ملخص حلقات لماذا محمد ... متجدد ان شاء الله

[ابو عمر المصرى]

برنامج *@* لماذا محمـــد ؟؟ *@*
صلى الله عليه و سلم

للشيخ د/ حازم شومان

الحلقة الأولـــــى
**@** لماذا محمــــد ؟؟ **@**

لماذا محمد؟؟
لماذا محمد؟؟

السنة دى و طول الشهر هنعيش مع الشعار ده
"لماذا محمد؟؟"

عليه الصلاة و السلام

و أنا عايز لسانك ما يبطلش "عليه الصلاة و السلام"

كان أطيب واحد مشي على وجه الأرض..أحكم واحد مشي على وجه الأرض...أطهر قلب مشي على وجه الارض ...أرحم واحد مشي على وجه الأرض

يا جماعة حنتكلم عن أكتر واحد ربنا حبه في الكون ..هنتكلم عن أحب حبيب إلى الله سبحانه و تعالى..هنتكلم عن من أهتز العرش لموت واحد من تلامذته أمال هو مقامه عند ربنا إيه؟؟

سيدنا

محمد صلى الله عليه و سلم كام واحد نجا من النار بسببه؟؟ كام واحد دخل الجنة بسببه؟؟

أي واحد عايز يبقى غني بيهتم بالسيرة عشان يعرف يبقى غني إزاى..
اي واحد عايز يبقى مخترع يهتم بسيرة المخترعين ..
عايز يبقى عظيم يهتم بسيرة العظماء

طب اللى عايز يوصل لربنا؟؟ اللى عايز ربنا يحبه و عايز يوصل للفردوس الأعلى.....يهتم بسيرة الرسول عليه الصلاة و السلام قد إيه؟؟


لماذا

محمــد؟؟

ليه هو اللى ربنــا اختاروه؟؟ ليه هو أحب حبيب إلى الله؟؟
ليه هو عليه الصلاة والسلام أكبر نعمة ربنا إدهالنا في حياتنا كلها؟؟

ليه بنتكلم عن سيرته دلوقتي؟؟
ليه هو اللى الكون كله بيحبه و بيصلي عليه _عليه الصلاة و السلام_؟؟


يا جماعة لو كان ربنا إختار كسرى أو قيصر كان نص العالم دخل في الإسلام في أسبوع واحد!!

ليه ربنا يختار

محمــد الشاب الفقير اليتيم الوحيد اللى قاعد على رأس جبل مهجور في غار مهجور و قاعد بالأيام و الليالي ذوات العدد؟؟

كان في مئات الملايين على وجه الأرض؟؟ ليه هو ده؟؟ أشمعنى هو ده؟؟

يا جماعة النبوة وهب مش كسب..يعنى مش أي حد هيقعد على جبل يعبد ربنا حيبقى نبي؟؟

بس إيه اللى كان فيه مش موجود في الدنيا كلها؟؟


تدفعي كام وتشوفيه لحظة؟؟
تدفع كام و تقعد معاه ســاعة؟؟



تدفعي كام و تبقي معاه في الجنة؟؟ تعيشي معاه في الجنة في الآخرة؟؟

بتقولي تدفعي عمـــــرك؟؟


رسول الله صلى الله عليه وسلم يا جماعة إتباعه هو الطريق إنك تبقي معاه في الجنة؟؟

ولو ما مشتش في طريقه خلاص يبقى إنت مش عايز تبقى معاه..


اسمعوا الحديث الخطير ده:
"المرء مع من أحب"
الراوي: عبدالله بن مسعود المحدث: البخاري - المصدر: الجامع الصحيح - الصفحة أو الرقم: 6168
خلاصة الدرجة: [صحيح]

يعنى لو حبيناك يا رسول الله هنبقى معاك في الجنة؟؟

يعنى الحديث ده مغتاح الفردوس الأعلى؟؟


مين المخلوق اللى حبك ليه يخليك في الفردوس الأعلى غير رسول الله؟؟

"ذاق حلاوة الإيمان : من كان الله ورسوله أحب إليه مما سواهما"
الراوي: - المحدث: ابن تيمية - المصدر: مجموع الفتاوى - الصفحة أو الرقم: 10/646
خلاصة الدرجة: صحيح



يعنى حب الرسول هيغير كل شيء في حياتك...

