العودة   شبكة صدفة > المنتديات العامة > منتدى صدفة العام

منتدى صدفة العام مواضيع عامة, مقتطفات, مواضيع جديدة، معلومات عامه.

إضافة رد
 
أدوات الموضوع
قديم 10-29-2010, 10:12 PM رقم المشاركة : 1
معلومات العضو
عادل الريس

الصورة الرمزية عادل الريس

إحصائية العضو








عادل الريس غير متواجد حالياً

 
إرسال رسالة عبر Yahoo إلى عادل الريس

افتراضي ذكريات تصوير مسلسل الرحايا باخميم

2009



ذكريات تصوير مسلسل الرحايا باخميم


من الصعيد الجوانى .. عيد ميلاد نور الشريف ..


لما أنتهت زيارتى للدير الأبيض على خير - زى ما قلت لكم فى البوست اللى فات - كنا بنصارع الوقت للوصول للمركب سوبك الراسيه على ساحل نجع العيساويه و كلى أمل فى اللحاق بالحفل اللى كان مقرر اٍقامته بمناسبة وصول الأستاذ نور الشريف فى أول يوم له لبدء التصوير و كمان بمناسبة عيد ميلاده اللى كان أحتفلت به معظم الفضائيات قبل هذا الحفل بكام يوم ..
لما وصلت المركب قبل الغروب بحوالى نص ساعه عرفت أن الأستاذ نور و مساعدينه لسه ما وصلوش و أنهم فى الطريق و حيوصلوا كمان ساعه اٍلا ربع علما أنه فضل الحضور لنجع العيساويه بالسياره و مش بالقطار ( يا بخته ) و مش بالطائره اللى لازم تنزل اٍما فى مطار أسيوط أو مطار الأقصر اللى بينهم و بين المركب حوالى ساعه و نص بالعربيه ..
قلت حلو أوى ..
فرصه الواحد يستحمى و يزيل شبرين التراب و العفره اللى لزقوا على جتتى من رحلة النهارده و يتكولن و يلبس اللى ما تلبسش علشان ده برضو عيد ميلاد الأستاذ نور يعنى مش أى كلام
أنجزت المهمه .. و طلعت على سطح المركب أتأمل الشمس و قد بدأت فى المغيب خلف الضفه الغربيه للنيل .. و كان هذا المشهد الساحر :


بعدها بدقائق حسيت بحركه غير عاديه على المركب و ناس طالعه و ناس نازله و حركة نشاط كده .. فتوقعت أن الأستاذ نور قد وصل .. و بالفعل لاحت سياره ميكروباص تابعه لشركة سياحه و وقفت أمام المدخل .. و أطلق الريس على قبطان المركب الأبواق بصوت عالى جدا شق الهدوء اللى تعودنا عليه كتحيه لوصول الأستاذ نور الشريف ..

و لكن هيهات !!
علينا واحد
الأستاذ نور ما نزلش من السياره اللى كانت بتحمل مساعديه و عدد كبير جدا من الحقائب الضخمه اللى بتحوى ملابسه و لوازم التصوير .. و سمعت الريس على بيزعق بصوت جهورى للى قال له اٍن الأستاذ وصل و خلاه يطلق الأبواق أونطه
- أمال فين الأستاذ ؟؟!!
سألت واحد من مساعديه ..
و علمت أن الحاج سيف كبير نجع العيساويه قام رجالته باْيقاف السياره اللى كان بيستقلها الأستاذ نور و أصر على دعوته لبيته اللى بيقع على مدخل النجع للقيام بواجب الضيافه تجاهه قبل أن يدخل القريه على عادة أهل الصعيد شديدى الكرم و اللى لا ينافسهم فى كرمهم سوى نحن و أعوذ بالله من قولة نحن معشر الشراقوه .. و أيضا أرسل من يدعو كل الطاقم الأول من العاملين بالمسلسل بغض النظر عن السبع ساعات اللى قضاها الأستاذ نور فى رحلته من القاهره للنجع .. و طبعا يعنى لا يجوز رفض أو الاٍعتذار عن هذه الدعوه فى الصعيد و اٍلا توبجا عيبه و شينه و الله وحده يعلم بعواقب الأمور
نص ساعه كده كمان و وصلت السياره اللى بتقل الأستاذ نور للمركب و المره دى بجد يعنى و أنطلقت مره تانيه الأبواق لتحية الأستاذ :




