ديوان الشاعرة عبير بنت أحمد

[لمسة دفء]

نبذه عن الشاعره....

عبير بنت أحمد التويجري
سعودية من مواليد وسكان الرياض - 22/12/1982م
بكالوريوس علوم الحاسب والمعلومات - جامعة الملك سعود 2005م


تحقيق المركز الرابع ضمن مسابقة أفضل قصيدة مشاركة في نادي المواهب بجامعة الملك سعود بقصيدة " قلب الحدث " 1424ه
أمسية شعرية في مهرجان صيف بريدة الترويحي المقام في مركز الملك خالد الحضاري 1424ه
أمسية شعرية في فعاليات إحتفالات أمانة مدينة الرياض بعيد الفطر المقام في مركز الأمير سلمان الاجتماعي1425ه
أصبوحة شعرية في برنامج "آمن يا وطن" كلية الإقتصاد والتربية الفنية 1426ه
أمسية شعرية في افتتاح مهرجان التراث والحرف اليدوية المقام بمركز الملك عبدالعزيز التاريخي تحت رعاية الأميرة حصة بنت سلمان 1427ه
أمسية شعرية ضمن مهرجان التراث والحرف اليدوية (نماء وإنتماء) 1428ه
أمسية في مهرجان صيف الرياض (الأسرة والطفل) 1429ه
أمسية في اختتام مهرجان القرية التراثية السادس بمركز الملك فهد لرعاية المعوقين 1430 ه

[لمسة دفء]

قصيدة التوبة ...

جيت النسايم لها ذعذاع
والمسك عطرت له ثوبه

لا قلب لي فاتح مصراع
ولا طهر يشكي من ا ذنوبه !!

يوم القدر للفرح منصاع
جوني حشودك وراحوا به !!

يا سيدي والوصل قطاع
والهجر عتب على دروبه

كانك تقول البحر بك ضاع
دوك السما بي مصلوبه !!

ما دام ذا في الهوى لك باع
عينك عن الحب معصوبه !!

خنت الرعابيب باستمتاع
ياليت ماني برعبوبه !!

لا تنشد الوافي الخداع
ليه المحاظير مرغوبه !!

سر المولع اذا ما شاع؟؟
تصبح نواياه مقلوبه !!

لاصبحت جا خافقي ملتاع
ولامسيت رددت والكوبه !!

خل التجهم ولا ترتاع
مثلك انا كنت مغصوبه !!

تدري أنا خافقي لا باع
مأهتم شاريه كم هوبه

كان الهوى واعدك بالقاع ؟
قدر الهواوي ومحبوبه !!!

ماعاد لي في هواك اطماع
التوبه التوبه التوبه

قصيدة مستحيلات الزمان ...

الصاحب اللي ما سأل عني ولا أهتم لبكاي
ما حدني ربي اداري خاطره وابكي معه

والمشكلة المشكلة .. لا من طعني من وراي
وانا اكتم الصرخة أخاف يهل -لأجلي- مدمعه !!!

عليت قدره بالشعر ابيه يوصل مستواي
بس الدني دايم دني مهما تحاول ترفعه

انقال عنه معجزه اللي قدر يكسب رضاي
وانقال عني عاشقة والروح في رهن اصبعه

أما اعشقه ...!! الا يهبا.. ما طال لو ريحة غلاي
المسك غالي... والا نفخ الكير صنعة مصنعه

انا اللي كنت ازرع لغيري راحته ../.. أجني شقاي
أنا اشهد انه هالزمن إما يطيعك .. أو طعه

يا قلب تبطي مالقيت اللي يبي قربك / سواي
من يشتريك اشره ومن خلاك للفرجة ../.. بعه

الغول والعنقاء والخل الوفي + هواي
صاروا بعيني مستحيلات الزمان الأربعة

صدقت بالله ما خلق فالأرض من يصدق معاي
وآمنت بأنه .. غير وجه أمي ...... مجرد أقنعه

[لمسة دفء]

قصيدة بس ...


إذا خلك لقاك إن ضاق..ولا ضقت إنت.. بك ما حس
وش اللي علقك وياه... غير إن الهوى ذله ؟

أبو صالح جمع أحباب قلبه عندهم في الرس
وانا ما غير اجمع قلبي اللي فرقه خله !

لو ايغيب الحزن لحظة .. لقيته فالفرح مندس
عمى يعميه كن الحظ تنقص طينته بله ؟!!

