ناصر القحطاني

[نور]

قصيدة السوالف - ناصر القحطاني

السوالف ياجنيني طاولني
والعرب تالي نسوا حسن الضيافه

والخوارج من تدني في تدني
والبلد مليان تهريج وطرافه

والحياه اكبر من اللي مس ظني
واوسع من احلام الانذال التوافه

والقصايد صنعتي والفن فني
والقوافل ماتحسب الا المسافه

ليه اعبر غاديات عارضني
وصك شحاذ على باب الصحافه

ماخذيتك ياجنيني بالتبني
ولاغذيتك الاحس له رهافه

حط في بالك قبل ماتحتضني
مانت باللي ينتقهوى باختطافه

لك علي مادمت منك وانت مني
ماتمرك غير الانسام بلطافه

وان دخل بك في ظلام الليل جني
لاتخافه لاتخافه لاتخافه

كلبوها سورتين وترجهني
يطلع المعتوه ويجيك اعترافه

والله اني والله اني والله اني
من رجال في ملاقاهم حسافه

حقهم ماياصله راع التمني
وانتصافتهم ماهيب أي انتصافه

اتفيا في ظلال الغصن كني
شايب رحال شاف اللي يعافه

قلت خلوني على ليلاي اغني
وازعجوا موالي دعاه السخافه

عصبه الخناس عشاق التجني
ملحقين اعمارهم ذل وكلافه

وش يبون الخاربين بقلع سني
آفة لابارك الله باي آفه

لاسلام وكل نذل يحل عني
مابعد ملت يدي من النظافه

والسفيه اللي من العام متعني
ماترك حتى النعامه والزرافه

ان مدح وان سب والله ماشحني
اعتبرته تافه وستين تافه

والقصايد صنعتي والفن فني
والبلد مليان تهريج وطرافه

[نور]

قصيدة العروس - ناصر القحطاني

خوية درب عمري ما خذاني دونها النسيان
وأنا يهل الملامة ما رغبت العيش وحداني

ابيلي مهرتاة ما عسفة صغيرة وبنت أحصان
أبوها إللي يفك المشكلة وزبن الجاني

وأخوها لاتعزوى بسمها فزو لها العربان
يحقلها الفخر في قولة آل فلان جداني

أبيها في بحر عشرين لازود ولا نقصان
أبي هقصا طويلة والوصوفا أشكال والواني

أبي الجبها كما الصبح وكما القوس السود الحجان
وابيها ناعسات ونرجسيه سود الأعياني

أبي رمشا كما ريشا يغطي الثلج في الاوجان
وأبي جفنن يشيل الرمش طربانا وكسلاني

أبي خداكما ورد تنما في طرف بستان
وأبي خشم صغير مثل حد السف شاماني

أبي البسمه كما البق وثناياها كما المرجان
وشفاها جمرتين وفمها خاتم سلماني

أبي شعر مثل ذيل الفرس لا طبت الميدان
أو الشلال لا من بات ليله بين الأمتاني

أبي جيدن سواة تبريك فضه لأتقن مليان
وصدرن كنه مرايه عليه طلع رماني

أبي ظهرا كما الجدول وقدا مثل غصن ألبان
وخصرا مثل مجدول العنان وجسم روياني

أبيها نابية ردبا وبطنا ظامرن جوعان
أبيها مدمجت ساقن وقدمها السان ثعباني

أبيها بنت عز من رغدها ينعم الفستان
أبي الرقة وأبي الدقة لها بطرافها شاني

أبي المشيى كملي طالع من المعركة كسبان
وابيها ترش مع خطواتها مسك ور يحاني

أبي صوت إلى مني سمعتة كن فيها الحان
يدغدغ مسمعي ويثير كل السحر في اشجاني

أبيها حب وخلاص و هواجيس وفرح واحزان
أبيها مثل مادكتورهل العشق وصاني

أبيها لوحة ما صورتها ريشة الفنان
أبيها جوهره ما جابها قاصي ولاداني

أبيها تنتصر لي من زمان حطني ليشان
وتبشر بالغلا إلي مالفابه واحدأ ثاني

مهرها قلبا و شعر يهز القلب و الاوجان
والبسه القصيد وتصبح اوزاني وقيفاني

أبي إلي فات والي فات صعب ومن لقا العنوان
يرد العلم والأأفضل ابقى أعيش وحداني


7
7
7

القصيدة مسموعه

http://www.movn.net/na9r_alq76any/al_3roos.ram

[نور]