وصول الأستاذ نور للمركب




و هو بيدخل المركب

طبعا الاٍستقبال داخل المركب بقى كان شىء خرافى من كل العاملين بالمسلسل من فنانين و فنيين و اللى بتربطهم بالأستاذ نور صلات وثيقه لأنه محبوب من الجميع زى ما عرفت بعد كده لتواضعه الشديد و اٍلتزامه بمواعيد العمل و الراحه و حرصه الفائق على أن تسود روح المحبه فى أى عمل بيشارك فيه ..
كمان كان فى اٍستقباله على الباب الداخلى للمركب الريس على القبطان و مساعدوه و أيضا كل طاقم العاملين على الباخره و أشتغل التصوير بكاميرات الموبايل و الاٍبتسامه لم تفارق وجه الأستاذ نور أبدا رغم أنى رأيت الاٍجهاد الشديد واضح على وجهه لأنه ما لحقش يرتاح بعد وصوله من القاهره ..
الصدفه البحته جعلت جناح الأستاذ المخصص له و هو رقم 306 يقع مباشرة أمام غرفتى رقم 305 و لا يفصل بينهما سوى خطوتين هم عرض الممر اللى بتقع على جانبيه الغرف و الأجنحه ..
الحقيقه يا جماعه مش عاوز أتكلم كتير عن نور الشريف الفنان لأنه حيكون كلام متكرر لا فائده منه .. الخلاصه أنه فنان ملتزم جدا و شديد الحساسيه تجاه الأعمال المسيئه لمسيرة الفنان .. لا عمرنا شفناه بيعمل عمل تافه الغرض منه اٍضحاك المتفرج و خلاص .. و لا عمرنا سمعناه بيتكلم كلام فارغ الغرض منه التقرب لأولى الأمور حتى لو كان على حساب تاريخه الفنى ..



