ديوان الشاعرة عبير بنت أحمد

[لمسة دفء]

قصيدة بلا بداية ...


وين أدور في حروفي عن مكاني ؟
كيف أبنهي هالقصيد بلا بداية

شاقني للهم إحساس المعاني
لو بقى لي من أحاسيسي بقايه !

الحزين اللي من اجروحه يعاني
ما درى باللي تعشعش في حشايه

هو بقى للحزن درب ما مشاني ؟
لا ولا حتى قدر يلحق جزايه !

ربي اللي قدر القسمه عطاني
حظ يشبه زول وجهي ف المرايه !

ما شغلني من حسود لو وشاني
قد تعودنا على سمع الوشايه

هل دمعي قبل لا أبكي ، بكاني
قبل يفضحني ..سترته بالعبايه

مشهد التوديع عاقد لي لساني
والأمل فيني يلوح بالنهايه

وش رجيت من العمر لا صار فاني؟
ما وصلني من غرابيله كفايه !!

الهوى طماع و العاشق أناني
و الوفا دايم نردد به حكايه

ذي حياتي كلها صارت أماني
إنتهت في فصل حب من روايه

لا تقولوا فيني الإحساس ثاني ؟!
عفت أنا بعد المشاعر كل غايه !

ليت شعري ما كتب صادق حناني
لين يعرف دفتري معنى القرايه

من يبي يلقى قصيد في مكاني
يرجع لشعري ، يدور له بدايه ...!!

قصيدة مواويل الملل ...


ما ذقت للراحة طعم، من عقب هذاك الزعل
إكذب و قل لي يالغلا .. إنك على قلبي رضيت !

ليتك تحس بهالألم ، لا من سلب مني الأمل
ما ظنتي باقي عطا .. بقدر عليه و ما عطيت !

البارحه جاني نغم ، يقطع مواويل الملل
في نغمته يبكي بكا .. يومه بكا عندي .. بكيت !

أشكي سواتك للنجم ، و اشوفه بعيني : نزل !!
و من شافني وسط الملا .. كني أبد ما قد شكيت !

إني أحبك إي نعم ، ما قلتها.. قصدي خجل !
يا كيف تجزاني جفا..إرحم طعون اللي جفيت !

ما قلت أبي منك وهم ، يكفيني ماجاني علل
أبيك بس إن جا وفا .. تذكر بأني لك وفيت !!

[لمسة دفء]

قصيدة برد الدفا ...


ودعت هم يومه فعمري شهر
والشهر رحب في همومي واحتفى

هم كساني هم به ضاق الصدر
و هم يهلي بالجديد اللي لفا

كان العسل يوم شفا مرضى البشر
وش في مريض الهم عمره ما شفى!؟

أضحك وانا قلبي تجرع بالقهر
وأبكي بدمع في وسط عيني خفى

أبرد و تجمد عبرتي عند الجمر
واستعذب الآهات في برد الدفا

ماللسهر داعي إذا غاب القمر
مير إن غفت عيني ؟ عذابي ما غفى

مصباح أحلامي تحطم وانكسر
وسراج أحزاني ولا مره طفى !

ياما عطيت الحظ من إسمي عطر
يقطع حظوظ ما بها ريحة وفا !

لا من سكني الهم وش باقي عمر
لا من تساوى العام مع لحظة جفا؟

لا العمر يكفيني ولا فيني صبر
قلت أكتب الأحزان بالحبر ..وكفى

قصيدة انتفاضية ...


للجمود الساكن اللي في محيطاتي العميقه
بأنتفض موج و ابعثر رجفة تقلب كياني

من بديت أمشي وانا من ضيقه في ألف ضيقه
كل ما ضايقت درب ..ضاق فيني درب ثاني !!

لو تعزويت الصبر ؟.. ما تكفي الدنيا دقيقه
ولو تعزويت التجمل؟..ملت الدنيا الأماني؟!