قصيدة في الشيخ احمد ياسين - ناصر القحطاني

يا حلاوة صرختك والحر تكفيه الإشاره
ما أنت في غزه وحيد الا معك عشرين دوله

يا نهار كل ماله يسقي الليل المراره
ما عليك من الفوازير الفوازير محلوله

لبطل يا شيخ ياسين إن شكى التاريخ عاره
قوم الدنيا وطش بها وراه وقال قوله

والبطولة تارة تشرق ضحى وتغيب تارة
يا بطل علمتنا كيف أبجديات البطوله

أنت لا من قلت لا صديت لك خمسين غاره
وأنت لا قلت إيه تشحن لك مية صوله وجوله

كل وسم بجلدك الصوان طير له شراره
يا شموخ تنحني لك هامة الدنيا خجوله

وإن حنت ظهرك كرابيج تعز أسخف حضاره
ما تذلك وأنت شيخ ممتلي دين ورجوله

بس حدثني حديث الماء لعشاق الطهاره
عن بلاد صار للجغرافيا فيها ألف صوله

عن صمود مخيمات تنشد الفزعه زياره
عن رجال لا خضوع ولا نفاق ولا عموله

عن جراد سبب الرعب اسمه أطفال الحجاره
القدر بالحرب عوضهم مراجيح الطفوله

عن عروس فجرت عشرينها لعيون حاره
واذكروا سكانها أيام من الخنسا وخوله

عن هذيك القبه آخر حلمنا وأول مناره
بيلسان عزه الله واحتضن مسرى رسوله

عن حماس الرايح اللي كل ما ذعذع سماره
لان وجه القاع واهتز البحر عرضه وطوله

عن زغاريد البنادق هي تظاهر بالغزاره
عن عصافير البيادر هي تحلق بالسهوله

عن شبابيك اليد اللي حرمت لمس الستاره
عن رغيف من صباح الله قليل اللي ينوله

عن سما الموال وأرض الدبكه ورقص العباره
والتفاصيل الكثير وخطوة الذهن العجوله

عن يسر مدري عسر مدري كسر مدري جباره
هدنة لعيون عيد مادرينا عن حلوله

جيلنا مل الجرايد مالقى فيها بشاره
وأكثر الأجراس خرسا والزمن هذي فعوله

ما وعينا إلا على النكسه وموال الخساره
نحسب اللي وسط بال أجدادنا نقدر نطوله

يا حرام الحر أجل ما عاد تكفيه الإشاره
وش ورا الخمسين عام بعثرت عشرين دوله

[نور]

الرديه مع خالد عبدالرحمن - ناصر القحطاني

الردية


القصيده هاذي تعاون فيها الشاعر ناصر القحطاني مع الفنان والشاعر خالد عبدالرحمن

وقامو بتصويرها فيديو كليب بطريقة فن المحاورة «الشيله»..


كلمات الشاعر: ناصر القحطاني
الحان الشاعر:خالد عبد الرحمن


سلام و المركب عليه اثنين و الساعة تدور
و الموج هادي و الوعد قدام و الرحلة ذهاب
أن غابوا الأجواد ما غابوا من أقفاص الصدور
دق الجرس و العلم عجل به بعد طول الغياب



يا مرحبا يا صاحبي وأعبر بنا سبع البحور
علي أدير البوصلة و أنت الله الله فالزهاب
أنا سمعت أنك تحديت الذيابة و النمور
و العام لك قلب خضر و اليوم ما كنك شباب



الوقت قاسي و الفتى يبقى على الشدة صبور
و أن ما غدا الرجال ذيب يطيح بأنياب الذياب
حتى الصديق الله وكيلك صار دمه ما يفور
و أنا لقيت الأصدقاء معظمهم أشبه بالسراب


لا تأمن الدنيا و لكن لا يجي قلبك فتور
أحد يشوف أحلى البنات و لا يجي فيه انجذاب
ما للحباري في القنص يا كود هدات الصقور
و أن ما كفخ طير الفضا معناته أن الراس شاب


كلش و لا قطع الرجا في الطيبات من العطور
لكن على شرع الله و سنة نبيه و الكتاب
بيض العذارى عسجديات الجسد ضمر الخصور
سود العيون مجدلات الروس تلعات الرقاب