ما تحبهوش إزاى و أنت لولاه كنتي بقيتي فحمة في جهنم!!

ما تحبهوش إزاى وأنت لولاه ماكنتش عرفت طريق الجنة!!

ما تحبهوش إزاى وهو أتعرض عليه الماك و المال و المركز عشان يتخلى عنك و يسيبك ومرضاش أنه يسيبك و يتخلى عنك!!

ما نحبهوش إزاى و هو أحب مخلوق إلى الله..
ما نحبهوش إزاى و كل شيء في الدنيا حبه..


ليه هو أعظم شخصية في الدنيا؟؟

ليه الغرب و العالم كله أجمع إن رسول الله هو أعظم شخصية في العالم كله ؟؟

مين اللى يبقى من النبي عليه الصلاة و السلام في الجنة...اللى سهروا على روايات هاري بوتر ولا اللى سهروا يقروا سيرته؟؟

اللى سهروا يتفرجوا على المغنين و المسلسلات ولا اللى سهروا يقتدوا بسنته في قيام الليل بين إيدين ربنا؟؟


عايزين نبقى صحابة للرسول صلى الله عليه و سلم بس ما شفناش الرسول..نجي نقوله كنت أصحابك يا رسول الله ...كنا وراك خطوة بخطوة بس احنا ما عشناش معاك؟؟
عليه الصلاة و السلام

سلسلة السيرة بتدي أمل للجميع..
بتدي أمل للأمة المحطمة إنها تقوم من جديد و توصل لربنا سبحانه و تعالى..

[ابو عمر المصرى]

الحلقة الثانية
**@** حنــــــان الحبيب **@**



أنا عايز أكلمك النهاردة هو حبك قد إيه!!

عايز أكلمك إن أكبر حب حبه مخلوق لمخلوق هو الحب اللى الرسول حبه ليك!!!


ممكن مايكونش هو أكتر واحد إنتى حبيتيه في حياتك...لكن إنتى أكتر واحدة هو حبك في حياته عليه الصلاة و السلام!!

و أنت أكتر واحد هو حبه في حياته عليه الصلاة و السلام..


بتحبه قد إيه؟؟
اللى قدم مليون برهان على إنه بيحبك...إنت قدمت كام برهان على إنك بتحبه؟؟

بتحبه قد إيه؟؟
اللى ياما دموعه سالت عشانك إنت ...أنت كام مرة بكيت عشانه؟؟


أنا نفسي حب الرسول يبقى مالى عليك حياتك..يبقى نفسك تشوفه في رؤية قبل ما تموت ....عليه الصلاة و السلام.


ما أشتقتلوش!!!
ما وحشكيش!!
مش نفسك تقعد معاه عليه الصلاة و السلام!!


أنا حكلمك النهاردة عن حنــان النبي
عن موقعك في قلبه كان عامل إزاى
حكلمك عن حنان النبي مش رحمته....الرحمة ممكن على المسكين إنما الحنان ده أم و أب على ابنهم..


حنانه في زوجاته يا كل واحدة نفسك في زوج حنون
حنانه بالجماد
حنانه باللى آذوه و اللى ظلموه
حنانه بالعصاه و المكسورين
حنانه بكل فقير و كل يتيم و ضعيف


* * * * *

أول حاجة حكلمكم عنها حنــــــــانه بالجماد ..

النبي عليه الصلاة و السلام في خطبة الجمعة..الصحابة عملوله منبر ...النبي طلع و القبائل اللى حوالين المدينة و الصحابة كلهم إلتفوا حوالين النبي عليه الصلاة و السلام على المنبر ...النبي إبتدى يتكلم عن الدين و نصرة الدين و يتكلم عن ربنا و الكل إنفعل معاه و الكل منصت معاه..

و فجأة!!

يسمعوا صوت حد بيتألم ..في صوت بكاء في المسجد .في صوت ألم في المسجد

و قدام كل الصحابة ينزل الرسول صلى الله عليه وسلم من على المنبر.. ويقطع حاكم الدولة الخطبة بتاعته من على المنبر و ينزل !!


و يفاجئوا إن الرسول راح على جزع الشجرة اللى كان بيخطب عليه قبل ما المنبر يتعمل و يحضنه رسول الله...أول ما الرسول يحضن الجزع ...الجزع يكسن تماما ..