يقطع أم الحب كان الحب هذا هو طريقه !!
ويش ابي بالشمع كان الشمع يحرق شمعداني؟

يالخفوق إفرج عن الأشعار والحب و رقيقه
و اسجن القرآن عندك لين يعرف وش دهاني ؟؟!!

كن حظي ورد يومي نحلة تلفظ رحيقه
كل ما قبلت قفى .. وان تحاشيته نصاني

و كن في غصني غراب يزعج الكون بنعيقه
ما دريت إنه حسود لين با زهاري رماني

ما عرف للطيب غير اللي تمصلح مع رفيقه !
و ما عرف للجود غير اللي يعدد وش عطاني ؟؟!

الجحود اللي كتبته تو ما بليت ريقه
والصديق الصادق اصبح بعض حبر في معاني ؟!

الحقيقه ما تزيف من يزيف فالحقيقه
و المشاعر ما تبادر من يبادر في هواني

سلت الدنيا سيوف في وجه ساطع بريقه
وفالوجيه الشهب ؟؟ حارت .. بين.. أفراح و تهاني !!

يا عشيقي لا تقول انك تدور عن عشيقه
ما بقى فالناس عاشق ما يدور عن مكاني

للجمود الشامخ اللي فالعمر ماله وثيقه
باكتب إثنين و معهم عشرتي ويا ثماني

[لمسة دفء]

قصيدة وش تسمينه ...


تقول امي علامك لك شهر حالك يجيب الخوف
وصرتي ما تقولين السلام .. و لا تردينه...؟!

يايمه وش أقول وحالتي ما تنوصف بحروف
وما يفضح هموم الروح غير اللي تشوفينه

وليش امسح دموع اطفال شعري .. والأبو مخطوف؟
نهيم فكل وادي بس نتفقد دواوينه

أعيش الحب باحلام تحرى وعده المخلوف
ونظرات الخيانه ، قبل حبه ، تلمع بعينه...!!

ومدري وش عطاني غير حزن ماكن بالجوف
وانا تليت له قلبي بكبره من شرايينه

يايمه وش بلى حظي علي من الصغر منتوف؟؟
وحزني نافش ريشه يموق بحظه و زينه؟!

يايمه لو تخبين العنا .. هذا البخت مكشوف
وانا من قبل لا أولد ..عرفت اللي تخبينه

وانا اذكر يوم قلتي لي طريقك بالشقا محفوف
ولكني نسيت اني (وانا اضحك) قلت : ماشينه

يسموني حزينه .. لا .. أنا هالحزن بي موصوف
إلى قالوا (تعبر) ..هاه .. بالله وش تسمينه ...؟؟؟!!

ولو يمه تعذبت و صفقني هالزمان كفوف
انا ادري توني ما ذقت ربع اللي تذوقينه

طبيعي من مرارة حاضري .. مستقبلي معروف
ولكنه يصير احلى حلى دامك تعيشينه

عسى ربي يخلي لي حنانك للأبد موقوف
وعسى ربي يخلي لك جميع اللي تودينه

يايمه لو طلبتيني عيوني .. ما ذخرت الشوف
بعذر الجنه إن جت تحت ماطا .. لو تدوسينه

و لي فوق (العمر) والحال هم في كدر في خوف
وأحد يقدر يشوفك .. دون ما يرتاح في حينه...؟

قصيدة من الذات للذات ...


ماللفرج معنى بدون المعاناة
وماللنفس حاجة بدون التناهيت

انت البحر .. والا انها دمعتي جات ؟؟
هيضتني والحزن ماله مواقيت

جيتك أبحكي عن همومي .. بالإنصات
ورجعت مدري من كتب مننا البيت !!

ياما سمعنا عن طباعك حكايات
ليتك تخلي غدرك اليوم يا ليت

مأذكر ترى قد قلت لك يا بحر هات
ولأذكر طلبتك تذكر اللي لك اعطيت

هي بس هالمره .. من الذات للذات
تكفى انا لا تردني يومني جيت

ليتك تخلي لي وعد .. ما بعد فات
ودي أعمر – لو بالاحلام – لي بيت

الجال همي .. والأماني مسافات
والريح ما تجري على ما تمنيت

وين انت ياللي تحسب الموت لحظات
تقلب مصير الحي .. لأهل التوابيت ...

