ديوان الشاعر فهد المساعد

نور · 07-03-2010, 09:27 PM

قصيدة / عمان

اليوم يالتاريخ وقف عشاني
عندي قصيد وحب وأسرار وأشجان

قل للدقايق لاتطيع الثواني
وقل للثواني تنتظر قدر الامكان

في صدري الليله قصايد واغاني
لعمان وأهل عمان ولبيرق عمان

سلام يامسقط غرام المحاني
من شاعر من عانق يديك ولهان

شاعر سعودي نصف قلبه عماني
من كثر ماقلبه هتف عاشت عمان

نور · 07-03-2010, 09:27 PM

قصيدة / 19 عام

19عام .. وبقى لك بعد عام
ويصير عمرك مثل ماأنتي تحبين

عقبال ماتمضي الليالي والأيام
ويمر يوم فيه اشوفك تقولين : ..

ياشاعري قل للدفاتر والأحلام
مرت سنه واليوم كملت عشرين

قلي كبرتي .. قل كبرتي .. من العام ..
وأنا احتريها .. وأنت ساكت لهالحين ؟!

وأقول هذي كلها حسبة أرقام
هو للسحابه عمر !ردي ؟!وبعدين ..

مهما تكبرك الليالي والأيام
تبقين طفلة قلبي اللي تحبين

نور · 07-03-2010, 09:28 PM

قصيدة / عين بدوي

وأتذكر كيف عشت اللي مضى لي من غيا
من غيابك لين هذا اليوم والهم اسروي

حالتي صعبه وضيقة خاطري قلة حيا
منطوي وأحس فيني شي مثلي منطوي

من بعد ماكان هذا القلب مرباع أخويا
ضاقت الدنيا عليه ولابقى منهم خوي

هيه ياللي همس صوتك نور..وحروفك ضيا
ليت صمتك موت وأشرب من فراقك وأرتوي

ودي أدري قبل ماأحيا كيف أموت ولا حيا
كم تعبت أموت وأرجع مثل خلق الله سوي

يالحقيقه في الزمان الممتلي كذب وريا
مابقى لي غير كلمه قبل مالصوت يهوي

أقسم برب البروق اللي كما مبسم هيا
أنك أغلى من بكور الوسم في عين بدوي

القصيدة/ للاستماع و التحميل

7
7

هنا..*

نور · 07-03-2010, 09:28 PM

قصيدة / أخر دروبي

يا بشر تكفون حلو عن سمايه
ما يصيب الهرج لو الهرج صوبي

كم سكت لكم بما فيه الكفاية
اشتموني لو زعلتوا واشمتوا بي

عيبوني واتركوني في عمايه
واتركوا لي واحد يرضى عيوبي

اتركوا لي واحد يمسح شقايه
كل ما حط الزمن دوبه ودوبي

ذاك والله لا ذكرت انه ورايه
اشعر إن الكون كله وسط ثوبي

يكفي انه لو يسولف للمرايه
كن صوته يهمس لصورته.. ذوبي

كيف أنا ما أذوب ما دامه معايه
اسمعه وأسهر معه لأول ذنوبي

كل ما قال السهر درب الغواية
قلت كله من عيونك هبلوا بي

وكل ما قال الخطا ماهو خطايه
قلت له قل للعيون السود توبي

ضيعتني واسأل الله الهداية
وين أجيب العقل.. أجيبه من جيوبي

من يعرفك ما يدل العقل راية
