ديوان الشاعر زايد بن سلطان ال نهيان

[لمسة دفء]

دكتورنا به عوقي


شاعر اوفيه الشّوقي أولا إيذوقي
أوطيب الغذا ماياه
كم إنتظر للشّوقي في اطروقي
أوعيّا ولا وافاه
بويادلٍ مطلوقي من فوقي
غطّا الجسم أوضفاه
خدّه شرى لبروقي له ذوقي
بين المزن محلاه
بو همّصٍ مرفوقي م العوقي
سبحان لي سوّاه
دكتورنا به عوقي اولا ايفوقي
من معسول الشّفاه
جد مرّ بي هالعوقي بالبوقي
يا شاجي من وزاه
سدّى أو سرى في اعروقي في الموقي
شيّد بيت أو بناه
انته خبير الذّوقي اولا ايعوقي
رمز الهوى معناه
لا اتحطّ سدّك فوقي لخلوقي
تتنا وله لوشاه
تكفا جميع العوقي برفوقي
تسلم أو تبقا أوياه

[لمسة دفء]

شرتا الهوى عمّالي




شرتا الهوى عمّالي
للمغرمين أوياك
متصوّبٍ في الحالي
او ربّي ينزح عداك
والدّله لي ما إيبالي
ما يِسْتَوْيِعْ شراك
تبع المها لوطالي
يسوى يلّو وزاك
يقدر طويل البالي
والغزر لي شرواك
إينال امن المنالي
لي ما احتوى إلهذاك
اولي خاليين البالي
لي ما ابتلوا ابّلواك
عنّيت لي لمثالي
ياذا الشّاعر عساك
تصبح فرح واتنالي
يا مانع ابمنواك
يعل الغضي لك فالي
ينهل مورد هواك
او تصبح إبخير او سالي
ابعذب الشّفايا اوياك
بوحيّاتٍ عدالي
لي بيّ لك يسباك
أشقر عفر يفّالي
عاينته احتواك

[لمسة دفء]

حيّ بجواب منك رايع




حيّ بجوابٍ منك رايع
ياذا الخوي لي لك معي قدّ
شاعر أوجيلك به نوايع
في الفنّ مالك عندنا حدّ
واللّي شرات الفلّ فايع
تكبر فرحته يوم بتردّ
غضّ الصّبا حلو الشّوايع
ياضي شرى القنديل وازيد
ماتلام لي له صرت طايع
إكتم وداده واحفظ السّدّ
حظيت به زين الطّبايع؟
عساك في لاماه تسعد
ساير معا ذرب الرّوايع
وقرومٍ إلهم نبّ مبعد
لي صيتهم بّين أو ذايع
والنّاس كلها لهم بتشهد
الحبّ في كلّ الشّرايع
منصوص به ذكرٍ اموكّد
والنّاس له شاري أو بايع
وحدّ صدير أو حدّ يورد
واللّي غدا مبعد أو نايع
الشّوق به ملزوم يشتدّ

[لمسة دفء]

الحب واشروطه




شكيت لي من ذا المليله
يا ذا الخوي مالك علي لوم
الحبّ واشروطه أو دليله
معروف عند اهله أو معلوم
لي يعتريه ايشدّ حيله
ويكون متحمّل له ايروم
ما يحمله راعي الهزيله
إيردّ دونه او يكسب اللّوم
يخسر لياليه الطوّيله
ويعيش متشائم او مندوم
الاّ انت يللّي يحتوي له
بمخططاتك تقدر اتشوم
او تكسب مغازيك اليميله
وامن الغضي ما اتكون محروم

[لمسة دفء]

حيّ بجيل عنا لي

حيّ بجيلٍ عنا لي
ويا مرحبا به أو حيّه
عدّ ماطرٍ همّالي
في موسم الوسميّه
وعد حبّات الرّمالي
في الصّحرا الصّيدحيّه
من شاعرٍ مب سالي
عن مفرود الثّنيّه
لي صوّبه في الحالي
صوبٍ ماله دويّه
دكتور وبه اعلالي
من لانواع الخفيّه
بنثيب له في الحالي
بالفزعه والحميّه
أو بينود له بالمالي
لين اينال البغيّه
ومثله أنا مب خالي
من لي إيده عليّه
أنشد عنه وآسالي
وامره ماشي عليّه
لي ودّهم ما حالي
عذبٍ حسين البيّه
بستانٍ له واظلالي
زاخر بالعنبريّه
وبنّاته في المجالي
إهيه إليه الحميه
مبعد يلو عدّالي
ووصله صعب عليّه

[لمسة دفء]

حيّ بجواب ياني




حيّ ابجوابٍ ياني
من بادع الإنشاد
ولّف كلامٍ زاني
في سولعي لبلاد
القوع من لوطاني
مشهوره باحتياد
معدن زين او غواني
او نخبة إقروم أيواد
لي تكرم الضّيفاني
او تضفي ابدون انكاد
أو ذكراهم من زماني
معروف مع لعباد
يفتخر إبهم لانساني
ويماري الرّواد
وزيرنا لي حاني
يوم الحشود إتقاد
ايوايب الغزلاني
لي الهن غدا منصاد
دكتورنا ما ايواني
عن إهدفه ما حاد
يعله له الكسباني
وينال به لسعاد
خشف ريم أو دماني
إتلوح بلإياد
يوم اوفدت شيخاني
بالحلّ والميعاد
لي ناعس الاعياني
إبو ثنايا افراد
ماخلج مثله ثاني
أو على الغواني ساد
لوحطّ في لوزاني
وزنه عليهن زاد
اولي له غدا شفقاني
معذور ماله داد

