ديوان الشاعرة عبير بنت أحمد

[لمسة دفء]

قصيدة هز فنجالك ...


إشتاق لك قلبي كثر ما جيت في بالك
شف ما إذا بالك تكرم ..وانشغل فيني !!

تنشد وصالي.. والهوى مقطوع بوصالك؟؟
لا وانت من زين الطبايع تسأله : ويني؟!

أمداك تنسى جيتك يوم انت يرثى لك
وخليت لك عز ايتمنونه سلاطيني !!

ولبست لي وجه ب لون أسود حالك
ولبست لك نور توهج في شراييني !

سبحان ربي .. في الكذب يا ضعفها حبالك
وشلون تقوى مثلها حدة سكاكيني !!

انت الذي أحسن خصالي بالوفا جا لك
وانت الذي ما خذت منك إلا ثقل طيني !!

مابيك يا حظي وفال الله ولا فالك
دام الكرامة حطها الله بينك وبيني

رح للغباء اللي سكنك ونوخ اجمالك
لاصرت منتب كفو تسكن بساتيني

إحلم حبيبي بالقمر لامن تهيالك
لا طايل شوفي ولانتب مالي عيني !!

ياخي من التوبيخ تكفى هز فنجالك
تدري .. كريمه.. عاد لا صبيت .. يا شيني !!

لولاي اخاف الله ماخليك في حالك
لافضح رداك ومن شعلني لا يطفيني !!

وإن كان كل الرجال تشابه افعالك ؟؟
الحمد لله... خلقني بنت من حيني

ودعتك المعبود في حلك وترحالك
لا حاجة لي بك ولا لك حاجة فيني


قصيدة الله واكبر عليك ...

الله واكبر عليك شلون ترضاها
بنت رخيصه ..وتعزمها على جاهي؟؟

مثل السحابه تصب / ولا نفع ماها ..
ثوب الصحاري ../ مدامه بالرمل راهي

الشمس تشرق ولابه من تحراها
والبدر يسهر طوال الليل بي ساهي

العز داري ... ودون العز مابغاها
والناس تشفق لدار البن والشاهي

وابسط تحية على مخلوق ب ألقاها
في كل مجلس .... مفاخر بي ومتباهي

يومك تنشد عبير القلب وش جاها
ما رد قلبك : بلاني عنها لاهي ؟

سامحت صفحات ذنبك دون ماقراها
وارجع والاقي ذنوبك هي على ماهي

وبطيبة بي تمنى مين يسواها
حاولت اعذرك..وعذري صار بك واهي

ما كنت اظنك مثيل الناس لولاها
ولا كنت اظنك تصير المر فشفاهي

خلك تدنى بحبك مثل شرواها
وخل التميز يلاقي حب باشباهي

الله واكبر عليك شلون ترضاها
بنت رخيصة ...تبديها على جاهي ؟؟!

[لمسة دفء]

قصيدة تعودت الغبن ...


سويتها يا مجرم الطيب واجرمت
واهديتني جرحك على الجرح جرحين

لى جيتني ليتك فقط لو تكرمت
يا سيدي .. لا لا تجيني بوجهين

لا ترمي العالم بالاحجار ما دمت
ما طلت تسكن لا قزاز ولا طين

جربت مير إن البلا ما تعلمت
ولوين اروح إن كان دربي بلا ( وين ) !!

كل ما بنيت ا من المبادي تهدمت
لين امتلى بيت الشعر بالدواوين

من زود حرصي / فالدسم / ما تسممت...
لكن لقيت السم في حالي التين !!

منهو طعني يومني له تبسمت
تكفيه نظراتي رماح و سكاكين

كيف الخلايق ساوموني ولا سمت
ما ردهم قلب و لا ردهم دين؟

ما همني حكي الردي دامني شمت
حتى و لو فيني تصدق ملاعين

في منطقي عن سيرة الناس انا صمت
ولا قد تذكرت المقفين بالشين

و لا جيت ابدخل فالمجالس وسلمت ؟؟
ردوا سلامي / واحتفوا بي شياطين

لاني على بيض الخصايل تندمت
محد تشكى من ثقيل الموازين

ولاعرف لغات لكن ب فن ترجمت
جل احترامي في جميع الميادين

واليا تراجع بي زماني ../.. تقدمت
والله رفع شاني عن الدون والعين

اقرا على نفسي الى قمت وان نمت
واعوذ انا بالله من( الميم ) و( السين )