أنا اللى على اليمين برضو علشان ما تتلخبطوش يعنى
الصوره دى كانت أثناء تناول العشاء .. و الأستاذ نور رفض كل أنواع الطعام رغم فخامتها لما عرف أن الشيف عامل كشرى و طلب يجيبوا له طبق كشرى محبش أكل منه و أبدى اٍعجابه بيه .. بصراحه أنا بصيت لكمية اللحوم اللى قدامى و أنكسفت على دمى !!
لما سألته ذات مره و اٍحنا قاعدين بالليل على سطح المركب أيه أقرب عمل فنى لنفسك يا أستاذ نور ؟؟
قال بدون تردد :
- ناجى العلى .. فيلم ناجى العلى ..
و ألتفت خلفه يتأمل صفحة النيل و قد اٍنعكس عليها وجه القمر ..
السياسه و واقع الحال العربى .. شيئان هما محور أحاديث الأستاذ بعيدا عن اللوكيشن .. و الحق أن آراءه التى يعلنها فى وسائل الاٍعلام هى هى نفسها التى سمعتها منه لم يغير منها حرفا و لم يبدل فيها على عكس الكثيرين من المشاهير الذين جالستهم و اللى بيبقى كلامهم المعلن غير كلامهم اللى مش معلن )
نور الشريف قست عليه الحياه قليلا فى طفولته .. القسوه لا تكون دائما عن طريق الماديات لأنه كان من أسره ميسورة الحال .. مثلا هو أكتشف أنه يتيم لما دخل المدرسه و أستغرب فى دهشه طفوليه لما علم أن اٍسم أبوه اللى المفروض يكتبه ملحقا باٍسمه ليس هو اٍسم الرجل اللى كان بيعتقد أنه أبوه و قد ساعدته شقيقته الكبرى على فهم هذا اللغز .. و أزعم أن هذا الموقف قد أثر فى حياته و فى طريقة معاملته لمن هم أقل منه تأثيرا كبيرا ..
نور الشريف اٍنسان متواضع لأقصى درجات التواضع .. لم تبهر أضواء الشهره عينيه .. و لم تنسه المكانه المرموقه التى وصل اٍليها كفنان معدود ضمن أكثر 10 ممثلين فى العالم نجوميه أنه فى النهايه اٍنسان .. اٍنسان يتعامل مع الجميع من هذا المنطلق .. و له تصرف لاحظته و أستغربت له أنه بيقوم و يقف و يبتسم لما حد من المتردوتيلات يضع له المشروب !!
و رغم اٍجهاده الشديد بسبب الرحله التى قام بها من القاهره للعيساويه و برغم الضجه التى حدثت بسبب وصوله للمركب ناهيكم كمان عن أنى ما رحمتوش و هاتك يا كلام و أسئله اٍلا أنه مانسيش يتابع بالموبايلات الأتنين اللى معلقهم فى رقبته آخر تطورات الموقف العائلى بين مديرة منزله و بين زوجها اللى كان بينهم خلاف و كان بيطمئن أن الأمور بينهم هدأت و المياه عادت لمساراتها الطبيعيه !!
الأستاذ نور له طبيعه خاصه جدا قد تكون موجوده لدى أغلب الفنانين الكبار و له طقوس يعرفها كل من يشاركه العمل قبل أن يبدأ التصوير و هى تبدأ مباشرة عقب اٍنتهاءه من عمل المكياج و لبس الملابس الخاصه بالدور .. ينزوى لوحده و مش شرط يكون بعيد عن الموجودين .. يصمت تماما لمده قد تطول أو تقصر على حسب موده .. ينفصل نفسيا عن المكان و الزمان و شيئا فشيئا تتغير ملامح وجهه .. يتغير صوته .. تتغير مشيته .. يخرج من شخصية نور الشريف تماما و يدخل فى اٍهاب الشخصيه اللى بيجسدها .. و لما بيتم له ما يريد ممكن بقى يتبادل الحديث مع الآخرين لكن قبل كده ممنوع التحدث معه اٍطلاقا ..
أيه ده ؟؟
أنا سرحت كده ليه ؟؟!!
معلش
نرجع تانى لموضوع البوست و هو حفلة عيد الميلاد !!
دى صورة البهو الرئيسى للفندق العائم سوبك قبل الحفله .. لاحظوا الهدوء اللى فيها :

لما نزلنا البهو الجميل ده كان المكان ممتلىء عن آخره بطاقم العمل .. و فجأه اٍنفتح باب المطعم و خرج منه ما لم أتوقعه أبدا !! و أصيب الأستاذ نور بالدهشه الشديييييييده .. بصوا :







زى ما شفتوا كده )
فوجئنا جميعا بتورته عملاقه و بكل العاملين بمطبخ و مطعم و بار الباخره (على فكره البار لايقدم خمور و لكن شاى و نيسكافيه و حاجات من دى ) و على رأسهم كبير الشيفات محمود اللى شعره أبيض رابط منديل أحمر على رقبته (لاحظوا رشاقته و لياقته العاليه) و هم شايلين الدفوف النوبيه و هاتك يا مغنى و رقص .. ما هم أصلا كلهم من النوبه و على حسب ما قالوا لى اٍن النوبيين بيعبروا عن كل شىء فى حياتهم بالرقص و الغناء حتى فى قمة أحزانهم برضو لا يتخلوا أبدا عن شغفهم بالتعبير رقصا و غناءا عما يدور بداخلهم ..
و شاركهم الأستاذ نور الرقص النوبى لبعض الوقت و لاحظوا ملامح التعب اللى على وجهه ..
ثم كانت لحظة طفى الشموع و اللى شاركت فيها الفنانه سوسن بدر اللى علمت منها اٍن لها جذور نوبيه هى كمان !! و بالمناسبه هى بتؤدى فى المسلسل ده دور شخصية سيده صعيديه قاتله و مخيفه شعرت بقشعريره فى جسدى و هى تؤدى مشهدا كانت تتشمم فيه طفلا كالذئبه المفترسه قبل أن تذبحه !! بصوا الصوره دى :



