ديوان الأميـــر الشاعر؛عبد الرحمن بن مساعد

[نور]

المـــبــادىء

بدء ذي بادىء ..

هذا تعريف المبادىء ..

كل وقت .. وله أذان ..

الزمان .. غير الزمان ..

ياكلام الليل .. يمحيك النهار ..

باختصار ..

المبادىء .. شىء تحكمه الظروف ..

مثل طفل .. ترتبك في الحروف ..

ما اجمل أغلاطة ..

المبادىء .. للأسف ..

كلمة مطاطه ..

بدء ذي بادىء ..

يا بايع إحساسك ..

وش احساسك ..

وأفكارك لغيرك ..

ياشاري إحساسك ..

وش احساسك ..

واحساسك لغيرك ..

ليتك توصف متعتك ..

لاخذت من غيرك مشاعر ..

تدري لو تقدر ترى ..

ماهو بعيد تصير شاعر ..

كيف الخلاص .. من ناس تغتال الشعر ..

و حد القصاص في كل سرقة..البتر ..

الا الفكر ..

بدىء ذي بادىء ..

هذا تعريف المبادىء ..

يا بايع أموالك .. لفقرك ..

وللعذاب اللي في بيتك .. ودمعة عيالك ..

ليت توصف متعتك ..

ليت أوصف ضيقتك ..

لو جرى لك ..

في القمار ..اللي جرالك ..

ليت نعرف ..

متعتك أو ضيقتك ..

أيهم اللي بقالك؟ ..

يا بايع أعصابك .. لخمرك ..

ياكثر ماحرت بامرك ..

يابايع الصحة .. لخمرك ..أو سمومك ..

وش يفيد أني ألومك ..

!كيف تلقى متعتك .. لا ضاع عقلك ..

وبان بين الناس ذلك ..

وكيف تسعد في شعورك ..

وانت خارج عن شعورك ..

يا بايع اعصابك و وعيك ..

.ياللي تهرب في عذابك ..

من عذابك ..

لو بغيت في يوم ..

تهرب من هروبك ..

وش هو احساسك؟ ..

بدء ذي بادىء ..

هذا تعريف المبادىء ..

!يابايع بلادك .. بكم كان الثمن؟ ..

يا بايع بلادك ..

انسى المباني .. والبيوت .. والحب الأول ..

انسى غبار المدرسة .. و وجوه اصحابك ..

انسى فؤادك .. وميلادك ..

وارمي ورا ظهرك ..

كل العبارات الكبيرة ..

عن الوفا .. والتضحية ..

وعن حب الوطن ..

يا بايع بلادك ..

لو كبروا أولادك ..

وكان السؤال في عيونهم ..

!سجنك وجلادك ..

!"احنا يابوي من وين؟ ..

!وش هو احساسك؟ ..

يابايع آخرتك .. يالعاصي القاسي ..

"..اسمع نصايح صاحبك " ابليس ..

"لا تترك التدليس ..

اظلم ولا تفكر في باكر ..

هيم في العصيان جاهر ..

واختار من بين الذنوب ..

مايسعدك ..

ولاسار عمرك للغروب ..

لاتتوب ..

لا تحسب للعمر ..

ولا تفكر بالقبر ..

ولا العذاب ..

توك شباب ..

هذي نصايح صاحبك ابليس ..

يابايع آخرتك بدنياك ..

لا عدمناك ..

لو عدمناك ..

وش هو إحساسك ..

[نور]

الشـاعـر الأول

قــرّر التـاجـر يـكـون الـشـاعـــر الأول
... افرحـوا يـا اهـل القصيـد وجهـزّوا السـاحـه

سـهـلـّوا الأوزان لـ اجـل المـبـدع الأفضـل
... بـعـد إرهـاق الـعـمـل يـحتـاج لـه راحـه

فـاضـي هـو يـوزن ؟ .. كـلامـه كامـل مـكـمّـل
... يكـفـي انّـه لـ اجـلنـا يكـتـب عـن جـراحـه

الكـسـر فـاسـمـاعـكم وادراكـكـم يجـهـل
... عـبقـريـه فـرحتـه والـفـن فـي نـواحــه

جـدّدي لـه يـا صحـافـه عـهـدك الأمـثـل
... وارسـمـي الأشعـار صـحـرا وشعـره الواحـه