وحتى فاختباري كنت ابكتب No .. صارت .. yes !!
و (إسمي) .. صرت اغشه !! من كثر ما صعبوا حله

ذكرت الله وانا اهوجس ...... عسى ماهوب هذا مس ؟
أو احد ما ذكر ربي علي .. وعلني عله ؟!

ف رحت لألف شيخ ثم مريت اربعمية قس ..
وصار ان البلا اللي في .. ماله للأسف مله !!

بديت ابكي .. وقلت الحين وش لي بالكآبه بس
عساني مأنحرم من طيبة اهل المنتدى والله

وإذا إني أمس مت .. وصاحبي في (عيشتي) ما حس
أجل بيحس بي لا ضقت !! قلللعة ذا الهوى كله

قصيدة كل الأعذار ...


بي ضيقة تغنيك عن كل الاعذار
ولوما كفاك الضيق..عذري ظروفي

أضيق..عادي بس لوصار ماصار
ما ضاق شعري عن فيافي حروفي

يامانكتب إبداع فنصوص واشعار
ولا فيه وصف قيل فالضيق يوفي


يامانكتب إبداع فنصوص واشعار
ولا فيه وصف قيل فالضيق يوفي

كل لقى له بين الاحلام تذكار
وانا على احلامي اصفق كفوفي

لولا تلاوة مصحف وذكر الاذكار
مأرتاح لين السم يشبع بجوفي

لو كان للطيب من الحظ مقدار؟
مأعلنت عن دنيا العجايب عزوفي

بأختار همي غصب لو كنت بأختار
وما للبلاوي سلوة عن كتوفي

بيني وبين النور مليون مشوار
ودروبي الظلما رفيقات خوفي

لا قلت باكر تنفرج ؟.. جدت اخبار
ما سرني سمعي ولا سر شوفي

كم من صبور واقف .. وراحت أعمار
وأدعي عسى الله لا يطول وقوفي

الأرض لا ضاقت بي وصبري إنهار..؟
..جلست اسولف للرمل عن حتوفي

[لمسة دفء]

قصيدة قوة عين ...


يا سرع ما جاني الإثنين
ليته من ايامنا منسي

وفي رهبتي م اختلف شخصين
كني مساقة إلى عرسي

قابلت ذاك اللي لين الحين
أصبح على طيفه وأمسي

عرف بنفسه وسولف لين
طاحت يديني عن الكرسي

غافلني و قال : تب تنسين!
ليت الزمن وقف ف أمسي

صار اللي صار.. أبروح لوين
وكل عرف حالي و نحسي

ما ينفع لهالألم تخمين
وليت الندم ينفع لطمسي

كلش غدا في مذاقه شين
والغيم الأسود على شمسي

والدم سال.. وتركني بين
فم عجز يفتح لهمسي ..

.. وموعد طلبني بعد شهرين
واثق.. وانا اشتمه في نفسي

ودي أقول وبقوة عين :
بشتاق لك حييييل يا ضرسي!

قصيدة نبض ...


تمرد يا نبض شعري على شيطانك الملعون
تمرد قبل لا يثري ظلام الحق إجحافي

على تشكيلة ألواني عجزت ألقى حكي به لون
يوضح لوحة عروقي .. ولا يختل به قافي !

ألا يا جرحي الدامي أنا لك خنجر مطعون
إذا ما خانني نزفك و صار البلسم الشافي

مدام الطهر له ناس على بيبانهم مرهون
علام الخبث مايمشي سوى في دربهم حافي؟!!

رحل عني الفضا قصده يدور بينهم عن كون
رجع مع كونهم قصده يزود حمل أكتافي

يناديني سحر همي و لبى فرحي المغبون
عجيبه هالزمن دايم يكابد هم إنصافي !

ركبته مركبي ب ابحر على طوفانه المجنون
تمسكت بشراع الحرف لكن ضاع مجدافي

نعم وان كانت حروفي عبير للي ما يدرون
فهي كل الشتات اللي يحاول لم أهدافي

نعم وان جفت همومي على خفاقي الممنون
مصير النبض في شعري يبيح سده الخافي

[لمسة دفء]

قصيدة زمن قاسي ...