يا شروق العمر.. مدري يا غروبي

أذكر انك كنت لي مثل الهواية
لو تروح ولو تجي يبقى شحوبي

بس مدري كيف صرت اليوم غاية
وصرت أجي وأروح مدري عن دروبي

يا بعد عمر الكتابة والقراية
يا الشمالي يابو الملح الجنوبي

لا قريت اللي كتبته يا رجايه
رح وبلغ ربعي اللي جننوا بي

قلهم يمكن يخلون الوشاية
و إن تمادوا خلهم مهما حكوا بي

أنت خلك بس في الدنيا عزايه
لا تفكر في العواذل وأنت صوبي

ادري إن كل درب وله نهاية
بس أنا باقي معك لآخر دروبي

القصيدة / للاستماع و التحميل

7
7

هنا..*

نور · 07-03-2010, 09:28 PM

قصيدة / فقدت في الشده

فقدت في الشده حبايب وخلان
هانت عليهم عشرتي بس ماهنت

خانوا .. وقلت أن الزمن مثلهم خان
لكن بعد ماشفت زولك تطمنت

وعرفت من فقدي لهم أني إنسان
ماعاد باقي له من العالم الا أنت

أنت السبب ياقلب في كل ماكان
مشكور ياقلبي على الطيب وأحسنت

في خاطري كلمه على حد طوفان
بقولها .. واليوم شفتك وهونت

لكن تذكر للأسف قدر الإمكان :
أن الجفا رجال وأن الوفا بنت !

نور · 07-03-2010, 09:28 PM

قصيدة / ذكريات

كل يغني على ليلاه
وانا على حالي أغني

أحيان عقلي احسه تاه
واحيان افكر واقول : اني

حزين..صدري مداين آه
ضايع بخت من صغر سني

غريب ربع وطريق وجاه
وحيد ماحد درى عني

غاوي شعر والزمن شلفاه
تنهش ضلوعي وتطعني

يلعن ابو الشعر يوم اقراه
وش جاب لي وش خذا مني؟

اظماه واشربه لين اظماه
وبأموت ظاميه لكني

لو ماوزنه وانكسر لرضاه
راحت قوافيه تلعني

في الذاكره شي لو انساه
يمكني اعيش متنهي

في الذاكره دمع..لاوالله
في الذاكره طفل يغني

ليت الاماني جبل وارقاه
وانسى همومي وينسني

مايدري اني على ذكراه
يمكن ابقى ...ويمكني

اترك طريق الشعر واجفاه
واموت مأحد درى عني

نور · 07-03-2010, 09:29 PM

قصيدة / سؤال

لاتكدر خاطرك ضيقة حبيبك يوم قال
أيه أحبك يابعدهم بس أنا وين آغدي

ضيقتي ماهيب بس اليوم يابنت الحلال
ضيقتي لها ثلاث سنين تاكل من يدي

ضيقتي مافي وفاها يابعد عمري جدال
كل ليله تبسط يديها وتفرش مرقدي

ودي أسكت بس أعرف الحظ لامن مال ..مال
لي متى والصمت ينهش في ضلوعي وجسدي

شوفة عيونك..هموم وضيق خلق وقل حال
وش أسوي دام حظي يابعد عمري ردي

هي كذا عيشة حبيبك لو تظاهر بالكمال
أقرب أيامه سعاده بعدها بعد الجدي

هي كذا وأنتي بكيفك ..مابقى فيها سؤال
فيه دمعه في عيوني تنتهي أو تبتدي؟!