... شفني انولدت وحسبتي ضمن الاموات !
عد انت واغلط فالعمر كم توفيت

ولو للفرج قيمه بدون المعاناة ؟
ما هاجت أمواجك بريح التناهيت

[لمسة دفء]

قصيدة الدنيا ...


غبيه يالقلوب اللي تبي في ضيقها إنسان
إذا الإنسان في حزة رخاه.. ا يخون محبوبه

أدور بالنقا روحي ولا ألقى سوى الخذلان
واسحب حافي رجولي على الأشواك مغصوبه

نعم .. ياما انظلمت .. ودعوتي ما عنها بيبان
ولكني تسامحت و جرعت الظلم من كوبه

وش ارجي من ورا دنيا مشى فيها نبي ..وانهان؟
رفعت الرايه البيضا على ذا الوقت وحروبه

انا ما جيت للدنيا رجا مخلوق ايا كان
ولا يوم بقول لطيبتي .. ياطيبتي توبه

ولانيب انتخي دنيا دنيه في زمن خوان
مدام ان الله العالي حفظ للحق مسلوبه

عباتي تستر عيوبي و راسي لابس تيجان
وعزي مالي الدنيا ب ذل لابس ثوبه

أبهرب من عبير الورد واترك عطرها الذبلان
عجزت استفرد بحالي وانا لاحقني ا هروبه ؟!

حبيبي يا إلهي .. أشتكي لك قلبي الشفقان
وذولا كاتبينه وانت تدري ويش قالوا به

سألتك رحمة تقبض جروح الروح يا رحمان
ومتعة شوفتك غاية منى الخافق ومطلوبه

على الدنيا السلام إن كانها ما عمرت بايمان
سلامي واعذريني لو رحيلي قصر اسلوبه

قصيدة موطن الشاعرية ...


ايه انا قلت شعر ما بعد قيل زيه
صفقت لي قلوب وانحنت لي رقاب

والقصايد خذتني عن طموح البريه
لين ما صرت نجمة واعتليت السحاب

جايز الشعر يحلى .. لأمتلى نرجسيه
لكن .. النرجسيه فالمحبه ؟.. خراب

ذقت من طب عشاقي ثمانين كيه
ولا تعودت اضيق صدرهم بالعتاب

واقرب الخلق فيني ما خذتهم حميه
لين مالعين صارت من رموشي تهاب !!

صرت احس الطعون بخافقي سرمديه
وصرت ما عاد افرق بين خنجر و ناب

جيت للحب زهره .. والشعر مزهريه
قلت ما ودي أفتح للمعاناة باب

والا لو بأكتب لهمي ؟؟.. كتبت الوصيه
واجبر الناس يبكوني ل يوم الحساب

والا يعني تظني بأنهبل من شويه؟
لا ذكرت ان جسمي صار مثل السراب

لاذكرت إن شيبي ما تركني صبيه
لاذكرت ان دربي ما يدل الشباب ؟!

إكتشفت ان همي .. موطن الشاعريه
وإكتشفت إني بألقى راحتي فالعذاب

وإكتشفت ان شعري ما بعد قيل زيه
بس لا جاب حظ ... و لا كتب لي كتاب

[لمسة دفء]

قصيدة أنا الجاني ...


(( كفا الله فراقك يا بعد كل من حبيت
عسى الموت لي قبلك و طيات الاكفاني ))

تعاني من اسبابي وانا منك كم عانيت
و يدمح ..غلانا .. كل غلطه من الثاني

حبيبي .. وتكتب كل نبضه فحبك بيت
على الله أطيح بدرب قلبك وتقراني

حبيبي .. وتتحدر عيوني متى مأقفيت
وتدري متى مأشرت ..عندك بتلقاني

حبيبي .. وتتهاوى عظامي إذا صديت
وتصدح طيور الموت فوقي وتنعاني

حبيبي .. وتتلاشى الأمومه متى حنيت
حبيبي ولو تقسى علي إنت .. أنا الجاني !

