ملخص حلقات لماذا محمد ... متجدد ان شاء الله

[ابو عمر المصرى]

الحلقة السادسة
**@** صناعة محمــد(2) **@**
(العالم قبل محمــد)





في مرة من ذات المرات كان رسول الله صلى الله عليه و السلم مع صحابة رضوان الله عليهم قالهم :
" لا يؤمن أحدكم حتى أكون أحب إليه من نفسه "

عمر بن الخطاب قاله : يا رسول الله أنت أحب إلىّ من كل شيء .. قلبي أهو كله يا رسول الله..قلبي بكل اللى فيه ليك إنت ولحبك يا رسول الله...إلا حتة صغيرة بس.. ما تجيش 5% من قلبي ..إلا نفسي ...إلا نفسي يا رسول الله!!!

الرسول قاله : "لا يا عمر, حتى أكون أحب إليك من نفسك"

يا ترى قلبك بقى كام في المية مليان بحب الرسول صلى الله عليه و سلم؟؟

يا ترى قلوبنا بقت مليانة حب النبي قد إيه يا جماعة ؟؟

ما إشتقتيش لنظرة لوجه النبي عليه الصلاة و السلام؟؟
ما إشتاقتش لأول مرة هتشوف وجه النبي عليه الصلاة و السلام على الحوض يوم القيامة؟؟

وحشتنـــــا يا رســـــــول الله

* * * * *
إزاى ربنا أعد الرسول كل هذا الإعداد دى كانت حلقة إمبارح...النهاردة هنبدأ يا جماعة إزاى ربنا أعد الكرة الأرضية لإستقباله عليه الصلاة و السلام!!

إزاى شوّق الأرض لإستقباله؟؟
إزاى الأرض كلها كانت قبل محمــد يتهتف إنها عايزة منقذ ينقذ الأرض من اللى وصلت ليه؟؟؟

يا جماعة الكلام اللى هقوله دلوقتي ده هيعرفنا ليه محمــد هو أكبر نعمة من ربنا..

ليه محمــد هو أعظم رحمة ربنا رحم بيها الأرض...

ليه في رقبة كل امرأة على وجه الأرض دين عظيم لنبي محمــد صلى الله عليه و سلم؟؟ بعدما كانت النساء مُهانة في الدنيا كلها؟؟


الواقع قبل رسول الله :


كسرى يتجوز أخته!! و كسرى تانى قبله يتجوز بنته و بعد كدة يقتلها!!!

قيصر يملك نص الدنيا ينشر الزنا و ينشر الرشوة في الأرض كلها!!

الإمبراطورية الرومانية لما كانوا يجيبوا العبيد و يعملوا صراع بينهم و بين الأسود و الناس في المدرجات الرياضية قاعدة تتفرج و تضحك!! و تتفرج على الأسود وهي بتمزق أجساد العبيد وفرحانين!!

البشرية كانت توحشت ووصلت لدرجة الوحوش...بل الوحوش كانت أرحم..

العبيد في الإمبراطورية الرومانية كانوا 3 أضعاف الشعب...يعنى 75% من المجتمع عبيــد!!

أنا عايز أقولكم ليه الإسلام لما طلع إكتسح العالم؟؟
ليه الإسلام لما طلع كل الناس تلقته؟؟

من كتر الظلم اللى كان العالم فيه..


عايز أكلمك عن وضع المرأة في أوروبا..أوروبا بلد التنوير دلوقتي ...في أوروبا مش كانت المرأة ما بتورثش ..دى كانت بتتورّث!! دى كانت بتتقسم مع الميراث!!


عند الهنود كان الرجل يجي يلعب القمار على زوجته, و زوجته تتاخد منه في القمار!!


الجزيرة العربية قبل الرسول عليه الصلاة و السلام ..تخيلوا الوضع!!

الحروب ...مكة دخلت حرب بسبب قتل حد في الأشهر الحُرم..
المدينة مئات السنين حروب داخلية طحنت المدينة المنورة..

كان العرب أمة مستعبدة ...الفرس مسيطرين على جنوب الجزيرة و الروم مسيطرين على شمالها..

كانوا أمة ذليلة..

عرفتوا ليه البشرية كلها كانت عايزة منقذ؟؟
عرفتوا ليه هرقل ملك الروم لما سمع النبي من أبو سفيان قال: لو كنت عنده لغسّلت بين قدميه...
ده أنا أغسل رجليه ...


هرقل كان حاكم من كتر فساد الشعب بتاعه ماعدش قادر يعمل حاجة..

* * * *

طب إعداد البشرية لإستقبال النبي :

بشارات الكتب المقدسة....مافيش نبي مابشرش بسيدنا محمد عليه الصلاة و السلام...مافيش نبي ربنا ماأخدش عليه الميثاق إنه يؤمن بمحمـد و ينصروه لو بـُعث في زمانه!!

سيدنا محمـد يا جماعة أوصافه متبشر بيها في التوراة و الإنجيل و الكتب السماوية كلها..
يا جماعة أوصاف سيدنا محمد دى معجزة أصلا ..


عارفة وصف النبي؟؟

كف الحبيب عليه الصلاة و السلام ..أنس بيقول: و ما مسست ديباجا ولا حريرا ألين من كف رسول الله.

عرق الحبيب...أنس بيقول : ولا شممت ريحاناً ولا عطراً و لا مسكاً أطيب من عرق رسول الله.
أم سُليم النبي كان نايم خدت العرق العرق بتاعه وحطته في قارورة العطر ..النبي صحى بيقولها : "ماذا تفعلين؟؟ "..بتعملى إيه؟؟

قالتله : يا رسول الله عرقك نطيب به طيبنا, نجعله في طيبنا...يعنى بتعطر العطور بعرق رسول الله.


إيد الحبيب رسول الله...ما إتحطتش على مريض إلا شُفي ...إيده ما إتحطتش على كسير إلا جُبر...إيده الطاهرة الطيبة حطها على عين سيدنا عليّ يوم خيبر وهي مريضة شُفيت ...إيده حطها على طعام بورك فيه و أكل الجيش كله في تبوك
عليه الصلاة و السلام


ثغر الحبيب...كان إذا تكلم كأن النور يخرج من ثناياه...النور بيطلع من بقه..


عين الحبيب...كانت كحلاء...كان فيها كحل طبيعي..


شعر الحبيب...كان أسود و طويل..


لحية الحبيب..وهي مالية صدره..


وجه الحبيب...نظرت إلى رسول الله و إلى القمر, ثم إلى رسول الله ثم إلى القمر, فلرسول الله أجمل في عيني من القمر..

كان يُري ضياء وجه على الحائط من نور وشه..كان كأن الشمس تجري في عروق وجهه


رجل الحبيب...اللى تفطرت من القيام في العبادة...اللى تفطرت من الرمي بالحجارة من أبو لهب في أسواق منى...رجله اللى إتقطع جلدها في غزوة ذات الرقاع...رجله اللى أدميت و اتفطرت في رحلة الطائف


صلى الله عليه و سلم

[ابو عمر المصرى]

الحلقة السابعة
**@** بدء الوحي **@**





النهاردة بإذن الله هنتكلم عن أخطر لحظة في حياة الرسول و في حياة البشرية كلها..
هنتكلم عن اللحظة اللى ربنا إصطفاه فيها و إختاروه فيها و كلفه فيها إنه يغير الدنيا كلها..