كلها مابين كلمة روح أو كلمة تعال
كلمة فيها أضيع ..وكلمة منها آهتدي

هذا كل اللي بقوله..وأعذري قل الوصال
والله أدري بك زعلتي بس أنا وين آغدي

نور · 07-03-2010, 09:29 PM

قصيدة / التفاصيل الصغيره

ازعل عليك احيان
وأزعل على نفسي قبل ماأزعل عليك

وأرضى عليك احيان
وأرضى على الدنيا وانا راضي عليك

وأنت عمرك
مازعلت .. وماعتبت ... ومارضيت

أزعل علي لو كذب
أعتب علي لو كذب

هذي التفاصيل الصغيره
اللي تخلينا نحب

ماأحب انا ازعل عليك
ازعل انا لأني احب

***

ياأدفى من حروف الشعر
ياأرق من حلم السنين

إذا تركتك تنتظر
حسسني إن انتا حزين

مابي تقول مسامحك
قل : ماأبيك

وإذا رجعت اصالحك
أبعد يديك

أنا انجرح قبل اجرحك
وأبكي عليك

لكن أبي مره تحس
وشلون أنا أموت فيك

هي التفاصيل الصغيره
اللي تخلينا نحب

ماأحب أنا أقسى عليك
أقسى أنا لأني أحب

***

أدري فيك تموت فيني
وأنا ميت من برودك

لي متى وانتا تبيني
وماتحسسني بوجودك

ايه ... حسسني بوجودك

لم صوتي
بعثر حكاية سكوتي

لاتخلي الحب يفقد همسك العذب ويموت
قل احبك ..
قل احبك بأعلى صوت

انا مليت السكوت

***

ياإبتسامة قلبي ولهفة حنينه
ياشقاه وياحنانه

يابعد كل المسافات الحزينه
معك امانه

الدروب اللي مشينا .. لاتضيع ونغترب

بالتفاصيل الصغيره
نقدر نعيش ونحب

القصيدة / للاستماع و التحميل

7
7

هنا..*

نور · 07-03-2010, 09:29 PM

قصيدة / زمان الدجى

بعد التعب عودت مثل أي أنسان
بأنسى همومي .. مثل مالناس ناسين

قعدت أقلب في الفضاء كوم بلدان
من شاشة لشاشة و لا أدري على وين !

قلت أنبش هموم و كواليس الأوطان
و أشوف هاللاهين في ويش لاهين

أول قناة .. و فلم عن قصة أخوان
حبوا فتاة و فرقت بين الاثنين !

ثاني قناة .. و وجه .. أو لوحة ألوان
من لبسها .. وش لبسها ؟ ربك يعين !

ثالث قناة .. و رقص .. واضواء .. وألحان
أجساد معروضة من يدين ليدين

رابع قناة .. وشاب من بين نسوان
يشرح لهن بإمعان عن موضة ألفين

خامس قناة .. و من صبايا لفنان
لا والله إلا زغردي يا فلسطين

سادس .. وسابع .. كلها حملة أعلان
ثامن .. و تاسع .. مثل باقي العناوين

عاشر قناة .. ومنظر يهز الأبدان
من شوفته ضاقت على دمعي العين

قبله وأنا تحت الغما بين جدران
حول الحطب وأقسى على البرد ويلين

بعده وأنا تحت السماء فوق طوفان
وأحس في صدري سواة البراكين

منظر طفل دينه نسخ كل الأديان
مسلم يعرف الله قبل ينطق السين

منظر طفل مسلم مشرد ومنهان
بين المطر والبرد والجوع والطين

عاري وخايف .. لأن كم طفل عريان
في مثل عمره واندفن قبل يومين

جايع ومن كثر القناعة والايمان
يسكت ويقرا الحمد ويقول آمين

صوته عتاب .. ورعشة ايدينه احزان
و نظرة عيونه مثل طعن السكاكين

في قلب من له قلب مفعم بالايمان
وفي عين من له في زمان الدجى عين

يا الله ياللي عندك الناس سيان
تجار .. وضعوف .. وعبيد .. وسلاطين

حنا عبيدك .. وأنت ياعالي الشأن
أدرى بخبث و غطرسات الملاعين

يارب تدحر كيد عباد الاوثان
و تعز ناس همها نصرة الدين

نور · 07-03-2010, 09:30 PM

قصيدة / حبيت اوضح لك

في عز ماكنت أهوجس فيك وافتح لك
أبواب قلبي خذتني رجلي لبابك

وجيتك وأنا ماذكر إني كنت رايح لك
بس اذكر اني كذا لاطول غيابك

ياما ترددت مدري كيف بشرح لك
أجيك وارجع .. أبيك تقول وش جابك

يابن الأوادم ترى مليت ألمح لك
أنا أعزك .. وأحبك .. واعشق ترابك

لاضقت اضيق .. ومتى ماتفرح أفرح لك
ولاغبت أموت ومتى ماشفتك احيابك

ان كان ودك ترسيني على كحلك
لميت عمري .. وخاويتك على أهدابك

لكن قبل تنجرف .. حبيت أوضح لك
مستقبلي في يدينك .. وأعمل حسابك

لوضاع مستقبلي مانيب سامح لك
يكفيني الماضي اللي ضاع بأسبابك