اللى كان بتالم من شوية هو الجزع؟؟؟


الرسول عليه الصلاة و السلام يقولهم : "والله لولا أني إلتزمته لظل يبكي إلى يوم القيامة "
وفي رواية "لظل يحن إلى يوم القيامة"



الجزع إشتاق لرسول الله ......و انت ما أشتقتلوش!!
الجزع بكى على فراق رسول الله .......و أنت بكائك على فراقه قد إيه!!


و المشكلة مش إن الجزع يحن على النبي أو يبكي على النبي ...لكن المشكلة إن النبي يحن للجزع !!

رسول الله ...حاكم الدولة... قائد الأمة..يسيب منبر الجمعة و ينزل عشان جمـــــــــــاد؟؟


* * * * *

زى ما كان في سفريه عليه الصلاة و السلام و كان فيه عصفورة صغيرة ولدت فرخين ...الصحابة خدوا الفرخين بتوعها ..قعدت ترفرف
النبي عليه الصلاة و السلام قالهم : " من فجع هذه بولدها , ردوا إليها ولدها "

حنــــــــــــانه بعصفور يا جماعة ..كأنهم ولاده مش ولادها عليه الصلاة و السلام.

* * * * *

أن عايز أكلمك النبي بكى عشانك قد إيه؟؟

دموع النبي سالت عشاننا قد إيه؟؟...لما كان ليلة كاملة من العشاء للفجر قاعد يصلي و يبكي 10 ساعات ..يصلي و يبكي

و يدعيلك أنت..و يدعيلك أنتي لما قرأ قول الله "إِن تُعَذِّبْهُمْ فَإِنَّهُمْ عِبَادُكَ " (المائدة : 118)
فضل يبكي و يدعي ربنا إن ربنا يرحمنـــا

أبوكي ما عملهاش معاكي ..أحب حبيب ليك في الدنيا ما عملهاش معاك ..


* * * * *

أنا عايز أكلمك عن حنــانه بكل مذنب و عاصي و مكسور


النبي عليه الصلاة و السلام قاعد في المسجد و الصحابة حواليه بيتكلموا عن ربنا و عن الآخرة و عن الجنة...و الكل منفعل و الكل قلبه في السما

فجأة...


يدخل شاب فجأة يرمي قنبلة...شاب يدخل يقول يا رسول الله ..فالكل يتلتفت إليه ...ائذن لي في الزنــا ؟؟؟

زنـــــــــا؟؟

ده لو راح قالها لأبوه أبوه يقتله...
ده لو واحد طلع لخطيب الجمعة يوم الجمعة و قاله الكلمة دى الناس ترميه بره الجامع!!!


تخيلوا يا جماعة...كل الناس إتلفت حواليه...إبعد من عندنا ..ابعد من وسطنا مش عايزينك معانا


الرسول عليه الصلاة و السلام ما قلوش إبعد..الرسول قاله : "ادنو" ...قرب...قرب مني

الرسول عايز يقربك...الرسول عايز يضمك...الرسول عايز يوصلك لربنا سبحانه و تعالى


الرسول قاله كلمة بتتفجر بطوفان حنان " قرب مني"

مش نفسك تسمعي الكلمة دى من رسول الله؟؟

مش نفسك تسمعها منه و أنت على الحوض يوم القيامة؟؟

نفسنا يا رسول الله

كل أمتك محتاجين الكلمة دى منك يا رسول الله

"قرب"


الشاب ده مشكلته إية؟؟؟ الشاب ده من كتر المعاصي قال أنا لا يمكن أتغير ..

رايح للنبي يقوله يا رسول الله أنا لا يمكن أتغير..


الحل الوحيد يا رسول الله عشان أدخل الجنة مش إني أنا اللى أتغير...الحل الوحيد إن الدين هو اللى يتغير !!!

أمال إنت جاي ليه؟؟؟


جاي لإني مش قادر..جاي لإني خايف من ربنا سبحانه و تعالى ...مهما عصيته خايف منه ...


الشاب ده يا جماعة في دقيقة واحدة مع رسول الله صلى الله عليه و سلم

بضمة واحدة من رسول الله صلى الله عليه و سلم


الشاب ده يا جماعة خرج بقى طاهر القلب ناسي تماما أي حاجة تتعلق بالزنا...


