نعرف ناس كتير في حياتنا .. بنحبهم وبيحبونا .. كل واحد بيعبر لك عن حبه ومقدار مشاعره بالطريقة اللى يعرف يجيدها .. فيه ناس بتحب بقلبها .. وعقلها لسه جواه حاجات كثيرة ... بتقف في سبيل انها تسعد نفسها وتسعدك معاها .. وفيه ناس بتدور لك على حبل حرير تعمله كرافتة جميلة ملونة بالوان مزركشة .. عشان تلبسها ولما تلبسها تقول ايه رأيك مش هايلة .. تبص على نفسك في المراية تلاقيها جميله فعلا .. بس مربوطة كتير حوالين رقبتك .. الناس يشوفوك يفتكروا انك جميل بيها .. وحتى انت لو بصيت على نفسك تلاقي المعنى ده .. وفيه ناس تحبك بقلبها وعقلها وكل ذرة من كيانها .. تعيش حياتها في حبك .. ما تقدرش غير انك تحبهم وتميل لهم وتقدر مشاعرهم كويس .. جميلة اوي الحب .. بشكله العام .. وفيه ناس تحبك وتداري .. وتسكت ما تعرفش تعبر .. ولا تقول .. وفيه ناس شغلتها الكلام .. تلاقي الحب عندهم وتلاقيه مصاحبه اجمل كلام .. تسمعه تلين كل جوارحك .. وما تقدر غير انك تميل .. وفيه ناس بتحبك .. بس عايزه منك تحبها اكتر .. وتميل ليها اكتر .. وتتحمل كل حاجه عشان الجميل اللى عاملاه معاك .. مش كفاية انها بتحبك .. وفيه ناس قلوبها صافية ورايقة .. وكلها احساس وتعطف عليك .. وتسأل عنك .. وتشقى لتعبك .. بس بتجرم في حقك وهي مش عارفه .. وساعات تكون سبب تعاستك .. وفيه ناس تقولك كلام جميل وسطه كلام يقطع كل حبال الود اللى بينكم .. وهي مش داريه .. ولما تلاقيك تعبان تتاجر بتعبك .. ولما تستريح تهددك .. بتلعب بمشاعرك .. وآلامك ..
وفيه ناس تحبك تديك عمرها ولا تبخل .. وتديك قلبها .. ولا تتقل .. وتديك عقلها .. ولا تعقل .. وتديك وقتها .. ولا تمل .. وتديك اللى ما شفته من حد غيرها .. حب بكرم .. وهو مستعد دائما للتضحية .. والايثار واشياء كثيرة لايعلمها البشر ..
كنت ساعات اسأل نفسي .. هو عشان الرزق الناس بتبيع نفسها .. وتقوم بالعاب غريبة زي البهلوانات .. شوف نفسك وانا معاك مش يمكن كنا بنعمل كده .. خصوصا لما نتورط في موقف محرج ونحاول نخرج منه .. بنعمل حركات غريبة ونتكلم بصفة وديه .. ونوصل للهدف اللى عاوزينه .. عشان نخرج من المواقف المحرجة ..
طبعا ان مش جايب الموضوع ده وسط كلامي كإشارة لتغيير الموضوع أو جمل اعتراضية ثم أعود اليه .. ولو ان بعض الجمل الاعتراضية تخدم الهدف الاساسي ..
ولكن هل الحب يجعلنا نقوم بتلك الحركات حتى نقاوم احراجات معينة .. وهل الحب يدفعنا الى تمثيل مواقف معينة حتى نستمر في شئ ما .. أو علاقة ما ..
هل رأينا انفسنا ونحن نقوم بالحب تجاه احبتنا .. هل شاهدنا حركاتنا وكيف اننا نتنازل احيانا حتى نقرب من هم يحبونا أو من احببناهم .. هل التنازل يشتمل مبررات الحب .. وهل الحب مبرر لحركاتنا تلك .. ولماذا لايكون الحب مبرر لكبريائنا .. ويرفع من قدرنا وشأننا وكما نرفع احبابنا الى مصاف النجوم ..
انتي يامن تسأليني .. هل احبك ..
كيف ارد من يمد يده الى بالعطف والحب والاحساس الدافق ..
سمعت قولا جميلا .. على لسان فارسنا الاسمر :
لو كان قلبي معي ما اخترت غيركم
ولا رضيت سواكم في الهوى بدلا
لكنه راغبا في من يعذبه وليس يقبل
لا لوما ولا عزلا ..
هي عزلا ... اه تقريبا عزلا .. مع ان عتبا كانت اجمل .. بس القافية بأه .. اهو شعر مقيد ..
يصل الشعر احيانا الى الحكمة .. ويجنح احيانا الى الجنون .. فنسمع مثلا كامل الشناوي يقول :
كوني كما تبغين . لكن لن تكوني
فأنا صنعتك من هوايا ومن جنوني
ويقول في مكان آخر ..
قدرا أحمق الخطا ( حاشا لله )
سحقت هامتي خطاه
دمعتي ذاب جفنها
بسمتي مالها حياة
عموما سواء كان خروجا مقصودا ام غيره .. فان الشعر الهام شيطاني كما يقولون .. ويقولون ايضا ان له شيطان خاص .. يوسوس للشاعر بكلماته .. لست ادري .. ولكنهم يقولون
وهم ايضا يقولون ..
مقدروك ان تبقى مسجونا
بين الماء وبين النار
فبرغم جميع حرائقة
وبرغم جميع سوابقه
وبرغم الحزن لاساكن فينا ليل نهار
فالحب سيبقى أحلى الاقدار
هو فعلا أحلى الأقدار التي تصلك من الخالق .. فيجعلك تتسامح مع نفسك ومع الناس ومع المجتمع ومع من ظلموك حتى من أحبابك ..
12-04-2008, 10:43 PM
كلمات متقاطعة