كلي ذهب لا من سكت أو تكلمت
جنسي وحيد و ما انخلق مني اثنين

إشهد بفعلي قبل اقوله.. فأنا قمت
وإشهد بأنه لي على كلمتي دين

إخت الرجال وبينهم ما تنعمت
كرمت من هو ينتخي بي و للحين

ما نعمة فيني عليها ترحمت
كثر الوفا لا من تجمع مع اللين

ياويل قلبي ليتني ما تعشمت
أو ليت عقلي سامع للمجانين

كنت اشبه الما لكن إني توهمت
صرت اشبه لشي ولادري على مين

الطيب فيني منكشف وان تلثمت
وآنا تعودت الغبن واعرفه زين

بعض البشر كم ودهم لو تحطمت
خليتهم في حلمهم هالمساكين

اما انت ياللي بالرخامه تحزمت
إفهق حزامك كود ينفعك بعدين

كم قلت لك يا سيدي لو تفهمت
تلقى مثيل لخستك بالملايين

قصيدة سيد الفاهمين ...


صفقوا يحسبونه سيد الفاهمين
لا نبي له سلام و لا عليهم سلام

كل واحد يدور من يسار ويمين
كل واحد يزود في كلامه كلام

حسبي الله عليهم..مادروا بنت مين
هذي اللي حشمتهم لبسوها اتهام

والعصابة / عصابة .. والتجوري ثمين
والكرم طول عمره من طباع الكرام

وما بيرضي الذيابه غير كبش سمين
هاجموه ف ظلام الليل واهله نيام

ليتنا بس من إخلاصهم سالمين
والخفافيش دايم مخلصه للظلام

لا تضيقون يوم انكشفوا المجرمين
للمراجل رجال / وللمخازي خمام

لا وهذا على إنا كلنا مسلمين
والا لوهم يهود كان قالوا : حرام

أجرنا عند ربي دامنا كاظمين
والمطافيق ندري ماعليهم ملام

وما نلوم الكواكب في شهاب طمين
كيف اجل والسما من دون بدر التمام

[لمسة دفء]

قصيدة عين الفضاء ...


حفنة تراب طاهر
نتيممه .......... لجل الصلاه
.............................. إن مالقينا ماء

والماء الأطهر .. لو تلاشى
كان ما نلقى حياه
.............................. ولا بقى أحياء

والغبينه

ال
.. غ
... ب
.. .. ي
.... .. ن
...... .. ه

لين جا طهر التراب
و .. حط يده
في يدين الماء الأطهر
........ وش بيظهر ؟؟

غير مارد ............. جا .. و قطب حاجبينه
وانمسخ
كل الطهر ........... واصبح و ح ل

والوحل ..
تعلق به اقدام السفينه
ثم تغرق .........................للأبد.

.
.
.
~ خذلان ~

ما بين جرحي .. واغترابي .. وهمي
وما بين حظي .. والوهم .. وابتعاده

جيت افتعل بسمة .. وجهي خذلني
نسيت كيف يكون وجه السعاده !!

ماعاد لي شف ب خل و غيره
مغنيني الله بالحزن عن عباده

ولاهوب أكبر همي احد حكا بي
كبرت عنه منطقي والوساده
.
.
.




~ سقوط إلى الأعلى ~


طاحت الشمس من عين الفضا
وانطفا عقبها نور القمر

والوفا كنز .. لكنه قضى
والزمن خان .. لكنه عمر

أزرع الخير والعمر انقضى
وما خبرت انني ذقت الثمر

من مشى حافي فوق اللظى
ما شكى لو غدى جوفه جمر

صاحبي لا تدور لي رضا
الرضا ضاع مثلي واندمر

ما تصورت طهر بك حضا
ينقلب خبث لعيون السمر

عقل الانسان ما يجهل قضا
والخطا منك وش ذنب الخمر

وش يبي القلب في قلب فضى
أسود اللون وعيونه حمر

للبدايات بالشر ارتضى
وللنهايات مدري وش ضمر

دونك الموت يكفي واعظا
ولو تبي .. مت .. تامرني أمر

يمكن الشمس ترجع للفضا
وألتقي بعد موتي بالقمر

قصيدة ثمان أيام ...


ثمان ايام يالظالم.. تمر .. ولا لكم شوفة !!
ثمان ايام معقولة تمر .. ولا لنا سيره ؟!