ليه؟؟ النبي أقنعه ؟؟؟


لا يا جماعة مش بس كده...لأنه فوجئ إن في حد بيسمعه ...

فوجئ إن النبي بيحبه كل الحب الرهيب ده

ما كانش متوقع إن في حد بيحبه للدرجة دي.. إن في حد مش هيحتقره و هيحتقر مشكلته

و إن في حد هيقربه منه ...

[طارق سرور]

معك متواصلين أخى أبو عمر

بارك الله فيك أخى

[نور]

اللهم اسقنا من حوض الحبيب
شربه هنية لاظمأ بعدها ابدا
سلمت اخى
ابوعمر
ننتظرك ورحيق لاينضب
جزاك الله خيرا

[ابو عمر المصرى]

جزيتم افردوس الاعلى
مروركم شرفنى
هنأكم الله بالقبول
واسكنكم الجنة مع الرسول

[ابو عمر المصرى]

الحلقة الثالثة
**@** آلام الحبيب **@**



مهما تخليت .. مهما تصورت ...هو استحمل عشانك إيه؟؟ هو عمل عشانك إيه؟؟ هو صبر عشانك على إيه؟؟ شاف عشانك إيه؟؟

ماحدش مننا حيقدر يتخيل أو يتصور يا جماعة

لو في يوم من الايام بإذن الله ربنا دخلك الجنة... و أنت بتسكن في قصورها و بتشرب من أنهارها و بتتنعم بنعيمها

أفتكر إن ورا النعيم ده واحد حرم نفسه من نعيم الدنيا عشان نعيم الآخرة بتاعك!!

أفتكر إن ورا النعيم ده واحد استحمل اللى الجبال ما تستحملوش عشان انت تتنعم في الجنة!!!


إن ورا النعيم ده واحد حياته كانت سلسلة من الآلام ..


لو في من الأيام حسيت إنك فرحان إنك مسلم و بتفتخر قدام الدنيا إنك مسلم ...افتكر إن ورا إسلام واحد ياما إتأذى و ياما استحمل شاف عشان أنت تطلع مسلم النهاردة..


أوعوا تنسوا يا جماعة إننا لسه ما دفعناش حاجة من التمن اللى احنا خدناه!!


احنا لسه اللى النبي ادهولنا ما ادنالوش حاجة قصاده..لسه ما قدمنش حاجة من اللى إتقدم لينا..



أنا النهاردة حكلمك إنتي خدتي قد إيه ..عشان تعرفي إنت قصداه محتاجة تدفعي قد إيه؟؟؟


* * * * *

كلنا بنقعد نقول النبي خرج بدر النبي خرج أحد النبي راح الخندق... ماحدش مننا فكر بيته كان شكله إيه وهو خارج بدر؟؟
كان في أكل في بيته ولا لأ و هو خارج الخندق؟؟


ماحدش مننا فكر إن وهو خارج بدر كانت رقية بنته بتموت من المرض...و يوم ما انتصر في بدر كان ساعة موت رقية بنته..و أدفنت قبل ما يرجع المدينة و يشوفها عليه الصلاة و السلام..


ماحدش فكر و النبي خارج لأحد كانت بيوت النبي مافيهاش طعام اصلا

ماحدش فكر الآلام اللى عاشها رسول الله و استحمل عشانك إيه؟؟؟

* * * * *

النبي يا جماعة كان عنده 8 اولاد مات منهم 7 في حياته!!! ده لو واحد مات عيل من عياله بيعيش حياته كلها محطم ...

تخيلي أحن قلب عليه الصلاة و السلام

افتكري ضحى عشانك قد إيه؟؟؟


لما روح بيته وكان جعان لقى مافيش في البيت غير خل...قعد يغمس الخل و يقول: " نعم الإدام الخل"!!!

* * * * *


اوعى تنسى الإبتلاءات اللى النبي أبتليها و مع ذلك عمره ما إتعطل بيها عن الدعوة...

إبتلاءات اللى لو نزل على واحد منا واحد في الألف منها ممكن حياته تقف....لكن مافيش حاجة عطلته عنك


النبي عليه الصلاة و السلام يبدأ الإبتلاء في حياته وهو جنين في بطن أمه و ابوه يموت .... عمره ما يقول كلمة : "ابـــي"


يجي وهو عنده 6 سنين أشد إبتلاء في حياته... تموت أمه قدام عينيه ... وهو خارج هو و أمه و أم أيمن الحاضنة بتاعته راجعين من المدينة المنورة بتزور قبر ابوه و بتزور أخواله...

