ديوان الشاعر زايد بن سلطان ال نهيان

[لمسة دفء]

إن لذع بالطرّف

إن لذع بالطرف لي مكسي ابدعايا
والهدب زافات يللي امظللنّه
والحشا منهوب وانهوده نفايا
فايعات فوق صدره يزهينّه
وإن تبسم إوضحن ذيك الثنايا
كنهن درّ وحصابي امنقينّه
والمعنق عنق خشف م المهايا
واليدايل فوق ردفه يكسينّه
والخدود ابروق مزن في السمايا
يبرقن وسط الدجى وينورنّه
ما خلج مثله ربّي في البرايا
جلّ يللي صوّره ومكملنّه
لدنّي حبّه أنا لدّ الظمايا
مبعدات وردهنّ ما يلحقنّه
يعل يفرح بالسعد هو والهنايا
لو يوزيني أنا مب لايمنّه

[لمسة دفء]

إلتمحته حزّة المغرب


إلتمحته حزّة المغرِب
خشف ريم زاهي ابطيبه
صوت لحنه شيّق يطرِب
باللطافه وزين ترتيبه
من صوابي قلبي اتعذًب
كيف ذا المحبوب اسوَي به
لي وصوفه بالحسن تنهِب
نظرته يا مانع عجيبه
رمش عينه كالسهم يضرِب
هوه لي يعالج تصاويبه
لي وداده يالخوي متعِب
دوم نفسي في مطاليبه
مطلبه بيهون لو يصعِب
منعزل ردفه عن الحيبه
مبعد عني ولو يقرِِب
في نظرته يبدي الهيبه
هو إذا للنفس لو ينهِِب
خاضع لامره وتصاويبه
يعل داره من المِزن تشرب
غيث 'م' المعبود يضفي به
والجفاف من البلد يذهِب
والمياه اتفيض في اشعيبه
والغضي من منظره يطِرب
وكلها الجيعان تغني به

[لمسة دفء]

العيد عيدك يا مها


العيد عيدك يا مها الخود
وإلا فنا ما جاني العيد
يا ما كثر اللي هوب مقصود
هشل ولا تهزف له الليد
قلبي امعبا منك بنضود
أو لا له مجال إيضيف ويزيد
إلا انت لي ساكن او موجود
لك منزل في باطن اسعيد
يالسولعي يا ترف لخدود
يا سيد الخفرات والغيد
مهما بعدتني عنك لحدود
واتوعرت من دونك البيد
شوقي إلشوفك غير محدود
لو إنت نائي عني بعيد
ياني خيالك والملا رقود
إيزورني وانا به اسعيد
ونشّيت ابغي الهاتف ايرود
كود أو عساه إلرقمك ايصيد

[لمسة دفء]

مترى العيل من بونه


مترى العيل من بونه
ما يوصل لي يباه
لو جدّ يا من دونه
ويخسر كل اصدقاه
بالخص لي ايعرفونه
أولي يربوا مجراه
الناس لو ايفهمونه
لانسان من مبداه
لا بد لي من سونه
إيغير مستواه
بعد اختيار المونه
واظروفه لي معاه
يرجي إيعرف العونه
والعدل يتنقاه
ما يسمع لي ايغوونه
يشمخ رأس العلاه
ينزح ما يلحقونه
لي اتراودهم دناه
إيعزل في مضمونه
شروى منهو شراه
وطور البشر يطرونه
في وصفه ومعناه
لِعْباد ما ينسونه
في الوقت أو في الحياه

[لمسة دفء]

عويد البان


يا عويد البان يا خلّي
يا فريد الحسن باخوانه
روف بي يا كامل الدلّي
لا تعذب نفس ولهانه
غيركم يا زين انا من لّي
منتقنك "م " الغزر دانه
معك عفت الخود بالكلّي
ماليه في غيركم خانه
انت شمسي و انت لي ظلّي
و انت لي تسحرني اعيانه
عين خشف الريم لمفلّي
و الخدود ورود باغصانه
والخشم كالسيف منسلّي
والشفايا حمر رويانه
أتلع والجيد متعلّي
والشعر طايح على امتانه
يا بديع الحسن لا تخلّي
في هواك الروح شفقانه
شوفني 'م' الحب معتلّي
عاكف ع لشعر واوزانه