انا وعيوني وقلبي و يد و يد مكتوفة
تحرينا لكم انت .. ولسانك .. ولمعاذيره

تلعثم .. قال انا احبك .. وقام يعدد ظروفه
توقعته على العادة .. مثل ماعتدت من غيره !

يجيني .. طالب قربي ..يزبرق ساحر حروفه
والا من جد وقت الجد ؟.. قال إن توك اصغيره !

انا ما خفت من هاجس خداعه .. لكن الخوفه
لو أتجاهل ب نيه صافيه..؟ باموت بالحيره

نشدني .. (- يا بعد عمري - وراك اليوم ملقوفه ؟!!
بعد بكره يجيك العلم ... والله يكتب الخيرة )

أعرف اني وفية لو زمنا جارت صروفه
واعرف انه وعدني والوعد وياه تفسيره

وصاروا عشرة ايامه... سنين تحتري شوفه
وانا لليوم ما حاولت اجيب لخاتمي سيره

[لمسة دفء]

قصيدة ميلاد انتحاري ...


أدري انه ما يهمك بس جيتك : شوف عينك
منها آسلم عليك.. و.. منها آرد اعتباري

يوه لو تدري.. جهاتي الاربعه - بيني و بينك –
كلهم من زود حبك زاحموا فيني يساري !!!

علموك شلون ترفع راسك و تعقد يدينك
ما تشوف إلا عبيد وخافقك كله جواري !!

إلتهيت انت بغرورك قلت اجل خله رهينك !!
خفت لا تكسر كلامي، كافي فيني انكساري؟؟!!

يوه يا ذيك المحبة.. وينها.. ويني .. وينك ؟!
هو صحيح ان المشاعر كل مافيها تجاري !؟؟؟

أنتصر لك فالمحافل لاجل نقهر عاذلينك
وانت . قدام العواذل تنسحب ما جبت طاري ؟!

ما دريت اني بكيييييييييت ولا بكيت إلا لعينك
والمصيبة وش يهونها علي لا صرت داري ...!

وين كنت انت الذي لا شفتني يشرق جبينك
ما بقى من ذكرياتك غير تنهيدة نهاري !!

لا تعودني صدودك يرحم الله والدينك
كيف يتحمل دلال المترفة عيش الصحاري

كان جالك عز مني .. رده.. الله لايهينك
نفسي ارجع يوم والقى غير ذلي فانتظاري !!!!

قلي وين ألقى دموع في حياتي ما تدينك؟
إرتكب جرمك ولكن خل موتي باختياري !!

حست ابو التاريخ!! ادور عن ولادة ياسمينك
مالقيت الا وداع فيه ميلاد انتحاري !!!

ادري انه ما يهمك بس جيتك : شوف عينك
جيت بآسلم عليك.. ورحت من دون اعتباري

قصيدة راحت عليك ...


خلاص راحت عليك .. وراحت أيامك
والحب راحت به الأيام من دونك

يا قلب صحصح.. زمن وآبشرك .. ضامك
إلحق جروحك قبل تستفحل طعونك

لو ما ظلام الليالي حس بالآمك
ما كان شفناه صابغ وجهه ب لونك

حذرتك امن المسا .. واهديته احلامك ...؟
أو تحسب انه سهر لك لأسود عيونك ؟؟!!

وقت يخونك به الرجال قدامك
ظنك سفيهه .. إلى قفيت بيصونك ؟

اللي حكى لك .. بيحكي فيك لأقلامك
حتى اقرب الحبر يا مسكين بيخونك !!

ما يكفي امن الحبايب جفت عظامك...
للحين ترجي من الحساد يسقونك ...؟!

الطيب ذنبك .. وعيبك طاهر اسلامك
ومع كل هذا.. تبي بالخير يطرونك !!

يا قلب يكفي حرام تقطع ابهامك
كل له الله .. و كان الله في عونك

اليوم ميلاد موتك.. وفر اعوامك
وان شاع ذكرك مصير الناس ينسونك

خلاص راحت عليك .. وراحت أيامك
والحب راح ورجع لي بس .. من دونك

[لمسة دفء]

قصيدة ضحك وطريق ...


بأكون بخير ...
لا تقلق
بأكون بخير

وبأتذكرك .. ياخلي
بعد بالخير ...

وحتى لو
تشوف الحزن بعيوني
تعدى موطني و كوني ...

