السلام عليكم ورحمة الله
كل عام والجميع بخير
هذه الكلمات أهديها إلى الشاعر المتألق ...
هشام الجخ
بعنوان ...... ما عادش خوف
أقول فيها ....
خلاص يا مصر ما عادش خوف
ولا عاد كماين للحروف
ولا عاد قمر يعرف خسوف
ولا شمس هتخاف من كسوف
خلاص يا مصر ما عادش خوف
هشام يا جخ انسى الخروف
واكتب قصايدك فى الجاروف
والساقية والفاس والشادوف
والقمح فايض فى المزارع
والصوامع والرفوف
خلاص يا جخ ما عادش خوف
اكتب قصايد فى الميدان
اللى الأمان فيه اتولد
اكتب قصايد فى الزمان
اللى الأمل فيه اتوجد
واللى انكسر فيه الأنوف
خلاص يا جخ ما عادش خوف
ولا عاد كماين للحروف
اكتب قصايدك فى الكهوف
اللى اتعمت فيها الكفوف
ما شافتش نور الحق يوم
ولا قلبها حاول يشوف
ما شافتش غير الظلم دوم
والظلم كان رافض يطوف
كانت قصايدك فى القطوف
اللى اتحنت لجل الظروف
كانت قصايدك فى السجون
اللى اتبنت بدل الصفوف
كانت قصايدك ملحمة
من غير مدافع أوسيوف
كانت قصايدك ملهمة
والشعر كان بيها شغوف
خلاص ياجخ ما عادش خوف
ولا عاد كماين للحروف
تأشيرتك الميمونة شالت
من قلوب الشعب خوفه
هدت جدار الصمت
واتحذفت
على اديها حروفه
وسمعنا صوت الحق
بيجلجل
وبيلملم جروحه
والحق غالب
مهما طال قرن الخروف
خلاص يا جخ ما عادش خوف
مع أرق تحياتى
أبو عبد الرحمن - محمد حامد