بدء الوحي..

نزول جبريل على الرسول صلى الله عليه وسلم..
اللحظة اللى السماء إتصلت فيها بالأرض..بعد 600 سنة عطش لنور الله و وحي الله و توجيه الله سبحانه و تعالى..

* * * *

أول حاجة تهز قلب النبي عليه الصلاة و السلام : "إني لأعلم حجراً كان يسلم علىّ في مكة"
وهو ماشي مرة...و هو في مكان لوحده فجأة يسمع..

السلام عليك يا محمــد!!

مين اللى عرفني هنا؟؟ مين اللى بيكلمني هنا؟؟ الصوت جاى من ناحية حجر؟؟
يجي النبي مرة تانية وثالثة من نفس المكان يعدي..يلاقي نفس الصوت طالع من نفس الحجر!!!

ربنا خلى الحجر يتكلم...و السلام ده معناه حب..
الحجر ده ممكن يكون بيحبني؟؟؟ الحجر ده ممكن يكون عارفني أنا؟؟

ثاني حاجة تهز قلب النبي عليه الصلاة و السلام ...لما يبدأ ينام يشوف رؤى...يصحى الصبح تتحقق كفلق الصبح!!

يارب الرسايل اللى بتتبعتلى دى بتتبعتلى ليه؟؟؟
6 شهور يشوف هذه الرؤى!!

يبدأ الزلزالين دول يغيروا النبي...يبدأ حب الله يتفجر في قلب النبي...اللى خلى الحجر يسلم علىّ...اللى خلاني أشوف الرؤى دى كلها..


يبدأ الحب يتفجر...و الشوق و الإنس بالله يزيد في قلبه
و يبدأ يزهد في الدنيـــــــا..


و يبدأ الرسول عليه الصلاة و السلام
بدايته حب الله..

يا جماعة دى بداية النبي...دى بداية الإسلام... بداية العلاقة الصحيحة مع الله...بداية ديننا كانت الحب

* * * *

و يبدأ النبي يمشي و يبعد عن مكة ...و يفضل ماشي لحد ما يلاقي نفسه قدام جبل...يطلع على الجبل ساعة ونص لحد ما يلاقي غار صغير يادوبك يكفيه هو عليه الصلاة و السلام...و يفاجئ إنه شايف الكعبة منه..

و يبدأ يعبد ربنـــا

وفي عز الليل وفوق الجبل يبدأ النبي يبص للسما ....و تزيد في قلبه عظمة الخالق مع نجوم السماء في الصحراء في الليل..و يبص لتحت و يزيد في قلبه إحتقار المخلوق..

في إنسان حب ربنا لدرجة إنه عاش على جبل عشان يعبده؟؟؟

وفي آخر مرة يطلع فيها على الغار...و كان شهر رمضــان...و ليلة خمسة وعشرين رمضان...وسط الليل الرهيب...ليلة في آخر الشهر العربي مافيش قمر...و رسول الله بيبص في النجوم و بيتدبر في السما...ظلام دامس

تيجي اللحظة الرهيبة..

وفجأة يسمع الرسول عليه الصلاة و السلام صوت...

الصوت ده جاى منين؟؟؟ أنا مافيش حد معايا هنا خالص؟؟

و يشوف نور..و يبدأ يتبين حد حواليه النور ده كله ..و بيقوله: يا محمــد..

ولأول مرة يبقى محمــد أمام جبريل عليه السلام

و يسمع صوت جبريل بيقوله : إقرأ...

أنا عمري ما قريت..أنا عمري مامسكت قلم في إيدي..."ما أنا بقارئ"..أنا ما بعرفش أقرأ أصلا!!

و يمسكه جبريل و يضمه ..يضمه...يضمه..لحد ما يعصر صدر النبي عليه الصلاة و السلام "فغطني حتى بلغ منى الجهد"..

يسيبه جبريل و النبي بينهج من كتر الإجهاد ..و يرجع جبريل يقوله : إقرأ..
"ما أنا بقارئ"...أنا ما بعرفش اقرأ!!

يغطه جبريل تانى..يعصره تانى..و يرجع يقوله تالت : إقرأ..

ولأول مرة يـُقرأ القرآن على وجه الأرض..و لأول مرة يسمع الحبيب كلام الله سبحانه و تعالى..
{اقْرَأْ بِاسْمِ رَبِّكَ الَّذِي خَلَقَ * خَلَقَ الْإِنْسَانَ مِنْ عَلَقٍ * اقْرَأْ وَرَبُّكَ الْأَكْرَمُ * الَّذِي عَلَّمَ بِالْقَلَمِ * عَلَّمَ الْإِنْسَانَ مَا لَمْ يَعْلَمْ }


و ينزل رسول الله و هو بيرتجف...وهو بيرتعش...و يجري على خديجة..
يقعد يرتجف و يقول: "زملوني..زملوني"
الحبيب كل ذرة فيه بترتجف..

وبعد فترة يهدى ويحكي لخديجة اللى حصل..و تاخد النبي عليه الصلاة و السلام ويطلعوا على ورقة بن نوفل..الراجل العجوز 90 سنة اللى إتعمى من السن ومن القراية ..الراجل اللى إختار على الأوثان النصرانية وقاعد على التوراة والإنجيل طول عمره..

لما النبي يحكيله و الوصف اللى شافه..و أول ما يقوله الخمس آيات اللى نزلوا عليه...يصرخ ورقة بن نوفل :

إنه النامـــــوس...

ده جبريل يا محمــد...ده الملك اللى بينزل بالآيات و الكتب السماوية على الأنبياء يا محمـد..

إنت نبي...إنت رسول من عند الله

ويقوله : ياليتني كنت فيها جزعاً إذ يخرجك قومك...يارتنى أرجع شباب تانى عشان أنصرك إذ يخرجك قومك..
النبي قاله : " أومخرجيّ هم؟؟"

حبايبي هيطرودنى أنا؟؟...النبي مارجعش لورا...النبي ماخفش...النبي كل اللى همه حبايبي هيطردوني إزاى!!!

أيام ويموت ورقة بن نوفل..

يفضل النبي واقف...مين اللى نزلي ده؟؟ جبريل...طب ماقليش ليه؟؟...و أنا مين؟؟..أنا رسول!!...طب ماقليش ليه؟؟

صراع نفسي رهيب

يطلع على الغار يستناه ...ماجاش...تاني يوم ماجاش...ثالث يوم ماجاش...رابع يوم ماجاش

ينزل النبي يمشي في شوارع مكة وسط الناس في صراع رهيب..هو فين؟؟...وماجاش ليه؟؟

وهو ماشي فجأة يسمع نفس الصوت اللى سمعه في الغار:
يا محمــد!!

يبص قدامه مافيش حد...يمين شمال..يبص وراه...مافيش حد!! الصوت جاى منين؟؟

بص فوق يلاقى جبريل على كرسي في السماء وهو بيكلم رسول الله

الرسول يبص مشدوه..يترعب..يترجف قلب النبي تانى..