ماهي غريبه يا زمن .. قاسي
عاداتك.. الله لا يغيرها

مادام حظي طاح متواسي
نشوف وش بيصير آخرها

قلبي كبير .. ومعدني ماسي
والناس تصقل في مظاهرها

ياللي قطعت آمالي بفاسي
وش حاجتك في كسر خاطرها؟

وبعض الكسور..ابني بها ساسي
أقلها .. ممكن نجبرها !

ولو ذقت مما ذقت في كاسي؟
عينك بتبكي دم .. وأعذرها

ودي أوري دنيتك .. باسي
واخاف لا أجرح مشاعرها !!

هجرت لجلك موطني وناسي
وأمنت روحي عند هاجرها

ناديت حتى بحت اجراسي
وتسمع ولا حتى تعبرها !

وماطعت فيك الصاحب الراسي
حتى اطيع انذال تحقرها

وأدري بصدق الحاسد الخاسي
وأكذب على نفسي بأسايرها

لوهي على همي وهوجاسي؟
هانت على نفسي عبايرها

بس كيف يعجب عينك لباسي
وانا .. منيب اللي تناظرها؟!

البارح اهديتك من احساسي
واليوم اشوفك صرت .. شاعرها !!!

وانت أقرب ا من النفس لأنفاسي
وأقرب من الدبله لبنصرها !!!

وياهونها لاشفت كراسي
مصيبته وشلون يصبرها

ماجيت اعزز بالأمل ياسي
جيتك بأعزي فيك.. وأشكرها

وآذكرك بالبعد يا ناسي
والا المحبه ؟.. لا تذكرها

ومادام طاح الحب من راسي؟؟
ماهين نفسي وانت خابرها

من عادتك .. يا قلبك القاسي
خطيبتك .. دايم تغيرها

قصيدة لهفة عاشقة ...


للوطن أرسل من الخافق سلام
فيه لهفة عاشقة عيت تتوب

للسعودية مدار الإهتمام
شمسنا اللي ما لها يوم غروب

قلت احبك قبل ما اعرف الكلام
ومع حليب امي لك الود امحسوب

ومن حوالي أربع وعشرين عام
كانت أول خطوة ف أرضك تجوب

يكفي انك موطن البيت الحرام
كم يحسدونا على هذي شعوب

وفيك مسجد للنبي سيد الأنام
إنخلق معصوم من كل الذنوب

وما ملك مستعمر لأمرك زمام
يومك انتي مالكة كل القلوب

ومهما قالوا فيك عذالك ملام
لا حشا ما اشوف في داري عيوب

من يلوم اللي زرعتي به هيام
شعبك اللي هام في حبك يذوب

إنتسابه لك على صدره وسام
يفتديك ان كان في سلم أو حروب

الغلا للشرق وللغرب إحترام
من شمالك نعشقك لين الجنوب

الله يديمك لنا عز و سلام
والله ينور لنا فيك الدروب

وبصلاة الله على أحمد ختام
عد ماهبت على الصحرا هبوب

[لمسة دفء]

قصيدة وأطري عليك ...


آسفه .. كنت احسب انك ( قد ما آحبك ) تبيني
قلت يمكن تشفق الدنيا علي .. و اطري عليك ؟

ما هقيت انك ولا مرة .... كذا ..... فكرت فيني
يوم انا مالي وجود إلا إذا فكرت فيك

كل ما شفت الشروق.. اقول..هذا انت ابتجيني
لين ما ذابت شموس الكون من شوقي إليك

وكل ما حسيت في قلب عروقه تحتويني
صوره عندي خيالي (لك).... وأتلهف و اجيك!

وآتوهم قبل ما .... أوصل ...... بأنك تحتريني
وآتساءل .. ويش بتسوي .. لو إني ما أبيك ...؟؟

وإقتناعي ....... إن ذا مكتوب مبطي في جبيني
وإنني ماني سوى لعبه .. وطاحت في يديك

يا خسارة كل احاسيس الغلا لك في سنيني
يا خسارة عمري اللي راح عمره يحتريك

يا خسارة كل زين ما قدر يوصل لعيني
يومني ارويت عيني بك..ولا ارضى لك شريك

آسفه ..... لا والله الا آسفه بيني وبيني
كنت احسب انك كفو هالقلب يومه محتويك

كيف أنا قارنت أصلا (حب غيري) مع (حنيني) ؟؟!!!
لكن الشرهه علي والا انت .. ما يشره عليك

قصيدة عسى ما تكلفت ...