عيوبك قبل ميزاتك اغرتني وظليت..
..أحسب اني استاهلك .. حقي وماجاني

وحقك علي إن كنت بإسم الغرام اخطيت
وحقي عليك تكون راضي وتهواني

تصدق .. على ان الشوق مالي علي البيت
عجزت آتجرد لو للحظه من احزاني

تجيني على شان المواجع متى ما جيت
ياليتك تجي لو بس مره على شاني

نخاف اللقا من خوف فرقا .. كذا حسيت !!
بأبرر علام الصمت جاثم على لساني

حبيبي ولا ينلام عقلي إذا انجنيت
اجل كيف .. عاد إن جن شعري و قيفاني !!

أحبك .. وانا لا قلت أحبك .. فأنا حبيت
على انك تبي تاخذ خفوقك من احضاني

قصيدة بدون أحباب ...


العيد فرحة لقا الأحباب بعد الغياب
وانا حزينه بدون احباب وبدون عيد

ياعيد ما زدت فيني غير هم وعذاب
وش زود غيري من الأفراح زاد و يزيد

ألحق سراب وانا ادري بإني ألحق سراب
وأسكب دموعي وانا ادري بإنها ما تفيد

للهم ألفين باب و للفرج ( ظل ) باب
ما يمدي آصله .. إلا وتغرب الشمس أكيد !!

يا شين حس العجز والعمر توه شباب
ويا شين موت الرجا والياس توه وليد

يشبهني الحزن .. لا .. وش جاب حزني لجاب ؟
وان قلت انا والحزن خلان .. ويش الجديد ؟

لا صار كل لأصله .. و الأصل من تراب
عند الحزن ما فرق.. أسياد والا عبيد

ومن جرب الموت.. قال الموت ما ينتهاب
ومن عزني ؟؟ ليت يدعي لي ب ( موت ) مديد

ما كان في خاطري أكتب بهمي كتاب
للفم قيد وللأقلام مليون قيد

مير الشعر جابه الله لي ونيس الغياب
في صبح عيد ..بدون احباب وبدون عيد

[لمسة دفء]

قصيدة يا رب ...


يا رب .. كانه ما حصل لي ألاقيه
والقى معه روحي و نبض فقدته

خذ عمري اللي باقي لي .. فلابيه
أنا وعدت .. وبأوفي اللي وعدته

ال(لا)..لغيره.. بس له..تنقلب (إيه)
وقعت بإسمه خافقي واعتمدته

الله و اكبر من كثر ماني اغليه
لا زاد هجرانه/ من الوصل زدته

عهدي به اصلا..مايجي لين اناديه
واليوم ما جاب الندا ما عهدته

مليت انادي وانشد الكون وش فيه؟
ولامن مجيب-الا الصدى-لا نشدته

ولا من سألني خاتمي وين راعيه
أهذي عليه.. وأحسب اني أفدته

إحتار صوتي بين الآهات وال(ليه) ؟
وباقي الحكي ضايع ولوي وجدته

تضيق بي دنياي اذا جيب طاريه
حسره على وقت معه ما قعدته

وقتي يا إما هجوس والا مشاريه
نفس الشريط اليا انتهى..قمت عدته

أخفي دموعي ب إبتسامات وجيه
واوصف جنون فالهوى ما شهدته

والهم ؟ إبن ما اعرف كيف اربيه
والا الفرح ؟.. جا ميت من ولدته

يارب ياللي مالي الا انت اناجيه
ولا غيرك احد في حياتي عبدته

خذني اذا اني بعد موتي بألاقيه
وش لي بهالدنيا عقب ما فقدته

قصيدة فاقد اخلاص ...