الوحي ماكانش لذة في الأول ولحد موت النبي...الوحي كان شيء شديد جدا على قلب النبي...إحنا بنستمتع النهاردة لكن لنبي ياما إتعذب..

يجري النبي لبيت خديجة تانى, يدخل "دثروني..دثروني"..بسرعة هاتوا كل الأغطية اللى عندكم في البيت و لفوني فيها..

جيه تانى..اللى شوفته على الغار جيه تانى..بس برضه ماقاليش هو مين...ولا قالى أنا مين..ولا قالي عايز مني إيه؟؟

ولأول مرة وهو وسط الإنفعال الرهيب ده

يجي جبريل لنبي بيته..عشان يقوله : مضى عهد النوم يا محمد..مضي عهد التزمل يا محمد..مضى عهد التدثر يا رسول الله..

أنا رسول الله؟؟؟ أيــــــــــوه...و أنا جبريل أمين الوحي من السماء

و ينزل قول الله:
{يَا أَيُّهَا الْمُدَّثِّر * قُمْ فَأَنذِرْ }

[ابو عمر المصرى]

الحلقة الثامنة
**@** مضى عهد النوم **@**
(الدعوة السرية)



النبي مابدأش يا جماعة في فضائيات...النبي مابدأش في فضائية يوصل بيها للناس عالطول...أو مواقع نت ..أو أي وسيلة من وسائل دلوقتي..

النبي بدأ مافيش وسيلة غير إنه ينزل و يلف على واحد واحد.....ويكلم واحد واحد!!

ده يقبل مرة...و ده يرفض مرة!!

وأول واحدة يبدأ بيها خديجة رضي الله عنها و تـُسلم فورا
أول واحدة تقول لا إله إلا الله على وجه الأرض بعد محمــد... كانت امرأة

و يكمل النبي و يكلم سيدنا علىّ اللى إتربى في حضنه... وكده الإسلام على وجه الأرض بقى 3 يا جماعة..المليار و400مليون واحد بقوا 3 يا أمة محمـــد

طب نام يا رسول الله!!!
لأ...مضى عهد النوم

و يكمل النبي و يروح يكلم أبو بكر الصديق صديقه...و أول ما يسمع الدعوة يـُسلم فورا بدون لحظة تردد واحدة...و كدة الإسلام على وجه الأرض بقى 4 !!


* * * * *

الرسول عليه الصلاة و السلام من أول يوم ما نمش...من أول يوم ما ارتحش..

مجهود رهيب بذله على عيلته و على عشيرته...النبي من ساعة ما جمع 45 واحد من عيلته و ما أسلمش غير عليّ فضل يزورهم و يدعوهم....و يدعيلهم و يواليهم و يوجههم و يوعظهم لغاية ما كلهم أسلموا ماعدا حاجة تتعد على الصوابع..

لحد ما صفية أسلمت و حمزة و جعفر و مرضعته حليمة السعدية و إخواته من الرضاعة و أعمامه ...كلهم أسلموا

طب نام يا محمــد...استريح يا رسول الله!!
لا...مضى عهد النوم

يا جماعة ده لو واحد مننا داق شوية تعب في أول حياته و بعد كده إغتنى و استريح بيقول أنا تعبت...لو واحد جاله فترة طويلة من المرض بيقول أنا كافحت!!

امال رسول الله اللى ماداقش الراحة من يوم جيه على وجه الأرض لحد ما ساب الأرض...اللى ماداقش الراحة من بعد بعثته ولا من قبل بعثته..عليه الصلاة و السلام

مجهود رهيب على أصحابه...النبي يا جماعة كان بيخرج في جوف الليل يلف على بيوت الصحابة يشوف بيعملوا إيه في قيام الليل؟؟؟

لو النبي عدى دلوقتي على بيوتنا هيسمع إيه؟؟؟

صوت نوم....ولا صوت قنوات فضائية شغالة...ولا صوت ضحك و هزار.... ولا صوت سهرات الشباب!!

النبي كان عارف إن قيام الليل ده هو الفتح..يفضل يربي الصحابة و يبذل مجهود

من أول يوم في الدعوة السرية النبي مانمش...من أول يوم في الدعوة السرية النبي كان شعاره ((مضى عهد النوم))...من أول يوم يا جماعة علم الصحابة مضى عهد النوم..

الصحابة أول ما شافوا النبي في الدعوة السرية يبذل المجهود ده..... كله بقى زى النبي...أبو بكر الصديق خرج و رجع للنبي ب 6 من العشرة المبشرين بالجنة!! 6 أسود في كتيبة الإسلام!!

رجع بطلحة بن عُبيد الله...عبد الرحمن بن عوف...سعد بن أبي وقاص وكان عنده 17 سنة يعنى (تالتة ثانوي)...أبو عبيدة بن الجراح وكان عنده 24 سنة....عثمان بن عفان..

دول مين؟؟ دول أحسن ناس لقاهم...أبو بكر كان بيختار للإسلام زى ما الراجل بيختار لبنته عند الجواز...البطل من أول يوم بطل...أبو بكر من أول يوم بطل...أبو بكر من أول يوم حب الإسلام ملىء قلبه..

لو حبيت الإسلام والله العظيم هتقول كلام رهيب عنه...لو حبيت الإلتزام كل اللى هيسمع كلامك هيتأثر بيه...

إنت بقالك سنين ...إلتزم على إيدك كام؟؟؟ تقدر طول عمرك تعمل بس اللى عمله أبو بكر في أول يوم في حياته؟؟؟

* * * *

عليّ بن أبي طالب يجري يشوف أي واحد غريب داخل مكة ياخده و يدله على النبي عليه الصلاة و السلام, وهو اللى جاب أبو ذر للنبي

الأرقم بن أبي الأرقم يفتح بيته و كان عنده 16 سنة (تانية ثانوي)...و كانت مخاطرة رهيبة في الوقت ده... وفضلت كتب التاريخ كلها تشهدله إن اللى فتح بيته للإسلام في الوقت الى كان الإسلام مخاطرة رهيبة في الوقت ده..

السيدة خديجة تجرى وسط النساء...تروح لفاطمة بنت الخطاب و تـُسلم فاطمة اللى بعد فترة هيُسلم بسببها عمر بن الخطاب اللى بعد سنين هيبقى خليفة و يبعت عمرو بن العاص يفتح مصــــر.

يٌسلم أهل مصر و يبقى ميزان صلاتهم في ميزان عمرو بن العاص اللى ميزانه في ميزان عمر بن الخطاب اللى بعته اللى ميزانه في ميزان فاطمة اللى أسلم بسببها اللى ميزانها في ميزان خديجة!!!

صلاة أهل مصــر كلها في ميزان خديجة...اللى ماتت قبل ما تـُفرض الصلاة!!

الصحابة كانوا بيحفروا في الصخر يا جماعة الوقت ده...لدرجة إن المرحلة السرية 3 سنين أسلم فيها 40 واحد!!

* * * *

الإسلام أول ما طلع أثبت قدرة رهيبة على الإنتشار...إنتشر وسط الجنسيات...رومي و حبشي و عربي...إنتشر وسط كل الأعمار...إنتشر وسط كل الطبقات... وسط الرجالة و الستات..