عقب الثمان دهور مريتني اليوم
جايب تحياتك .. عسى ما تكلفت !!

ما كنك اللي قلت (انا فيك مصدوم)
عيني بعينك .. تنكر انك تحسفت ؟!

لو تمهلك دنياك ما تمهلك دوم
هذا.. لو انك للغلا قد تعرفت

أجل أنا يا صاحبي ما علي لوم
لو عن رجاي وحسن ظني توقفت

وكانك تعاف امن الوله لذة النوم؟؟
أنا لهالدنيا بلذاتها عفت

ياما سهرت وصحبتي ليل ونجوم
وياما على روح المجرات سولفت

وياما رحم حالي يتيم ومظلوم
والجن احس اني معاهم توالفت

لين الشقى خلى من عزومي..عزوم
وعن ركب تباع الهزايم تخلفت

ما شفت قبلك داخله ( أمة ) رخوم
ومثلك(قبيلة) في الردى..مابعد شفت

القلب لولا نبضته ؟؟ ماله لزوم
والدم لولا حرمته ؟؟ ما تكتفت

محروم عشت .. وخلك تموت محروم
يكفيك بإنك في صدودي تشرفت

ولا تحسب اني ارتجف خوف وهموم
لولا الحساب وشدته.. ما تراجفت

ولا يقبل الله لي صلاة ولا صوم
إن كانني من غير رب الملا خفت

لو بس تفهم ليه انا أستر علوم
ما كان عني هالحكايات ألفت

خطاك سهم صايب الروح مسموم
ماعاد يشفع لك أسف لو تأسفت

وبهالبساطة جيتني شاري اليوم
وتبيعني بكره ؟؟ عسى ما تكلفت

[لمسة دفء]

قصيدة طيف السراب ...


طرى في البال هوجاس شعور خفت تفسيره
شعور يوم لاقيتك .. نسى باله و هوجاسه

تقوله : نفترق لازم عسى يا علها خيره
واقول إن كانها فرقا ؟؟ عساها ضعف مقياسه

خبرتك ما تقول إلا كلام دون تبريره
علامه هالحكي كله لسانك يومها داسه ؟

سكنت الروح في روحي بنى لك خافقي ديره
تطاول في مبانيها و لكن إنهدم ساسه

حسبت ان الفؤاد بطلعتك بيطير مع طيره
و اثر طيري بجنحانه غدى عباس فرناسه

كسرت من الغلا قلبي بعد ما طاب تجبيره
شربت من العطش دمعي بعدما إمتلى كاسه

تصور هالعقل طيف السراب و زان تصويره
ألا وش حيلته عقل ضرب باخماسه اسداسه

يعانق هالألم روحي.. عرف للطيب تقديره
حلف في داخلي هالجرح لاماينحني راسه

خطاي إني عطيت الود منهو (لا) حسن سيره
مثيل الخل في السكر إلى من إختلط .. حاسه

حبيبي وش لنا والحب دام الحب تصبيره !!
بعيد الفرق .. وش جاب اسود الكربون ... لألماسه

حبيبي للأسف ما عاد قلبي ينتفض غيره
تريح من جميع احساس قلب مات بإحساسه

حبيبي و الوداع الحل كانه ما بقى غيره
أمانه بس لا تنسى تشيل الحب فأكياسه

طرى في البال هوجاس شعور ( صح ) تفسيره
شعور يومي اطريته .. رميت البال .. بأنجاسه

قصيدة لا باس ...


عامين واردى طبع بي .. يرفع الراس
عامين حتى من ظلمني .. نصرته

لا باس ياللي ما تعرفون لا باس
الله وعدني بالستر لا سترته

يارب سامح من مشى يفتن الناس
عبدك بيهلك لو رحل ما غفرته

لا هو لقى في داخلي للردى ساس
و لا أنا اللي عن رخومه حظرته

إلين وسوس للشياطين وسواس
وانا سكت ..و أدري اني قهرته

يطرد ورى بنت أحمد بقطع الانفاس
هذا مع اني جالسه... منتظرته

ومن حر مابه قال يكتب لها احساس !!
مايدري اني عقبها كم شكرته

أبدعت شعري مير ما شلت هوجاس
كني بألاقي جنتي لا نشرته ؟؟

مو ذنبي انه من تراب و انا الماس
حاسد وانا من قبل يحسد عذرته

يارب انا ما همني حكي الادناس
مادام قلبي بالنقاوة عمرته

واللي تبجح بين معشوقة وكاس
لي الشرف كاني بطيبي غدرته

فالجود جيد ... لكن العرق دساس
وحكي بأقوله.. في السكوت اختصرته

عامين..واردى من حكى.. رافع الراس
والناصر اللي ما نصرني .. نصرته

[لمسة دفء]

قصيدة زمان الكبرياء ...