والله اني على الشدات فعلي عسير
وكل نجم إذا ناظرت فيه اختفى

وإعرف انك حظيظ ويحسدونك كثير
كان ماشفت فيني ميزة الا الوفا

إختلط في حشاي الحر و الزمهرير
وما تحدد شعوري برد والا دفا

مير ماعاد تفرق صار وش ما يصير
دام للطهر وجه خان ظن القفى

ولو فتك بي مرض قتال ماله ضمير
يكفي ان لي ضمير حي لو ما شفى

وان غلبني هوى هالنفس ماني عبير
ولو طباعي وصل ؟؟ / طبعتها بالجفا

تهت مدري هو اني جد..مالي مصير ؟
والا هالدرب من كثر الهموم اكتفى !!

مدري الا وانا والسر طحنا في بير
صرت انا تحت سطح الما و سري طفا

قمت أأشر لشخص مر.. واثره ضرير
وقمت أصوت ولا يرجع لي الا ( أفا )

كان عندي أمل فالحبل واصبح قصير
كان عندي أمل فالنور مير انطفا

وحتى لو كان باقي بين هالناس خير
عادة الحظ خايب لو زماني صفى

مير ماعاد تفرق صار وش ما يصير
فاقد إخلاص .. كيف ارجيه يعطي وفا

[لمسة دفء]

قصيدة احتضار ...


الموت آمنا به إن مات محبوب
مير البلا من مات قلبه وهو حي !

ما ينفعه لو هو صبر صبر أيوب
دام الأماني ما تزيده سوى غي

يهرب من الدنيا ولا يلحق هروب
وتركض له الدنيا ولا شافها شي !!

كن الليالي لابسه طلعته ثوب
ما غير تفرق بأنها أبيض شوي !!!

وفكل أسبوع يمر....( سبعة قلوب..
..تموت في صدره) و لا مرها ضي

نصفه جماد .. ونصفه احساس مسكوب
واكثر جروحه ناضجه .. والعمر ني !

الله يفرج كرب من كان مكروب
يطوي همومه كلها بالرضا طي

الموت .. آمنا به ومات محبوب
مير البلا ما عاش عقبه ولا حي

قصيدة معنى الكابة ...


الكآبه لو تبي معنى الكآبه؟
ناظر فوجهي ..... وتعرف جدها !!

في وجوه العالم احزان تشابه
بس في خدي ؟؟.. تميز خدها

حدني حظي على المر .. ورضى به
بس ابفهم .. هي علي وش حدها ؟؟

واصلة .. وبزعمها..هذي طيابه
ليت تتكرم علي بصدها

خابره قلبي أبد ما صك بابه
خابرتني طيبه .. ما اردها

وإحتراقي: عود .. والدمعة: سحابه
واليمين بلا عطا؟ ما امدها

وش بلاها تحسب لهمي حسابه
وابتساماتي .... علي تعدها ؟ !!

والزمن .. حتى الزمن .. زادت عذابه
مابقى به حيل يقوى هدها !!

والفرح سافر و خلى لي غيابه
ما يبي يجلس .. وهي ما ودها

راح متشره.. ولا عندي إجابه
غير بإني خاتم في يدها !؟

وكل ما اتجاهل شقاها بالكتابة
هددت سري : (تبيح سدها) !!

ليمتى بأسكت لها ذوق و ذرابه؟
كنها ما قد تعدت حدها ؟؟

واثر جيشي مختفي قبل انسحابه
واستباحت كنني من كدها

لبست كل اجنبي بي .... حجابه
واستقرت داخلي ... من جدها !؟؟

ومع مرور الوقت بأنواع الرتابه
صرت اوقف ضد منهو ضدها !

والكآبه .. تعني الحين (( المهابه))
زادها وجهي شرف .. من قدها ؟!!

[لمسة دفء]

قصيدة حكاية عذابي ...