تراني بخير
لا تقلق
تراني بخير ...

وش اللي صار حتى ما أكون بخير ...؟؟

ولا حاجه ...
.
.
.
سوى إني صرت محتاجه ...
أكون بخير ...!!


ويعني لو
أغص بعبرتي والا
أموت بحسرتي .. يا خل
وش بيصير ؟

أبد عادي
.
.
.
ولا اهتميت ب جروحي ولا فيني ...
قسم بالله
يا خلي ...
ترى عادي ...
يجيني وش يجيني
ما نطقت الآه ...
لا بالله
ولا بي من يواسيني
مدام اني
أنا .. من خانت التعبير ...!
يا خلي

وش بيصير
اذا صار الألم زادي ...
ورحت بدون ميعادي ؟
بأفسرها مثل حبك
ولا بألقى لها تفسير ...


جروح الحب يا خلي
هم اولادي
أحد يزعل من اولاده ؟

أنا ماظن !

لكني
اذا تغربت ف بلادي
أروح لمن !!
ياخلي ...
أروح لمن ...؟

وأمسي مين في ليله :
مساء الخير ...
و لي غنى مواويله
و له تقدير ...

ولا يمكن
يهنيني فأعيادي
سوى حبه ...
وانا طبه ...
وانا فجرية اعياده ...

أجل يا خل ..
من اللي بعدها بآظل

أتذكر
وأعد وأنتظر وأحسب
بقى كم يوم
يا خلي
لذكرى عيد ميلاده ؟

وكيف اهرب
من احزاني
وانا من وين ما أهرب
ب ألقاني ...!
ويلقى حزني بلاده ...

وكيف آعيش فالعالم
وانا ما أملك الا ذكريات الحب
في خاتم ...
وسجاده ...
و ملح أحمر !
ودولابي ... ومكياجي
و عود ناحل أسمر ...
وبرج أحسبه عاجي
و زهرة لوتس .. وحلم
صحى والكون متدمر !
وش باقي ..؟
فقط لا غير
أنا يمكن ../.. وأشواقي
وبعض اشعار معتاده ...
؟
؟
؟
وبس تدري ؟

أبد عادي ...
وش بيصير
الى من ضاعت سنيني؟
عمر فاني ...
بأعزي تربتي فيني ...
وما جاني ؟
أبد .. تكفير ...

وذي عاده ...
انا من وين
يا خلي
بأشوف الخير ...؟
و لي عشرين عام
كلما جتني بشاير خير
.
.
.
خذاه الطير ...!!

خذاه الطير يا خلي ...
خذاه الطير ...

وش تفرق ؟
إذا شمسي
تدور في ظلام الروح عن مشرق
ولا تشرق ...
ولا تمسي
ولا تفرق ...!

بأكون بخير ...
لا تقلق
بأكون بخير

.
.
.

كل ما يلقى الفرح يمي طريق
.................... لا لقى وجهي ..؟.. تكدر وانتحب ...!!

كن ( عيني ) صارت ف ( همي ) بريق !
.................... وكن جوفي نار وضلوعي حطب

والعشق ماهوب من حظ العشيق
.................... وش لقينا من وراه إلا التعب

لا لقينا صدق محتاج ل صديق
.................... والهنا لا ذاق وعد ولا شرب

وما يطيح الورد من ثقل الرحيق
.................... ما تشوف الأرض تمسك بالخشب ؟

بأسهر الليله بلا ليل ورفيق
.................... دام غصن التوت ما طال العنب

مجرم الأحلام من نومي طليق
.................... وهاجس السجان في همي لعب

رحت ابطفي بالبكا نار الحريق
.................... واثرني طفيت عيني باللهب !!

صاحبي ما عاد لي نفس تطيق
.................... وماعلى المحروم من نفسه ...عتب

إنثر ادموعك علي ..( ودي أفيق ...
....................... وادري إني مت ..).. طالبتك طلب

ليتها بس جت على كوني يضيق
.................... البلا ضاقت عظامي يا عرب !!!!

الحياة اليوم ما تسوى شهيق
.................... كنت أبحيا .. بس.... ربي ما كتب

وكل ما ينسد في وجهي طريق
.................... تضحك الفرحة علي .. بلا سبب ...؟!

.
.
.
.
.
.
.
.
.
.
.
.
.
.
تشوف شلون
يا خلي
فراقك غير ...!
.
.
.