واكـتـبـي عـنـه العظـيـم الشـامـل الأشـمـل
... كـان يـحـتـاج الشـعـر جـهـده واصـلاحـه

واسـألـي كـيـف ومـتـى وهـل كـان أو يعـقـل
... عـمـرنـا مـن غـيـره فكـره تكـمـل افـراحـه ؟

ويـن "نـوبـل" عـن قـلـم مـن أشـرق واشـعـل
... ظـلـمـةٍ كـنـّا بـهـا أفـنـاهـا مـصبـاحـه

مـن يـقـول إن الشـعـر فـي وقـتنـا مـبـهـذل
... سـعـرنـا عـقـب الـخسـايـر زادت اربـاحــه

لحّـنـوا الشـعـر البـديـع الأصعـب الأسـهـل
... واعـرضـوه بكـل شـاشـه ليـل واصبـاحــه

وادفـعــوا للـي شـدا للـشـاعــر الأجـزل
... مـبلـغ وقـدره "كـذا" يستـاهـل صيـاحــه

ابـشـروا يـا مطـربيـن الدفـتـر الأجـمـل
... يكـفـي عـن مُـرّ السـؤال وذل إلحـاحــه

دفـتـرٍ فيـه القصـايـد تشتـري الأخـطـل
... وعنتـر يضحّـي بعبلـه ويـرمـي سـلاحــه

دفـتـرٍ فيـه المـعـاني فـي الـيميـن اسـفـل
... أقـوى أبيـاته : فـقـط لا غيـري فـي السـاحــه

[نور]

شـهـــر

ياللي تحبيني شهر .. ثم تجافيني شهر
ثم تحني لي شهر .. وتفكري كيف الرجوع كذا شهر ..
وترجعي لي في شهر..
ما قد خطر في خاطرك .. ان السنه اثنعشر شهر
...............

وقتي معك نصفه هموم
ونصغه الباقي أسى .. لو طبعك القاسي نسى
وبالصدفه جاء مره صباح .. وكلمه منك فرحتني
لابد ما نسى الجراح
تسمعيني في المسى
ولو تعبت اجروحي عليك .. وتشتكي منك إليك
بترجعي تحبي شهر .. ثم تجلفيني شهر
ثم تحني لي شهر .. وتفكري كيف الرجوع كذا شهر ..
وترجعي لي في شهر ..
ما قد خطر في خاطرك .. ان السنه اثنعشر شهر

...............

اعذريني لو أقول .. حبك نسى معنى الفرح
اعذريني لو أقول .. وشلون يذكرنا الفرح
مادام له انتي قريبه .. اللي يكفيني اهموم
بعدك متى .. وإلى بعدت ابلا سبب
الاكيد بترجعين .. بس الاكيد هذا متى
ولوتعب مني الصبر .. ومل من صبري العذول
وقلت يا ناس اسألوها .. الحب هو كله هجر

[نور]

سألـتـهــا

سألتها ليه البحر ساكن عيونك

جاوبتني للغرق

سألتها ليه السواد اللي في عيونك

قالت للأرق

سألتها ليه الخدود

قالت عبق

سألتها هي رقتك مثل النسايم و الورود

قالت لي لأ يمكن أرق

سألتها عن حسنها كنه يقول ماللشعر فيني حدود

قالت صدق

سألتها يا اغلى الأنام .. وشو الغرام ؟؟

قالت لي انك ما تنام .. و أوهام

وتنتظر شمس اللقا و ما تجي شمس اللقا

ومشوار ما يعرف وصول

ولحظه بها كل الفصول

وقلب واحد يحترق

وبعض الصدق

ووقت عصيب و يتبعه وقت عصيب

ولين يتعدى الصباح

وجراح تدمى لو تطيب

وفي الأخير .. خل عن خل افترق

وفي الأخير كل النهايات الفراق

ما في فرص

مافي نهايات بلقا إلا في خيالات القصص

سألتها وش هو الوفا ؟؟

قالت كفى .. النور من ضيي اختفى

والليل في عيوني غفى

اترك كثير الأسئله .. اسأل عن عيوني و كفى

اسألني ليه البحر ساكن عيونك ؟؟

ليه السواد اللي في عيونك ؟؟

سألتها جاوبتني للغرق .. للأرق

سألتا عن حسنها كنه يقول

ما للألم فيني حدود

قالت صدق ..