[لمسة دفء]

بوعيان نعّس


يعلّ يسقى يوم بالاجي
لي ايسلّي القلب ويريحه
نظرة من شوفه اعلاجي
ينعش اللي نفسه امسيحه
هوه لي لي في الحشا لاجي
فيه ما اسمع قول نصيحه
ولا عيوني اتخايل الباجي
او لا الضحل لي سده ايبيحه
بوعيان نعّس ادعاجي
هوه لي بعنيه وآصيحه
بو ثمان لولؤ ناجي
تشرح الخاطر تفاريحه
لي جماله فاج لي فاجي
لا و لا في الحور تمريحه
النهد في منحره لاجي
كامل الشايات والطيحه

[لمسة دفء]

ويهٍ باسم نسيمه

ويه باسم نسيمه
واتحفّ به لفراح
وعين حورا عديمه
فيها الدّعايا اصحاح
وصدر وزن تقسيمه
ونهود كالتفّاح
وخصر هايف بريمه
يزهو فيه الوشاح
لو مرّ بإرض امحيله
سدى عشبها أو ساح
ينعش نفس سجيمه
وتشفى من لانضراح

[لمسة دفء]

جيل لي عنّيته


جيل لي عنّيته اوياني
يا حمد باصوغ لك ردّه
مثل لي صابك تبلاّني
مرّبي في جزره أو مدّه
إلمودّه لي لها شاني
تشغل المشتاق واتحدّه
كيف تشكي وانت متهاني
في عسادة حبّ ومودّه
إلهوى منعش لمن كاني
سعد يللّي يلحقه مدّه
الغضي مدعوي لعياني
لي اينير البيت من خدّه
هوه سلطانٍ لسلطاني
يامر ابأمره أو نعتمده
الطّبيعي عارف الشّاني
يخضع لسيده أو ما يبدّه
ما يبدّه غير لحساني
عند من يهواه وايوده
يا حمد واضب ولا تواني
في خشوع الحبّ لك سعده

[لمسة دفء]

يعلّ عيدك




يعلّ عيدك ما ايغدي ابعيدي
في ليالٍ لك ابها اسعودي
أو يكتمل مع خلّك العيدي
والفرح والإنس بالزودي
او تقبضه بالأيد واتميدي
أو تكتفي به سيّد الخودي
لي يديله باع ويزيدي
أسمرٍ كاللّيل مفنودي
كالبدر لي ياضي البيدي
بين مزنٍ تسكب اليودي
تشتكي دكتور تسهيدي
م الهجر واتهلّ منشودي
ما خذنّك قايد الغيدي
أو حاشدٍ في قلبك احشودي
واضب الخلّك ابترديدي
لو غدا في طبعه اعنودي
لي شراتك ضفر ما ايحيدي
لين يبلغ كلّ مقصودي
والعشق ضمن التقاليدي
بين كلّ الناس موجودي
صابني منّه ابتحديدي
في افوادي او ورّث ايهودي
أو شاد له في باطن اسعيدي
قصر ومزخرف بالورودي
منزل زانه ابتشييدي
كمّله أوفاق لحدودي

[لمسة دفء]

ياحمد كيف اختفى




يا حمد كيف اختفى صوتك
عقب ما انته تسجع الونّه
والمزامل قامت اتفوتك
والهوى تّركته أو فنّه
كنت لوّل تلعي ابصوتك
في طَرب والودّ هاونّه
خايف أنّ السّعد بيفوتك
والزّهر ما تخضعه فنّه
عجّل ابجدّك ومجهودك
جان درب الودّ متلنّه
إملها مرّن على اورودك
والرّيوم اللّي لهن بنّه
يرتعن في خطرة احدودك
ينهلن وايعلّن ابسنّه
لا تحرّم نفسك أو ذودك
أو لا تخلّي القلب في هنّه