أجل وشلون
تطلبني : أكون بخير ...؟!
.
.
.


أ
ك
و
ن

.

ب
خ
ي
ر
.
.
.
!!!
.
.
.
.
.
.
ويعني بس
هذا اللي
تبي مني
وتطلبني ...

ألا يا خل ...؟
.
.
.
وكني بك تجاوبني :


فقط لا غير ...
.
..
...
..
.
فقط لا غير ...!!
.
.
.
أبد إبشر ...
تطمن يا معذبني ...
تراك ب حل ...
.
.
.
تراك بحل لو قالوا : حبيبك مل ...!


وانا ادرى الناس
في طبعك ...

ملول وتعشق التغيير ...
يا خلي

ولا تنلام ...
ذا طبعك
وانا دلوعتك واعرف
طباعك زين ...
وانا اللي كنت أقرب لك
من اقرب شخص من ربعك ...

تبي تسكت .. أنا أكمل ...
ولا تخبي ...
أبتحمل ...

وأكون بخير …

ما قصرت
لا يا خل
.
.
.
لا تسكت
ولا تخبي ...

تطمن
واحلف بربي ...
.
.
.
بأكون بخير ...
يا حبي

إذا انت بخير ...
.
.
.
.
.
.
.
.
.
.
.
.
.
.
عساك بخير ...

قصيدة قولوا وراي ...


قالوا إن الحب أعمى .. قلت اجل قولوا وراي
الله ايقدي لحب ما لمس دمعة حبيب !

والله اني كل ما غمضت اشوفك في عماي
ولا فتحت عيوني ؟ اتعامى وانا اشوفك تغيب

صح انا سلمت نفسي مرغمه.... بس ب رضاي
هيكل كله جروح و خاف من مشرط طبيب

رحت اسولف لك عن اشواقي ولا كنك معاي
قمت اسولف لي عن اوجاعي واقول الشوق عيب !

جايز ان الحب ضربة حظ مأختارت سواي
مير انا ما قد خبرت الظن في حظي يخيب

واكتشفت ان القمر ما له مقر في سماي
والبحر طفى لهيب الشمس في وقت المغيب

وأدري ان الهم ما ينصاني الا من غلاي
الفرح ياما تحضنته و حس انه غريب !!

ومن حكى عني بوجهي .. وش رجى منه قفاي؟
ولا ابعدت عني حياتي ؟.. وش لو ابيبعد قريب

ما لقيت بهالخلايق حي ... يستاهل هواي
قلت اجرب .. يمكن القى لي مع الموتى نصيب !

وارسل آهاتي قصايد تنقل ل نفسي عزاي
ومارجع لي من ورا شعري سوى زود النحيب !

دامني وكلت ربي .. مأنتظر منك جزاي
سامح الله كل قلب ممتلي جود و طيب !!

وقالوا إن الحب أعمى .. قلت اجل قولوا وراي
لا سقى الله حب ابصر .. ليلة ا فراقه حبيب

[لمسة دفء]

قصيدة حفنة عضام ...


يا خوي بين القلب و اوجاعه ا عهود
أفطر ب هم وارتشف من وريده

لا قلت يكفي قال : أجل رغبتك زود
لابو جزالة هالهموم البليده !!

أوجس شعور لا هو بنوم أو نود
تشبه وصوفه للمنايا الشديده

أكهل شبابي شيب في قلب ملهود
حولي خلايق مير كني وحيده

تمطر عيوني دونما برق و رعود
تمطر بصوت بالمناحة نشيده

زفت منيره بنتها بعقد منضود
راحت قبل لا عقدها تستعيده

لا خير فيها .. دنية ما بها اسعود
مات و كتابه ينتظر من يفيده

معقول موضي ماكل جسمها الدود ؟؟
وخلى هدوم في كيسها جديده ؟؟!