[نور]

بــس معــك

با افارق افراقك وبخنق عبرتي
..... واجرح اضمادي واسافر لك معك

بشد للماضي واقدم ساعاتي
..... واعاند عنادي واقودك واتبعك

بأجامل احزاني واجافي فرحتي
..... واعادي خلاني واحبك واخدعك

بصير أنا طبعك وإنتي طيبتي
..... وبيحزنك ضحكي واهلل مدمعك

بأحارب اف ضعفي وافارق قوتي
..... وإلى رضختي لموتي بدفعك

لأجمل لقاء برحل وتمضي رحلتي
..... إلى حصل شوفي بكون مودعك

ابوصلك ببعد بسابق خطوتي
..... وبأنثرك فيني وبأنسى اجمعك

بضم أنا هجرك في قربك وحدتي
..... وتدلك اعيوني وقلبي مضيعك

وإذا قسى ليلي بطفي شمعتي
..... وإذا كثر زادي بجوع وبشبعك

شردتي ارقادي وسمعتي نبرتي
..... وغمضة أنا عيوني لجل ما أسمعك

عند الحزن تثقل خطاكي دنيتي
..... وعند الفرح دارت خطاكي مسرعك

قصيدتي يكفي كبيره كذبتي
..... حبيبتي آسف بخونك بس معك

[نور]

