انا مش فارس الأحلام
ولا الجندي اللى مات قدام
ووسط الحرب لو تقعي
انا مش بطلك المقدام
انا سرطانك الخالد
حبيبك اللى خد إعدام
انا سرطانك الخالد
بريئك اللى خد إعدام
انا عاشق مبيطولشي
ولو طالك ما راح يسلم
انا عاشق مبيطولشي
ولو طالك ما راح يسلم
انا نعسان مبينامشي
ولو حاول يخاف يحلم
انا اللا منطق العادي
كما قالو انا ف وادي وكل الخلق ف وادي
انا البطل اللى ماشيلك بضهرو
كأني رحت مش راجع
انا ضحكة عجوز لاسع
سمع اثناء ما بيصلي غنا ومزيكا ف الجامع
انا الوردة اللى بتشوه جمال صورتك
انا الواد اللى بيخونك وبيحافظ على غيرتك
انا الحرب اللى بتجمع وبتداوي وبتفرق وبتفرتك
هقولك كلمتين حلوين وهاخد عمر من عمرك
أشوف الحزن ف عنيكي هغمي عنيكي واتلكك
انا الدمعه اللى مش قابله عليكي تهون
انا المحبط ولو محبط اسلم نفسي قبل ما اخون
اكون راجلك ومش عارف أبوس ايدك
ف أحاول أكون
ولو عاوزه سبب للخزي هديكي 200 مليون
موافق
مره أحكيلك عليا باختصار
يمكن تبادليني كما ما عندي من مكنون
انا كداب مليش أصحاب
انا عايش ف خرم الباب
وأموت م الخوف لو الشارع ف يوم أتساب
ف أدمعلك
وارجع لك خطاباتك
وأمشيلك وأرجعلك
واشكيلك وأسمع لك
واطلع لك لسان الحق
يلطع لك
كلام يوجعني في جسمك
ما انا جسمك
وانا الحرف اللى هجر إسمك
وانا اللون اللى ساح ف اللوحه
بوظ شكل نهر النيل
وراح يلقاله حل بديل
ولما صرخ وقال يا رحيل
مكان يعرف بان الكون هيقلب ليل
وملك الغابة راح يظهر
وهيدمر وهيعور
وهيدور على المساكين
ويرميلهم عشا الضالين
ويجبرهم ف يدعوله
ويجبرني ف اقول آمين
وتوهنا خلاص وراضونا بدي توها
وغنولنا اغاني العيد
ووسط الغنوه فزعونا في بور سعيد
ف هدونا وهدونا
خلاص انسو
دا حلم وحش
ف نمنا هووو
انا عاوز ومش جايز اعوز تاني
وأخاف العوزه تنساني
ف أحاول اعوز
لأول مره اصدر حكم على السلطان
واقول يمشي ف يمشي
لاول مره مش هدعى يطول عمر الرئيس
لمجرد اني بلقى مكان يساع رجليا في الاتوبيس
خلاص هحلم براحتي
وحلمي من المرض يشفى
وامد الرجل في قلب الشتا تدفى
لا يوجعني جفاء بردو
ولا يكفنني في مطرو
ولا يفرق هواه الساقع
واشوف وشالوطن في بسمة الطفل اللى نايم في حمى الشارع
ودي فرصه ومش راجعه
فيلا نعوز
مكانش يجوز هتنجح
شلة الميدان
ولا الفوران
ولا الصرخة اللى مدفونه بقالها زمان
نلاقيها كما الأدان
وشاب جبان
يقوم م النوم بفعل السحر
يطلق جرئته كبالحر
فتمحو كل ما قد كان
ومش على شان
انا مش فاهم الموقف
هبطل أروح على الميدان
لان هناك
بحس بروح غريبة
طاعيه ع الكل
بتاع الفل
بينظمن اشارات المرور وحده
ومش وحده
مصر على خلوده هناك وحده
يرجع حق دمعة أم زنقوها
ما بين تأبين وبين تعويض
دا لو كان القمر بيبيض ما كان رضيت
ولا هديت
وهذا الرفض
كرساله لكل من كانو بهذه الحرب وتراجعو
لكل اللى عدم نص الحياه ع الأرض
سلب أم الشهيد حالة
كانت منحاها بس تعيش
خناقة كل يوم الصبح ويا الواد
عشان ينزل يجيب العيش
وكام بنوته ليها حبيب
وكان حالف لا هيسيبها
ولا يخونها
ويستشهد
ف تحبس روحها ف الدبلة اللى ف يمينها
ويحرمها قصيدة شعر كتبها اول امبارح
فتحرمنا ابتسامتها
فيتكسف الربيع يجي
والصبح يخجل من طلوعه
والفقير يشبع بجوعه
والبكا يدبح دموعه
رأفة بيها
وطن محافظش على بسمة البنت
هيحرم من وجودها عليه
من غناها
من حبها لالورد
ولما ف يوم يعود الحق وينور
اذا رجع النهار من الشرق
وخدنا حق كل شهيد
اذا حصل المنى
ممكن تقبل الأم العزا
تعيش يمكن بحبة ذكريات الأمس
وجايز برضه تلك البنت
جايز
تبتسم للشمس
01-23-2013, 08:46 AM
فارس الأحلام-عمرو قطامش
