ديوان الشاعر فهد المساعد

[نور]

قصيدة / تهديد

والله وصرت تمون يا مايس القد
من قلت : احبك.. والحكي ما ترده

لا..لا تغرك طولة البال والسد
القلب شكله قرب اليوم سده

أنا عزيز النفس لا جيت للجد
واللي تمادى يقضب اليوم حده

صحيح صعبة ابني الحب واهد
لكن ترى لا ضقت والله لا اهده

مهوب انا اللي يرفع بوجهك اليد
ولا عاش من يرفع على بنت يده

لكن با اروح ولو غشى دمعك الخد
باقول : وينه غايب فيه مده؟!

يوم الوصل من بيننا حبل ممد
ترخي وانا ارجي منك يوم تشده

بعد المذله جيتني اليوم بتشد؟!
خلاص انا فكيت حبل الموده

ما دام به ناس عن الدين ترتد
وش يضمن انه ما يجي منك رده؟!

[نور]

قصيدة / تمنيت موتك

اللي بقا لي في غيابك .. سكوتك
واللي فقدته من غيابك .. حنانك

عذرك معك لوخبروني بموتك
وحقي عليك ان كان عذرك زمانك

ماكان موعد .. وأعذرك لو يفوتك
أنا انتظرت العمر كله عشانك

غبت ورضيت .. وبعدها .. غاب صوتك
وأبطيت أكذب .. من يقولون : خانك

بالله كيف تحس في طعم قوتك
لامن ذكرت إنسان .. خنته .. وصانك

ماكن قلبه واحد من بيوتك
من تحت سقفه كم شعرت بأمانك؟

وراك خليته .. لعتمة سكوتك؟
وأنا ما غير أعشمه في حنانك

في غيبتك ياكم تمنيت موتك
أقل شي .. أرتاح وأعرف مكانك

[نور]

قصيدة / بنت الشعر

ياقصيدي شد حيلك وأخذ من جورك عداله
وأنفض غبارك وطوح باللحون السامريه

أبشر بعلم تسر البال رشفه من زلاله
أبشر بعلم يجيب أقصاك ويردك عليه

أبشر ب( ريف الضلوع العوج ) جت منها رساله
رجعتني للحياه وذكرتني بالمنيه

أكتبت فيها : (( من سهول الشمال ومن جباله
_لأرض الأحباب وبلاد الحب _ إلى نجد العذيه

من صبيه عاث فيها الوقت وأعياها أحتماله
للحبيب اللي يطيح فغيبته دمع الصبيه

يالحبيب أن مرك أسمي في الرساله وأنت داله
أعتبر هاك الرساله طيش بنت نرجسيه

وأن قريت أسمي وطاحت دمعتك قبل الكماله
كمل السطر الأخير وبلغ الشعر الوصيه ))

وأكتبت لي فآخر سطور الغلا سطر لحاله
بشرت في القصيد وجت تسوق الشعر ليه

ياقصيدي وأنت عم القلب وجروحي خواله
لاتردى ماخبرتك ياولد راعي رديه

أقدح الشعر وتولم مانبي لأحد جماله
مالها غير المساري والحروف الأبجديه

دامها لعيون بنت الشعر والحسن ودلاله
والله أن يقال فيها الشعر وتسوقه حميه

العنود اللي تذكر واحد ماغاب باله
بالقصايد والرسايل وأسمها والمقدريه

كيف تسألني عن أسم هز له غصن وحدا له
شاعر من طول صمته ماهقيت ألقاه فيه

ليتها تسأل جنوب القلب عن صحراء شماله
كم بقت رغم الهبايب في قفاريه الخليه

وأن بغت تسأل قصيدي جعل يفداها خياله
تقلط هنيا وتبشر بالسعد والشاعريه

القصيد أن كان مانصف شاعره لاجا مجاله
وش نبي به يوم نكتب فيه ونحطه قضيه

[نور]

قصيدة / برد وأحباب وأيام

هب الشمال وفز بين المحاديب
طفل على خده مشاريه وعتاب

والبرد شبع جرد الأيام تعذيب
وأنا ضحية برد وأيام وأحباب

ياليل مالي غير حضنك معازيب
خلك معي لاشحت وجيه الأصحاب

ماعاد هي لحية غرام ومكاتيب
لاوالله الا قربت صوب الأهداب

يابنت ياأم الضحكه أم المعاطيب
لاماك ذنب وشاعرك مابعد تاب

مرت ثلاث سنين ياأغلى الرعابيب
والريح تشكي للشبابيك والباب

مرت ثلاث سنين بين المراقيب
عديتها يابنت مرقاب مرقاب

في ذمتي ماعاد أودي ولاجيب
حتى الشعر ماعاد ودى ولاجاب

يابنت عندي كلمة تقطع الجيب
باقولها لو ماحسبتي لها حساب

طرد المقفي مثل طرد العذاريب
وأنا تعبت أبلع مشاريه الأعراب

أما تعالي وأقطعي دابر الريب
والا انسي أني كنت انا وانتي أحباب

[نور]