الحين جيت تقول لي جيت مشتاق؟؟
الحين تسأل عن سبايب غيابي

خانوك أحبابك و فكرت تشتاق
والا على الطاري ذكرت الوفا بي

يوسعك صدري مع همومك و لا ضاق
و لا وسع صدرك هواي أو درابي !!

عفت المشاعر والقصايد والاوراق
وقفلت عقبك عن هوى القلب بابي

قد جف نبع الحب مبطي بالأعماق
وارويته بدمعي إلين امتلابي

لا تحسب اني بوهبك فايض اشواق
ماعاد عندي فايض الا عتابي

ما كنت لك إلا للأسقام ترياق
وما كنت لي إلا حكاية عذابي

ترجع تزيد الجرح توثيق وخناق؟
والله فلا اضيع عليكم شبابي

خوفي الى من لفت الساق بالساق
ألقاك انت اللي تعسر حسابي

قصيدة في مجلس القلب ...


في مجلس القلب جا شيخ الحزن وارتكى
يقدع عروقي وابهر له بدمي دلال

هي جت على جرح ؟؟.. عادي كل جرح انتكا
وش صار مادام شرب الدم أمسى حلال

جافيت انا الناس مبطي بس مو من ذكا
أصلا غباهم من اول ما ترك لي مجال

كل حكابي وشاهد طيبتي ما حكا
قلت إن جفوني .. معي سجادتي والجلال

مليت يا صاحبي طول الصبر والبكا
كني عجوز توفى لي ثماني عيال

حتى الفرح يوم شرف .. زارني مضنكا
والله مدري من اللي قال له بس : تعال

جاريت وقتي على انه من حياتي شكا
وانا احمد اللي قسم حظي على كل حال

هي جت على جرح .. عادي كل جرح انتكا
و بنت الكرم ما تشح بدمها للدلال

[لمسة دفء]

قصيدة يا ولد ...


ياولد أول جروحي إستجد
طبك المجروح داوه يا ولد

ياولد وين الذي صوته رعد
يبرق بنظرة عيونه يا ولد

ياولد قلبي جمع حزن و نكد
وامتلى بالهم بعدك يا ولد

ياولد دمعي على عيني رمد
والكحل يغسل جفوني يا ولد

ياولد ثوبي أشوف إنه لحد
والقبر عقبك سريري يا ولد

ياولد كني فقير وانجلد
إجتمع عاجز وعاشق يا ولد

ياولد والله ما قلت لأحد
ما شكيت لغير ربي يا ولد

ياولد لو صنت ما صان العهد
سافرت عني عهودي يا ولد

ياولد ما جاك مني ما يعد
في فؤادي زود باقي يا ولد

ياولد غيرك فلا قام و قعد
لا ولا حسيت فيهم يا ولد

ياولد والليل لامنه رقد
شافتك عيني بحلمه يا ولد

يا ولد والطير عندي لو نشد
تسمع الآذان صوتك يا ولد

ياولد حبك جنونه ما ركد
ينهبل لا شاف إسمك يا ولد

يا ولد ما صرت أبخص بالعدد
أجمع الأعداد بيدي يا ولد

ياولد سرحان عقلي لى سجد
يذكر الركعة نساها يا ولد

ياولد غربلك ربي يا ولد
وش بلاني فيك تكفى يا ولد

يا ولد أول جنوني إستجد
يا ولد لا عاد طبك يا ولد

قصيدة تريد الحب ...


تريد الحب و إلا ما تريده
مردك له بلا شرع و عقيده

غصب يفرض على الدنيا وجوده
لو إنك قاسي مثل الحديده

تحاول تخفي الأشواق عينك
و نار الشوق في قلبك تزيده

يصير المر في طعمه حلاوه
و تحلى به مآسي في الجريده

علامك تبتئس و الصدر ضايق
مع ان الحب يرسل لك بريده؟!