أم الجمايل عقبها الراي مفقود
ساره .. خذاها عن مرضها حميده

بيت السعاده عقبها صار مهدود
لطيفه .. اللي ما بعدها فقيده

راعي الفضيله شيخ ما عنه منشود
عثمان قفى لابس ثوب عيده

و إليا سلينا نذكره شيخنا حمود
وشلون ننسى شمس علم فريده

عبدالعزيز و طيبة ما لها حدود
كل توارى تحت أرض بعيده

حتى رضيع ما له أيام مولود
ودع مهاده جنب أم تريده

ما شفت وافي مثلما الموت بالجود
لا مات نشمي مات عقبه عضيده

يا كود شعر ما بلغ وصفهم كود
ماتوا و عاشت هالقصايد زهيده

الجسم ناحل غادي عقبهم عود
حفنة عظام تكتسيها قصيده

و العقل غايب بس بالإسم موجود
والدمع يمسح كحل عيني بإيده

يا عزتالي فرق الموت عنقود
ليت إن فرقا الروح عنهم تحيده

شديت عزمي وانقطع عزم مشدود
ظني أطارد و اثري اللي طريده

مقرود منهو (يحسب الحظ مقرود )
الحظ هو هو...بس حنا نعيده

البندق اللي ما يعبا ببارود
تفنى حياته و الصدا في حديده

أشكي على اللي ما خشر معه معبود
يرحم شيوخ كلهم من عبيده

الموت حق و كلنا نشهد اشهود
يا رب تجعل خاتمتنا سعيده

قصيدة الأرض طماعه ...


وش اكتب يابوتركي والفكر لا من لقيته ضاع
وش ارثي والحزن لا من قويته .. زادت اوجاعه

أحس إن الدموع اعمت عيوني والعذاب انواع
ولكن الفجيعه أعظم امن الهم بانواعه

وحنا كالورق لامن تهاوى ..والشجر مرتاع
وكل وحده تحرى دورها والأرض طماعه

لك الله وش لقينا فالحياة إلا غدر وخداع
لك الله كم غبطنا ميت محموده اطباعه

وهذي حكمة الخالق وكل للقدر ينصاع
وهذي سنة الدنيا إليما حزة الساعه

ولولا رحمة الله ما عرفنا فالخطوب شجاع
تصبر واحتسب واحنا معك بأرواح ملتاعه

عساها آخر الأحزان والضيقات و الأوجاع
وعسى المعبود يرضينا ويقبضنا على الطاعه

[لمسة دفء]

قصيدة عساه بجنة الخلد ...


مشينا في طريق بإسم دنيا .. والعمر مشوار
و إلى منا وصلنا .. ف القبر فاتح لنا يدينه

وكم من ميت عمره قصير ما يذوق النار
وكم من حي .. يتزود ذنوب وطالت سنينه

نويت اكتب.. وانا وشلون أبكتب والحزن جبار
إذا ما هزت اشعاري شعوره .. طحت من عينه

وألا ياكثر ما طاح بقصيدي من هموم كثار
ولكن القلم .. عيا يخط .. وسن سكينه

فقيد ما فقده (إن كان ظله) ..ما لقى مقدار
وفقيد لو نعيش ألفين عام موب ناسينه

يا مؤمن لا تضيق إن راح غاليك و خلت هالدار
عساه ب جنة الخلد ايتحرى لأهله ب زينه

خذاه اللي هو ارحم به من امه .. كاتب الأقدار
وجعل الله يصبر من فقد غاليه ويعينه

يافيصل .. جيت أعزيك .. ولقيت ان العزا .. لي صار !
رضينا بأمر من جمع م بين الناس في دينه

[لمسة دفء]

قصيدة أي عيد اللي تهنوني عليه ...


أي عيد اللي تهنوني عليه ؟؟؟
عيدكم هذا ترى ماهوب عيد

عيدكم.. مجرم!! و سفاح وسفيه !!
مالقى يقتل سوى ولد الرشيد ؟!

تعجز الأوصاف تلقى له شبيه
هو فقيد كن ما غيره فقيد

والعطا لوما تعلم من يديه ؟
ينقلب معناه للحرمان اكيد

وكل هم ينفرج لا قال : ايه
وغير عظمه.. ماخبرنا به شديد

كل ما سجيت انا فكرت فيه
وانزف دموعي مثل دمه وازيد !

هادم اللذات .. كل يحتريه
لا رحم شيخ ولا خلى وليد

بس ابفهم ليه ابونواف ليه ؟؟
ومن وفاته قاتله وش يستفيد !!

يا طلال .. الصيد ماكنا نبيه
رايح بتصيد..والصياد صيد

للحزن فينا ملايين الوجيه
وانت عند الله بحول الله سعيد

رحمتك يارب .. يامن نرتجيه
يالله انك تقبله عندك شهيد

ضيفك اللي جاك عابد ..لا تجيه..
.. نارك اللي قولها: هل من مزيد ؟!