و لما يزيد العدد يبدأ الإسلام يبقى مخاطرة رهيبة...الرسول ما يقدرش يصلي غير في الشعاب..الجبال...الصحابة مايقدروش يتقابلوا غير في بيوت...

اللى دلوقتي مابتقدرش تنزل تصلى في جماعة و الصحابة كانوا بيمشوا مئات الكيلو مترات لكل صلاة عشان يصلوها!!!

* * * *
و في الدخول في دار الأرقم تبدأ مرحلة رهيبة...مضى عهد النوم تماما
النبي كان قبل دار الأرقم بالنهار بيشتغل في الدعوة....بعد دار الأرقم بقى طول النهار دعوة و طول الليل تربية للصحابة..

أوعى تشيل عينك من عليهم...دول كنز الإسلام!!

و ربنا يقوله : (وَلَا تَعْدُ عَيْنَاكَ عَنْهُمْ)


البداية الصح بيئة الإيمان..الرسول عملهم في دار الأرقم بيئة دين....بيئة إيمان...

قيمة إنك تكون في بيئة ...تحضر دروس...تطلب علم...تحتك بملتزمين..

إنك بقيت بعدما بتسمع عن الدين بقيت شايف الدين واقع في حياتك!!

[طارق سرور]

جزاك الله عنه خيرا أخى أبو عمر

[ابو عمر المصرى]

أمنياتي لك بدوام الصحة
والعافية والسعادة يارب
مرورك شرفنى واسعدنى

[ابو عمر المصرى]

الحلقة العاشرة
**@** رجال صدقوا **@**
(الصحابة بين الهجرة الى الحبشة وشعب عامر)




بعد إصرار النبي عليه الصلاة و السلام إنه يجهر بالدعوة...و إصرار الصحابة إنهم يجهروا بالدعوة...زاد الأذى جداا

أصبحت الحياة في مكة لا تـُطاق ولا تـُحتمل...أصبح الصحابة مهددين بالفتنة في دينهم...هنعمل إية؟؟؟

يا رسول الله كل ما العدد بتاع الإسلام بيزيد كل ما التعذيب بيزيد..يا رسول الله مش قادرين نشوفك تتأذي يا رسول الله...ده أشد علينا من العذاب اللي إحنا فيه...

و يصدر قرار رسول الله سنة 5 مكية بهجرة مجموعة من الصحابة إلى الحبشة...إشمعنا الحبشة؟؟

الحبشة يا جماعةماكانش فيه مكان غيرها أصلا...لأن أي مكان في جزيرة العرب كان هيترعب إنه يأوي الصحابة...ولا هيرحوا مصر وسط المعارك الطاحنة اللى كانت بين الأرذوثيك و الكاثوليك.....و الحبشة دولة قوية ...لو خدوا لجوء سياسي هناك ماحدش هيقدر يرجعهم...و النجاشي داق الظلم عشان كده ماكانش بيحب يظلم...

و يهاجر الصحابة للحبشة....كانت هجرة رهيبة كلها مخاطرة و تضحيات...ماكانش هجرة من مكة للمدينة, عرب إلى عرب...لا دى كانت هجرة من آسيا لأفريقيا...من قارة لقارة...لناس لا لغتنا ولا ثقافتنا..

16 صحابي منهم 4 نساء يطلعوا في جنح الظلام...سافروا منهم ناس على رجليهم ومنهم ناس راكبين...و أول ما قريش تكتشف الخروج تطاردهم عشان تقتلهم...لكن يوصلوا للبحر الأحمر قبل ما قريش تمسكهم و ربنا يبعتلهم سفينتين...و ينجوا..

الناس اللى سافروا منهم ناس ما شافتش مكة تانى...هجرة الحبشة أطول من الهجرة للمدينة...14 سنة يا جماعة..

إنت عارف يعنى إيه واحد يطلع سنة 5 مكية يروح الحبشة يقعد 5 سنين....يرجع 10 مكية وهو بيحسب إن الإسلام إنتشر في مكة...يروح يلاقي عام الحزن و الرسول بيؤذى بنفسه...و السيدة رقية ترجع تلاقي أمها ماتت...يرجع الصحابة تانى للحبشة يقعدوا فيها ل 6 هجرية يروحوا على المدينة...ما شافوش مكة تانى!!

* * * * *
و يبقى واضح قدام قريش يا جماعة إن خلاص بعد إسلام حمزة و عمر...و بعد الجهر بالإسلام في الحرم و إن الصحابة بقوا يصلوا في الحرم...و بعدما هجرة الحبشة نجحت...و بعدما الرسول رفض أى تفاوض و أى تفاهم...أصبح الواضح إن الإسلام ينتشر..

إن الحديد و النار ماهماش قادرين على إيمان الصحابة...ولازم يشوفوا حل!!

و يوم واحد محرم سنة 7 مكية يجتمع المشركين و يتقاسموا و يصدروا قرارات :

- ممنوع إن حد يتجوز من بني هاشم أو يجوزهم..
- ممنوع إن حد يبيعلهم أو يشتري منهم..
- ممنوع إن حد يدخل بيتهم أو يدخلوا بيته..
- ممنوع إن أى حد ييسرلهم أى سبب للرزق..
- ممنوع إن حد يرحمهم لحد ما يسملوا محمد, نقتله وبعد كده نعفوا عنهم..

و يكتبوا صحيفة و يعلقوها جوه الكعبة عشان يكون لها قدسية!!

النبي بقى مهدد بالقتل كل ليلة...حصار رهيب...3 سنين...الصحابة مهددين بالموت من الجوع...أطفال الصحابة مهددين بالموت بالمجاعات..

و تشتد الأزمة يا جماعة... ياما شافوا الصحابة شافوا...ياما الصحابة داقوا...لو كان فكر الصحابة إن الدين صوم وصلاة ماكانش حد مننا دلوقتي مسلم...ولكن الصحابة عاشوا عشان الدين..

هتعيش إمتى عشان الإسلام؟؟؟
هتشيل المهمة اللى الصحابة شالوها إمتى؟؟؟

عرفتوا ليه الرسول فضل 3 سنين يربي الصحابة في دعوة سرية في دار الأرقم!!

* * * *

تخيلوا مع كل دخلة ليل مكة كلها تسمع صراخ أطفال المسلمين من الجوع...تخيلوا المية كانت بتتباع يا جماعة...غلوا المية عليهم...تخيلي ابنك هيموت على بق مية و مش قادرة تديه...

تخيلوا لما النساء الهاشميات يتطلقوا...بنات النبي يتطلقوا...تخيل إن بنتك تيجي مطلقة عندك وتقعد لا لسبب ولكن لأنك قلت لا إله إلا الله!!

تخيلوا يا جماعة الفقر وصل إلى إن المسلمين كلوا ورق الشجر...الرسول أكل ورق الشجر لغاية ما تقرحت شفتاه عليه الصلاة و السلام..

لما يقضوا حاجتهم يخرجوا زى البعير لأنهم بياكلوا ورق الشجر..

المية مش لاقينها...الأكل مش لاقينه...الأمن مش لاقينه ...النبي مهدد بالإغتيال..

