الطريق الى البنك
كان لسابع مرة يصف لي عنوان البنك بدقة شديدة وبتفاصيل دقيقة للغاية ولم أكن قد ارتكبت جرما حتي يفعل بي كل هذا سوي انني ألقيت سؤالا عابرا علي الجالسين.. ولم أخصه هو بالسؤال.. هو البنك الفلاني له فرع بالمهندسين؟!
وبعيد عن السامعين اتفتح صديقي في وصف عنوان البنك.. بادئا اجابته بسؤال.. فين جامع مصطفي محمود ؟! أكيد عارفه طبعا.. هوه اصل له اربع نواصي.. ناصية علي شارع جامعة الدول العربية وناصية من ناحية المدرسة والناصية الثالثة بتاعة الصيدلية.. وضهر الجامع عند الفكهاني.. بعد الصيدلية بأه فيه كوفي شوب.. باقعد فيه علطول.. عارف مين بيقعد فيه كمان.. فهمي سليمان.. فهمي سليمان يا جدع اللي كان معانا في المدرسة عارف ده اتجوز مين ؟! بنت بيومي عطا.. بيومي عطا يا جدع بتاع المقاولات.. اللي تلاقي اعلاناته علي المحور.. أيوااه.. قبل منزل المريوطية وانت رايح علي كرداسة.. شفت المنطقة هناك ولعت ازاي؟! كانت بتراب الفلوس دلوقت المتر فيها بأه بالشئ الفلاني.. وحمدت الله علي ان الحوار اوصلنا الي كرداسة وانتهي موضوع البنك ولكنه عاد وتذكر انني كنت أتساءل عن عنوان البنك,, وقال البنك,, بأه ح تسيب البقال اللي علي الناصية واول ناصية بعد البقال ح تلاقي بتاع فضة.. عارفه!!
صرخت في غيظ.. خلاص عارفه واللهي.. قال صديقي.. عنده تشكيلة حلوة قوي علي فكرة ح ابأه اخدك مرة ونروح له.. اصله بيعمل لي خصم جامد قوي.. ح نروح ناخذ اللي عاوزينه ونمشي.. بص ومدلي اصبعه وقال الخاتم ده من عنده شايف الشغل اللي فيه.. واخذنا صديقي في رحلة عن عالم الفضة وانواعها حتي مات موضوع البنك تماما.. وكنت قد اقسمت فيما بيني وبين نفسي الا اسأل عن اي شيء في وجوده مرة اخري.. ولكنه وبمهارة شديدة بعد ان انهي المرحلة الفضية من حديثه قال. قلت لي يا سيدي بأه عنوان البنك.. ده سهل خالص انت عديت محل الفضة وماشي.. خش اول يمين وادي ضهرك للجامع وبص قدامك ح تلاقي ايه.. قلت له وان اتنفس الصعداء اخيرا البنك.. قال.. لأ المدرسة انت موش مركز معايا علي فكرة.. مش قولنا فيه مدرسة علي الناصية ؟! انت ايه يا عم!! ما تصحي معايا!! ح تلاقي المدرسة بتاعة اللغات..
وحتي ح تلاقي العيال عاملين هيصة جوه المدرسة.. ونازلين جري ولعب وزعيق.. جيل آخر زمن بأه.. ده احنا ما كناش نقدر نفتح بقنا في المدرسة... فاكر يا جو.. لما مدرس العربي ظبطك بتتكلم مع اللي جنبك ومدك علي رجيلك.. يا ااه.. كانت ايام يا أخي.. كنا بنترعب من المدرسين دلوقت العيال لا هاممهم مدرسين ولا اولياء امور.. ما هو التعليم عمره ما حينصلح حاله إلا لو رجعت هيبة المدرس تاني.
وأخذنا صديقي هذه المرة في رحلة كلامية عن التعليم وما صار اليه وما كان عليه.. هنا لم اطق صبرا وانفجرت فيه.. فين البنك فين البنك يا جبار يا مفتري.. حرام عليك دوختني معاك.. قال مندهشا ما انا بقولك.. قلت له بتقول ايه يا أخي. انا باسألك ع البنك مالي انا بالمدرسة.. سيب المدرسة. قال مستغربا.. ما سيبت المدرسة من الصبح.. انت اللي واقف عندها معرفش ليه انت مالك.. بتزهق علطول كده ليه ده احنا ما صدقنا وصلنا.. بعد المدرسة بناصيتين ح تلاقيه في وشك قلت له البنك ؟! قال لأ.. الفكهاني.. صرخت فيه وانا اكاد اجن.. وانا مالي بالفكهاني؟*! مالي بالفكهاني.. قال راجل بقاله تلاتين سنة في المنطقة وعارف كل شبر فيها.. تروح تسأله علي البنك ح يقولك اهوه.. امسكته من زوره وسألته في غيظ مكتوم بقي انت مش عارف عنوان البنك ؟!
قال وهو يخلص نفسه بصعوبة من قبضة يدي.. يا سيدي عارفه.. بس انا بحاول اختصر المشوار.. وبعدين اصل هناك مفيش ركنه انا عاوزك تركن عند الفكهاني وتمشي الكام متر دول لغاية البنك.. فهمت!! وذهبت في اليوم التالي حسب خريطة صديقي. وانا استرجع ما قاله عن فهمي سليمان وبيومي عطا وكرداسة.. والكوفي شوب والمدرسة ومحل الفضة حتي وصلت للفكهاني وسألته البنك فين واللهي.. اجاب الفكهاني.. بنك ايه ؟! ما اتنقل يا باشا.. الفرع كله راح ميدان لبنان!! هنا قررت ان اتصل بصديقي واقول له كلمة ابيحة في التليفون.. وإذا به هو الذي يطلبني من نفسه.. هه.. عملت ايه..
الوصفة ما تتوهش طبعا.. الفرع اتنقل ميدان لبنان؟! بس.. بس.. بس عارفه.. انما اقول لك تروح ازاي.. ح تنزل الميدان.. فيه واحد بتاع حمام مشهور في الميدان في شارع النيل الابيض.. أيواااه هو ده.. انا من كام يوم كنت بآكل عنده.. بيعمل شوية حمام محشي.. حكاية تعرف قابلت مين بياكل عنده.. سارة.. بنت منتصر مع جوزها.. ما شاء الله البنت كبرت قوي.. شوف دي كانت قد إيه.. العيال كبرونا يا جو واللهي.. والواد شريف جوزها واد ابن حلال قوي.. تصور كان عاوز يحاسب لي علي الطلبات.. عامل فيها راجل قلت له يا واد ده أنا عمك عيب المهم خليته يحاسب في الآخر عشــان ما ازعلوش.................
__________________
يوسف معاطي
05-05-2009, 05:04 PM
الطريق الى البنك يوسف معاطي