بالله قلي ما برى جرحك بعد بدر البدور
ما عوضوك الفاتنات الذاهبة و الجرح طاب
كم واحد لو مرته مزيونه بعمر الزهور
ضاعت علومه و الصواب الله يجيبك يالصواب


أحد على الدنيا وهو كنه من أصحاب القبور
و احد يجي و يروح مع خله وهو تحت التراب
ياللي نسيت أن الهوى يبقى على مر العصور
بنشدك عن برق سرابك و أنت من فوق السحاب



معلمك يا صاحبي بالسالفة و العلم نور
وش بك تقول الشمع ذاب الشمع ما يمديه ذاب
و البارق اللي مرني و أنا أدعي بقلب شكور
هذاك خير طاح بأرض الغير و الرب أستجاب


وش بينك و بين المدينة و الشوارع و القصور
ما قد شبعت من الخلا الخالي و من روس الهضاب
الناس ما تبطي ولو راحت مراويح الطيور
ترمي تعبها في البيوت و تستريح من العذاب


البر يشرح كل صدر و يقلب الضيقة سرور
و أنا إلى جيته يمر الوقت ما أحسب له حساب
يا ما حلا طوي الخبوت و سجة الخاطر شهور
ولا معك غير النشامي اللي يعزون الجناب

[نور]

قصيدة راسي ولو شح الزمن ماحنيته - ناصر القحطاني

:::]] راسي[[::::

راسي ولو شح الزمن ماحنيته
ماباقي الا انتى توطين راسي

رضيت بالهم وتعزبت بيته
وصبري وعزة نفسي اهلى وناسي

يا مرحبا بالجرح لو ماقويته
الذل فى وجه عنيد وقاسي

ان طاعنى الخفاق ولا عصيته
ماخنت فى يوم من الايام باسي

لعل قلبا مايثور لو نخيته
تصبح ركونه للمواجع كراسي

وان مرنى ليل الغرام وسريته
لاتحسبين انى مع الوقت ناسي

جرحا برا وان مابرا مانسيته
لو يمتلى من مويه العذر كاسي

تدرين راسي للبشر ماحنيته
لانتى ولا غيرك بيوطون راسي

[نور]