و يدفنها هو و أم أيمن في الأبواء..

مافيش حد حبه إلا و مات...

حب أمه... أمه ماتت
حب جده....جده مات
حب خديجة احب زوجة ليه من زوجاته ....ماتت...ماتت متأثرة بالمجاعة اللى كانت في شعب ابي طالب بعدما خرجت من المجاعة..


النبي يا جماعة ماكانش من غير قلب الإبتلاءات دى عادى عنده...لأ..دى كانت أشد من الإبتلاءات اللى بتمر علينا

* * * * *

و مع ذلك مافيش يوم إتعطل عنك

خديجة تموت...يطلع على الطائف عشان ينقذني و ينقذك

إبراهيم ابنه يموت....يخرج يعلم الصحابة دينهم

ابن بنته بموت و تبعتله عشان يجي يشوفه مايرضاش....لأنه قاعد مع الصحابة بيعلمهم...عشان يجوا يعلموا اللى بعدهم و اللى بعدهم...عشان في الآخر إحنا نتعلم و ندخل الجنة بإذن الله

* * * * *

أنا مش عارف إزاى يـُحتمل موت مصعب... ده لو واحد زرع زرعة لمدة سنة و رواها و جي حد قطعها قلبه بيتقطع معاها..

النبتة اللى النبي بقاله 15 سنة بيربي فيها...يلاقيه في لحظة متقطع بين إيديه..

* * * * *

طب ليه الإبتلاءات دى كلها؟؟؟


عشان ربنا يورينا النبي بيحب ربنا قد إيه ... رغم كل الإبتلاءات دى قلبه مليان حب لله..و مليان أمانة في الرسالة وجهد
عليه الصلاة و السلام

النبي عليه الصلاة و السلام يبدأ يشتغل في الدعوة و يقول :
" لقد أخفت في الله وما يخاف أحد . ولقد أوذيت في الله وما يؤذى أحد . ولقد أتت علي ثلاثون ، من بين يوم وليلة ، وما لي ولبلال طعام يأكله ذو كبد إلا شيء يواريه إبط بلال"

تخيلوا استحمل جوع قد إيه

* * * *

النبي في عام الحزن لما قام عقبة بن ابي معيط اللعين و النبي ساجد لله و بيصلي لله عند الكعبة و يقوم ماسك الثوب بتاعه عقبة و يقوم لفه حوالين رقبة النبي و يشد الثوب و يخنق في رسول الله ...و أهل مكة بيتفرجوا و فرحانين و بيشجعوا عقبة ...

و النبي عليه الصلاة و السلام وشه يحمر...ثم يسقط مغشيا عليه رسول الله صلى الله عليه وسلم

يسقط لركبتيه مغشيا عليه و عقبة مصمم يفضل شادد في الثوب عشان يقتل النبي..

و يجب أبو بكر الصديق يجري و يشد عقبة و يقول : " أتقتلون رجلا أن يقول ربي الله"

يمسكوا أبو بكر يفضلوا يضربوا فيه لحد ما يخلوا وشه و ضهره دم ماحدش عارف وشه من ضهره!!

* * * *

قبل كدة يدخل الشعب.. بناته يكلوا ورق الشجر قدامه و فاطمة عندها 12 سنة طفلة....و صحابه يكلوا جلد البعير.... و هو نفسه بياكل ورق الشجر عليه الصلاة و السلام


يطردوه من مكة يمشي 90 كيلوعلى رجليه على جمر الصحراء لحد ما يوصل للطائف ...يوصل للطائف يطردوه بعد 10 أيام بالحجارة لغاية ما يرضخوا رجليه بالدم بالحجارة

يخرج من الطائف....مطرود من مكة و مطرود من الطائف

يروح فين حبيــــب الله


يرفع إيده لربنا و يقول : " اللهم إليك أشكو ضعف قوتي "
ماعدش قادر أعمل حاجة أكتر من كدة يارب ...ده آخري يارب

" وقلة حيلتي"
اعملهم إيه عشان يسمعوا عنك يارب

[ابو عمر المصرى]

الحلقة الرابعة
**@** أخلاق الرسول **@**



أكبر مدرسة للأخلاق في العالم هي السيرة

أخلاق رسول الله أخلاق تاريخية ...ماحصلتش قبله ولا هتحصل بعده..