جربت إن ولادك يقعدوا يصرخوا و يشدوا في رجليك من الجوع و يقولولك أخرج هاتلنا أى حاجة...دورلنا على أي أكل...

تخرج ما تلاقيش حاجة!!

راجع و إنت عارف إنهم بيموتوا و يتلووا من الجوع....مين فينا جرب ده عشان الدين؟؟؟

يا جماعة الدين ما قامش غير كده...الدين ما قامش غير بالتضحيات دى..

الدين ما قامش إلا لما في ناس عاشت عشانه...إنما كلمة مسلم في البطاقة!!!

لا يا جماعة...شوفوا الناس حصلها إيه؟؟...شوفوا الصحابة إتأذوا في كل حتة من جسمهم إزاى؟؟

جبال مكة شهدت على جثث الشهداء...شوارع مكة شهدت على التعذيب..

* * * *
و يستمر التعذيب 3 سنين...ألف و تمانين يوم....لحد ما يجي الفرج أخيرا...من الله..

ربنا يرسل جند من جنوده....حشرة...يرسلها داخل الكعبة...تاكل الصحيفة إلا كلمة **بإسمك اللهم** ...

و يخرج الإسلام من الشعب منتصر..

[ابو عمر المصرى]

الحلقة التاسعة
**@** لأجلك يا فجر الإسلام **@**
(الدعوة الجهرية)



لا إله إلا الله

أول كلمة في لا إله إلا الله ==>(لا)....بعدما كانت في قلوب المسلمين طلعت إتزلزل بيها جبال مكة...إتهتف بيها على جبل الصفا...إتزلزل بيها نوادي قريش..

الكلمة إتقالت و إتعلنت ....و إتقالت في الحرم..

لأول مرة كلمة الحق يـُهتف بيها مرة تانية..

البداية كانت لما رسول الله صلى الله عليه و سلم طلع على جبل الصفا وهتف و نادى قريش كلها وقال:
" أرأيتم إن أخبرتكم أن خيلا تخرج من سفح هذا الجبل ، أكنتم مصدقي "

قالوله : ما جربنا عليك كذبا

قال : "فإني نذير لكم بين يدي عذاب شديد "

يا تلحقوا يا ملتحقوش....يا بني كعب أنقذوا أنفسكم من النار....يا بني عبد مناف أنقذوا أنفسكم من النار...يا بني هاشم...يا بني عبد المطلب....يا قريش إشتروا أنفسكم لا أغني عنكم من الله شيئا!!!

و من أول لحظة يبدأ ابو لهب يعادي رسول الله صلى الله عليه و سلم و يقوله : تبا لك ، ألهذا جمعتنا؟؟

* * * *
و يبدأ رد فعل رهيب من مكة لا يمكن كان يُتوقع ولا يُتصور !!

بلال العبد الحبشي الفقير المكسين العبد عند أمية بن خلف...يبدأ يخدوه كل يوم مع إشتداد الحر يطلعوه في الصحراء الرهيبة....ينيّموا على الصحراء لغاية ما جلده يتشوى من كتر الحر بتاع الرمضاء..
وبعد كده يربطوا رجليه في فرس و يجروا بالفرس....جلده الملتهب يبدأ يتمزق مع جري الفرس..

بلال يربطوه من رقبته بحبل و يجروا الصبيان بيه في شوارع مكة كلها!!

يظل بلال في التعذيب ده ولكن صامد..

سيدنا أفلح كان عبد أسلم على إيد بلال...كانوا ياخدوه و يربطوا رجليه في الفرس عشان ينطلقوا بيه عشان يتمزق على الأرض...

سيدنا خباب يا جماعة...يجيبوا السلاسل و يقيدوه فيها..و يجيبوا أدرع الحديد...مش هدوم صوف في عز الحر...أدرع الحديد يلبسوهاله وهي ملتهبة و مشتعلة...أم أنمار لما يجي يصلي تسخ السيف لغاية ما يحمر ويبقى نار و تحطه على رأسه..
لحد ما يسقط مغشيا عليه و رأسه بتطلع دخان...

كانوا يعذبوه بنتف شعر الرأس...كانوا بيعذبوه إنهم ينيّموه على جمر ملتهب...على فحم مشتعل...مرة ولعوا حفرة و نيّموه على ضهره ...خباب يقول : والله لقد أوقدوا ناراً فما أطفأها إلا ودق ظهري!!
دهن ضهره لما ساح نزل طفى النار..

سيدنا خباب بعد 20سنة عمر يشوف منظر ضهره...يُغشى عليه من منظر ضهره

و ينزل قول الله :
{ الم * أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ}

الناس مش الذين آمنوا...لسه مش هتتسموا مؤمنين إلا لما تثبتوا في الإبتلاء ده...
{وَلَقَدْ فَتَنَّا الَّذِينَ مِن قَبْلِهِمْ ۖ فَلَيَعْلَمَنَّ اللَّهُ الَّذِينَ صَدَقُوا وَلَيَعْلَمَنَّ الْكَاذِبِينَ}

يا جماعة كانت دخلة دار الأرقم معناها إيه؟؟

الصحابي اللى كان بيدخل دار الأرقم كان بيشوف قدامه عمار و هو بيتجلد...عمار و أمه بتتقتل...كان بيشوف قدامه صهيب وهو بيتعذب...كان بيشوف قدامه بلال وهو بيتسلخ جلده في شوارع مكة...كان بيشوف خباب وهو بيتكوي بالنار..

ومع ذلك دخلوا... ومع ذلك صمدوا..

كان في المرحلة الجهرية الصلاة مخاطرة...إعلان الإسلام مخاطرة...ثبوت تهمة الإسلام معناه إن ماعدش ليك دية...

* * * *

و تبدأ قريش تحاول بكل المحاولات...تعذيب...قتل...سجن...تجويع...عطش...تغريق في الميه..
كانوا يلفوهم في جلود البقر و يرموهم في الصحراء...عشان جلد البقر يسخن و يولع و كأنهم بيتشوا على نار هادية جوه هذا التابوت المقفول عليهم..

كانوا بيعذبوهم لحد ما الصحابي تعدي من قدامه خنفسة ماشية على الأرض يقولوله : قول إن دى ربك!!! يإما مش هنسيبك!!

مصعب بن عمير الشاب المترف...أمه لما تعرف إنه أسلم تقول: والله لا آكل...يقولها : والله يا أمي لو أن لك مئة نفس خرجت ما تركت هذا الدين!!

لما تيأس منه تأكل بس تحبسه وتجوعه...لحد ما جلد مصعب المترف الشاب الناعم اللى كانت أمه بتنّيمه و جنبه طبق الحيس..طبق الحلويات عشان يصحى ياكل حلويات لو قلق في وسط الليل...

مصعب يجوع لحد ما يتحشف جلده!! لحد ما يتقشر جلد مصعب رضى الله عنه!!

سيدنا سعد بن ابي وقاص...ابوه كان يجيب حواليه الحصير و يولع عليه من فوق...كان ممكن يربطه من سقف البيت و يوقد تحته نار... وهو يقوله: والله لا أعود أبدا


أم سعد بن ابي وقاص برضه أضربت عن الطعام..قالها نفس الكلمة اللى قالها مصعب...لأن الإتنين متربيين في نفس المدرسة...مدرسة دار الأرقم بن أبي الأرقم!!