قصيدة بغداد - ناصر القحطاني

عساها فاتحة برد وسلام وخاتمة و قاد
على دار السلام الله يروع من بروعها

حضارة سومر وبابل قبل تشريفة الميلاد
عروق الرسل والعلم واهل الشعر وروايعها

هوى سيف الله المسلول يوم السيوف حداد
مساري سربة كان المثنى في طلايعها

عروس زفها المنصور والدنيا لها سجاد
ودلعها الرشيد الله عليها يوم دلعها

بدت بالسندس اللي يهوس الخلان والحساد
وكثر ماهزها التاريخ ما اهتزت مرابعها

بقت خضر مرابعها بقت تنجب لنا أمجاد
بقت بيض صنايعها بقت سود وقايعها

ورى ما تستميت اقلوبنا معها وهي بغداد
ياكبر العار لو ما تستميت قلوبنا معها

عليها الله وامان الله الى ذرات زين ابلاد
هجد صوت القنابل جنب تهليلة جوامعها

دهاها من ورى الحملات ليل لو نقص يزداد
أهلنا في مدامعها واهلها في مطامعها

هل الحرية اللي لا غشى اصحاب البيوت ارقاد
تفرق بينها من دوية الهاون مضاجعها

هل الحرية اللي بعدها صاروا بنات الضاد
ينوش المعتدي حشمة ملابسهن ويرفعها

هل الحرية اللي قصت أجنحة أكثر الأولاد
مادام ايدينها ماترفع اثنين من أصابعها

تعودنا على حرق النسل والحرث والأصفاد
تعودنا على نار يطفيها مولعها

يبس بكفوفها إلا غصن زيتون وكما المعتاد
عناقيد الهدايا جاتنا من كف صانعها

عسى المقبل مثل صيحة ثمود ومثل صرصر عاد
عشان أهل البيوت الخاربه تبرى مواجعها

ألا وين المراكب سايره في حضرة الرواد
عساهم للدواير لين تدرجهم منافعها

مصير امصار و اجيال وزمن وجموع بيد افراد
لها التاريخ بالمرصاد وان خانت ودايعها

محبتنا عداوه والقلوب قريبات بعاد
بعد ما نصنع الكذبه نصدقها ونتبعها

خذتنا العنتريات الله يبيح من ابن شداد
وضعنا بالخطب ليت الخطب نقدر نضيعها

تواعدنا مع الوحدة وصرنا نخلف الميعاد
مذاهب وانظمه واحزاب من يقدر يجمعها

تصهين دم ناس طايرين بعجة الأوغاد
تصاغرنا مثل ماستصغر الكرسي مراجعها

أخيرا : كم بقى طاغي وكم باغي وكم جلاد
وكم لص وكم أصنام وكم أوهام نصارعها

وكم صورة تظن الروح والدم أغنيه وانشاد
وهي كل هناك يدوسها والا يقطعها

لعل الليله اللي جابت الكابوس ماتنعاد
وبسم الله على بغداد من شي يروعها

[نور]

قصيدة يمه الغربة وفرقاك ملتمه - ناصر القحطاني

يمه الغربة وفرقاك ملتمه

دمعة العين هذي مالها داعي


يابعد راسي انتي ليه مهتمه

الوجع لي سواة الناي للراعي


آخر أخباري الذمه هي الذمه

والوصايا هذيك تقدي شراعي


مابه الا السواد يحاود اليمه

ولا به الا البياض اللي ورا أضلاعي


وأشعل ما يفارق ليل حضن امه

وأخضر كل صبح من أول أتباعي


يتعب البرق ما أتعب النظر يمه

وانشديهن بعد ما قلت أطماعي


أنجبن لي عروسة حلم أضمه

أو بعد توها تشرب عطش قاعي


واذكري كيف كان العود ابو عمه

ايتعلى صهيله وأرخي أسماعي


امنياتي بدرب ودي أتمه

آخره صعب وأصعب منه مرجاعي


يوم كلن فزع له خاله وعمه

يكفي اني وردت العد بذراعي


أرفع الراس بين الروس ما همه

وأتباهى وأنا الغرقان بأوجاعي


يمه الحر طبعه يعشق القمة

وأنتي اللي فطمتيني على أطباعي


الهواء دام راسي حي ويشمه

والله اني لاسوق هناك ذعذاعي


غربة تلوي ذراع أشجع الخمه

لا تخافينها لو تقلب أوضاعي


يمكن تبعثر الرجال وتلمه

بس بدري عليها تلوي ذراعي


القصيدة مسموعه

http://www.faisal1.com/poems/rm/alghtani-4.ra

[نور]

قصيدة المقابر - ناصر القحطاني

في مكان تفاخر فيه روس النصايب
و امتلت من عظام الناس فاضي قبوره


كل شي يتراجف فيه حتى الهبايب
والذهايب توارى والنصايب فخوره


وقفت بي قدم رجلي وكلي عجايب
والبكا حولي اسمع له تمرد و ثوره


لين جاء واخجل عيون تودع حبايب
مؤمن جفف الدمع بحديث و سوره


عن يميني بيوت السابقين والذهايب
وعن يساري بيوت اللاحقين محفوره


اسمع اصغر ذنوبي كنه يصيح تايب
والقدم ما نشدت بموقفه عن شعوره


واذكر انه تشره لحظه وكان هايب
قلت خل الطواري ما طلبتك مشوره


دامها جت من الله مرحبا بالمصايب
لو ثقل حمل نفس المسلم اللي صبوره


جيت اشيل الجروح المشرقات العطايب
طيب الله ثرى اللي فارق العين نوره


ما ركزت النصيبه واعتلت راس شايب
كود ابادل ذاك القبر لا جيت ازوره


عل ما تبخل بماها عليه السحايب
كودها تستر اطراف النصيبه زهوره


كل حزن ملا الدنيا على القلب ذايب
وانقلي يالجروح الحمل لو زاد جوره


كنت اعزي مجاريح بعاد وقرايب
واترك الخاطر لعيني تجبر كسوره


تغرف الحزن وتصب العباير صبايب
وان خلص دمعها لعيون ابوي معذوره


شايل صورته في البال لو كان غايب
ليته اللي يشيل لشخصي اليوم صوره


كان لي ظن في صغري ولا هو بصايب
احسب ان القبور من الحياة مهجوره


عل قبره نعيم وصالحاته سبايب
هي عزاي بوادع مودع جاه دوره

[نور]

