي الموعين و انتي مولعه علي الاكل عشان يا قمر الانفجارات النوويه و الحروق لاواني الطهي و الاطقم لسه جديده عايزين نحافظ عليها عشان طبعا مش متعوده علي دخول المطبخ حتنسي الاكل و تسرحي مع المنتدى فالطيب احسن خليكي في المطبخ عشان تتابعي الاكل
بالنسبه للطبيخ باميه بسله كوسه سبانخ فاصوليا بطاطس
هاتي اللحمه شوحيها يعني حطيها علي نار هاديه من غير حاجه خالص لغايه ما تنشف ميتها
هاتي البصله ابشريها و فصين توم قطعيهم و عليهم اللحمه و قلبي 5 دقائق انزلي بالطماطم المعصوره (ملحوظه وزن الطماطم اد وزن الخضار) و سيبيهم يغلو شويه لوحدهم بعدين انزلي بالملح والخضار (ملحوظه الملح يتحط بعد اللحمه ما تستوي لانك لو حطتيه في الاول اللحمه مش حتستوي ) كميه الملح انا ريحت نفسي بحط معلقه كبيره ملح علي نص كيلو خضار و بيطلع معايا مظبوط او حسب الرغبه بقي توابل الخضار فلفل اسمر بس
بالنسبه للبطاطس الشامي و التورلي قطعي الخضار و البصل و التوم و شوحي اللحمه و اخلطيهم مع فلفل اسمر و بهارات اللحمه من عند العطار خلطه جاهزه و غطي الوش بشرايح طماطم و رشه ملح و فلفل اسمر و بعدين من الجنب حطي كبايه ميه ما ترشيهاش علي الخضار عشان ما تغسلش التوابل من عليه
الملوخيه اهم حاجه فيها الطشه و هي عباره عن كسبره ناشفه مطحونه مع توم مدقوقه و تتحمر في سمنه
بالنسبه للباميه بتعملي لها تقليه بكسبره خضرا و توم و تدقيهم بعد ما تحمريهم في سمنه و تضيفيها في اخر غلوه
العدس و ما ادراكي ما العدس لايام التوفير
انا بعمل اد نص كيلو علي 3 طماطمات و بصلتين و راس توم و اسويهم و اضرب في الخلاط و اقسمهم علي علب في الفريزر مش كل شويه اقف في المطبخ عشان اوفر لا يبقي يوم توفير من كله
المسقعه تقطعي البدنجان و تحطي عليه ملح و تحمريه بعد ساعتين مع قرنين شطه و الصلصه بتاعته تحمري لها فصين توم متقطعين و تطشيها بالخل ده اللي بيديله طعم و توابل صلصه البدنجان شطه و كمون
و لو زودتي في البدنجان بيقعد في التلاجه و بيتاكل مع اي حاجه
بالنسبه للفراخ و السمك تغسليهم بدقيق و ملح عشان الزفاره
الفراخ و اي حاجه تتسلق زي اللحمه بتشيلي الريم من وش الحله عشان الشوربه تبقي نضيفه
لو فراخ بانيه تتبيلتك الاساسيه بصل توم و فلفل اسمر و بهار و تسيبيها في التلاجه 12 ساعه علي الاقل
بالنسبه للسمك التتبيله توم و شطه و كمون وملح طبعا
بالنسبه للمكرونه تسلقيها عشردقايق زي ماهو مكتوب علي الكيس لانك لو زودتي حتبقي الحله مكرونايه كبيره فلازم تاخدى بالك كويس بعد ماتتسلق حطيها فى مصفاه وبرديها بميه من الحنفيه وسبيها لحد ماتصفى ميتها بعد كده تحطيها فى الصلصه اللي هي صلصه بس من غير بصل و لا توم و عليها فلفل اسمر و ملح و ممكن توفري و تضيفي زيت دره بدل السمن مش بيبان خالص في المكرونه
المكرونه بالبشاميل تسلقيها كيس بس مش اوي عشان لسه حتضيفي لها البشاميل ما تعجنش و تصفيها و تحطي عليها زيت و ملح و فلفل و تقلبي
البشاميل بقي 5 معالق دقيق كبار تحمريهم في سمنه كتير لغايه ما يبقي لونهم دهبي فاتح و بعدين و هما علي النار و انتي بتقلبي تحطي كوبايتين لبن و كوبايه ميه و تقلبي كويس حتلاقيه بقي عجينه
تسيبيه يبرد شويه و تضيفي عليه بيضتين و فلفل اسمر و ملح و تقلبي كويس
اللحمه بقي تعصجيها ازاي تحطي عليها بصل و ممكن توم و ملح و فلفل و بهارات ومعلقه سمنه و تسيبيها تنشف و بعدين تجيبي صنيه و تخلطي نص البشاميل علي المكرونه و تاخدي نص المكرونه في الصنيه و طبقه اللحمه المفرومه فوقها و نص المكرونه التاني و فوقهم باقي البشاميل و تدخليها الفرن
نيجي بقي للحاجه المهمه الرز المعجن قصدي المفلفل قاعده عامه في الرز انك تعايريه بالكوبايه يعني كوبايه رز عليها كوبايه ميه او لبن او خليط مع مراعاه انك لو نقعتي الرز تقللي ميته و انك لو في اول السنه و الرز جديد تقللي ميته و ممكن تعملي رز بشعريه بيبقي خطير تحمري الشعريه و تضيفي الميه تغلي و تضيفي الرز ملحوظه تانيه الرز ما يتقلبش الا مره واحده عشان تقلبي الوش بس اكتر من مره يعجن منك
و كده انا خلصت