مجلس رجال
على اليسار مقلّط .. وعلى اليمين صالة
ضيوف جالسين
قهوجي يلم الفناجين
وينطر اخر ضيف منهم يهز فنجاله
ضيف يقبل من بعيد
يقوم صاحب المجلس طلال لستقباله
شخص جالس على اليمين يهمس لجاره :
" هذا احمد اللي جاي بس ماهو لحاله "
" من معه ؟ "
" يبدولي اطفاله "
ويدخل احمد معه ثلاث اطفال
وعند باب الصالة يستقبله طلال
" السلام عليكم "
الكل يوقف
" هلا والله مرحبا عليكم السلام .. حي الله احمد هلا وسهلا .. تفضل .. كيف الحال ؟ "
" هلا طلال ..اعرّفك على عيالي .. ابني صابر عمره ثمان سنين .. لاتستحي سلّم ياصابر
بنتي هالة .. ست سنين .. سلم ياثامر على الجماعة .. وش هذا اللي في يدك ؟؟
اه .. سجايري والولاعة "
عبدالمعين يطالع الساعة .. ويهمس لجاره
" كيف يجيب اطفاله ؟! .. محد منا معه اطفاله .. ليش يجيب اطفاله "
ويجلس احمد ويجلس حوله عياله
طلال يقول :
" ما شاء الله .. ياحليلهم .. الله يحفظهم ويحرسهم ويحميهم
ماشاء الله يا صابر : ايش هالثوب الجديد "
احمد يقول وملىء وجهه ابتسامة
" هذا صابر موهوب في التقليد قوم ياصابر قلّد اصالة
والا تدري وري عمك كيف يركض سامي الجابر "
ينطلق صابر لخارج المجلس .. يرجع معه كورة يشوتها .. تنزل من السقف ثمان لمبات مكسورة
احمد يقول وملىء وجهه ابتسامة
" شاطر ياصابر ... شفت ياطلال شقاوة هالعيال "
طلال يتمتم :
" ياحليلهم .. الله يحفظهم ويحرسهم ويحميهم "
" تعالي ياهالة سمعيهم و وريهم اغنية و رقصة الخيالة
لا تستحي يا بنت مافيه احد غريب هذا عمك طلال وهذا عمك مثيب
وهذا عمك عبدالمعين وهذا ..... لا مؤاخذة انت مين ؟ "
- انا عبدالكريم
" عبدالكريم .. تخيّل يا اخي ماعرفتك لانك يمكن ملتحي .... لاتستحي يابنت لاتستحي ..
تدري طلال " هالة نجحت بامتياز "
صوت مدوي ينفجر
" اه ياثامر ما اشطنك .. كسّرت القزاز "
احمد يقول وملىء وجهه ابتسامة
" شفت ياطلال شقاوة هالعيال "
طلال يتمتم :
" ياحليلهم ..الله يحفظهم ويحرسهم ..... ؟؟؟؟!!!!
" وش كنت اقول ايوا طلال كنت اقول هالة نجحت بامتياز اعطيتها البارح فلوس
وقلت لها ياهالة ايش ما تبغي اشتري "
طلال يقول
" مبروك .. مبروك .. ايش تبغي تصيري لما تكبري "
هالة تتفل على طلال .. وتقول :
" ايش دخل ابوك "
احمد يقول وملىء وجهه ابتسامة
" شفت ياطلال شقاوة هالعيال "
طلال يتمتم :
"ياحليلهم .. الله يحفظهم .... ؟؟!!!
" تعال ياثامر .. عد لعمك من واحد الى العشرة "
ثامر يبتدي يعد
" واحد ..اثنين .. ثلاثة .. سبعة "
احمد يقول وملىء وجهه ابتسامة
" دايم يعد .. ولما يوصل اربعة يلخّبط "
يالله ياثامر من جديد
يبدا ثامر من جديد
" واحد .. اثنين .. ثلاثة .. سبعة "
" شاطر يا ثامر شفتوا كيف لخبط "
ينفتح باب المقلّط ويدخل النادل شايل دخون
والصالة في حالة جنون
احمد يصفق .. صابر وثامر يرقصون
طلال يقوم
" العشاء .. تفضلوا ..الله يحيكم "
احمد يقول
" يالله يا اولاد الله يحميكم .. اتعشوا اول .. بعدين سووا اللي تبون "
يركض الاولاد قبل الضيوف .. وللمقلط يدخلون
صابر ياخذ برتقالة .. يرميها على النادل .. تطيح المدخنة والدخون
ثامر هناك .. يكسر بياله .. ويرمي شظاياه على اللي ياكلون
هالة ترمي على طلال صينية ... وتاخذ علبة مياه غازية
تخضها .. تخضها .. تخضها .....
وترقص رقصة الخيالة .. وتفتح العلبة
احمد يقول وملىء وجهه ابتسامة
" ايوه ... هذي رقصة الخيالة "
والضيوف في ثياب من المياه الغازية يرفلون
مجلس رجال
على اليسار مقلط .. وعلى اليمين صالة
كل شي فيها ماهو على حاله
قزاز مكسور .. سجادة محروقة .. غترة مشقوقة
صينية هناك مرمية ...
ضيوف مبللين بمياة غازية
على وجه عبدالمعين جرح قطعي . .ومهلبيّة
نادل مصاب بحروق من الدرجة الاولى .... وجروح سطحية
كورة ... لمبات مكسورة
يضهر احمد من المقلط وملىء وجهه ابتسامة
" اكرمك الله يا طلال..شايف شقاوة هالعيال
اقول طلال .. اشكر ام العيال نورة .. العشاء كان رائع .. ماقصرت مشكورة
عشاكم ياجماعة بعد اسبوع عندي ... لازم تشوفو ولدي الصغير ؟!!
اخر العنقود .. منصور .. عمره ثمان شهور .. شيطاني يعقد ..اظن له معي صورة
شوف يا طلال هالصورة .. لاتغرك نظرته .. ترى والله ذكي مره
ما يضحك ولا يبكي لما يبدا اخوه ثامر يعد "
طلال صامت ما يرد
وترتسم على وجهة احمد علامة استفهام ويتساءل في داخله
" طلال كن وجهه متغير ..اكيد احد من هالضيوف زعله
مسكين طلال .. دايم في حاله مايخلوه .. زين جبت العيال سلوه "
ويخرج احمد من الصالة .. فخور بعياله
تارك وراه مجلس .... كان مجلس رجال
وعلى اليسار بقايا مقلط ... وعلى اليمين شبه صالة

[نور]

عجب عجاااب

طيبة قلبها أبيض سحاب
أخلاقها مامثلها .. أخلاقها
أخلاقها تنتظر عشاقها
ومايجون .. !!
ياهي جريحة .. طيبة .. لكن قبيحة

عجب عُجاب
وسيم أنيق شاب .. كسبه حلال مشروع ماجرّب الجوع
ناجح مركزه مرموق
ورغم هذا الحزن ساكن عيونه
ماتت امه .. وحبيبته كانت تخونه

عجب عُجاب
كثر الفقر ماله
كل ٍ يبي قربه ورضاه
رغباته قوانين وزلاته صواب
الناس حوله من شمال ومن يمين
يأمر .. يطاع
الدول تحسب حسابه
والكل يخشاه ويهابه
لكن مريض ياعذابه
ممنوع ياكل لو أكل جايز يموت