قصيدة يابوي انا من ضوك اشعلت ضوي - ناصر القحطاني

يا بوي أنا من ضوك أشعلت ضوي
والله ما تفنى ولو كنت فاني

شربت علمك في مراحل نموي
حتى قوى عودي وغنى لساني

تذكر ضناك الحالم اللي ينوي
صار أكبر منية نوايا وأماني

ياليت عمرك طول وعشت جوي
وتشوف كيف أنجبت لك عمر ثاني

عشق على حبل الوريد متلوي
لهواية التحليق وحدي خذاني

ما ضقت كم باكر وأنا أقول توي
هذا زمان الغير ولا زماني

ودي تحدت هالنجوم بعلوي
دام الثرى يحلم بحزة طماني

من لا دخل بين الرجال متقوي
ما ظمنتي يصهل صهيل الحصاني

واللي على جال الضلوع متطوي
تباشري بمفارقه يا المحاني

والله لا سوي ثم أسوي وأسوي
ولا فلا باسمي فلان الفلاني

ماتوا عداي وصار وقتي عدوي
لا بو دقايق ساعته والثواني

أنا على ذاك المكان متروي
بس الوعد لا قلت هذا مكاني

[نور]

قصيدة النسا كل الحياة - ناصر القحطاني

النسا روح المسا

والليل لو فكر يبات

كان ما فيه أغنيات

وكان ماله ذكريات

وكان ما فينا عظيم

ومال أمانينا حليف

وما بنا قلب وليف

ولا لنا قصد شريف

النسا نصف الحياة

الا النسا كل الحياة

آه يا أسرار الخوات

آه يا أحلام البنات

آه يا الطيش الطفولي

آه يالحسن الشفيف آه يالعشق العفيف

آه يالجنس اللطيف

علمن حتى المرايا والشبابيك اللغات

والرسايل والدواة

صارت أعذب مفردات

كم بكن وانكف مبصر واضحكن وابصر كفيف

ورمشن واهتز سيف

وهمسن وامتد ريف

كم غدن لاخوانهن عزوة صناديد عصاة

بين صفق المرهفات

وبين ضبح العاديات

طاحت أشناب وكراسي وانطلق دمع ونزيف

واعتلا الخف المنيف

والمقابر تستضيف

النسا ضلع عوج لولاه كل العدل مات

مالهن عنا فوات

ومالنا عنهن غناة

تبرق الدنيا على يديهن ويغرينا القنيف

نطمع بتكريم ضيف

وناقف بيوم عصيف

النسا بحر على موجه منايا وأمنيات

والنسا مركب نجاة

نسأل الله الثبات

هن لباس وهن فراش وهن معاش وهن رغيف

إن فتك جوع مخيف

وإن حدا الرجال حيف

النسا حتى شراب الجنه العذب الفرات

تحت ماطى الأمهات

يالهن من مكرمات

كل ما عود بنا الكد أقبل ابن آدم ضعيف

له ورا البيبان طيف

مثل نسناس المصيف

في بلادي يحسبون ان النسا متخلفات

في الضحى مستعمرات

وفي المسا مستوطنات

ما دروا عن هالبيارق شمخ العرض النظيف

فزعة الدين الحنيف

شجرة العز الكثيف

غادة وسجادة وكفين وحجاب وصلاة

من صبايا محصنات

من عروق طيبات

أطهر من ألفين منظر كلها فتنة وزيف

في رجا الصبح الكسيف

واجرة الليل السخيف

كم مكان يعرض أعراض آنسات وسيدات

والهوى له بايعات

والغلاف وله فتات

والحسن تشبير عنق وطول وخصر نحيف

وشي ما ينشاف شيف

لاجل الأول والوصيف

شهب تشابه رسوم الشاشة المتحركات

مال زمتهن طرات

و لا لهن ملح وحلاة

لا ربيع فيه خير ولا به الا بروق صيف

والشتا ما به رفيف

يحيي أوراق الخريف

لي مناحل لي خلايا كلها سكر نبات

لي حصون ناعمات

لي غصون شامخات

لي قوارير ملاها العقل والدم الخفيف

خلفها العمر الكليف

ودونها الحد الرهيف

يا زمن وش جاب حلوى غلفوها بالعباة

جنب حلوى للمشاة وللغبار وللشتات

شف بدل ما هي لواحد صارت لجمع لفيف

كيف أنا اخبرك كيف

شوفها فوق الرصيف
م0ن