[لمسة دفء]

ألا يا مرحبا حيّ


ألا يا مرحبا حيّ ابنفيحه
نسيم الشّرق لي ياب الجوابي
هلا به لي عرف قاصي النصيحه
كريم الأصل واجداد انجابي
تمثّل لي ابتماثيلٍ صحيحه
وكل ما قال لي فيها صوابي
ترى في النّاس أجناس شحيحه
اتخيّل لك غديرٍ من سرابي
إيشوفون الأمور اللّي فسيحه
ابعينٍ حولها ضاق الرّحابي
فهيمٍ للملامح والقريحه
ولا يخفاك خاطي اولا صوابي
ولو روّوك ضحضاح أو شيحه
فلا يغريك من لك باينابي
لأنّك من هل الجزلا الفصيحه
عريب العرب عالين الجنابي
شكيت امن الهوى حرّه أو لفيحه
وانته ابشوق منسوع الرّقابي
خفيف الرّوح والنّفس المليحه
يسلّي من ابقلبه لكتئابي
عزيب الرّيم في قفره نزيحه
وعين الحرّ لي في راس نابي
له الصّقّار لو يرضف ابصيحه
غنيّ النّفس ماحدّه أو يابي
عجيد اليازيات اللي سريحه
عرى عشب الشّوامخ في الرّوابي
سقا الله دارها يودٍ نضيحه
كسى لمغيب ويسوّي احيابي
وعود الموز والشّرتا لفيحه
هضيم الكشح لي زينه اعجابي
يصوّب في الهوى أو يشفي جريحه
إيعالج من يصيبه بلحرابي
محبّك لي بشوش ولك نصيحه
وبيّن لك خفا ما صار غابي
تخيّر له طريجه لي تريحه
وعن العذّال سربه في تغابي
ختمت الجيل بابياتٍ صريحه
جدا شهمٍ فيهمٍ للجوابي

[لمسة دفء]

دكتور وله بغيّه




تعزاني يا خويّه
أو باثيب لك فرحان
واملبّي ببغيّه
ياذا الشّهم لك شان
دكتور وله ابغيّه
بلكويت قلبه حان
شاف الحسن في ابنيّه
واتبدّلت لوزان
في الخود حاز امزيّه
وارموش له زفّان
أو تبريقةٍ مكسيّه
إمن الدّعايا الوان
واخدوده الورديّه
لي اترجّح الميزان
أو بنّاته عنبريّه
من ورد أو زعفران
وزيرنا له نيّه
في الرّيم والغزلان
شطّن به في اضحويّه
تعب أولفا عطشان
ين به في بوبهيّه
يردا أمن السّكّان
فيها المها له ضيّه
ذاير إمن الطّيشان
والقانص له سجيّه
أو يصبر على لمحان
أو لابدّ له من ضيّه
يلفي إبها فرحان
صايد حسين بيّه
ريمٍ رعى الجيزان

[لمسة دفء]

يا نجيّ الدر




يا نجي الدر لي صافي
لي جني من لجة ابحوره
فيك حسن وافي أوضافي
مر وقت لي وانا دوره
يوم ريتك عند لاشرافي
فرحتي بك مالها صوره
الخصر والزين لي وافي
منك ياخذ ذا البدر نوره
لو بشخص فيك لاوصافي
ما احتويت الحسن وامهوره
لك عيان نعس لاطرافي
حور بين العنيد مشهوره
وان وطيت الارض لو : لافي
إعشبت بالورد وازهوره
لك موده باطن أو خافي
عن حسود يلتمح صوره

[لمسة دفء]

مغذّي للهوى


أنا مغذّي للهوى دايم أودوم
ولا انظر اللي للهوى ما اينابي
هذاك معدومٍ وم الناس محروم
موته أو حياته كلها بالتّوابي
والاّ مريض الذوق في الفكر مسقوم
ولا له مرامٍ في الهوى او لا صوابي
واخْير منه كل قرمٍ أو شغموم
شهمٍ ايعدّ إلكلّ خفره احسابي
يدرا قدرها في القوافي عن اللّوم
ويحمي صديقه لايمسّه مصابي
سلام منيّي للغضي ريم لحزوم
اعداد غيثٍ هاطلٍ من سحابي
سلامٍ امعطّر ابوردٍ أو مشموم
عليك يا حلو الصّبا والتّصابي
ياللّي يديله فوق لرداف مردوم
شروى الدّجى حالك أو لون لغراني
واعيان حورٍ نوعها صار معدوم
ياللّي حظتها ارموش مثل الحرابي
ولي من تبسم بسمته اتزيل لهموم
ويبين من ثغره ادرور الحصابي
وامضمّرٍ هايف وله عود مبروم
ينور كما القنديل تحت الثّيابي
هذي مزايا الغرّ بو نهد مزموم
ياللي اشخوصه مالهن من اموابي