قصيدة وهو باقي أحد نبكي عليه ...
وهو باقي صباح نلتقيه ؟!
و هو باقي مساء به سبات ؟!
وهو باقي أحد نبكي عليه
عقب ما ماسح الدمعات مات ؟؟!
سميح الوجه .. نصاح السفيه
رهيف الحس .. ممدوح الصفات
أبو صالح .. وتتحدر وجيه
أبو صالح .. وتنهد الجهات
أبو صالح.. ياراع الطيب ليه
تروح وبس ؟! .. تتركنا شتات !؟
لو ا يباع العمر .. لك نشتريه
و لانك تبدل الجسم ب رفات
يجوز الصبر مقدور عليه
ولكن كيف نقوى الذكريات ؟!!
خذاك الموت .. واحنا نحتريه
معاد ا لنا بهالدنيا حياة
عسى اللي لمنا بالحب فيه
يجمع شملنا بعد الممات
مع الأبرار .. هذا اللي نبيه
يا رب الكون نطلبك الثبات
وهو باقي أحد نبكي عليه
عقب ما مبهج الأفراح مات ؟؟!
قصيدة يالفهد الامام ...
يابوفيصل.. يبلغك السلام
ألف مليون مسلم [أو يتيم]
كيف نرثيك.. هو باقي كلام
ينكتب وانت متلحف رميم ؟!
فاقدينك .. دموع ما تلام
من رجال ومن اطفال وحريم
الثلاثة مع العشرين عام
ما خبرنا بها ليل عتيم
تونا نكتشف معنى الظلام
تونا نشعر ببرد الهزيم
موت والموت ما يكرم كرام
كم أخذ من عزيز ومن كريم
ما للإنسان في الدنيا دوام
غيرك انت بفعالك تستديم
يالعظيم اللي أفعالك عظام
كم صغر في عيونك من عظيم
كم توسع بك البيت الحرام
كم قرى بك من المصحف فهيم
كم تعلم على يدك همام
كم شفى بك من اسقامه سقيم
كم سهر لك جفن واحنا نيام
كم خشاك العدو .. وانت الحليم
وش نجازيك يالفهد الإمام
ما جزاك الا جنات النعيم
تحفظك عين رب ما ينام
يجعلك بين جناته مقيم
يا بوفيصل .. يبلغك السلام
كل حي .. غدى عقبك يتيم