عثمان بن عفان عمه بقى يجيبه و يجيب جريد النخل يلفه حواليه و يولع فيه من تحته و يخنقه من جوه هذا الحصير عشان يرجع عن دينه..

الزبير بن العوام وهو عنده 16 سنة لسه...يُصاب من اللى حصله بمرض صدري من كتر اللى حصل فيه في هذه المرحلة...

ماكانش في حاجة إسمها غنى و فقير...كل الصحابة اتأذوا..

* * * *
النساء في الدعوة الجهرية كانوا بيعملوا إيه؟؟

زنيرة كانت جارية لعمر بن الخطاب...كانوا يجيبوا مكاوي الحديد يعرضوها لعينيها لغاية ما أتعمت...لكن ربنا يرد عليها بصرها تانى بقدرته التى لا يقف امامها شيء

سمية يا جماعة ...سمية شرف كل امرأة على وجه الأرض...سمية أم عمار بن ياسر..وهي بتتعذب كانوا بيدفنوها في الرمل المشتعل...كانوا يقعدوا يرضخوها بالحجارة كأنهم بيرجموها!!

وكل التعذيب ده ماهوش حاجة قصاد إنهم يجيبوا قصادها عمار ابنها يقعدوا يغرقوه في أحواض الميه لحد ما يبقى هيموت من الإختناق..

وفي الآخر يجي أبو جهل يشتم في سمية..ويقولها إنتى ما أسلمتيش غير لأنك بتحبي محمد...و يسب و يشتم فيها...و يقولها سبي محمد و ياإما مش هسيبك...فتقوم باصقة في وشه...يقوم طاعنها بالحربة طعنة تتقتل منها سمية...

و تسقط أول شهيدة في الإسلام

أول دم يسيل عشان ربنا

* * * *
من أجلك يا فجر الإسلام :: :: :: كم تحلو في الليل الآلام
بجلالك تصطبغ الأحلام :: :: :: من أجلك يا فجر الإسلام

[ابو عمر المصرى]

الحلقة الحادية عشر
**@** عام الحزن **@**
(و ثبت رسول الله ساجدا)



يبدأ عام الحزن...و أول الأحزان موت أبو طالب عم الرسول اللى اتربي في حضنه من وهو عنده 8 سنين...نصير رسول الله

يخرج ابو طالب من الشعب وهو عنده 80 سنة...محطم صحيا...آخر 3 سنين فيهم أكل ورق الشجر...و بعد 6 شهور خروج من الشعب يموت ابو طالب..

ليه ربنا يخلى أبو طالب يموت دلوقتي؟؟

لو كان أبو طالب فضل لحد ما النبي إنتصر, كان الناس قالوا إن النبي إنتصر بسلطان بشر!!...إنما النبي ما ينفعش ينتصر إلا بسلطان الله..


ليه يموت ابو طالب و خديجة دلوقتي يارب؟؟ خديجة كانت سنده جوه البيت و ابو طالب كان سنده بره البيت؟؟

عشان ما يبقاش ليه سند غيرك يارب..عشان ما يبقاش في قلبه غيرك...عشان التمكين خلاص قرب يا محمــد بن عبد الله..

* * * *

الرسول يسمع إن أبو طالب بيموت يروحله ويقوله : "يا عمّاه قل لا إله إلا الله, كلمة اشفع لك بها عند الله يوم القيامة"
و النبي خلاص قلبه هيتفطر...

يقوله: لولا أن تعيرني قريش لأقررت بها عينك!!

يُعيرك قومك؟؟؟ هتدفن تحت التراب يولع بيك قبرك وتقول تـُعيرك قريش!!! قريش هتنفعك بإيه؟؟؟


يجي أبو جهل بسرعة و يجي صناديد قريش أول ما يسمعوا إنه بيموت و الرسول عنده, يقولوله: مت على ملة عبد المطلب...مرعوبين أحسن أبو طالب لو أسلم بني هاشم كلهم هيسلموا!!....و آخر كلمة يقولها: بل على ملة عبد المطلب!!

و يموت كافر...ده قدر من عند الله...اللى يملك القلوب ربنا مش محمـد...محمد عبد, لايملك القلوب..

إزاى أبو طالب يموت كافر؟؟ بعدما حمى النبي الحماية الرهيبة دى و نصره بماله و مركزه؟؟؟
عارفين ليه؟؟

أول حاجة عشان كلمة : "لولا أن تـُعيرني قريش"!!

الناس...الناس هتعملك إيه؟؟..ياما ناس ضاع دينها بسبب منظري و إعتباري ووجاهتى و مركزي!!

تاني حاجة بسبب ابو جهل اللى كان صاحبه...الصحبة السوء ضيعت أبو طالب...الصحبة السوء خلت مصير أبو طالب في الآخرة في بركة نار في جهنم تغلى منها دماغه...يسيل مخه على رجليه و العياذ بالله...خلته يلبس نعلين من نار في جهنم..

عشان الناس تعرف إن الصحبة السوء يا جماعة دى قضية مصير...اصحابك دي قضية مصير...دى قضية جنة أو نار...دي قضية إنتى عايزة ربنا ولا مش عايزة ربنا...

أبو طالب يضيع و يدمر مصيره بسبب صحبة السوء و الناس هتقول عليا إيه!!!

* * * *
يموت ابو طالب عميد بني هاشم و تطلع مخالب قريش و تتحول قريش لوحش رهيب مع رسول الله صلى الله عليه و سلم..

و يصدر قرار بطرد فوري لمحمد بن عبد الله من مكة....طب اروح بيتي أجيب دابة...لأ...طب يجيب أكل من بيته....لأ....طب يجيب مال من بيته...لأ

في عز الأحزان وفي عز موت الأحبة...

و يطلع الرسول...

و يطلع الرسول في رحلة من الرحلات التاريخية...في صحبة شمس الصحراء الحارقة وهو رايح وهو جاى....يطلع رسول الله 90 كيلو متر لحد الطائف تانى بلد في المركز بعد مكة...لوحده معهوش غير زيد بن حارثة...

يطلع النبي في شوال و خديجة لسه ميتة في رمضان...مافيش تراجع...مافيش إستسلام...مافيش توقف لأى سبب من الأسباب...

و يطلع على الطائف...متخيلين الآلام اللى كانت في طريق الطائف؟؟؟....آلالام جسمه وهو لوحده...و الجوع....و العطش...و الحر الرهيب...الآلام النفسية وهو مطرود من بيت الله الحرام...

وهو ماشي كل قبيلة يقابلها يدعوها إلى الله...وهو في الحالة دى عنده قدرة إن يتكلم لسه عن ربنا و يدعو إلى الله!!! الله أكبر!!!

يا فخرنا إنك رسولنـــــــــا

ولا قبيلة وافقت....ترفض...يدعو اللى بعدها...ترفض....يدعو اللى بعدها!!

ده انت لو كلمة واحد في الدين كلمة و كسفك تقعد طول اليوم مش قادر تشوف قدامك!!