قصيدة / أنت زعلان

أسمعك ياللي تناديني يابو قلب خلي
بس انا ماني خلي القلب لأجل اسكت واجيك

الخلي ماهو بقلب من هيامك ممتلي
الخلي قلب آدمي شافك ولا هام فيك

انت زعلان لجفاي مادريت إن زعلي
يوم قلبك مايبيني قد ماقلبي يبيك

حتى لو عيت همومك في غيابي تنجلي
كل هذا مايساوي لهفتي يوم احتريك

كان ماصدقت هرجي طيب اسمع مايلي
ياحبيبي ياعسى ربي يحفظك ويهديك

جايز إنك في غيابي تقلب الدنيا علي
بس انا من قبل اعرفك قالب الدنيا عليك

[نور]

قصيدة / المراسيل

أقول : يمكن تنفرج في المقابيل
و لا ادري الا الأرض تحتي تهايل

و بعد التعب والهم والحط والشيل
توي عرفت ان البخت كان مايل

مع ذاك ابو ذيك الرموش المظاليل
ذاك الغريب اللي عمل بي عمايل

جتني مراسيله تشب القناديل
و معها سؤال جاوبته النحايل

يقول : ( كيف الحال بعد المراسيل ؟ )
و اقول ( مثل الحال قبل الرسايل )

عمر الكتابه ما تجيب المواصيل
ريح مكاتيبك ترى الشك زايل

ان ما حصل همس وحنان وتعاليل
واعاتبك لين المح الدمع سايل

و اجلس واسولف عن زمان البهاذيل
و انسى السوالف لا نسفت الجدايل

كذا يصير الحب والوصل والليل
وكذا ادري انك ما نسيت الجمايل

اما كذا والا اترك الحظ للميل
واتركني فوق الارض تحتي تهايل

[نور]

قصيدة / الناس

ياصاحبي لاتجي وتقولي قالوا
لو قلت ماقلت غير الله يجازيهم

لاشفت بعض الأوادم للردى مالوا
نفضتهم من عيوني قبل اخليهم

يكفيني القدر نلته يوم مانالوا
الا .. او اقول مابغى اجيب طاريهم

ماقول غير انت لامن حطوا وشالوا
تعوذ برحمه الله من اساميهم

وذكرهم ان الاعمار ان طالت وطالوا
الخالد الذكر والا الموت قافيهم

اما انت ياقلب لو صالوا بك وجالوا
خلك مثل مانت لاتشره على ايديهم

الناس من خلقت الدنيا ومازالوا
عيال رجال لكن فيهم وفيهم

وذولاك من عرض ناس مالي ان مالوا
الا اني اسكت ,, واقول : الله يجازيهم

[نور]

قصيدة / القصائد والغلا

لعن ابو بعض القصايد كان مافيها حلا
ما تروح الا و تترك للحنايا جلجله

تبتدي مثل المزون اللي تسولف للكلا
و لا خذت قامت ترزم مثل شهب منزله

فوق صدر الشاعر اللي عن طواريقه جلا
لين شاف اخت القصايد بالقصايد مقبله

يا هلا ب اخت القصايد كثر شوقي يا هلا
اقلطي بين الحنايا وافهقي جمر الوله

كل ضلع من ضلوعي حافظ درس الولا
مثل حفظك للعفاف و للشرف يا مذهله

سولفي كذا السوالف تنسمع و الا فلا
وان=بغيتيني اسولف .. اسأليني اسئله

اسأليني وابتديها .. بالنهار اللي تلا
ليلة ان الجرح يقرا في الضلوع البسمله

واسأليني عن زماني كم شرب في وكلا
انتهي من مشكله والقى وراها مشكله

المشاكل بهذلتني في غيابك ... والبلا
ما لقيت اللي احط السر عنده وازهله

كل ماسمع (كيف حالك) ينقبض جفني على
دمعة تبغى تقول الحال دمع و مهزله

وابلع العبره واقول : بخير والهم انجلا
و آخر الهرج آتلعثم فيه وانقض أوله

ليه غبتي .. ليه غبتي وانتي اللي ما ملا
عيني الا همس صوتك في زمان البلبله

ياه شفتي وين راح البال بالشعر وسلا ؟
قمت اعاتب فيك وانتي ف الضلوع مدلله

لني ماصدقت نرجع للقصايد والغلا
بعد ذاك اليوم يوم اجنبت وانتي مشمله

ايه ماصدقت لكن ياعساني ما خلا
قلطي بين الحنايا وافهقي جمر الوله

[نور]