أخلاق رسول الله أذهلت العالم ..من أول ما النجاشي راحلوه جعفر بن ابي طالب في هجرة الحبشة و كلمه عن أخلاق الرسول

إنبهار النجاشي بأخلاق الرسول

و يخر خاضعا و يشهد أن لا إله إلا الله و أن محمدا رسول لله !!!

ملك يدخل في الإسلام بسبب أخلاق رسول الله..

وكانت من اول ثمار أخلاق النبي عليه الصلاة و السلام..

* * * *

في جنوب شرق آسيا لما التجار المسلمين راحوا يتجاروا بعد الإسلام
فبقى التاجر يفرش البضاعة بتاعته فيجي واحد يقوله: دي بكام؟؟
يقوله : بكذا..
يقوله : عايز أشتري
يقوله: إشتري من أخويا اللى جنبي!!
يقوله : في حد يجوا يشتروا منه يقولهم اشتروا من اللى جنبي؟؟؟
يقوله: انا النهاردة بعت و أخويا لسه ما بعاش!!!!!!!!!!

و النبي بتاعنا بيقولنا : " لا يؤمن أحدكم حتى يحب لأخيه ما يحب لنفسه"

الراوي: أنس بن مالك المحدث: البخاري - المصدر: صحيح البخاري - الصفحة أو الرقم: 13
خلاصة الدرجة: [صحيح]


الناس إبتدت تنبهر ..مين النبي بتاعهم ده...و إيه الإخلاق اللى عمرنا ما سمعنا عنها دى؟؟؟ مين محمـــد؟؟ عايزين نعرف محمـــد؟؟


و لما عرفوا محمد كانت الثمرة 200 مليون مسلم في إندونيسيا ...200 مليون مسلم في الهند ... 120 مليون مسلم في بنجلاديش .. 80 مليون مسلم في باكستان

* * * * *

لو رسول الله شاف دلوقتي المرأة اللى أمها بقت قعيدة الفراش و بتقضي حاجتها في الفراش... دخلت عليها مرة لاقيتها قضت حاجتها في الفراش مش قادرة تتحكم في نفسها ...راحت جابت مية مغلية كبتها عليها...ماتت أمها

قتلت أمها !!!

لو الرسول شاف أخلاق الأمة دلوقتي؟؟؟

حيقول إيه عليه الصلاة و السلام؟؟


يا جماعة الفروض لما المستشفيات مليت الدنيا عيادات الدكاترة تبقى فاضية!! إزاى تروح للدكتور المستشفى يعاملك أسوء معاملة و لما تروحله العيادة يشيلك على راسه؟؟؟


إحنا يا جماعة ربنا تعبدنا بصلاتين مش بصلاة واحدة...صلاة جوه الجامع وصلاة بره الجامع....صلاة جوه الجامع بين إيديه ....و صلاة بره الجامع اللى هي مهناتنا اللى هى الأمانة اللى هي الأخلاق اللى هي المعاملات!!!


صلاتنا التانية يا جماعة عملنا فيها إيه؟؟؟

عايزين نقتدي بالرسول جوه الجامع و بره الجامع...

مش في الشكل بس و كمان في الأخلاق..

عليه الصلاة و السلام..

* * * * *

لما دخل الرسول فتح مكة.. و أبو سفيان واقف هيتعمل فيه؟؟؟ كان أقصى حلمه إن النبي ما يقتلوش ..فإذا بالرسول يقول:
"من دخل دار أبو سفيان فهو آمن "

و يديله 100 ناقة = مليون و نص

وهو داخل سعد بن عـُبادة شايل الراية فبيقول: اليوم يوم الملحمة, اليوم تـُنتهك الحرمات

الرسول قال: " لا..بل اليوم يوم المرحمة " و نزع الراية من سعد بن عـُبادة !!!

و دخل ...ووقف أهل مكة مبهوتين شاخصين الأبصار ...هيعمل فينا إية؟؟؟ هيقتلنا ولا هيعمل فينا إيه؟؟

أكبر معجزة من معجزات الإسلام !!! يوم دخول الإسلام مكة أعظم يوم للأخلاق و للرحمة !!