سهام العشق ما تخطي هدفها
تصيد اللي رصاصه ما يصيده

يطيح ا بها القوي من دون رايه
طعون الحب و إن لانت شديده

تعودنا نكذب في المعاني
نكابر في مشاعرنا العنيده

تعودنا نقول الحب (( كلمة ))
يعرف الحب من يكتب قصيده

و لو إن العشق أول شقانا
يلوعنا ... و لكنا نعيده

وإذا ما كان للأشواق دنيا ؟
فأنا بأخلق لها دنيا جديده !!

وللعشاق بأكتبها مشاعر
يدوم الشعر ما يبلى جديده

[لمسة دفء]

قصيدة مشاوير اللقا ...


على كثر الهموم اللي تجيش بصدري الملهود
بعدها ما سقت عيني مدامع حزني الظامي

الى من ضاق بي همي تمنيت السنين تعود
ولكن .. من متى كانت سنيني فرحة ايامي ؟!

علام القلب يتمنى عروقه ( تستحيل ) ورود
اذا كان الشذى يجذب طعون تذبل عظامي!!

مشاوير اللقا راحت تحيد لمفرق مسدود
و ذا مشوار للفرقا يسوق الدرب لأقدامي

يحسدون العبير ل (ميلة ) في حظها المقرود !
أجل وشلون لو شافوا هموم الحظ لى قامي !!!

لمحت فغمرة احزاني سماي ب خاطر مهدود
وهج نور البدر / وابرق / وميض الشوق قدامي

تخيلتك قمر يضوي ليالي فكري المحدود
والامن حل بي فجري غديت الشمس (فاوهامي) !

بعيني .. لو جميع الناس غابوا ؟.. ما بهم مفقود
مدامك حاضر بقلبي و طيفك ساكن احلامي

تصدق ما دريت ان الخلايق عنك فيهم زود؟
يزيدون ب( برودي) .. وانت حدك حبي الحامي !!

مع اني ما عطيتك غير قلبي،تشتكي هالجود؟!
عسى م ازهد لك ب روحي وتشكي باقي حطامي

ترى لاهمت في حبك، ذكرت ان الشعر موجود
رحمك الله / من اطنان المشاعر/ عند أقلامي !!

انا والليل وهمومي على رهن العيون السود
ترفق في بهاك اللي عليه أسدلتك إ لثامي

ولا صارت مشاوير اللقا لك ، كلبوها صدود؟؟
كفاني من دروبك إنها هي ...... مصدر إلهامي

قصيدة ياما و ياما ...


ياما وياما قلت لي .. ياما وياما قلت لك
ياما وياما قلت لك: ياما وياما قلت لي

واضح عليك انت الغلا لكن عزيزي ماجملك
لما يجي خلف الغلا قلب بحبي ممتلي

لا بو همومك و الزعل لابو حبيب يزعلك
اطى على قلبي إذا قلبك همومه تنجلي

حين تحس انك قمر.. حين تحس انك ملك
لكن شعور تجهله : هو قيمتك بالنسبه لي

لا تشتكي نار الهوى دام انها تنشب لك
غيرك يموت من الصقيع ولا حصل له مشعلي

تدري وش احلى ما أشوفه فيك كلك؟..مجملك
مدري هو احلى ما تشوفه في .. كلي ب اكملي ؟

ماستغرب اسراب النحل يوم انها تنشد لك
العين في لون العسل و الخد ورد مخملي

أشفق على ذيك الجبال اللي تحاول توصلك
تتطاول ب طين وحصى وانت فسمائي معتلي

بدري على شمس الكواكب والمعامل و الفلك
تنجب مثل نور الى من شعشع اجهر منزلي

يا صبر شيطانك عليك اشلون هو مستحملك !!
أكبر عذاريبك خصال الطيب يا شيمة هلي

هونك على طهري أنا ودي فقط أتأملك !
لك نظرة لا داهمت يخجل جميع اللي علي !!

جاوب ولكن كانها كلمتك (إيه ) .. باسألك :
تسمح حبيبي كلمتك .. بابني بها مستقبلي ؟

أما ولو صارت ب نفي كلمتك ...... لا يشغلك
لا صار ياما قلت لك: ياما وياما قلت لي !!