الرسول أخيرا يوصل الطائف...و أول ما يوصل يروح للرؤساء بتوعهم و يبدأ يكلمهم...أول رئيس من رؤسائهم يقوله : أما وجد الله غيرك ليرسله!!!

يروح لواحد تانى يقوله: انا ما أكلمكش اصلا...إن كنت نبيا فأنت أعظم من أن أكلمك...و إن كنت كاذبا فأنت اقل من أن أكلمك!!!

9 أيام يلف على بيت بيت ...على نادي نادي...على مكان مكان...

و بعد 9 أيام يلموا الأطفال و الشباب السفيه و العبيد و يجروا ورا الرسول عليه الصلاة و السلام في مشهد يخلده التاريخ...بيحدفوه بالحجارة و يرضخوه بالطوب...و كل اللى على قلب النبي (يَا لَيْتَ قَوْمِي يَعْلَمُونَ)

و يزيد الألم...

* * * *
و ربنا يحنن عبد من العبيد في الطريق بتاع الطائف اسمه عداس يجيب للنبي قطف عنب و يقعده تحت الشجرة....النبي يجي ياكل يثني على الله ويقول بسم الله...

عداس يقوله : هذا الكلام لم اسمعه هنا ...فيقوله : "من أين أنت؟؟؟"

يقوله : من نينوى.

يقوله : "بلد أخي يونس"؟؟؟

يقوله: ما أعرفك بيونس؟؟؟

يقوله: "إنه نبي و أنا نبي"..

يقوله: أنت نبي!!..و ينكب عداس على رجل رسول الله صلى الله عليه وسلم يبوس في رجليه!!

رجليه النبي اللى مليانة دم من الرضخ بالحجارة!!...لما النبي يستحمل ضرب رجليه بالحجارة عشان الدعوة...ربنا يبعتله اللى يبوس رجليه!!


الرسول دلوقتي يا جماعة في أشد موقف مر عليه في حياته...

يرجع ماهوش عارف يدخل مكة...مطرود منا هنا...و مطرود من هنا..

[ابو عمر المصرى]

الحلقة الثانية عشر
**@** فإنك بأعيننا**@**
( رحلة الإسراء و المعراج)



الليلة مع رحلة الأفراح..

الليلة مع جايزة ربنا لرسول الله بعد رحلة الطائف..

اطلع يا حبيب الله لو كل البشر آذوك...شوف ملايكة السماوات هيفرحوا بيك قد إيه؟؟

اطلع يا حبيب الله شوف مُلك أمتك في الآخرة...شوف جنتك...شوف نهر الكوثر اللى هتسقي منه أمتك..

اطلع يا رسول الله لو في الدنيا مش عارفين مقامك...شوف اللى في السما عارفين مقامك إزاى..

و تبدأ التاريخية.....للعرش..

تبدأ الرحلة و النبي نايم في الحرم المكي...في عز عام الحزن....ينزل جبريل من فوق سبع سماوات على النبي في الحرم يشق صدره و يطلع قلبه يغسله بميه زمزم....ليه؟؟؟

لأنه هيطلع أعظم عبادة...المناجاة...مافيش بينه و بين الله إلا حجاب النور...عشان يستعد للطلوع في رحلة المعراج..عشان قلبه يستحمل اللى هيشوفه..


جبريل يجيبله البُراق عشان النبي يركبه...مخلوق يا جماعة خطوة رجله مد البصر...من البرق سرعته رهيبة!!

عشان تعرفي ربنا يقدر يحل مشاكل حياتك كلها في سرعة قد إيه؟؟؟

دلوقتي يا رسول الله هتطلع في السما..لكن الأول سيدنا جبريل ياخد النبي عليه الصلاة و السلم في رحلة الإسراء الأول للمسجد الأقصى..

يا جماعة هما رحلتين...رحلة من المسجد الحرام للمسجد الأقصى هدفها " إمامة الرسول في الأرض"...و رحلة من المسجد الأقصى لعرش الله هدفها " إمامة الرسول في السماء"..

ليه يارب المسجد الأقصى تودي النبي ليه؟؟؟

عشان ربنا يحمل الأمانة في رقبتنا..أمانة فلسطين و القدس في رقبتنا..

ليه يارب المعراج للعرش يكون من المسجد الأقصى؟؟

عشان ربنا يعرفنا قيمة القدس اللى احنا مفرطين فيها..قيمة فلسطين..

* * * *

النبي يركب البراق يروح للمسجد الأقصى, يربط البراق قبل ما يدخل!!...يربطه ليه هو هيهرب يا رسول الله؟؟؟

الرسول قمة الربانية و قمة الواقعية

و بعد كدة يصطف الأنبياء كلهم يا جماعة...مين اللى هيطلع يصلى بيهم إمام؟؟

جبريل يقول للرسول : تقدم يا محمـــد!!


الرسول يُذهل...أنا أؤم دول؟؟؟...أنا أؤم إبراهيم خليل الرحمن اللى ربنا خلى النار برد وسلام عليه..إزاى؟؟؟
أؤم عيسى كلمة الله اللى ربنا أحيا له الموتى ...إزاى؟؟
أؤم موسى اللى ربنا شقله البحر..كليم الله...إزاى؟؟
أؤم أعظم ملائكة السماوات...إزاى؟؟


و بعد ما خلص صلاة بيلتفت وراه... "فإذا النبيون أجمعون يصلون معي"...هو إيه اللى حصل ده؟؟

اللى حصل ده هو تسليم قيادة البشرية من الأنبياء جميعا لرسول الله...كل نبي سلم أمته للرسول...و الرسول سلم الأمم في رقبتنا يا جماعة...الأرض في رقبتنا ....عملنا إيه؟؟

يخلص الرسول الصلاة يفاجئ إن في ملك جاى يسلم عليه....الملك ده مين؟؟؟....ده مالك خازن النار!!

طب و إشمعنى خازن الله؟؟؟....لإن الرحلة دى تفريح لقلب الرسول عليه الصلاة و السلام...خازن النار لما يسلم على حد يبقى هيسلم منه...يبقى سلامة من عذاب الله و من النار يا رسول الله

* * * *
الرسول قبل ما يطلع السما جبريل ورّاه في المقابر بتاعت الناس مشاهد رهيبة...

شاف سيدنا موسى بيصلي في قبره يا جماعة...الرسول انبهر بقلب موسى..إيه الشوق لربنا ده؟؟

الرسول يشوف ناس في قبورهم ضوافرهم من نحاس...قاعدين يخمشوا وجههم و صدورهم..بيلطموا...بيقطعوا لحمهم!!
دول مين يا جبريل؟؟
هؤلاء الذين يأكلون لحوم الناس و يقعون في اعراضهم..

يا اللي الغيبة على لسانك دايما...اتقوا الله!!...هتقطعوا لحمكم تحت التراب..

الرسول عليه الصلاة و السلام يشوف ناس يتجبلهم مقاريض من نار...يتقرض بيها شفاههم و ألسنتهم..
دول مين؟؟

دول خطباء من أمتك يأمرون بالمعروف ولا يأتوه...كلمنجية...بتوع كلام!! مش بتوع تنفيذ!!