قارنوه مع دخول الصليبين القدس ..مع الـ 90 ألف واحد اللى إتقتلوا...مع ركب خيل الجنود اللى غاصت في دماء المسلمين ..مع جثث الأطفال اللى إتشوت يومها !!


يقول الرسول لأهل مكة و هما واقفين : " ماذا تظنون أني فاعل بكم؟؟ "

انتو ياما عملتوا فيا..ياما طردتونى ..ياما حبستوني ..ياما عذبتوني....ياما آذيتوني...انتو فكركم حعمل فيكم إيه النهاردة؟؟

يقولوله : أخ كريم و ابن أخ كريم

شوفوا الرسول يقولهم إيه عليه الصلاة و السلام : " لا أقول لكم إلا كما قال يوسف لإخوته, لا تثريب عليكم اليوم , إذهبوا فأنتم الطلقاء"


* * * * *

يشهد التاريخ إن أول واحد دعا لحقوق الأطفال قبل اليوناسيف بـ 1400 سنة هو محمــد بن عبد الله

لما كان خادمه أنس ..طفل صغير...كان لما يكلمه يقوله : "يا بني"!!
انت ابني...انت زى ابني ..10 سنين لا ضربه ولا شتمه ولا نقده ولا قاله أي حاجة تزعله

رسول الله ما ضرب بيده شيء قط...عمره ما ضرب طفل بإيديه رسول الله

* * * *
رسول الله أول من دعا لحقوق المرأة قبل منظمات التغرير بالمرأة ب 1400 سنة

عمر المرأة ما إتعاملت المعاملة اللى الرسول عاملهالها

رسول الله يا جماعة اقام حرب كاملة عشان امرأة مسلمة أهينت ...امرأة مسلمة أهينت في أسواق اليهود اقام حرب عـشـــان واحدة بس

عليه الصلاة و السلام

* * * * *

روح النبي كان جملية أوى يا جماعة

في وسط الحرب و الأذى ده تيجي واحدة ست تقوله يا رسول الله زعلانة من جوزي و بشتكي من جوزها
يقولها : " زوجك الذي في عينيه بياض؟ "

بياض يعنى اتعمي!! الست تترعب على جوزها و تجري ترجع تصالح جوزها بسرعة و تبص في عينيه الرسول قال إن في عينيك بياض؟؟

جوزها يقولها : يا حمقاء..هو في حد مافيش في عينيه بياض جنب السواد!!

[طارق سرور]

جزاك الله كل الخير عنه أخى ابو عمر

[ابو عمر المصرى]

أسعدني مروركم الرااائع
حــياكم الله

[ابو عمر المصرى]

الحلقة الخامسة
**@** صناعة محمــد(1) **@**





يا جماعة مافيش مدرسة على وجه الأرض ممكن تخرج نبي!!! مافيش معهد على وجه الأرض ممكن تطلع نبي!!!

مافيش حد يقدر يصنع نبي إلا الله سبحانه و تعالى

إزاى ربنا أعد اللى هيشيل الدين في الأرض؟؟
إزاى ربنا أعد اللى هيربي اللى هيشيلوا الدين ليوم القيامة؟؟

إعداد النبي بدأ إمتى؟؟؟

في ناس هتقولك هنبدأ من أول بعثة النبي... و ناس تقولك لا هنبدأ من أول ولادة النبي..

لا يا جماعة...إعداد النبي بدأ من أول ما آدم نزل على الأرض ...من أول ما ربنا أخذ العهد و الميثاق على كل الرسل (لَتُؤْمِنُنَّ بِهِ وَلَتَنصُرُنَّهُ)


البشر الوحيد اللى سيرته بتبدأ من قبل ميلاده بآلاف السنين النبي عليه الصلاة و السلام


* * * *

أول حاجة إزاى ربنا أعد محمد نفسه عليه الصلاة و السلام :


خدي بالك ..كل حدث حصل لرسول الله من يوم ما إتولد لغاية ما بُعث كله له دور في صناعة النبي..النبي إترتبله من فوق 7 سماوات يا جماعة...