والفراق الله يصبرنا عليه
عظم الله أجرنا واجر القصيد

[لمسة دفء]

قصيدة وين أودي دمعتي يا فواصل ...


اآه بس وين اودي دمعتي يافواصل
كل مألمح غلافك غصب عني بكيت

بين حد ارتوائي والظما حد فاصل
واشهد اني وصلته .. بس .. ما قد رويت

لو نويتك قطاعه؟ عادة الحزن واصل
جيت ابنسى طلال وضيقتي .. ما قويت

ليتي اقدر اصدق مير ماهوب حاصل
والمقدر أبد ما يرفعه قول ليت

راح من كان طيبه بالذكر سيف ناصل
راح من كان معطي الطيب إسم وصيت

أحسن الله عزاك فميتك يا فواصل
ما ترك عقب مأقفى حي .. ماهوب ميت

قصيدة للطفل الضرير ...


آه يا هم تهون إ له الحتوف
وآه يا وقت رخص فيه العمر

من يقول الحظ / لو نصبر يروف ؟
والقهر لا مات .. يورثنا قهر ؟!

والظروف ان كانها مثل الظروف
وش بيد المحتضر غير الصبر

لا الإذن تسمع ولا فالشوف شوف
ولا العقل صاحي ولا شارب خمر !!

والحزن شهم يحوف الحال حوف
والدموع ف دلة وسط الجمر !

ما على الدنيا مخاسير وحسوف
ما بقى بالطيب ربع اللي خسر

ذا محمد راح مع ساره و نوف
ما يوازي وحشة الفرقا كدر

لو حرمه الله لا عينه تشوف
فالجنان الحيييين شاف اللي يسر

ذاك يوم ماله بوصفي وصوف
ذاهلين و ينقسم فيه القمر

تحت حر الشمس والعالم وقوف
والكتاب يديننا .. وين المفر

البلا كل بهالدنيا شغوف
يا هنى منهو توعظ واعتبر

واه من قلب يموت بلا حتوف
واآه من عمر يضيع بلا عمر

[لمسة دفء]

قصيدة وهو باقي أحد نبكي عليه ...


وهو باقي صباح نلتقيه ؟!
و هو باقي مساء به سبات ؟!

وهو باقي أحد نبكي عليه
عقب ما ماسح الدمعات مات ؟؟!

سميح الوجه .. نصاح السفيه
رهيف الحس .. ممدوح الصفات

أبو صالح .. وتتحدر وجيه
أبو صالح .. وتنهد الجهات

أبو صالح.. ياراع الطيب ليه
تروح وبس ؟! .. تتركنا شتات !؟

لو ا يباع العمر .. لك نشتريه
و لانك تبدل الجسم ب رفات

يجوز الصبر مقدور عليه
ولكن كيف نقوى الذكريات ؟!!

خذاك الموت .. واحنا نحتريه
معاد ا لنا بهالدنيا حياة

عسى اللي لمنا بالحب فيه
يجمع شملنا بعد الممات

مع الأبرار .. هذا اللي نبيه
يا رب الكون نطلبك الثبات

وهو باقي أحد نبكي عليه
عقب ما مبهج الأفراح مات ؟؟!

قصيدة يالفهد الامام ...


يابوفيصل.. يبلغك السلام
ألف مليون مسلم [أو يتيم]

كيف نرثيك.. هو باقي كلام
ينكتب وانت متلحف رميم ؟!

فاقدينك .. دموع ما تلام
من رجال ومن اطفال وحريم

الثلاثة مع العشرين عام
ما خبرنا بها ليل عتيم

تونا نكتشف معنى الظلام
تونا نشعر ببرد الهزيم

موت والموت ما يكرم كرام
كم أخذ من عزيز ومن كريم

ما للإنسان في الدنيا دوام
غيرك انت بفعالك تستديم

يالعظيم اللي أفعالك عظام
كم صغر في عيونك من عظيم

كم توسع بك البيت الحرام
كم قرى بك من المصحف فهيم

كم تعلم على يدك همام
كم شفى بك من اسقامه سقيم

كم سهر لك جفن واحنا نيام
كم خشاك العدو .. وانت الحليم

وش نجازيك يالفهد الإمام
ما جزاك الا جنات النعيم

تحفظك عين رب ما ينام
يجعلك بين جناته مقيم

يا بوفيصل .. يبلغك السلام
كل حي .. غدى عقبك يتيم