قصيدة / حادثة مدرسة مكه

يالمدرسه والحزن ماله مراسي ..
والدمع ماعادت مراسيه الأهداب


برد الصفوف ,, الطاولات ,, الكراسي ..
صوت الجرس ,, جوع الشبابيك ,, الأبواب


هناك كن السور ابو قلب قاسي ..
يبكي من الوحشه على فقد الأحباب


وهنا الدروج تصيح : طول نعاسي ..
على يدين توقظ الصمت لكتاب

وهناك طفله جنب لوح نحاسي ..
ترسم عليه عيون وجيه غياب

وهنا رماد كان منهج دراسي ..
في كف بنت ضمها طين وتراب


ياهل الحرم والله ماجيت اواسي ..
جيت ارتدي من رعشة ايديكم ثياب


أنتم هلي وأنتم ربوعي وناسي ..
خوات وأخوان وعجايز وشياب


مكه .. وأهل مكه جبال رواسي ..
لكن حناجرهم بها غصة عتاب :


ياريس التعليم وش هالماآسي ..
فند لنا كل الدوافع والأسباب


مادام ابو فيصل ابونا السياسي ..
ينفق على التعليم مايحسب حساب


ودام الحكومه عندها شي اساسي ..
العلم والصحه .. أجل كب الألقاب


وأجلس وصارحنا اذا كنت ناسي ..
بس لاتحط الذنب في حلق بواب

[نور]

طلال الرشيد .. قصيده ومجاراه

كانت هذه آخر قصيده نشرت للشاعر طلال العبدالعزيز الرشيد ( رحمه الله )



صديق الطفولة وش جرى لك مع الايام
هي انصفت دنياك ولا انت بك مثلي

فقدنا ملامحنا مثل ساير الانام
عبث بنا جور الزمن والزمن يبلي

وقفنا جميع وبيننا حاجز الاعوام
صعيب وصولي لك وياصعب لك وصلي

وانا اشوف في وجهك طريق غشاه عتام
وذاك النخل واشوف دارك ودار اهلي

وسدرة هي اكرم من اهل بيتها اللوام
وفي وجهك اصحابي .. عصى مدرسي .. فصلي

وعود كبير ودايم فالظلال ينام
في ذكرياتي له بعد ملمح وجلي

وسور كتبنا فيه ذكرى عبث واوهام
ولي في عيونك صورة زانها جهلي

بثوب تبلل بالمطر والتراب وشام
وانا احب اسير العب وهي حافية رجلي

انا وانت طفل وطفل دايم رضا وخصام
بكانا سهل والضحكة امر بعد سهلي

دعاني بوجهك ناده ينده الاحلام
معه رمح مدري هو علي غاضب او لجلي

انا كيف اباصل والامل خلف مو قدام
كثير الاسى والسهد يامن فعل فعلي


،،،،،،،،،،،،،،،،





وهنا مجاراة الشاعر فهد المساعد لها ..





فقيد الرجوله وين حطت بك الأقدام؟
انا ما تخيلتك تزور اللحد قبلي

عقيد الطنايا شيخ شمر ذرى المنضام
حفيد الجنازه بلوة اللي بلا المبلي

عقيد لقومك.. بس تبكي عليك أقوام
من الساحل الشرقي الى الساحل القبلي

أنا لا ذكرتك طاح راسي على الأكمام
اسولف لقلبي عنك.. وأبكي على مهلي

أسولف عن أول مرة جيت قبل العام
و شفتك بعيني مثل ما كنت في عقلي

امير و عظيم و شاعر و فارس و مقدام
سجل البياض اللي بنقش الذهب مطلي

سنافي شهم فزاع .. لا قام يعني قام
يغيث الضعوف ولا يقول الوبل وبلي

طلال .. الشهامه نكست عقبك الأعلام
الا من قتل خيال .. وش نفعة ( الرجلي؟ )

طلال .. الأوادم كلها من لحم و عظام
تعيش و تموت بصمت .. تالي ورى متلي

عداك انت يا من عشت عمرك عظيم اشمام
وقفت فمماتك تنتخي: (من نوى قتلي؟)

رحيلك بنى للحزن وسط القلوب خيام
و وداعك جعل كف الثرى بالدمع مملي

عسى من لبست لخشيته فرمضان إحرام
و دعيته يا رب اكرم نهار الحشر نزلي )

يعوضك عن دنيا بها حاسد و نمام
و يرفع مقامك عن مقام البرى السفلي