قبل ما الرسول يتولد كان فيه أسباب كتير تخليه يموت أو ما يتولدش أصلا عليه الصلاة و السلام...قبل ما النبي يتولد بأيام أبرهة جيه يغزو الكعبة و كان هيقتل كل اللى في مكة وكانت أمه حامل فيه في الشهر الثامن و كان خطر رهيب..


أهل مكة كلهم يهربوا للجبال و يسيبوا مكة فاضية و ماعدش فيه أي حاجة بين أبرهة و بين الكعبة.. ربنا هيسيب دينه؟؟؟؟

لما كلهم إتخلوا عن بيت الله...ربنا هيسيب دينه؟؟؟؟....ربنا نزل عليهم طير أبابيل بقت تقطع من أجسادهم و ينهزم أبرهة و ينجو رسول الله حبيب الله.


* * * *

المرة التانية لما جده ماكانش بيخلف و نذر إن لو ربنا إداله 10 ولاد هيدبح واحد منهم لربنا... وكان بسبب جهل الكهان اللى هيدّبح هو عبد الله أبو النبي!!

ولكن يُفتدى بـ 100 ناقة

* * * *

يخرج عبد لله عشان يتاجر في المدينة المنورة يـُصاب بمرض شديد جدا أثناء السفر و يموت في المدينة و يدفن هناك...يموت بعد شهرين من حمل آمنة بالنبي!!

و يجي معاد ولادة النبي عليه الصلاة و السلام ..

كل أهل مكة كانوا مستنين المولود اليتيم اللى ابوه مات وهو لسه جنين في بطن أمه..

@@يوم ما الرسول يتولد الدنيا يحصل فيها إيه؟؟@@

إيوان كسرى يتزلل و 14 شرفة من شرفات قصره يقعوا يتكسروا !!
نار المجوس تتطفي!!

يخرجوا لجده عبد المطلب يقولوله إنت ربنا رزقك بولد جميل زي القمر...هتسميه إيه؟؟؟
يقولهم هسميه محمـــد!!!

إيه؟؟ حتسميه إيه؟؟ إيه محمـــد دي؟؟؟يعنى إيه محمـــد؟؟ إزاى تسميه اسم مش موجود في الجزيرة كلها؟؟؟إزاى تسميه اسم ماحدش إتسمى بيه قبل كده؟؟؟

امه تشوف رؤية إنها تسميه محمد... و يصر جده إنه يسميه محمد...

* * * *
ليه النبي يطلع يتيم؟؟؟

عشان يعرف يعنى إيه يُتم...عشان يعرف يعنى إيه جوع...عشان يصعب عليه كل يتيم وكل فقير و كل محروم وكل غلبان
عشان يطلع طوفان حنان على البشر


ليه ابوه يموت؟؟

عشان ماحدش يعلمه الشرك...عشان يبقى النبي عليه الصلاة و السلام ماحدش رباه غير ربنا...ماحدش يبقى ليه منّه عليه في تربيته غير ربنا

طب ليه ما يبقاش ليه إخوات؟؟

لا الدنيا كلها كانت شرك ..لازم ابوه يموت و أمه تموت ومايبقاش ليه إخوات ...عشان ماحدش يعلمه الشرك خالص

ليه أمه آمنة بنت وهب؟؟و ليه تفضل 6 سنين قبل ما تموت؟؟

أمنة الشابة الجميلة اللى مارضتش تتجوز بعد جوزها و تخرج الرحلة عشان تزور قبر جوزها وهي بتموت من المرض و تموت في الرحلة...عشان العاطفة الرهيبة اللى كانت مالية قبلها تجاه جوزها...
عشان النبي يرضع الحنان من أمه ...عشان يطلع النبي بركان حنان على الأمة كلها

طب ليه ربنا يختاروله حليمة؟؟

يا جماعة الرضاعة بتغير في صفات الإنسان عشان كده الشرع إعتبرها زى النسب ...كل مرضعة كانت بترفضه ماكانتش هي اللى بترفضه ده كان ربنا هو اللى ما بيخترهاش..

لإن من اسمها كان عندها حلم ...لإنها كانت إنسانة رحيمة رغم فقر النبي عليه الصلاة و السلام خدته!!

* * * *
يا جماعة كل حاجة بتترتب ..النبي في بطن أمه و الدنيا بتترتب عشانه
و المكان اللى بيتولد فيه بيترتب و اللى هيرضع فيه

النبي بيترتبله كل شيء من رب البشر