الرسول عليه الصلاة و السلام يشم ريحة رهيبة...الريحة دي إيه؟؟ قبر تحتنا؟؟

لا ده قبر في مصر...ده ريحة قبر ماشطة بنت فرعون و أولادها...

الماشطة اللى لما فرعون عرف إنها آمنت بالله أيام موسى..جبها هي و عيالها وجاب برميل زيت مغلي موقد عليه النار...هترجعي ولا لأ؟؟....قالتله "ربي وربك الله"...قام راميلها أول عيل من عيالها وهو بيجروه من إيديها...وقدام عينيها يحطوه في الزيت المغلي يرموا ابنها يدوب لحمه قدام عينيها...ياخدوا التاني...ها؟؟....."ربي و ربك الله".....و التالت و الرابع....لحد الطفل الرضيع...هترجعي ولا لأ؟؟.....ابنها محطوط على الزيت المغلى ...واقفة مش قادرة...ربنا يسيبها معقولة!!!

معقولة يارب هتسيبها بعد التضحية دى؟؟؟

يـُنطق الغلام يقولها: يا أماه اصبري...إنك على الحق..

و يترمى الغلام و تترمى الماشطة....و يتجمع عظمهم في كيس واحد من فرعون...يدفنوا في حتة في مصر الله اعلم بيها...

يشم الرسول النهاردة ريحة الماشطة ليه؟؟؟

لسه حزين على سمية يا رسول الله اللى قتلها أبو جهل؟؟....لسه حزين على ياسر اللى إتقتل من غير دية...لسه حزين على شهداء الإسلام يا رسول الله؟؟؟

* * * *
يا رسول الله يلا...المعراج هيبدأ...رحلة السماوات هتبدأ يا جماعة...

اركب البـُراق يا رسول الله...

[ابو عمر المصرى]

الحلقة الثالثة عشر
**@** من يبايع رسول الله**@**
( بيعة العقبة)




ينزل النبي عليه الصلاة و السلام من رحلة المعراج...بعد ما شاف عبادة الملايكة في السماوات...وكل همه إن أمته تعبد الله في الأرض كما تعبده ملائكة السماء...

ينزل النبي بعدما شاف الجنة...و كل همه ماحدش من أمته يتحرم من الجنة....ينزل النبي بعدما شاف حجاب النور...و كل همه إن أمته يتكشف لها حجاب النور و تنظر لوجه الله سبحانه و تعالى..

ينزل النبي وكل همه في الـ 3 سنين الجايين دول إنه يلاقي حد ينصر الدين...

من يبايع رسول الله؟؟

الدعوة وقفت خلاص يا جماعة...ماحدش راضي يخش الإسلام...و ماحدش راضي يسمع عن الإسلام.... و التشويه الإعلامي ضد النبي و الصحابة بقى رهيب في جزيرة العرب...

لو انت مكان الصحابة و القبائل سنة 11 مكية في عز الأزمة....هترضى تبايع رسول الله؟؟؟؟

يا أمة محمد من يبايع رسول الله إنه يعيش حياته عشان قضية فلسطين؟؟؟

من يبايع رسول الله إنه يموت شهيد على اعتاب الأقصى بإذن الله؟؟

من تبايع رسول الله إنها تربي أولادها يطلعوا زى الصحابة؟؟؟

من يبايع رسول الله إنه يسخر مواهبه و طاقاته و حياته لنصرة دين الله؟؟؟

يبذل الرسول مجهود رهيب في (منى) في مواسم الحج بتاعة الجاهلية...و العرب كلهم موجودين....النبي كان آخر واحد بيسيب (منى) يا جماعة بعدما كل الناس تمشي و كل الناس تعزل

النبي لما مايلاقيش حد يكلمه....خلاص يمشي صلى الله عليه و سلم


أبو لهب يا جماعة كام بيمشي ورا النبي في كل مكان...وكان عنده 65 سنة و مع ذلك هيموت عشان النبي ما ينتصرش...أبو لهب يا جماعة بذل مجهود قاتل...كان هو و ابو جهل بيبدلوا نبطشيات في اسواق (منى) عشان النبي ما يبقاش ساعة لوحده يدعو الناس وهما مش موجودين...

حاسين إن الإسلام لو طلع وجودهم هينتهي تماما!!

واحد يقول رأيت رسول الله في (منى) يمر على قبيلة قبيلة وهو يقول: "قولوا لا إله إلا الله تفلحوا"...فمنهم من حثا على رأسه التراب...و منهم من بصق في وجهه...و منهم من سبه سبا شديدا...حتى انتصف النهار..

و الرسول مكمل ما بيقفش...و تنزل سورة يوسف اللى إتظلم من القريب قبل الغريب...اللى اتظلم من إخواته زي النبي ما اتظلم من أعمامه..و بعد كدة ربنا مكـّن ليه!!

* * * *

وبعد كدة ندخل في مرحلة خطيرة جدااا...العرض على القبائل...النبي دلوقتي يا جماعة هيلف على 26 قبيلة...النبي يبذل مجهود رهيب...يروح لبني حنيفة عشان ينصروه و يبايعوه....يردوا عليه أقبح رد رده العرب!!

يروح لقبيلة عشان يبايعوه...رئيس القبيلة ينزغ الدابة بتاعة النبي...يقع النبي على الأرض عليه الصلاة و السلام يتلوى من الألم و الكفار واقفين يضحكو حواليه...

أكتر حاجة باهره الواحد في النبي...إن النبي ما وقفش...ماكانش في حاجة بتوقفه...مشاكل أو إعاقات منزلية...

و تنزل سورة النحل...اللى من اسمها عن النحل اللى بيلف على ألف زهرة عشان يجيب معلقة عسل صغيرة...أوعى يا محمـــد تبطل...طوف على ألف قبيلة...أوعى تنام....لف على الدنيا كلها عشان توصلهم الشفاء...توصلهم الشرع...توصلهم الدين و الإيمان و القرآن...

الكل رفضك يا رسول الله ليه؟؟؟...مش عشان مش مقتنعين عشان خايفين...إحنا مش قد ابو جهل و ابو لهب...إحنا مالنا بالمشاكل و إحنا مالنا بوجع القلب!!

كل القبائل دى ندمت بعد كده!!!...كل القبئل دى يا رسول الله هتجيلك في عام الوفود بعد فتح مكة...عشان تـُسلم على إيديك..

* * * * *

في آخر يوم في (منى) وخلاص الناس بتمشي....النبي عليه الصلاة و السلام يلاقي ستة شباب واقفين اكبر واحد فيهم عنده 21 سنة....آخر يوم في منى و الناس بتعزل و الناس بتمشي خلاص....ما تيأسوش يا أمة محمـــد ما تعرفوش الفرج هيجي إمتى!!

الرسول يبدأ يكلمهم...أول مرة يشوف الإنطباع اللى على وجههم ده...أول مرة يشوف الإشراق اللى على وجوههم لما سمعوا....النبي يحس إن دول فيهم أمل!!

6 من المدينة المنورة....فما قاموا إلا وقد اسلموا و بايعوا رسول الله...

أخيرا يا جماعة جات اللحظة اللى النبي بقاله 13 سنة بيدور عليها..