و برضو الجماعه ماسابوش الأستاذ نور يستريح و أصروا على مشاركتهم رقصهم و غناءهم ..



بالمناسبه بقى الرتم النوبى ده مصطلح موسيقيا مش صح لأنه الحقيقه هو اٍسمه الاٍيقاع الخماسى اللى هو الاٍيقاع الاٍفريقى و اللى كان بيستعملوه المصريين القدماء فى غناءهم و فى ترانيمهم و هو اٍيقاع ساحر شديد الحيويه يخليك غصب عنك تتمايل معاه .. و النوبيين حافظوا عليه على مدى آلاف السنين و لم يتأثروا بأى نوع من الاٍيقاعات الموسيقيه الأخرى ..
و اٍنسحب الأستاذ بأعجوبه و جلس ليستريح و كان فى ضيافته بقى المره دى الحاج سيف كبير نجع العيساويه اللى وصل مع مجموعه كبيره من رجاله و معاه اٍبنه طفل صغير لكنه بيتصرف كالرجال الكبار و كان لابس بدله و بابيون .. و الحاج سيف أهدى الأستاذ نور هديه قيمه جدا جدا بمناسبة عيد ميلاده عباره عن نموذج موغل فى القدم لرحايه فى علبه قطيفه حمراء تماشيا مع اٍسم المسلسل اللى هو الرحايه برضو .. الحاج سيف اللى لابس جلابيه بيضاء :


و فضلوا برضو الجماعه يرقصوا و زى ما يكونوا أما صدقوا سمعوا دق الدفوف علشان يرقصوا و ما شعرتش أنهم حسوا بالتعب فى الكليب ده حتلاقوا الظابط الاٍدارى للباخره اللى لابس قميص أبيض و كرافته بيرقص مع البارمان شريف اللى هو الشاب اللى لابس صديرى أحمر و اٍذ فجأتن و على حين بغته بيروح ناطط وسطهم المتردوتيل نجيب اللى لابس صديرى أسود زى ما يكون ماهنش عليه يسيب فرصه و ما يرقصش فيها !!
لاحظوا كمان شخص اٍسمه أنور لابس جلابيه و متحزم و بيرقص معاهم علشان ده له حكايه رهيبه و كانت حتحصل له مصيبه كبيره لولا لطف الله و حأبقى أحكيهالكم فى بوست تانى



و لاقيت موبايلى بيرن و كانت البرنسيس شمس النهار .. رديت و طبعا كانت الدوشه عاليه جدا جدا و مش سامعين بعض .. لاقيتها بتقولى :
- أنا مش سمعاك خالص و واضح أنك فى مولد .. هو فيه مولد فى البلد اللى أنت فيها ؟؟
قلت لها :
-أيوه .. بنحتفل بمولد الأستاذ نور الشريف )
ردت فى براءه :
- طيب لما ترجع المركب اٍبقى كلمنى !!
و دى كانت اللحظات الأخيره فى الاٍحتفال قبل ما الأستاذ يستأذن من الجميع و يصعد لجناحه الساعه 11 بالظبط زى ما هو متعود لأنه بينام 11 و نص بالثانيه مهما كانت الظروف ليستعد لأول يوم من الأشغال الشاقه لتصوير أول مشاهد خارجيه له فى المسلسل و اللى كانت فى منطقه اٍسمها الهدار حاجه كده شبيهه بالشلالات :