عجب عُجاب
مرتاح الضمير لاسرق .. لاظلم .. لاحسد
عنده قليل أصحاب
قلبه كبير .. بيته صغير
والمرض عن صحته بعيد
عنده ثلاث اطفال
أحمد وإيمان ويزيد .. وامهم
وكثر السماء يحبهم
لكن فقير مالقا لصوته مسامع
مايملك الا طيبته وملح المدامع
ولو مادفع مبلغ حقير
ينطرد هو والعيال وامهم في الشوارع

عجب عُجاب

عبقري في الطب ملحد

عجب عُجاب

شاعر عظيم داخله فارغ

عجب عُجاب

أمير كذاب

عجب عُجاب

ملايين البشر .. تعبد بقر

عجب عُجاب
ماتصلي فرضها .. وتلبس حجاب

ياصاحبي عطني يقينك والظنون

من ودك تكون ؟!

[نور]

إحترامي .. للحرامي !!
صاحب المجد العصامي ..
صبر مع حنكة وحيطة ..
وابتدا بسرقة بسيطة ..
وبعدها سرقة بسيطة ..
وبعدها تَعدى محيطه ..
وصار في الصف الأمامي .. !
احترامي .. للحرامي .. !!

احترامي .. للحرامي ..
صاحب المجد العصامي ..
صاحب النفس العفيفة ..
صاحب اليد النظيفة ..
جاب هالثروة المخيفة ..
من معاشه في الوظيفة ..
وصار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي..
يولي تطبيق النظام ..
أولوية واهتمام ..
ما يقرب للحرام ..
إلا في جنح الظلام ..
صار في الصف الأمامي
احترامي .. للحرامي .. !!

احترامي .. للحرامي ..
صاحب المجد العصامي ..
يسرق بهمة دؤوبة ..
يكدح ويملي جيوبه ..
يعرق ويرجي المثوبة ..
ما يخاف من العقوبة ..
صار في الصف الأمامي ..
احترامي .. للحرامي .. !!

احترامي .. للحرامي ..
صاحب المجد العصامي ..
صار يحكي في الفضا ..
عن نزاهة ما مضى ..
وكيف آمن بالقضا ..
وغير حقه ما ارتضى ..
صار في الصف الأمامي ..
احترامي .. للحرامي ..
احترامي للنكوص ..
عن قوانين ونصوص ..
احترامي للفساد ..
وأكل أموال العباد ..
والجشع والازدياد ..
والتحول في البلاد ..
من عمومي للخصوص ..
احترامي للصوص .. !!

[نور]

اسأل الاعمــــى


اسأل الأعمي .. ان كان في نومه يشوف
ليه يصحى ؟!
واسأل اللي ما درت عنه الهموم
اللي درى ان العمر محدود
وان الفرح مهما اختفي .. موجود
اسأله ليه ينوم ؟
وان جاوبوك اسألني ليه حنـّا افترقنا


يا صاحبي مابه سبب لفراقنا
غير اننا جينا بزمن ماهو زمنا
ياصاحبي مابه سبب لفراقنا
غير اننا في حبنا عشنا الصدق
وفي وقتنا وشهو الصدق
في وقتنا لجل اللقاء تكذب
ولجل تاصل ماتبي تكذب
ياصاحبي خذها من جرحي نصيحه
كانك تبي تاصل ؟ اكذب .. اكذب .. اكذب
الصدق في وقتنا اصبح فضيحه
في وقتنا دايم تهيم في شي ماتعرف مداه
دايم تهيم فلي بعد عن سكتك
واللي زهد في محبتك
واللي فـ يدك ومتحمل جروحك معك
ما يهمك تنساه
ولو تقتله ما يؤلمك وبقدامك تاطاء على دماه
يا صاحبي وقتنا في اوله ضيّعنا أولى القبلتين
وفي آخرة الله اعلم وش بيبقي
في وقتنا صار الغدر شي ٍ عظيم
والوفا ماظنتي ان كان بتدور بتلقى
يا صاحبي في وقتنا أطول مسافة ممكنه
تمشيها بين النقطتين
الخط المستقيم