يا رفيق الجرح الأول .. جرحك التالي بيا
مدمي باقي عروق باديات الإحتضار

ما ذبحنا غير قولة : ( كبريانا ) .. كبريا
من عرفنا كبريانا كل شي فانحدار

لا تحسب الشمع نوره يكفي العالم ضيا
كل ليل بالخطايا تكشفه شمس النهار

الحقيقة في وضوحي ... لا غرور و لا ريا
البلا إن الخطا شيد على عينك جدار

كان صغر السن ظنك في عذاريبي حيا
كيف ظنيتك تخلي للعقل أدنى اعتبار

يا بدايات الهموم و يا بداياتي و يا...
.. آخر أحزاني ويا أكبر أحاسيسي الصغار

يا جميع الجرح الأول .... يا زمان الكبريا
يا وداع الحب كله .. يا وفاتي باختصار

قصيدة نشوة الاعجاب ...


سلام يالذي أنت الذي من بد هالأصحاب
ملك قلبي ، ملك عقلي ، ملك كل الذي ما (بي)

إذا كل القلوب أمست تبيك و لك تهج ابواب
فأنا مالي سوى قلب عيوف قافل بابي

إذا حتى الهقاوي خانت المحبوب و الأحباب
معاد بدنيتي شي يساوي هقوة إغضابي

أنا ما قد هقيت إن الشعر يصدق وهو كذاب
مثل ما قد هقيت إنك تخون الحب فغيابي ؟!

حضرت و لا حضرت إلا بعد ما كل مابي غاب
لبست ولا لبست إلا بعد ما ضاقت ثيابي

رغم كود الممات اللي تساوت عنده الأسباب
غريب إني تحريت الضمير الحي يصحى بي

كفاية نظرة عيونك تبرهن دونما استجواب
كفاية مبسمك عايش على توتير أعصابي

غبية كنت!! كيف إني سمحت لنشوة الإعجاب
تنادي للغبا طيف غباءه.. سبة إعجابي

و جوعت القوافي لاجل تطعم فص ملح ذاب !!
و عطشت القصايد لاجل تشرب ملح أهدابي

ألم بوح المشاعر و المشاعر ما لها اي حساب
سوى ما للمشاعر من ألم ينصب فحسابي

رهنت لبسمتك ثغري و عضيت الندم بالناب
عبس وجهي ولكن ما تولى غير لاحبابي !!

اذا ما كان بك ( كذب ) يراضيني إليا خاب؟؟
مصير الصدق بي يرضى اذا ما جرب عتابي

سلام يالذي كنت الذي من بد هالأصحاب
ملك قلبي،ملك عقلي،ملك كل الذي ما (بي)

إذا كل القلوب أمست تبيك ولك تهج ابواب
فأنا مالي سوى قلب ..عيوف... قافل بابي

[لمسة دفء]

قصيدة قد المراجل ...


من قال حنا نبي لك شي يالغالي؟
لا صرت كلما تكحلها.. بتعميها

حطيت عندك أمانه من ردى فالي
وازريت اقول إن حاميها حراميها

موروث طيبي وطهري وانصع اعمالي
ظنوك بانك على ماقيل راعيها

ياكثر ما خاب فيني ظن عذالي
وياكثر هقوات خابت قبل لأهقيها

ما شفت نخل وجا لي تمرها حالي
الا والاقي دسيس السم ساقيها

مدري تثاقلت اشيل الهم بلحالي...؟
مدري كتوفي علي اليوم وش فيها...؟!

طقيت انا كل باب شفته قبالي
ما غير باب الرذايل قلت مابيها

جنبت سمعي دروب القيل والقالي
ورفعت نفسي عن اللي هو يماشيها

عند الشدايد أحل معقد حبالي
واشد روحي على الضيقات وارخيها

والخير.. مهما جفوه الناس .. يبقالي
والناس ما تجفي الا من ترديها

جربت صمتي .. لقيت الموتة اشوى لي
والموت عيا على صمتي يعديها

وان صرت بنت فلانيب اصغر عيالي ؟؟
قد المراجل..وانا ابوها..واسميها !