شويتين كده و أنا كمان طلعت على غرفتى بعد ما هبدت حتة تورته قدددددددددددددددددددددد كدهوه (قد عقلة الصباع و الله) اٍستعدادا لرحلتى تانى يوم لزيارة مدينة أخميم الفرعونيه الصميمه حيث وقعت فى غرام بنوته صعيديه بنت ناس أوى أوى سحرتنى و سلبت عقلى بجمالها و شبابها و مياصتها !! هى صحيح فى سن عيالى بس أعمل أيه ؟؟ أصل الهوى غلاب !!
و ده بقى موضوع البوست القادم باٍذن الله .. فترقبونا
لكم كل الشكر و التحيه ..
منقوووووووووووول









آخر مواضيعي 0 تاريخ كسوة الكعبة في مصر
0 وحشتوني
0 كيف تتلذذ بالصلاة
0 مشهد سيسجله التاريخ ؟؟؟؟؟؟؟
0 إسرائيل" وتهديد الأمن المائي المصري
آخر تعديل عادل الريس يوم 10-29-2010 في 10:27 PM.
رد مع اقتباس
قديم 10-30-2010, 12:08 AM رقم المشاركة : 2
معلومات العضو
ملكة بإحساسي

الصورة الرمزية ملكة بإحساسي

إحصائية العضو








ملكة بإحساسي غير متواجد حالياً

 

افتراضي رد: ذكريات تصوير مسلسل الرحايا باخميم

عادل بارك الله فيك
تسلم الايادي والله يعطيك العافية







آخر مواضيعي 0 برنامج DuDu Recorder v4.90 الافظل في تسجيل المكالمات والملاحظات
0 كن بشرا وليس اشباه بشر
0 كيف تجعل عطرك يدوم طوال السهرة
0 ازياء رائعه وانيقة للمحجبات
0 فساتين قصيرة وناعمة للسهرة
رد مع اقتباس
قديم 10-30-2010, 10:09 AM رقم المشاركة : 3
معلومات العضو
أحمد اسماعيل

الصورة الرمزية أحمد اسماعيل

إحصائية العضو







أحمد اسماعيل غير متواجد حالياً

 

افتراضي رد: ذكريات تصوير مسلسل الرحايا باخميم

عاشت اخميم حرة مستقلة


ههههههههههههههههه




ابو احمد

يسلمووا على الطرح المميز

دعواتى لك بالصحة والعافية






آخر مواضيعي 0 مباراة الأهلي ووفاق سطيف الجزائري
0 دعاء يوم الجمعة
0 روسيا تسلم محطة تشيرنوبل النووية إلي أوكرانيا
0 دعاء آخر يوم في شعبان
0 فضل الصيام
رد مع اقتباس
قديم 10-30-2010, 10:16 AM رقم المشاركة : 4
معلومات العضو
أحاسيس مبعثره

الصورة الرمزية أحاسيس مبعثره

إحصائية العضو








أحاسيس مبعثره غير متواجد حالياً

 

افتراضي رد: ذكريات تصوير مسلسل الرحايا باخميم

انا فعلا كنت متابعى مسلسل الرحايا وبجد عجبتنى كتير وخصوصا كمان ريم البارودى وجه جديد ومشرق

الغالى

عادل الريس

تسلم على الموضوع الجميل وبالشرح

دومت لنا بكل الود



تحياتى

أحاسيس مبعثره






آخر مواضيعي 0 لا احد يستطيع أن يفهم نغماتك
0 يااااقلمى
0 ياحبيبى
0 الحب هو ان أحتاجك
0 بحر الحياة
رد مع اقتباس
إضافة رد

مواقع النشر

أدوات الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code متاحة
كود [IMG] متاحة
كود HTML معطلة

الانتقال السريع


الساعة الآن 04:12 PM.


Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
Content Relevant URLs by vBSEO 3.6.0 (Unregistered) Trans by

شبكة صدفة

↑ Grab this Headline Animator