يا صاحبي في وقتنا وقت الألم
من يسمعك مهما حكيت
من ينصفك مهما شكيت
منهو اللي ما يضحك إذا ذلتك دنياك وبكيت
يا صاحبي في وقتنا
ما للمشاعر ناس
يا صاحبي في وقتنا لبعض القلوب إحساس
يا صاحبي في وقتنا وقت الكلام
وقل الفعل .. لامات احد وانتقل لعلى رفيق
من طيبنا نحزن عليه
نصلي عليه
ناصل معه للمقبرة
وفي المقبرة غير الدعاء وقولت الله يرحمه
مابه كلام .. وندفنه .. ولا دفناه نبكي
بدون دموع أو بدموع
المهم بعد ما نبكي نتركه ونروح
وتلقانا نقول مسكين يا فلان مسكين
من دنيتك وش اللي خذيت ؟
وبعد باب المقبرة بشبرين
واقل من الدقيقة لامن دخل فينا الزحام
من طيبنا نضحك ونسمع أغنية
لجل نتسلى في الطريق بين المقبرة والبيت
يا ربي سبحانك ياللي تجير من العذاب
قلوبنا وش صابها ؟
في وقت غدا بين الحياة والموت
وبين البكاء والضحك
شبرين ودقيقه وباب
ويدننا اللي قد حثت في وجه ميتنا التراب
هي نفسها اللى بعد شبرين واقل من الدقيقة
اختارت شريط وحطته لجل تقتل طول المسافة
بين المقبرة والبيت
يا صاحبي في وقتنا احسن كثير
من بعضنا
في المقبره على الاقل ميت وندري
المشكلة متنا وإلى الحين ماندري
يا صاحبي في وقتنا ضاع احترام الموت
في وقتنا حكينا ما أكثره
وللأسف كل الحكي من غير صوت
وان كان به فم ٍ صدق
واسمحوا يحكي بصوت .. ما نسمعه
ياصاحبي قدامنا كان اختيارين
يا نجاري وقتنا ونكذب ونخدع نفسنا
يا نفترق .. لان الفراق في وقتنا
هو الصدق .. افترقنا
يا صاحبي كانك تشك في أسباب الفراق
دور لك اعمي وإذا صحى اسأله
ان كان في نومه يشوف ليه صحي

وليه افترقنا ؟؟؟؟؟

[نور]

الحر القطام

احمد الله مالك الملك iiالسلام
الكريم الحي رزاق الانام

احمد الله نعمته iiماتنحصي
عزني بالدين والقوم iiالكرام

عزني بـ أني سعودي رايته
كلمة التوحيد فيها iiوالحسام

عزني بـ اطهر تراب iiيفتدى
مسجد احمد فيه والبيت iiالحرام

عزني بجدي ابو تركي iiالعظيم
عزني بمساعد الحر القطام

الذي يعرف سجوده iiخالقه
الذي ليلة تراويح iiوقيام

الذي بالدين حصّن اسرته
عن رماح الوقت عن طيش السهام

سيد كل الزهد فكاك iiالكرب
غايث الملهوف عنده من iiيضام

كم يتامى قد لقوا فيه iiالابو
كم ضعوف ٍ قد لقوا فيه iiالمرام

واضح ٍ جوده عجز iiلايختفي
مثل حال الليل والبدر iiالتمام

والله ان المدح منّه iiيستحي
كيف يوفي المقدرية iiوالمقام

فوق كل المدح قدره iiمعتلي
فوق كل الوصف من شعر iiوكلام

واثق بالله ثابت iiمهتدي
فعله القرآن امن iiواستقام

مهما جل الخطب او شان iiالخبر
مايلقي للمصايب iiاهتمام

صامدٍ مثل الصحابة في iiبدر
مبتسم رغم المقادير iiالعظام

مبصر ٍ يابوي لو كف iiالبصر
بك بصيرة يرتجف منها iiالظلام

قدوتك عبدالعزيز iiالمتقي
يالامام ابن الامام ابن iiالامام

خادمك يابوي رهن iiاشارتك
امر وما يلحقه فيك iiالملام

افتدي ترابٍ تدوسه خطوتك
دامني حي ٍ وتحملني iiالعظام

بك يابو خالد افاخر iiوارتجي
من اله الكون رزّاق iiالانام

يجعل الفردوس اجر iiلطيبتك
كثر ما علمتنا نحيا iiكرام

أحمد الله نعمته iiماتنحصي
هامتي فوق السحايب iiوالغمام

احمد الله مالك الملك iiالقوي
ان ابوي مساعد الحر iiالقطام