قصيدة لا يغرك ...


لا يغرك زينك اللي في عيونك
ربي اللي زينك خالق سواك

ولا يغرك مدح من هم يمدحونك
كل مدح فيك بالذم اشتهاك

ولا يغرك قولهم : ( لا يحسدونك )
الحسد يا صاح منشاه بحشاك

يوم شفت الطيرمبعد عن غصونك
رحت يم الشمس في عن لظاك

دوك ثوب الخير ما غطى متونك
والفساد أردى خلاقينه كساك

يا مريض الحال قل لي ويش لونك؟
جب طبيب الكذب يصرف لك دواك

من يقول: (الصدق لا يمكن يخونك)
وش يقول فكلمة الصدق بهواك؟

تحسب إنك بالشعر عززت كونك؟
شعرك المكسور يالجاهل هجاك

لا تغررني بدمع في جفونك
ذاك أول يوم أنا أنشد رضاك

أتعس الصبار مسقيته مزونك
( يتفل ) أمطار تقطر من سماك

يا غشيم شلون تترك من يبونك
وترمي بنفسك على هذا و ذاك؟

لو سمعت الشور ما طعته جنونك
يستوي عنده نجاتك والهلاك

أعرف ان الطيب لا صنته يصونك
أنت من طيبك .. تبيع اللي شراك !!

عش قرير العين وانساني بهونك
يا حلاة العيش.. دام إنه بلاك

رح لمن غروك وازهلها ظنونك
كود تلقى لك خبل يركض وراك

[لمسة دفء]

قصيدة كلي شوق ...


وش حدني للشعر يا كود شوقي
وش حدني للشوق لولا محبتك

وش حدني للحب لولاك ذوقي
وما حد ذوقي غير علمي بطيبتك

حبك تغلغل واستبد فعروقي
سريت فيها لين ف القلب صبتك

وان كان به غيرك سكن في خفوقي؟
فما غير امك يومها لي جابتك

وتغير ؟ هذا وإنت طيحت سوقي !
اللي يجي لي؟ يشتري منك هيبتك

وماشفت وش كثر الفراشات فوقي؟
حتى محد يلمح جناين .. حبيبتك

والشمس..أنا..لكن.. حضورك .. شروقي
ما لي غروب الا إن أطريت غيبتك

ويحق لي لا قلت للنفس : موقي
مادام حتى الموق مايق بسبتك

المشكلة .. هالناس يقرون شوقي
والعين حق.. وشكلها عين صابتك

يومي أبرك .. ليه تبدا عقوقي ؟
كذا تجازي من على الحب ربتك؟

ولاعاد من حقي أدور حقوقي
مدام روحي راضيه يوم حبتك !

تليت وردي قبل تثمر عذوقي
واللي جنيته منك : شكك وريبتك

و اجيك كلي شوق .. وتذل شوقي ؟؟!

لا بوك !

.
.
.


لا بو الشوق !!

.
.
.


لا بو محبتك

قصيدة حلول ألغاز ...


يامعجب / تقول انك لشعر النسا منحاز
ياليتك / توفر هالمشاعر / ورايك .. لك

مرزز / مية صورة / تقل صالح العزاز !!
تبينا / ندقق في كلامك / أو ف شكلك ؟

على بالك ا عيونك معاها / حلول ألغاز
تحسب ان ازارير العذارى / تفكك لك !!

ترى لي / حمية شيخ .. ولي فالشرف مركاز
وحجة محبتك الشعر.. ما / تملك لك

تحديتني يمكن .. ولكن من اللي فاز
على الرغم من ألفين مبدع / مشارك لك

اذا انك وصلت ل وزن مطلع ؟.. وصلت انجاز
وعشرة كسور في القصيدة / تضاحكلك

تبي تفهم المغزى : عط الخبز للخباز
فلاحد ( سمع بالذائقة ) .. يشتهي أكلك

وانا عادتي ما احط بالي للإستفزاز
بس اني أبيك اتشوف غيره / يشبك لك

وخذها من العطر.. الصراحة بكل إيجاز
لوإنك تخلي النت كله .. ترى ابرك لك